PINAKIUSAPAN ng ride-hailing giant na Grab ang Land Transportation Franchising and Regulatory Board (LTFRB) na alisin sa master list nito ng transport network vehicle service (TNVS) drivers ang mga inactive na miyembro.

Sinabi ni Grab president Brian Cu na tinatayang higit sa 5 milyong tao ang magbo-book ng biyahe sa buong Metro Manila sa susunod na buwan.

Ang pag-alis sa mga inactive na TNVS drivers mula sa master list at pagpuno sa mga bukas na slot ang makakatulong upang siguruhing may sapat na biyahe anumang oras.

Nagtakda ng 65,000 cap ang LTFRB para sa mga TNVS drivers.

Ang Grab, ayon kay Cu, ay mayroong 45,000 na accredited drivers sa ngayon kahit 35,000 lamang ang tumatanggap ng bookings sa araw-araw.

Ramdam umano ang shortage noong nakaraang holiday season, kung saan nakakapagtala ng nasa 3 milyong bookings sa isang araw ang transport company.