Hindi matunton ng PBA ang may sala sa “luto” remarks.

Kaya naman nagbabala si PBA commissioner Willie Marcial sa lahat ng koponan na iwasan ang anumang hindi magagandang statement habang nasa laro.

Dahil sa oras na muling may lumabag, isang mabigat na parusa ang nakaabang sa salarin.

Bantay-sarado na ng PBA ang bawat anggulo ng court maging ng table official upang mabilis na mahuhuli ang sinumang lalabag sa patakaran.

Nagulantang ang lahat nang madinig sa telebisyon ang “‘Ref, lutung-luto to ah” habang nasa kasagsagan ng fourth quarter ang laban ng Meralco at Barangay Ginebra sa Game 3 ng best-of-three semifinals series noong Linggo sa Clark, Pampanga.

Itinanggi ni Meralco player Reynel Hugnatan na siya ang salarin.

Dahil walang matukoy ang PBA, palalampasin na lamang ito ng liga.

At sa oras na muling may lumabag, siguradong hindi na ito makalulusot sa parusa.

Sa kabila ng batang lineup, asahan ang isang palabang Gilas Pilipinas sa FIBA Asia Cup Qualifiers na aarangkada bukas sa Manama, Bahrain.

Bahagi ng program ng Samahang Basketbol ng Pilipinas (SBP) ang magpadala ng batang lineup sa mga international tournaments.

At naniniwala ang lahat na hindi bibiguin ng Gilas Pilipinas ang buong sambayanan dahil inaasahang lalabas ang bangis nito laban sa Thailand.

“Everybody is raring to go. Mga bata eh so I guess the energy, the passion of the youth. Tab (Baldwin) was saying it’s very inspiring to see these young men carry our flag in such a very unusual period of tournaments,” ani SBP president Al Panlilio.

Sa katunayan, isa ito sa pinakabatang lineup ng Gilas Pilipinas sa isang Asian-level tournament.

Subalit hindi ito basta-bastang Gilas Pilipinas dahil gigil ang bawat mi­yembro nito na patunayan ang kanilang kakayahan.

Pinakabeterano sina Isaac Go, Matt Nieto, Juan Gomez de Liaño, Kobe Paras at Dwight Ramos dahil dati na silang naging bahagi ng Gilas Pilipinas.

Kaya naman ibinahagi ng apat ang magandang karanasang kanilang natutunan sa Gilas Pilipinas sa kanilang mga bagong katropa.

Makakasama ng limang beterano ang baguhang sina Mike Nieto, Javi Gomez de Liaño, Rey Suerte, Jaydee Tungcab, Justine Baltazar, Dave Ildefonso, William Navarro, Calvin Oftana at Kemark Carino.

Baguhan sa international competition ngunit malalim ang kanilang karanasang natutunan sa college teams na inaasahang dala ng bawat isa sa qualifiers.