NASABAT ng mga opisyal ng Bureau of Immigration (BI) sa Clark Freeport Zone ang isang babae na biktima ng human trafficking na may pekeng pangalan.

Ang biktima ay pansamantalang hindi pinangalanan aklinsunod sa anti-trafficking laws, ay nagmula sa Cotabato ay tinangkang sumakay sa Qatar Airways flight No. QR 931 sa Clark International Airport at magtratrabahi bilang household service worker (HSW) sa Doha, Qatar.

Sa ulat nina Travel Control and Enforcement Unit (TCEU) Officers Johnel Badua at Marc Danes Diego, na ang biktima ay sumailalim sa primary inspection hanggang  secondary inspection pero nahalata ang pabago-bago niyang salaysay kung saan sinabi nitong 27 anyos na siya at mayroon na itong Philippine Overseas Employment Administration-accredited agency bilang isang HSW.

Pero sa kalaunan ay nabuking din ito hanggang sa aminin nito ang tunay na pangalan at 24-anyos lamang siya.

“These human traffickers go as far as providing their victims documents that assume the identity of others,” ayon kay BI Commissioner Jaime Morente.  “This has to stop.  They are taking advantage of our kababayan in the midst of a pandemic,” dagdag pa nito.

Ipinaliwanag ni Morente na ang mga nasabat na biktima ng human trafficking victims ay isinasanguni sa Inter-Agency Council Against Trafficking (IACAT) para maibestigahan ang kanilang recruiters at para sila masampahan ng kaso.

“We pray that cases of these victims push through so that those who victimize the vulnerable will find themselves facing the harshest penalties to finally end this modus,” ayon pa sa BI Chief. (GENE ADSUARA)

Isang Tsinoy na hindi na nagbayad ng kanyang hotel bills at nagwala pa , ang naaresto ng mga awtoridad sa isang hot pursuit operation na nagmula sa Quezon City at umabot pa sa Maynila, kahapon ng umaga.

Nakilalang ang nadakip na si Arvin Chua Tan, 46,  ng New Manila, Quezon City, na  kasaluku­yan nang nakapiit sa Kamuning Police Station 10 (PS 10) ng Quezon City Police District (QCPD).

Dakong alas-10:30 ng umaga nang maganap ang insidente sa isang hotel  na matatagpuan sa Timog Ave., Brgy. South Triangle, Quezon City.

Batay sa reklamo ni Catherine Pelaez Silva, 40, branch manager ng hotel, nabatid na dakong alas-11: 00 ng gabi ng Hulyo 12 ay nag-check-in sa kanilang establisimyento ang suspek.

Kahapon ay nag-check out umano ang suspek ngunit tumangging magbayad ng kaniyang bill. Nagulat pa umano ang mga staff ng hotel na sa halip magbayad ng bill ang suspek ay galit pa itong nanghihingi ng halagang P20,000 sa kanila sa hindi malamang dahilan at nagpakilalang empleyado ng DILG.

Kaagad namang rumesponde ang mga pulis ngunit sa kasagsagan ng komprontasyon ay mabilis na sumakay si Tan sa nakaparada niyang itim na BMW na nasa parking lot ng hotel, at saka ito pinaharurot palayo sa lugar.

Binangga pa umano nito ang nakaparadang mobile car ng mga pulis, maging ang NMAX motorcycle na sinasakyan ng isa pang alagad ng batas. Umabot pa ang ‘hot pursuit operation’ sa kahabaan ng Claro M. Recto Avenue, kanto ng Nicanor Reyes St., sa Maynila kung saan nakorner ang suspek at tuluyang naaresto.

Inihahanda na ng mga pulis ang mga kasong estafa, resistance and disobedience to a person in authority at multiple damage to property na isasampa laban sa kanya sa piskalya. (Gene Adsuara)