NANINDIGAN ang Malakanyang na walang hurisdiksyon ang International Criminal Court (ICC) sa Pilipinas.

Ang katuwiran ni chief presidential legal counsel Salvador Panelo, matagal ng kumalas ang bansa mula sa Rome Statute.

Tugon rin ito ni Panelo sa naging desisyon ng ICC na payagan ang imbestigasyon sa nangyaring pagpatay na kinalaman sa war on drugs sa bansa.

“Nilalabag nila ang ating karapatan, that’s interference into our domestic affairs,” ayon kay Sec. Panelo.

Matatandaang, opisyal na kumalas ang Pilipinas mula saRome Statute — tratado na nagtatag sa ICC — noong Marso 17, 2019.

Sa isang kalatas, sinabi ng ICC na pinayagan ng Pre-Trial Chamber 1 ang naging kahilingan ni dating Prosecutor Fatou Bensouda noong Hunyo 14 na imbestigahan ang krimen ng di umano’y nangyari sa Pilipinas sa pagitan ng Nobyembre 2011 at Marso 16 2019 sa tinatawag na ‘war on drugs’ campaign.”

Sinabi ng ICC na ang “specific legal element of crime against humanity of murder” ay sinasabing di umano’y nakita sa war on drugs sa panahon ng mula Hulyo 1, 2016 —isang araw matapos na manumpa sa tungkulin si Pangulong Rodrigo Roa Duterte bilang chief executive — hanggang Marso 16, 2019, isang araw bago pormal na kumalas ang bansa sa Rome Statute.

Giit ni Panelo, makapagsasagawa lamang ang ICC ng imbestigasyon kung ang estado ay walang gumaganang judicial system kung saan hindi aplikable sa Pilipinas.

“‘Yung ating bansa, napakalusog ng judicial system. Alam natin na lahat ng mga kaso na hinahain napo-prosecute, meron tayong process na sinusunod,” anito.

“At kung willing man ay wala silang kakayahang mag-prosecute,” dagdag na pahayag ni Panelo.

Aniya pa, hindi naman mapipilit ng Rome Statute ang PIlipinas dahil ” it was not published in the Philippine government publication.”

“Yang Rome Statute, ever since that is not enforceable because from the very beginning hindi yan lumabas sa Official Gazette. And our civil law requires public case on the penal law or any law on the Official Gazette bago ito ipatutupad. Hindi nangyari yan,” ani Panelo.

Kaya nga, para kay Panelo ay wala namang bago sa “latest development” na ito kaugnay sa ICC.

“Hindi naman bago yan, talagang ever since pinagpipilitan nila ,” aniya pa rin.

Inanunsiyo ng International Criminal Court (ICC) na kanilang sisimulan sa Oktubre ang pag-iimbestiga sa kampanya sa iligal na droga ni Pangulong Rodrigo Duterte.

Sa inilabas na pahayag, pinayagan na ng Pre-Trial Chamber ang hiling ng ICC Prosecutor’s na ituloy na ang imbestigasyon sa programa na drug war sa bansa mula Hulyo 2016 nang maupo sa puwesto si Pangulong Duterte hanggang Marso 16, 2019 ng mag-withdraw ang Pilipinas sa Rome Statute.

Sakop ng imbestigasyon ang patayan daw sa Davao City mula Nobyembre 2011 hanggang Hunyo 30, 2016 kung saan nakaupong alkalde at vice mayor ang pangulo noon.

“Similarities in the modus operandi are also discernible,” ani ICC chamber.” “For this reason, the Chamber considers, at the present stage, and to the required standard, that there are similarities between the killings in the Davao area in 2011-2016 and the so-called ‘war on drugs’ campaign which merit further investigation.”

Dagdag pa ng ICC, isa umanong paglabag sa karapatang pantao ang nasabing “war on drugs” kahit na ilang beses na sinabi ng mga otoridad sa Pilipinas na ito ay legal na operasyon.

Itinaguyod noong taong 2002 ang ICC na siyang huling takbuhan ng mga biktima ng iba’t ibang krimen sa isang bansa kapag ayaw magsagawa ng imbestigasyon ang kanilang gobyerno.

Base sa talaan ng mga human rights group aabot umano sa 6,000 katao ang nasawi sa isinagawang anti-drug campaign o oplan-tokhang mula ng maupo ang pangulo noong 2016.

Kung maalala una nang inakusahan ng Pangulong Duterte ang ICC nang pakikialam sa “internal affairs” ng Pilipinas kaya wala umanong hurisdiksiyon na magsagawa ng imbestigasyon.