2022 February 17 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for February 17th, 2022

SC, inilabas na ang buong desisyon ng Anti-Terror Law

Posted on: February 17th, 2022 by @peoplesbalita No Comments

INILABAS na ngayon ng Supreme Court (SC) ang full decision at separate opinions sa kontrobersiyal na Anti-Terrorism Act of 2020.

Ito ay ilang buwan matapos ilabas ng kataas-taasang hukuman ang dalawang bahagi ng naturang batas bilang unconstitutional.

Siyam na critical questions naman ang kinilala ng SC bilang core issues sa 235 na pahinang resolusyon.

Idineklara naman ng Korte Suprema ang “Not intended Clause” sa probisyon ng Section 4 at ang second mode ng designation sa ilalim ng Section 25 bilang unconstitutional.

Inatasan na rin ng high court ang Court of Appeals (CA) na agad bumalangkas ng rules para sa judicial prescription na mayroong objective na mapanatili ang karapatan ng mga grupo, asosasyon at organisasyon.

Kung maaalala, ilang human rights groups, mga abogado at estudyante ang nagpahayag ng kanilang pagkontra sa desisyon ng SC at marami raw dito ang hindi naideklarang unconstitutional.

Nasa 37 petitions ang humirit sa SC para kuwestiyunin ang naturang batas at nagkaroon pa ng ilang beses na oral arguments.

Kung maalala, noong Hulyo 2020 nang pirmahan ni Pangulong Rodrigo Duterte ang anti-terror bill para maging ganap na batas.

DEEP INSIDE MY HEART (Chapter 33) Story by Geraldine Monzon

Posted on: February 17th, 2022 by @peoplesbalita No Comments

HABANG sakay ng kotse ay nagka-idea si Bernard na puntahan nila si Andrea para makita nila ito ng personal at higit nila itong makilala. Labis itong ikinatuwa ni Angela kaya pinlano agad nila ang sorpresang pagbisita rito.

“Sweetheart, samahan mo akong mamili ng mga ipapasalubong natin sa kanya ha.” ani Angela.

“Okay, no problem, kahit kailan mo gusto sweetheart.”

Dahil doon ay masayang masaya si Angela habang nagtatrabaho sa restaurant. Hinanap niya si Jared.

“Ma’am Angela, pinatawag nyo raw po ako?”

“Oo, maupo ka.”

“Ano pong maipaglilingkod ko ma’am?”

May isinulat si Angela sa kapirasong papel.

“Heto ang numero ni Andrea. Pumayag siyang ibigay ko ito sa’yo. Be good to her or else, kaming dalawa ni Sir Bernard mo ang makakalaban mo, maliwanag ba?”

Hindi makapaniwala si Jared. Nangingislap sa tuwa ang mga mata niya habang inaabot ang kapirasong papel na naglalaman ng numero ni Andrea, mula kay Angela.

“Opo ma’am, thank you so much po, thank you talaga, umasa po kayo na magiging mabuti akong kaibigan sa kanya, pangako po ‘yan!”

“Ok. Sige, balik ka na sa trabaho mo.” nakangiting sabi ni Angela.

Palabas na ng pintuan nang biglang pumihit pabalik si Jared.

“Ah ma’am, pwede po bang samantalahin ko na ang pagkakataon na’to, magpapaalam po sana ko na uuwi muna po ako sa amin ng tatlong araw, may pinapaasikaso po kasi ang mama ko tungkol sa dokumento ng lupa namin.”

“Ok. No problem. Magfile ka na lang ng leave.”

Tuwang tuwa si Jared sa napakabait niyang amo.

Tuwang tuwa rin si Regine sa balitang natanggap mula kay Bernard nang tawagan siya nito.

“Regine, this is good news for you, pumayag na ang asawa ko na ipasok kita sa company.”

“Thank you so much Bernard, thank you dahil pumayag kayo ni Angela na maipasok ako sa kumpanya!”

“You’re welcome Regine. Gusto rin namin na maging maayos na ang buhay mo. Do it for Janine kahit wala na siya.”

“Yes Bernard…siguradong matutuwa si Janine kung malalaman niya ito, saan man siya naroon.”

“And gusto ko lang din na ipaalala sa’yo na, ayokong mabahiran ng kahit anong kulay ang pagmamagandang loob naming ito.”

“I know.” napahinga ng malalim na tugon ni Regine.

Matapos makipag-usap kay Bernard sa phone para sa ilang detalye tungkol sa trabaho ay napangiti ito.

“This is it…babalik ako sa pedestal kung saan ako nararapat…”

Dumalaw sina Angela at Bernard sa puntod ni Janine. Masaya nilang ibinalita rito ang nalalapit nilang pagsorpresa kay Andrea.

“Janine, anak, makikita na namin siya…para sa’yo ito…kung ipinagkait man sa inyo ng tadhana ang pagkikita ninyong dalawa, gagawin namin ito ngayon para sa’yo. Sisiguraduhin namin na mapapangiti namin ang matalik mong kaibigan tulad ng lagi mong sinasabi sa kanya.” ani Angela.

“Kaya huwag ka nang mag-alala anak, hindi namin pababayaan ang kaibigan mo. At saka ang mama mo. Tutulungan din namin siya para ngumiti rin siya kagaya namin.”

Hindi naman mapakali si Jared nang makuha ang number ni Andrea. Ilang beses niya itong idinial pero ring lang nang ring. Hindi sumasagot.

“Hays, busy kaya siya? Gustong gusto ko ng itanong kay Ma’am Angela kung bakit umiiyak si Andrea doon sa puno at bakit hindi ito pumasok sa chapel at kung ano ang kaugnayan nila sa isa’t-isa…kaya lang baka isipin naman ni ma’am na lalaking Marites ako…di bale kapag naging magkaibigan na kami ni Andrea, malalaman ko rin naman lahat ng gusto kong malaman tungkol sa kanya…” sa isip ni Jared habang nakahiga sa sofa at patuloy na idina-dial ang numero ng dalaga.

Hindi naman masagot ni Andrea ang tawag dahil hindi niya ito napapansin. Nagmamadali kasi siya na matapos ang gawaing bahay para pagdating ni Jeff ay nasa kuwarto na ulit siya. Hindi na siya aabutan nito. Mula kasi nung may mangyari sa kanila ay todo iwas na siyang magkrus ang landas nila kahit nasa iisang bubong lang sila. Kapag alam niyang mag-aalmusal na ito ay papasok siya ng cr para maglinis. Kapag wala na ito sa kusina ay saka naman niya iimisin ang pinagkainan nito.

Kapag alam niya na magkkakasalubong sila ay agad siyang iiba ng direksyon. Tulad noong isang araw na nagdidilig siya ng mga halaman, mula sa bintana ay nakita niyang papalapit ito kaya’t mabilis siyang nagkubli sa malalagong halaman. Nakita pa niyang lumilinga ito sa garden na parang hinahanp siya.

Isang beses, nagpapatimpla sa kanya ito ng kape ay bigla siyang nag-inarte na masakit na masakit ang tiyan niya, kaya nakiusap siya kay Manang Sonya na ito na lamang muna ang magtimpla ng kape para kay Sir Jeff.

Isang beses naman ay naabutan siya nito sa washing area. Hinagis nito sa kanya ang boxer short na ikinagulat niya. Pero hindi siya lumingon. Ni hindi siya umimik nang sabihin nitong unahin labhan ang paborito nitong boxer short. Napalunok siya nang makita iyon dahil iyon ang boxer short na suot nito noong may mangyari sa kanila.

Lingid kay Andrea, habang hawak niya ang boxer short ay nakasilip sa kanya si Jeff mula sa likuran ng wall. May ilang segundo ring hinawakan at tinitigan iyon ng dalaga bago isinama sa mga labahin. Kaya naman napangiti ang binata. Iniisip nito na may naalala roon si Andrea.

Hindi alam ni Andrea kung hanggang kailan niya maiiwasan ang kanyang amo pero hangga’t maaari ay patuloy niyang gagawin ang pag-iwas dito sa sobrang hiya niya at takot sa nangyari.

Hanggang isang araw. Isang bisita ang hindi niya inaasahang dumating. Narinig na lang niyang may pinapapasok si Manang Sonya.

“Tuloy. Sandali at tatawagin ko lang si Sir Jared.”

Dumagundong ang kaba sa dibdib ng dalaga. Hindi niya ito inaasahan.

(ITUTULOY)

Dahil may ‘something’ na sila ni RAYVER: JULIE ANNE, in-unfollow na ni JANINE sa kanyang Instagram at Twitter account

Posted on: February 17th, 2022 by @peoplesbalita No Comments

ANG pagiging mas lalong malapit nina Julie Anne San Jose at Rayver Cruz kaya ang dahilan kung bakit ini-unfollow na raw ni Janine Gutierrez si Julie sa Instagram at Twitter account nito?

Nalaman namin na naka-unfollow na si Janine kay Julie dahil sa mga tila imbestigador na mga fans. Sila ang nakapansin na naka-unfollow na nga raw si Janine.

Upon checking, kumpirmado ngang hindi na pina-follow ni Janine si Julie pero ang huli, naka-follow pa rin sa social media ng ex-girlfriend ni Rayver.

Eh, sa latest Instagram post ni Julie kunsaan, nakasakay ito sa jetski at nagpasabog na naman ng kaseksihan niya habang naka-two-piece, isa si Rayver sa nag-comment na Japanese characters nga lang at may emoji ng spider sa dulo.

Nag-reply si Julie na, “Toasted spidey” at laugh emoji sa comment ni Rayver at ‘di pa do’n natapos. Humirit pa si Rayver ng “hahaha limitless” na sinagot ni Julie na, “limitless patatas.”

Sa isang banda, kung totoo nga ang balita na sina Julie at Rayver na ngayon, wala naman kaming nakikitang problema dahil break na naman sina Rayver at Janine at ang huli rin ang nabalitang nakipag-break.

Si Janine naman, balita namang may something with Paulo Avelino.

***

HINDI raw napapansin ni Mikael Daez na kahit 12 taon na siyang Kapuso at ilang shows na rin ang naging host siya, ang bago niyang show sa GMA-7 na The Best Ka! pa lang pala ang una niyang full show talaga.

At finally, pinagkatiwalaan na nga siya ng sarili niyang buong show.

“I guess at first, nagulat ako, pati si Megan (Young), hindi ko naiisip na o, wala pa ‘kong show. Kasi, I host, I work.

“So, na-realize lang namin no’ng may nakapagbanggit sa amin na first full show mo ‘to. Ha? Oo nga ‘no, so natuwa ako. And I think, every project naman sa GMA is a blessing.

“Kasi, pinagkakatiwala naman sa akin ng GMA.”

Love of My Life pa ang huling show ni Mikael sa GMA, two years ago pa. Pero hindi raw nagkuwestiyon si Mikael sa network dahil inamin nito na natakot din sila ni Megan sa COVID-19.

At si Megan din ang pilot guest ni Mikael sa The Best Ka. Nang matanong naman kung kailan kaya makikita ang little Mikael o little Megan, sey na lang niya, “baka one of these days, magulat na lang tayong lahat. Don’t worry, pati ako mag–uulat, promise.”

***

MAGKAKASUNOD ang selebrasyon nina Heart Evangelista at ng mister niya na si Governor Chiz Escudero.

Kaya pala pinapababa na ni Heart si Chiz sa reply nito sa Instagram anniversary message at aalis na raw sila.

Nag-post si Heart kunsaan ay nagpunta sila ni Chiz sa kunsaan daw sila nag-start ni Chiz, seven years ago.

At may assurance ito kay Chiz na para rito, wala na siyang mahahanap pang iba na katulad ng Mister niya.

Aniya, “Happy Anniversary to the best husband anyone could ask for. Whenever I tell people that I don’t think I’ll be able to find anyone like you, I mean it with all my heart. You’re the only one for me, my best friend and my one true love!”

Nagpasalamat din si Heart kay Chiz sa mga naituturo raw sa kanya.

“Thank you for all the wisdom you have taught me, for being a good father and a great partner to me. I thank God for you and the way you hold my hand in every step of the way. I’ll always be here right by your side.

“Cheers to 7 years and a lifetime more of our story!”

(ROSE GARCIA)

Wright Player of the Week ng PBA GC sa Pebrero 11-13

Posted on: February 17th, 2022 by @peoplesbalita No Comments

NANALANTA si Matthew Andrew Christopher Wright ng 27 points at 10 assists nang manehohin ang Phoenix Super LPG sa pagtakas ng 93-92 win laban sa TNT sa 46th Philippine Basketball Association 2021-22 Governors’ Cup eliminations nooong Linggo sa Smart Araneta Coliseum sa Quezon City.

Tampok sa pabida ng 31-year-old, 6-foot-4 Fil-Canadian guard-forward ang pagnakaw ng bola kay Jayson William Castro ng Tropang Giga saka mabilis na tumakbo at saluhin iyon upang isalpak ang pang-eskapong puntos ng Fuel Masters.

Kaya pinagpasyahan Lunes ng mga sportswriter na kumokober ng mga laro sa unang Asia’s play-for-pay hoop na igawad kay Wright ang PBA Press Corps Player of the Week para sa Pebrero 11-13.

“I have to be better on that scenario but I’m happy we got the win,” suma ni Wright, na tinalo para sa weekly award sina Christopher Elijah Newsome ng Meralco at Rain or Shine rookie Michael Joseph Nieto. (REC)

1 SA 2 SUSPEK SA PANGANGARNAP AT TANGKANG PAGPATAY SA CARPOOL DRIVER, ARESTADO

Posted on: February 17th, 2022 by @peoplesbalita No Comments

TIMBOG ng mga tauhan ng Valenzuela City Police ang isa sa dalawang suspek sa pangangarnap at tangkang pagpatay sa 28-anyos na carpool driver na binigti at pinagsasaksak sa loob ng minamanehong Toyota Hi Ace van ng biktima.

Kinilala ni PLT Robin Santos, hepe ng Valenzuela City Warrant and Subpoena Section (WSS) ang naarestong suspek na si Diomedes Saquillo Jr., alyas “Jonel Saquillo” ng Bacoor City, Cavite habang pinaghahanap pa ang kasama niya na kinilala lang sa alyas “Migs”.

Ayon kay Valenzuela police chief Col. Ramchrisen Haveria Jr, nangyari ang insidente sa Barangay Parada, Valenzuela City noong Enero 18, 2022.

Nag-‘book’ umano ang mga suspek sa ‘carpool’ mula sa lalawigan ng Quezon patungong Valenzuela City at pagdating sa Barangay Parada ay tinutukan ng baril, binigti at pinagsasaksak ng mga ito sa iba’t ibang bahagi ng katawan ang biktima.

Inakala ng mga suapek na wala ng buhay ang biktima matapos magpanggap na patay kaya dinala siya at basta na lamang iniwan ng mga salarin sa isang liblib na lugar sa San Pedro Laguna saka tinangay ang kanyang sasakyan.

Sa pamamagitan ng GPS ay agad namang narekober ang sasakyan ng biktima sa isang lugar din sa San Pedro Laguna.

Ayon kay Santos, personal na nag-report sa Valenzuela police ang isang taong tumulong sa biktima at iniulat nito na dinala niya ito sa ospital at kasalukuyan aniyang nasa Intensive Care Unit.

Kaagad nakipag-ugnayan ang Valenzuela Police SIU sa pamumuno ni P/Major Albert Juanillo sa mga police station ng Laguna police at lalawigan ng Quezon kung saan nakakuha sila ng mga kaukulang detalye.

Napag-alaman din ng pulisya na si Saquillo ay may ‘warrant of arrest’ sa kasong Estafa (5 counts) na ipinalabas ng Dasmarinas City, Cavite noong September 20, 2021.

Sa masusing imbestigasyon, nagawang matunton ng mga tauhan ng Valenzuela Police SIU at WSS ang suspek sa C5 Bonifacio Global City, Taguig City na nagresulta sa pagkakaaresto sa kanya sa pamamagitan ng pagprisinta ng nasabing warrant of arrest at narekober sa kanya ang susi ng sasakyan ng biktima.

Nahaharap si Saquillo sa mga kasong Frustrated Murder, Robbery with Serious Physical Injuries, at Qualified Carnapping. (Richard Mesa)

PETISYON NA KANSELAHIN COC NI TULFO, IBINASURA

Posted on: February 17th, 2022 by @peoplesbalita No Comments

IBINASURA ng second division ng Commission on Elections ang petisyon na kanselahin ang certificate of candidacy (COC) ni senatorial bet Raffy Tulfo, ayon kay acting Comelec chairman Socorro Inting nitong Miyerkules.

Sinabi ng Comelec second division na walang misrepresentation sa COC ni Tulfo nang pangalanan niya si Jocelyn Tulfo bilang kanyang asawa.

Si Julieta Pearson, na naghain ng petisyon, ay nagsabing siya ang legal na asawa ng broadcaster.

Sinabi ni Inting na ibinasura ng second division ang kaso dahil kung sino man ang asawa ng isang kandidato ay hindi materyal sa kung maaari silang tumakbo sa pwesto.

Nanguna si Tulfo sa pre-election survey para sa senatorial aspirants na isinagawa ng Pulse Asia noong Enero, kung saan 66.1 porsyento ng mga respondent ang nagsasabing Siya ay iboboto nila. (GENE ADSUARA)

HEART, ‘di napigilang magpaka-fangirl kay senatorial candidate CHEL DIOKNO

Posted on: February 17th, 2022 by @peoplesbalita No Comments

HINDI napigilan ng aktres na si Heart Evangelista ang sarili na magpaka-fangirl kay senatorial candidate at human rights lawyer Chel Diokno nang magkita sila sa Sorsogon kamakailan.

Nag-post si Evangelista sa Twitter ng larawan ng kanilang pagkikita ni Diokno nang bumisita ang huli sa lalawigan para mangampanya.

“I’m kilig. fan mode @ChelDiokno good luck po,” tweet ni Evangelista.

Bilang tugon, sinabi ni Diokno na siya ang nag-fanboy nang makaharap si Evangelista.

“Ako po talaga yung totoong nag–fanboy. It was so nice meet you, @heart021485!” sagot ni Diokno sa Twitter.

Binati rin ng human rights lawyer si Heart, na magdiriwang ng kanyang kaarawan noong Lunes (Feb. 14).

Nagkaroon din ng ‘fanboy’ moment si Diokno sa pagratsada ng kampanya sa Naga City kung saan nakaharap niya ang ilang artista at mga singer, gaya nina Nikki Valdez, Cherry Pie Picache, Bituin Escalante, Agot Isidro, The Company at Rivermaya.

***

MAS matindi ang dating ng last three episodes ng controversial series na Love at the End of the World, which had a press preview on Tuesday morning sa Cinema 76, Anonas Center.

Present ang ilan sa cast members ng series na dinirek ni Mark Shandii Bacolod who revealed sa interview na after niya na mapanood ang original Scorpio Nights movie directed by the late Peque Gallaga ay sinabi niya sa kanyang sarili na magdidirek din siya ng pelikula someday.

Hindi sa acting may tagisan ang cast members kundi pati sa hubaran. May shock factor ang ending ng movie kung saan makikita ang mga artista in various state of undress while indulging in sex.

Sabi nga ni Shandii, hindi tama na tawagin na BL series ang Love at the End of the World dahil ibang-iba ito kung ikukumpara sa BL na Gameboys at Hello Stranger, na very light romance ang dating. It is a different kind of gay love story.

Pero ang Love at the End of the World ay pag-iisipin ka after watching it dahil sa tinatalakay nitong issues about suicide, gay love, acceptance, and drug addiction, among others.

No wonder, the movie got mixed reviews pero maraming positive comments sa Twitter. Kaya naman sobrang happy si Shandii at ang kanyang fabulous cast.

But wait, there’s more dahil nakatakdang magkaroon ng sequel ang pinag-uusapang pelikula sa Twitter world. At may kasunod pa kasi trilogy ito, ayon kay Shandii.

“The story is inspired by real people in my life,” say ni Shandii, who revealed he was a victim of sexual molestation when he was young.

Hindi rin agad natanggap ng kanyang ina na he is a gay kaya bahagi ito ng struggle ng buhay niya.

Pero ngayon ay bati na sila ng kanyang ina after having a gap for so many years. They are now the best of friends.

Congrats sa cast namely Rex Lantano, Kristoff Garcia, Mike Liwag, Gold Azeron, Nico Locco, Yam Mercado, Elijah Filamor, Markki Stroem, Khalid Ruiz and Ms. Irma Adlawan in a very special role.

Love at the End of the World streams at Gagaoolala at 12 midnight Thursday.

(RICKY CALDERON)

Maraming Pinoy naniniwalang matatapos na ang COVID pandemic ngayong 2022 – SWS survey

Posted on: February 17th, 2022 by @peoplesbalita No Comments

MARAMING Pinoy naniniwalang matatapos na ang COVID pandemic ngayong 2022 – SWS survey

Mayroong 51 percent sa mga lumahok sa survey ng Social Weather Station (SWS) ang umaasa na matatapos na ang COVID-19 crisis ngayong taong 2022.

Lumabas sa survey na 45 percent ang umaasa na hindi pa matatapos ngayong 2022.

Isinagawa ang face-to-face interview mula Disyembre 12 hanggang 16 na mayroong 1,440 adults na tig-360 sa Luzon, Metro Manila, Visayas at Mindanao.

Sa nasabing survey ay umabot naman sa 62 percent sa Mindanao ang nagsabi na hanggang 2022 na ay matatapos ang pandemya na sinusundan ng balance Luzon na mayroong 51 percent, Metro Manila 49 percent at Visayas 41 percent.

Malaki rin ang nagsabi sa survey ang kahalagahan ng vaccine mandate maliban lamang sa Visayas.

P103K HALAGA NG SHABU, NASAMSAM, 27 PANG TULAK, BINITBIT SA BUY BUST SA CAVITE

Posted on: February 17th, 2022 by @peoplesbalita No Comments

TINATAYANG P103K halaga ng shabu ang nasamsam sa pagkakaaresto sa tatlong hinihinalang tulak habang dalawampu’t-pito na iba ang binitbit sa isinagawang buy bust operation sa magkakahiwalay na lugar sa lalawigan ng Cavite .

Kinilala ang mga naaresto na sina Emily Valerio y Santos, dalaga, 62 ng 1st St. Sto. Niño, Niog 3, Bacoor City, Cavite (target ng operasyon); Ramoncito Rabales y De Guzman, 47, tricycle driver ng 04A Brgy Niog 3, Bacoor City, Cavite at Ronnie Reformado y Paguera, 53, tricycle driver ng 0079 Celestino st., Brgy Niog 2, Bacoor City, Cavite.

Sa ulat ng Bacoor City Police, dakong alas-3:00 Martes ng hapon nang nagsagawa ng buy bust operation ang pinagsamang puwersa ng PDEA IV-A Cavite PO, Bacoor Cps at CAVITE PDEU sa bahay ni Valerio sa1st St. Sto Niño, Niog 3, Bacoor City, Cavite kung saan siya ang target.

Pero nabulaga ang awtoridad nang nadiskure na ang nasabing lugar ay ginagawang drug den at ginagawang pot session na nagresulta sa pagkakaaresto ng dalawa pang hinihinalang tulak.

Nakuha sa lugar ang tinatayang 15 gramo ng hinihinalang shabu na may street value na P103,000.00, dalawang pirasong aluminum foil na ginagamit na improvised tooter, dalawang aluminum foil na ginagamit na improvised needle, lighter, cellular phone at buy bust money.

Kasong paglabag sa Secs. 5, 6, 7, 11 12 at 15, Art. II ng RA 9165 ang kinakaharap ng tatlo.

Samantala, dalawampu’t-pito na hinihinalang tulak ang binitbit ng Cavite police sa isinagawang magkakahiwalay na buy bust operation sa limang Lungsod at apat na bayan sa pagitan ng alas-6:00 kamakalawa ng umaga hanggang ala-1:40 ng madaling araw.

Nanguna ang Dasmarinas City sa may pinakamataas na bilang ng naarestong tulak na pito, habang anim sa Bacoor City, apat sa Kawit, tatlo sa Cavite City, tig-dalawa sa Imus at Naic habang tig-isa sa Rosario, General Mariano Alvarez (GMA) at Gen Trias City. (GENE ADSUARA)

Ads February 17, 2022

Posted on: February 17th, 2022 by @peoplesbalita No Comments