ISANG tulak ng illegal na droga na listed bilang high value individual (HVI) ang kalaboso matapos makuhanan ng mahigit P.1 milyon halaga ng marijuana sa buy bust operation ng pulisya sa Valenzuela City, kahapon ng madaling araw.

Kinilala ni Valenzuela police chief P/Col. Salvador Destura Jr, ang naarestong suspek na si Carlo Mendoza alyas “Kalbo”, 28 ng No. 4706 Cipriano Street, Brgy. Gen T De Leon.

Sa kanyang ulat kay Northern Police District (NPD) Director PBGen Ponce Rogelio Peñones Jr, sinabi ni Col. Destura na dakong alas-2:20 ng madaling araw nang ikasa ng mga operatiba ng Station Drug Enforcement Unit (SDEU) sa pangunguna ni PCpt Joel Madregalejo ang buy bust operation sa Francisco St., Fortune 1, Brgy. Gen T De Leon, matapos ang natanggap na impormasyon na nagbebenta ng marijuana ang suspek.

Isang undercover police ang nagawang makipagtransaksyon sa suspek ng P500 halaga ng droga at nang tanggapin niya ang marked money mula sa police poseur buyer kapalit ng isang plastic sachet ng marijuana ay agad siyang dinamba ng mga operatiba.

Nakumpiska sa suspek ang 7-pirasong transparent plastic sachets na naglalaman ng aabot 1000 grams ng hinihinalang pinatuyong dahon ng marijuana with fruiting tops na nasa P120,000.00 ang halaga, buy bust money, P1,000 recovered money at cellphone.

Pinuri naman ni BGen Peñones ang Valenzuela police sa kanilang matagumpay na drug operation na nagresulta sa pagkakaaresto sa suspek na nahaharap sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)

UMAASA si CamSur Rep. LRay Villafuerte na bibigyang panahon para pag-isipan at pag-aralang maigi ng mga miyembro ng Senate committee on constitutional amendments and revision of codes ngayong congressional break sa pagdesisyon sa report sa panukalang pagbabago sa restrictive economic provisions ng konstitusyon.

Sa kabila na isinusulong ng committee chairman nitong si Senador Robinhood Padilla na maaprubahan ng mga miyembro ng komite ang report na nag-eendorso sa Charter Change sa pamamagitan ng Constituent Assembly (Con-Ass) option— kaysa sa inaprubahan ng kamara na panukalang Constitutional Convention (Con-Con) ay sinabi ni Villafuerte na bukas siya sa naging kaganapan basta masigurong magtutuloy tuloy ang proseso.

“We are hoping our senators, especially the members of the Senate committee on constitutional amendments and revision of codes, can find time during our recess to consider the report of its chairman, Sen. Robin, endorsing constitutional reforms to do away with our 1987 Charter’s economic provisions that have restricted foreign ownership of, or participation in, Philippine businesses,” pahayag ni Villafuerte.

Para sa mambabatas, hindi isyu umano sa kanya kung anong hakbang (concon o con-ass) ang pipiliin ng senado para amyendahan ang konstitusyon kundi ang maipagpatuloy ang proseso upang maamyendahan o maisa-ayos ang depekto sa konstitusyon.

“The important thing is for us lawmakers to keep the ball rolling on constitutional reforms, in the hope that we can do away soon enough with the restrictive economic provisions of our 36-year-old Charter that have put off investors and impeded the inrush of FDIs (foreign direct investments),” dagdag ni Villafuerte. (ARA ROMERO)

NILINAW ni Pangulong  Ferdinand  Marcos Jr. na ang rightsizing ay hindi para sibakin sa trabaho ang mga empleyado kundi magsisilbi itong tool o kasangkapan para  “i-upskill at reskill” ang kasalukuyang government workforce para mapahusay ang state services at mga programa.

Nauna rito, ipinag-utos ng Pangulo ang pag-assess sa mga posisyon sa ehekutibong sangay ng pamahalaan bilang bahagi ng rightsizing measures ng gobyerno.

Nais kasi ng Pangulo na idetermina ang inuulit  lamang na posisyon sa government branch at maging ang tungkulin na maaaring pagsamahin kasunodng  sectoral meeting ukol sa  National Government Rightsizing Program (NGRP).

Sa nasabing pulong sa Palasyo ng Malakanyang, nagbigay ng upadte report ang  Presidential Legislative Liaison Office (PLLO) at Department of Budget and Management (DBM) kay Pangulong Marcos hinggil sa “status at salient features” ng panukalang  National Government Rightsizing Bill.

Sinabi ng Presidential Communications Office na ang Section 6 ng House Bill No. 7240, o National Government Rightsizing Act, “authorizes the President to right-size the operations of agencies in the executive branch.”

Kabilang na rito ang pagsusulong ng “functional shifts at modifications, pag-implementa sa  organizational actions base sa rekumendasyon ng  Committee on Rightsizing the Executive Branch (CREB), pagsasagawa ng iba pang functional o organizational actions, pag-develop at pagbibigay ng safety nets, at pagbalangkas ng organizational development program para palakasin ang agency institutional capacity at paghusayin pa ang employee productivity.

Kabilang naman sa mga salient o kapansin-pansing probisyon ng panukalang batas ay ang  mandatory coverage ng lahat ng ahensiya ng ehekutibong sangay ng pamahalaan kabilang na ang mga departmento, bureaus, tanggapan, komisyon, boards, konseho at ang lahat ng iba pang entity na naka-attached sa o na nasa ilalim ng kanilang administrative supervision, at government-owned or -controlled corporations (GOCCs)  na hindi saklaw sa ilalim ng Republic Act No. 10149 o GOCC Governance Act of 2011.

Nakasaad sa batas na hindi naman kasama o excluded  mula sa  NGRP ay  “teaching at teaching-related positions sa mga eskuwelahan, medical at allied-medical items sa mga  ospital at iba pang medical facilities, military at uniformed personnel, at GOCCs at government financial institutions na saklaw ng Governance Commission for GOCCs.

“The legislature, judiciary, Office of the Ombudsman, constitutional commissions, and local government units (LGUs) may also right-size their respective offices consistent with the principles and guidelines contained in the NGRP,” ayon sa batas.

Ayon sa PCO,  naniniwala si Pangulong Marcos na isasama sa NGRP ang komprehensibong strategic review ng mga tungkulin, operasyon organisasyon sistema at proseso ng iba’t ibang ahensiya ng pamahalaan.

Isasama rin ang malawakan at transformational initiatives sa mga agencies concerned, gaya ng pagsasanib, pagpapatatag, paghahati, paglilipat at maging ang abolisyon ng ilang tanggapan. (Daris Jose)

SA loob ng kulungan gugunitahin ng tatlong lalaki ang Semana Santa matapos makuhanan ng hindi lisensyadong baril sa magkahiwalay na operation ng pulisya sa Malabon City.

Sa kanyang report kay Northern Police District (NPD) Director PBGen Ponce Rogelio Peñones Jr, sinabi ni Malabon police chief P/Col. Amante Daro na nakatanggap ng impormasyon ang Station Intelligence Section (SIS) mula sa isang Barangay Information Network (BIN) ng Barangay Tañong hinggil sa isang armadong lalaki na pagala-gala sa Estrella Street ng nasabing barangay dakong alas-7:00 ng gabi.

Kaagad rumesponde sa nasabing lugar ang mga operatiba ng SIS sa pangunguna ni PSSg Pepito Gatus na nagresulta sa pagkakaaresto sa suspek na si John Carl Suarez, 25, ng Market 3, NBBN, Navotas City at nakumpiska sa kanya ang isang cal. 38 na baril na may apat na bala.

Alas-4:25 naman ng hapon nang magsagawa ng pagsisilbi ng search warrant ang pinagsamang mga tauhan ng Sub-Station 3 ng Malabon police sa pangunguna ni PCpt Joseph Alcazar at SIS sa No. 7 E. Martin Street, Barangay Santulan, na nagresulta sa pagkakaaresto kay Angelito Nieves, 40.

Pinosasan si Nieves matapos walang maipakitang kaukulang mga dokumento sa isang cal. 38 revolver na may tatlong bala na nakuha sa kanya matapos ang ipinatupad ng pulisya na search warrant na inisyu ni Executive Judge Rhoda Magdalene Mapile-Osinada ng Malabon City Regional Trial Court (RTC) laban sa kanya.

Samanta, dinampot naman si Dodie Boy Mamuyac, 38, matapos makuhanan ng isang cal. 38 revolver na may tatlong bala sa isinagawang pagsisilbi ng search warrant ng mga pulis sa kanyang bahay sa Dulong Bronze St., Brgy. Tugatog, dakong alas-12:45 ng madaling araw.

Pinuri ni BGen Peñones ang Malabon police sa pamumuno ni Col. Daro sa kanilang mahusay na trabaho na nagresulta sa pagkakaaresto sa mga msuspek na nahaharap ang mga suspek sa kasong paglabag sa RA 10591 (Comprehensive Firearms and Ammunations Regulation Act). (Richard Mesa)