BIGO ang mga umaasa na ikakasal na sa lalong madaling panahon sina Bea Alonzo at Dominic Roque dahil sa prenup shoot daw ng dalawa sa Japan kamakailan.

Pasyal lamang at bakasyon ang ipinunta ng magkasintahan sa mga lugar sa Japan tulad ng Niseko, Otaru at Sapporo.

At dahil sa mga sweet photos na lumabas, inakala ng marami na iyon na ang prenup pictorial ng dalawa.

Kaya naman nilinaw agad ito ni Bea…

“Japan talaga yung favorite place namin,” umpisang pahayag ng aktres.

“Dun nag-start kasi yung love story namin. Yung pinunta namin is to ski. So, it was memorable kasi ang dami kong falls, ang dami kong ano. But then, everyday I was getting better.”

Sa ngayon, sa trabaho muna naka-focus si Bea, kaabang-abang nga ang pagsasama nila ng isa pang reyna ng GMA, si Carla Abellana sa “Widows’ War”.

Kuwento ni Bea, “It’s going to be an exciting soap because it’s my first time doing this genre.

“Yung ‘whodunit’ genre. Medyo dark siya, normally, nalilinya ako sa romcom or drama na heavy. But first-time na medyo dark.

“Nasa edge ka ng seat mo, ganun yung ibibigay niyang feeling sa iyo.”

***

GOOD news para sa Global Pinoys dahil aabot na sa UAE at California, USA ang screening ng 2023 MMFF Best Picture awardee na ‘Firefly’.

Mapapanood na sa ilang sinehan sa UAE ang ‘Firefly’ simula January 18. Kasama rin ang pelikula sa Metro Manila International Film Festival sa Los Angeles, California na ipalalabas mula January 29 hanggang February 2.

Talaga namang parami na nang parami ang nakatutuklas kung saan matatagpuan ang mundo ng mga alitaptap. Kaya naman, mga Kapuso mula UAE at California, USA, huwag sayangin ang pagkakataon!

(ROMMEL L. GONZALES)

WALANG tigil ang NDMstudios sa paggawa ng mga “de calibre” na international films! 

At sa kauna-unahang pagkakataon, bibida na rin sa wakas sina Mayton Eugenio at Jean Kiley sa isang full-length buddy-girl comedy film na, Hongkong Kailangan Mo Ako sa direksyon ni Direk Njel de Mesa ng NDMstudios.

Matagal nang gumaganap sa iba’t ibang supporting roles si Mayton (e.g. Miracle in Cell No. 7, Indak, 100 Tula Para Kay Stella etc.) at Jean Kiley (e.g. Jowable, Dulo, Ikaw pa rin ang Pipiliin ko, etc.)—pero dahil sa pagtitiwala ni Direk Njel de Mesa, ngayon pa lamang sila nagkaroon ng proyekto kung saan sila naman ang bida.

Sa Hongkong Kailangan Mo Ako, gaganap si Mayton at Jean bilang mag-bestfriends na nagbakasyon sa Hongkong pero walang puknat ang mga kamalasan na sasapit sa kanila.

Sobrang nakatatawa at makaka-relate ang mga biyahero nating mga kababayan sa mga “travel horror stories” na daranasin ng kanilang mga characters na sina Mallory at Blair. Ipapakita rin dito na kahit anong kamalasan sa biyahe, maiibsan ang inis at lumbay basta’t may kasama kang kaibigan at maganda ang mga tanawin.

Ang shooting ng buong pelikula ay ginanap at kinuhanan sa Hongkong mismo, tampok ang iba’t ibang mga magagandang tourist attractions ng bansa, kung kaya’t nagpapasalamat ang NDMstudios sa Hongkong Tourism Board sa kanilang suporta.

Tampok din ang iba’t ibang artista at talento na OFW na nagtatrabaho sa Hongkong para ipakita ang kondisyon at pamumuhay ng mga kababayan natin abroad.

“Masaya kami sa karanasan namin sa shooting dahil madaling katrabaho si Direk Njel, hinahayaan niyang laruin namin ang mga roles na sinulat niya para sa amin,” sabi ni Mayton Eugenio nang ibinahagi ang proseso ng shooting sa Hongkong.

“Masayang-masaya ako at napagsama ko ang dalawa kong kaibigan sa industriya sa isang pelikula—na talaga nga naman napaka-husay sa kanilang pagganap,” sabi ng multi-awarded director.

“Grateful ako sa mga hosting at acting opportunities ko sa VIVA, hindi ko rin naman magagawa ang project na ito kung hindi dahil sa kanilang suporta,” sabi ni Jean Kiley na kilalang batikang host sa mga malalaking events ng VIVA.

Gaya nang naunang pelikula ni Direk Njel na “Must Give Us Pause” na pinagbidahan naman nina Cheska Ortega at Shaneley Santos, isasali muna nila ang pelikula sa mga film festivals abroad (i.e. Japan, Hongkong, Singapore, Canada, Dubai, etc.). Matapos nito ay maipalalabas na ito sa mga sinehan dito sa ating bansa para sa mga excited nating mga kababayan.

Mapapanood na ang kanilang official international trailer sa official facebook at youtube channels ng NDMstudios Japan at Philippines.

(ROHN ROMULO)