SINABI ng isang senior U.S. defense official na ang pinakabagong nuclear-powered attack submarine ng Tsina ay lumubog noong unang bahagi ng taong kasalukuyan.

Maituturing itong isang malaking kahihiyan para sa Beijing na hangad na mapalawak ang military capabilities nito.

Sa ulat, sinasabing ang Tsina ay mayroon ng pinakamalaking navy sa buong mundo, mayroong 370 barko, at nagsimula nang gumawa ng bagong henerasyon ng nuclear-armed submarines.

Winika ng senior U.S. defense official na ang bagong first-in-class nuclear-powered attack submarine ng Tsina ay lumubog sa tabi ng pier o pantalan sa pagitan ng Mayo at Hunyo.

Sinabi naman ng tagapagsalita ng Chinese embassy sa Washington na wala itong maibibigay na impormasyon ukol dito.

Hindi naman malinaw kung ano ang dahilan ng paglubog o kung ito may lulan na nuclear fuel ng oras na iyon.

“In addition to the obvious questions about training standards and equipment quality, the incident raises deeper questions about the PLA’s internal accountability and oversight of China’s defense industry – which has long been plagued by corruption,” ang sinabi ng opisyal, gumamit ng acronym para sa People’s Liberation Army.

“It’s not surprising that the PLA Navy would try to conceal” the sinking,” ang sinabi pa rin ng opisyal.

Samantala, ang balita ay unang iniulat ng Wall Street Journal.

Isang serye ng satellite images mula sa Planet Labs mula Hunyo ang lumabas para ipakita ang cranes sa Wuchang shipyard, kung saan ang submarine ay nakadaong.

“As of 2022, China had six nuclear-powered ballistic missile submarines, six nuclear-powered attack submarines and 48 diesel-powered attack submarines,” ayon sa Pentagon report ukol sa China’s military.

“That submarine force is expected to grow to 65 by 2025 and 80 by 2035,” ang sinabi naman ng U.S. Defense Department. (Daris Jose)

NAGSANIB ang Pamahalaang Lungsod ng Valenzuela sa pamamagitan ng Public Employment Service Office (PESO), at ang Department of Labor and Employment (DOLE), sa paglunsad ng back-to-back na mga programa para sa mga Valenzuelanong naghahanap ng trabaho sa pamamagitan ng isang Mega Job Fair, katuwang ang SM Valenzuela.

Ayon kay Mayor Wes Gatchalian, umabot sa 200 aplikanteng mga walang trabaho na lumahok sa lokal at international mega job fair ng Valenzuela ang natanggap sa trabaho.

May kabuuang 29 lokal na kompanya mula sa iba’t-ibang industriya at limang kompanyang naka-base sa ibayong dagat ang lumahok sa job fair.

Naglagay din ng “one-stop-shop” para sa mga aplikante ang SSS, PSA, Philhealth, TESDA, Project AYOS at PAGIBIG at nakapagbigay ng serbisyo sa may 189 na aplikante na kailangan para sa kanilang aplikasyon.

Kasabay ng naturang job fair ang paglulunsad ng “Project Angel Tree,” na isang paraan upang labanan ang child labor.

Sinabi ni Mayor Gatchalian, ang anti-child labor program na ito isa ring paraan sa pagkakaloob ng mga serbisyo sa mga dokumentadong mga batang manggagawa at nagbibigay din sa kanila ng oportunidad na matamasa ang kanilang oras sa paglilibang bilang mga bata at maisantabi muna ang nakaatang sa kanilang responsibilidad.

May kabuuan namang 46 na naka-profile na mga batang manggagawa sa lungsod ang nakinabang sa inilunsad na programa matapos pagkalooban ng pagkain, gamit pang-eskuwela at mga regalo mula sa ilang mga nagmamay-ari ng pribadong industriya at non-government agencies. (Richard Mesa)

AABOT sa mahigit P200K halaga ng shabu ang nasamsam sa tatlong drug personalies, kabilang ang isang babae matapos matimbog ng pulisya sa magkahiwalay na buy bust operation sa Malabon at Navotas Cities.

Ayon kay Malabon police chief P/Col. Jay Baybayan, ikinasa ng mga operatiba ng Station Drug Enforcement Unit (SDEU) ang buy bust operation kontra kay alyas Bossing, 30, residente sa lungsod matapos ang natanggap na impormasyon hinggil sa umano’y pagtutulak nito ng iligal na droga.

Nang tanggapin umano ng suspek ang marked money mula sa pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba dakong ala-1:00 ng medaling araw sa P. Aquino Avenue, Brgy. Tonsuya.

Nakumpiska ng mga tauhan ni Col. Baybayan sa suspek ang humigi’t kumulang 20.34 grams ng hinihinalang shabu na may standard drug price value na P138,312.00 at buy bust money.

Sa Navotas, nalambat naman ng mga tauhan ni Navotas police chief P/Col. Mario Cortes sa buy bust operation sa M. Naval St., Brgy. Sipac Almacen, alas-10:45 ng gabi sina alyas Michael Daga, at alyas Angge, 49, kapwa residente ng lungsod.

Ani SDEU chief P/Capt. Luis Rufo Jr., nakuha nila sa mga suspek ang nasa 10.2 grams ng hinihinalang shabu na may katumbas na halagang 69,360.00 at buy bust monet.

Pinuri naman ni NPD Director P/BGen. Rizalito Gapas ang Malabon at Navotas police sa kanilang matagumpay na drug operation na nagresulta sa pagkakatimbog sa mga suspek na pawang mahaharap sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)

HININGAN ng paumanhin ng mga mambabatas mula kay Vice President Sara Duterte dahil sa umano’y pagsisinungaling sa publiko matapos lumabas ang ulat na nasa Calaguas Island siya noong Lunes ng umaga, ang takdang araw na nakasalang ang kanyang opisina sa plenary budget deliberation sa Kamara.

Tinuligsa din nina House Assistant Majority Leaders Paolo Ortega V ng La Union at Jay Khonghun ng Zambales ang pagsisinungaling umano ng bise presidente.

“The Vice President owes the Filipino people an explanation and an apology. This is not the kind of leadership we deserve – where the truth is hidden and lies are told to cover it up,” ani Ortega.

Nakiisa si Khonghun sa pahayag ng kasamahang mambabatas kung saan iginiit nito ang importansiya ng katotohanan at transparency mula sa isang public officials.

“This is conduct unbecoming of any public official, especially the Vice President of the Philippines. Honesty should be a non-negotiable trait for anyone who holds office,” giit ni Khonghun.

Nagpahayag din ito nang pagkadismaya sa pagwawalang bahala umano ni Duterte sa kanyang tungkulin sa panahon na isinasagawa ang budget deliberations.

Nag-ugat ang kontrobersiya nang lumitaw sa police reports na nasa Calaguas Island ai Duterte habang pinagdidebatehan ang badyet ng kanyang opisina sa Kamara.

Sa kabila nang unang pagtanggi mula sa kampo ng bise presidente na nasa kalsada siya noong Lunes, lumabas na naroon siya sa nasabing isla.

“This is about integrity. If she cannot be honest about something as simple as her whereabouts, how can we trust her on more important matters?,” pahayag ni Khonghun.

Inihayag naman ni Ortega na ang pagiging bise presidente ay hindi lang tungkol sa posisyon kundi ito ay tungkol sa integridad at tiwala.

“This dishonesty tarnishes the office she holds,” ani Ortega. (Vina de Guzman)