NASAMSAM sa 44-anyos na dalaga ang mahigit P.2 milyong halaga ng shabu matapos siyang maaresto sa ikinasang buy bust operation ng pulisya sa Valenzuela City.

Sa kanyang report kay Northern Police District (NPD) Director P/BGen. Rizalito Gapas, kinilala ni Valenzuela police chief P/Col. Nixon Cayaban ang naarestong suspek na si alyas “Janice”, 44, ng Balintawak, Quezon City.

Ayon kay Col. Cayaban, nakatanggap ng impormasyon ang mga operatiba ng Station Drug Enforcement Unit (SDEU) sa ilalim ng pangangasiwa ni P/Capt. Joan Dorado hinggil sa umano’y pagbibenta ng iligal na droga ng suspek.

Nang magawang makipag-transaksyon ng SDEU sa suspek ay agad ikinasa nila ang buy bust operation sa pangunguna ni P/Lt. Johnny Llave kung saan nakapagsunduan umano nila na sa 3rd St., Brgy. Marulas gaganapin ang kanilang transaksyon.

Nang tanggapin umano ng suspek ang P7,000 marked money na kinabibilangan ng isang 500 bill at 13-pirasong P500 boodle boodle money, kapalit ng isang plastic sachet ng shabu ay agad siyang dinakip ng mga operatiba dakong alas-9:55 ng umaga.

Nakumpiska sa suspek ang humigi’t kumulang 30 grams ng hinihinalang shabu na nagkakahalaga ng P204,000, buy bust money, P200 recovered money at coin purse.

Ani PMSg Ana Liza Antonio, kasong paglabag sa Sections 5 at 11 sa ilalim ng Article II of RA 9165 o ang Comprehensive Dangerous Drug Act of 2002 ang isinampa nila laban sa suspek sa Valenzuela City Prosecutor’s Office. (Richard Mesa)

PINANGUNAHAN ng Pamahalaang Lungsod ng Caloocan, sa pamamagitan ng Cooperative Development and Coordinating Division (CDCD), ang pagdiriwang ng taunang Cooperative Month ngayong Oktubre na may iba’t ibang aktibidad na nakahanay upang kilalanin ang mga kontribusyon ng mga kooperatiba sa paglago ng ekonomiya ng lungsod, tulungan sila sa mga kinakailangan para sa pagpaparehistro sa iba’t ibang ahensya ng gobyerno, at pagbutihin pa ang kanilan mga kakayahan sa pamamahala at pananalapi.

Sinimulan ang mga aktibidad sa Motorcade, Salu-salo, at Coop Singing Content na dinaluhan ng mga kinatawan mula sa mga rehistradong kooperatiba ng lungsod, habang ang Mandatory Trainings at ang Recognition of Top Performing Cooperatives ay gaganapin sa mga susunod na linggo.

Pinuri ni Mayor Dale Gonzalo “Along” Malapitan ang lahat ng miyembro at opisyal ng mga lokal na kooperatiba na nakilahok sa mga inisyal na aktibidad ng CDCD at iba pang mga programa upang matiyak na ang bawat kooperatiba ay magiging kapaki-pakinabang sa kani-kanilang mga miyembro at komunidad.

“Maraming-maraming salamat po sa CDCD at sa lahat ng mga bumubuo ng mga kooperatiba sa ating lungsod. Para sa inyo po ang mga programang nakalatag ngayong Coop Month at titiyakin natin na matutulungan kayo ng pamahalaang lungsod sa inyong mga pangangailangan,” ani Mayor Along.

“Batid ko po na mayroong mga maliliit at mga nagsisimula pa lamang na kooperatiba sa ating lungsod, kaya naman po patuloy pa nating palalakasin ang ating mga programa upang matutukan natin ang paglago ng inyong mga samahan,” dagdag niya.

Hinikayat din niya ang pangkalahatang publiko na suportahan ang mga lokal na kooperatiba sa kanilang mga pagsisikap. (Richard Mesa)

INALIS ng Commission on Elections (Comelec) ang 42 partylist groups dahil sa kabiguang manalo sa nakalipas na mga halalan at ang iba naman ay dahil sa hindi paglahok sa nakalipas na eleksyon.

Ayon kay Comelec Chairman George Erwin Garcia, bahagi ito ng paglilinis nila sa listahan na bahagi ng kanilang obligasyon sa ilalim ng batas.

Narito ang mga hindi nakasali sa magkasunod na halalan:

1. 1-ABAA – 1-Ako Babaeng Astig Aasenso

2. ABYAN ILONGGO – Abyan Ilonggo (AI)

3. AKIN – Akbay Kalusugan Inc.

4. ALON – Adhikaing Alay Ng Marino Sa Sambayanan, Inc.

5. AMANA – Aksyon Ng Mamamayang Nagkakaisa

6. ANG PDR – Ang Partido Demokratiko Rural

7. CLASE – Central Luzon Alliance for Socialized Education

8. KGB – Katipunan ng mga Guardians Brotherhood, Inc

9. MELCHORA – Movement of Women For Change And Reform

10. NACTODAP – National Confederation of Tricycle Operators and Drivers Association of the Philippines

11. PDDS – Pederalismo ng Dugong Dakilang Samahan

Habang ang 31 naman ay hindi nakakuha ng kahit dalawang porsyento ng boto para sa partylist system kaya walang nakuhang upuan sa Kongreso sa magkasunod na halalan.

1. 1-CARE – 1st Consumers Alliance for Rural Energy, Inc.

2. ABEKA – Abe Kapampangan

3. ACTS-OFW – Acts Overseas Filipino Workers Coalition of Organization

4. AKO BISDAK – Ako Bisdak-Bisayang Dako (AB-BD), Inc.

5. АКМА-РТМ – Aksyon Magsasaka-Partido Tinig Ng Masa

6. AP PARTYLIST (formerly 1-APTO) – Alliance of Public Transport Organization, Inc.

7. ANAKPAWIS – Anakpawis

8. ANG KABUHAYAN – Ang Kabuhayan

9. ALIF – Ang Laban ng Indiginong Filipino

10. ANAC-IP – Ang National Coalition of Indigenous Peoples Action Na! Inc.

11. ANGKLA – Angkla: Ang Partido Ng Mga Pilipinong Marino, Inc.

12. ABS – Arts Business and Science

13. AASENSO – Ating Agapay Sentrong Samahan

14. ABANTE PILIPINAS – Avid Builders of Active Nation’s Citizenry Towards Empowered Philippines

15. BUTIL – Butil Farmers Party

16. KABALIKAT – Kabalikat ng Hustisiya ng Nagkakaisang Manileño (formerly Kabalikat ng Nagkakaisang Manileño)

17. MAYPAGASA – Kilusang MayPagasa

18. KOOP-KAMPI – Kooperatiba-Kapisanan ng Magsasaka ng Pilipinas

19. AYUDA SANDUGO – Mindoro Sandugo Para Sa Kaunlaran, Inc. (formerly Partido Sandugo)

20. KONTRA BROWNOUT – National Association of Electricity Consumers for Reforms, Inc.

21. MARVELOUS TAYO – Noble Advancement of Marvelous People of the Philippines, Inc.

22. 1 UTAP BICOL – One Unified Transport Alliance of the Philippines – Bicol Region

23. PTA – Parents Teachers Alliance

24. PLM – Partido Lakas ng Masa

25. PEACE – Philippine Educators Alliance For Community Empowerment

26. PRAI – Philippine National Police Retirees Association, Inc.

27. PPP – Pilipinas Para sa Pinoy

28. BUKLOD FILIPINO – Pinagbuklod na Filipino Para sa Bayan

29. 1-ANG EDUKASYON – Una Ang Edukasyon

30. WOW PILIPINAS – Wow Pilipinas Movement

31. YACAP – You Against Corruption and Poverty

(Daris Jose)

KASADO na ang pag­hahanda ng National Capital Region Police Office (NCRPO) para sa seguridad sa mga lugar na pagdadausan ng paghahain ng certificate of candidacy (COC) ng mga kakandidato sa 2025 national at local elections, na magsisimula, Oct 1.

Sinabi ni NCRPO Director, P/Major General Jose Melencio Nartatez Jr. na may 1,389 tauhan ng NCRPO ang ipapakalat upang mapahusay ang police visibility sa lahat ng itinalagang lokasyon sa paghahain ng COC, kabilang ang mga tanggapan ng Comelec at iba pang pangunahing lugar.

Inatasan din ni Nartatez ang mga district director na tiyaking may sapat na tauhan na nakatalaga upang pamahalaan ang crowd control, at daloy ng trapiko at magbigay ng tulong sa pamamagitan ng mga help desk para sa mga kandidato at publiko.

Tuluy-tuloy din ang pakikipag-ugnayan ng NCRPO sa Commission on Elections (Comelec), local government units, at iba pang pangunahing stakeholder para matiyak ang maayos na proseso sa rehiyon sa filing ng COC sa loob ng Oktubre 1-8, ani Nartatez.

Tiniyak ng Team NCRPO sa publiko ang kanilang kahandaan na panatilihin ang kapayapaan at seguridad sa buong panahong ito. Ang mga pagpupulong ng koordinasyon sa iba’t ibang ahensya at stakeholder ay nagpapatuloy upang matugunan ang mga posibleng hamon at matiyak ang mabilis na pagtugon sa mga umuusbong na sitwasyon.

Umapela rin si Nartatez sa publiko na ma­kipagtulungan sa mga awtoridad at igalang ang mga alituntunin at regulasyon na itinakda ng Comelec.

“Let us all work together to make this crucial step in our democratic process peaceful and orderly,” aniya pa.