HINIKAYAT ni Pangulong Ferdinand Marcos Jr., ang mga Filipino sa Lebanon at Israel na bumalik na ng Pilipinas habang available pa ang mga byahe sa gitna ng tensyon sa Gitna ng silangan.

“We hope that you will avail yourselves of our repatriation program while flights are available,” ang sinabi ni Pangulong Marcos sa mga pinoy sa Lebanon at Israel.

Aniya pa “in the meantime, heed the advisories of the Philippine Embassy and the Lebanese and Israeli governments.”

Idinaan ng Chief Executive ang kanyang panawagan bago pa umalis ng Pilipinas at lumipad patungong Laos para makiisa sa Association of Southeast Asian Nations (ASEAN) summits.

Muli namang tiniyak ng Pangulo sa publiko na gagawin ng gobyerno ng Pilipinas ang lahat upang matiyak ang kaligtasan ng mahigit sa 40,000 Filipino nationals sa Lebanon at Israel.

Nangako rin ang Pangulo na iuuwi niya ang mga ito sa Pilipinas.

Sinabi pa niya na wala namang naiulat na Filipinong nasaktan sa krisis sa sunud-sunod pag-atake sa Hezbollah sa mga nakalipas na araw.

“Our embassies have been coordinating with the Filipino community on this matter and working on securing exit papers and transportation for those returning,” aniya pa rin.

Sa 1,500 initial applicants para sa repatriation mula Lebanon, pangatlong batch ang nakauwi habang may 500 naman ang pino-proseso ang kanilang mga papel.

Sinabi ni Pangulong Marcos na bibilisan ng Department of Foreign Affairs (DFA) ang proseso habang Overseas Workers Welfare Administration (OWWA) ang magtsa-charter sa pagapapauwi sa mga ito sa Pilipinas.

Para sa buwan ng Oktubre, Iuuwi ng Department of Migrant Workers (DMW) at OWWA ang 162 na namimighating Overseas Filipino Workers (OFWs) mula Israel.

“I expect the Secretaries of the DFA and the DMW and the Administrator of OWWA to report to me with updates daily,” aniya pa rin.

Samantala, nanawagan naman ang Pangulo sa lahat ng partido na iwasan ang karahasan at isulong ang mapayapang paglutas sa tunggalian.

“We emphasize the need to adhere to international humanitarian law, especially the principles of proportionality and distinction in response to security threats, and to ensure the protection of civilians at all times,” ang sinabi ng Pangulo.

“The Philippines will always stand for the principles of international law and the safety of Filipinos in the Philippines and overseas,” dagdag na pahayag nito. (Daris Jose)

KUMPIRMADONG tatakbo sa Senado si Pastor Apollo Quiboloy, ang leader ng Kingdom of Jesus Christ (KOJC) na inaresto ng mga awtoridad noon lamang nakaraang buwan sa KOJC compound sa Davao City.

Ayon kay Comelec spokesperson Atty.John Rex Laudiangco na tinanggap ang Certificate of Candidacy (COC) ni Quiboloy ala 1:47 ng hapon nitong Martes, Okt.8 dahil mayroon itong duly authorized representative na nagsumite ng kanyang kandidatura.

Sa pamamagitan ng kanyang kinatawan , inihain ni Atty.Mark Christopher Tolentino ang COC ni Quiboloy.

Si Quiboloy ay inaresto dahil sa arrest warrants dahil umano sa paglabag sa Special Protection of Children Against Abuse, Exploitation, at Discrimination Act maging sa qualified human trafficking.

Kinasuhan din siya ng federal grand jury sa US District Court for the Central District of California para sa conspiracy to engage in sex trafficking by force, fraud and coercion and sex trafficking of children; sex trafficking by force, fraud and coercion; conspiracy; at bulk cash smuggling.

Kasalukuyang nakaditene si Quiboloy sa PNP Custodial Center sa Camp Crame, Quezon City. GENE ADSUARA

MAGLALABAN bilang representante para sa unang distrito ng Davao City sina Puwersa ng Bayaning Atleta (PBA) Partylist Rep. Margarita “Migs” Nograles at incumbent Davao City Rep. Paolo Duterte.

Opisyal na naghain (Martes) ng umaga ng kanyang Certificate of Candidacy (COC) si Nograles sa opisina ng Commission on Elections (COMELEC) sa may Magsaysay Park habang si Duterte ay naghain ng kanyang COC nitong Lunes.

Si Nograles, ay anak ng yumaong Speaker Prospero “Boy” Nograles habang si Duterte ay panganay na anak ni dating pangulong Rodrigo Duterte.

Habang maglalaban naman sa pagka-mayor sina dating Rep. Karlo alexei Nograles at dating presidente Duterte.

Inihain ni Nograles ang kanyang COC ngayong Martes habang isinumite naman ng dating pangulo ang kanyang COC nitong Lunes. (Vina de Guzman)

IKINAALARMA ni Gabriela Women’s Party List Rep. Arlene Brosas ang pagkalat ng mga pekeng partylists na kakandidato sa Kongreso.

Ayon sa mambabatas, taliwas ito sa isinusulong na partylist system na mabigyan ng boses ang marginalized sectors ang mga partylists na pinangungunahan ng mga businessmen, political dynasties, at indibidwal na sangkot sa red-tagging.

“Nakakabahala ang paglipana ng mga pekeng partylist na ginagamit ng political dynasties, mga negosyante, at mga redtagger para isulong ang kanilang pansariling interes,” giit ni Brosas.

Sinabi ni Brosas na dapat na maipatupad ang tunay na representation upang masiguro na ang boses ng mahihirap, kababaihan, manggagawa, at iba pang marginalized sectors ay marinig sa kongreso.

Nanawagan ito sa publiko na maging mapagbantay at ibasura ang mga pekeng partylists na gumagamit sa laban ng marginalized sector bilang plataporma para sa kanilang personal na interes.

“The partylist system was envisioned to provide genuine representation for marginalized sectors in Congress. We call on the public to remain vigilant and support only those partylists that truly represent the interests and aspirations of the marginalized and oppressed sectors. We must ensure that those who genuinely fight for reforms and change for the people have a seat at the table, and not those who are merely using the poor to secure power,” pagtatapos ni Brosas. (Vina de Guzman)

PINANGUNAHAN kahapon, araw ng Martes Oktubre 8 ng Department of Budget and Management (DBM) ang Dugtong Buhay Movement isang bloodletting activity sa Naval Station, Ernesto Ogbinar, Poro Point sa San Fernando, La Union.

Sinabi ng DBM na layon ng aktibidad na mangolekta ng blood donations mula sa mga volunteers mula sa iba’t ibang ahensiya upang makapagbigay ng tulong sa mga taong nangangailangan ng duo lalo na’t napaulat ang pagtaas sa kaso ng dengue.

“This is especially because the latest data from the Department of Health shows that the recorded cases of dengue this year have reached 208,000, which is 68 percent higher than in 2023,” ayon sa DBM.

Ang aktibidad ay alinsunod sa Republic Act 7719 o National Blood Services Act of 1994, na nagpo-protestang ng voluntary blood donation upang matiyak ang ligtas at sapat na suplay.

Ang Dugtong Buhay Movement ay binubuo ng DBM, Philippine Coast Guard, at Philippine Red Cross, sa pakikipagtulungan sa Philippine National Police, Philippine Navy, Philippine Air Force, at Provincial Government ng La Union.

Inaasahan naman ang 400 donors na makikiisa sa bloodletting campaign. (Daris Jose)

ISANG Filipino sa Kingdom of Saudi Arabia ang binitay dahil sa kasong pagpatay sa isang Saudi national.

Sa isang mensahe, sinabi ni Department of Foreign Affairs (DFA) Undersecretary Eduardo de Vega na ginawa na lahat ng departamento ang magagawa nito hinggil sa kaso ng akusadong Filipino kabilang na ang pagpapadala ng presidential letter of appeal, subalit nabigo lamang sila.

“No official confirmation from Saudi authorities yet but yes, our Embassy in Riyadh reports that there was an execution. It was for murder of a Saudi national over money,” ayon kay De Vega.

“We did all we could: court appeal, presidential letter of appeal, trying to get the victim’s family to accept blood money. In the end, our efforts were not successful as the victim’s family wanted the death penalty instead of accepting blood money,” dagdag na wika nito.

Sa kabilang dako, ayaw naman ng pamilya ng binitay na Filipino na ipalathala pa ang naturang kaso.

“Out of deference to their wishes, and out of respect to their privacy, we will withhold details on the case. We appeal to the media and the public to understand and heed the wishes of the family,” ayon kay De Vega.

Samantala, tiniyak naman ni Department of Migrant Workers (DMW) Secretary Hans Leo Cacdac na magbibigay ng tulong ang gobyerno sa pamilya ng binitay na filipino.

”The family is requesting privacy. Rest assured we’re assisting them, the family and this is a case na medyo matagal na rin, nasa OWWA pa ko noon,” ayon kay Cacdac.

”Ýun nga, the family is requesting privacy, galangin na lang natin ‘yung privacy ng family,” ang sinabi ni Cacdac.

Binigyang diin ni Cacdac na ginagawa lahat ng pamahalaan ang lahat ng hakbang hinggil sa kaso.

Sa katunayan aniya ay nakikipagtulungan ang DMW sa DFA para sa agarang pagapapauwi sa labi ng binitay na Pinoy. (Daris Jose)