PINIRMAHAN ni Mayor John Rey Tiangco, kasama si Navotas Schools Division Office Superintendent Dr. Meliton P. Zurbano, mga scholars, at kanilang mga magulang o guardians, ang memorandum of agreement para sa NavotaAs Athletic Scholarship Program kung saan umabot sa 145 Navoteño elementary at high school students na mahuhusay sa sports ang tinanggap ng Pamahalaang Lungsod ng Navotas bilang mga bagong athletic scholars. (Richard Mesa)

NAGBIGAY ang Pamahalaang Lungsod ng Navotas ng scholarship sa may 145 Navoteño elementary at high school students na mahuhusay sa sports.

Kabilang sa mga bagong scholars ang 38 Navotas Division Palaro champions sa athletics, 24 sa swimming, 21 sa taekwondo, 18 sa arnis, at 16 sa badminton.

Kasama rin ang 11 medalists sa table tennis, 10 sa pencak silat, seven sa chess, at siyam sa arnis.

Pinirmahan ni Mayor John Rey Tiangco, kasama si Navotas Schools Division Office Superintendent Dr. Meliton P. Zurbano, mga scholars, at kanilang mga magulang o guardians, ang memorandum of agreement para sa NavotaAs Athletic Scholarship Program.

“This achievement is a testament to your perseverance and dedication in your chosen sports. I encourage you to continue honing your skills and talents, and at the same time, strive hard in your studies to maintain your grades,” ani Mayor Tiangco.

Ang mga athletic scholars ay tatanggap ng P16,500 transportation at food allowance, at P1,500 para sa kanilang uniform at mga gamit kada scholarship term.

Makakakuha din sila ng libreng training sa mga coaches na kinuha ng pamahalaang lungsod at tulong sa pagsali sa mga kompetisyon.

Ang kanilang scholarship ay maaaring i-renew taun-taon kung sila ay manalo ng hindi bababa sa ikatlong puwesto o katumbas nito sa anumang regional o national sports competitions, dumalo sa lahat ng kailangan at nakatakdang pagsasanay at mapanatili ang kanilang mga grado sa paaralan.

“Your success is the success of the entire Navotas community. Keep striving and dreaming. With your determination, you can achieve your dreams,” dagdag ni Tiangco.

Ang pamahalaang lungsod ay nagbibigay din scholarships sa mga estudyante na nagpapakita ng outstanding academic performance at artistic talent, at sa mga anal o mga kaanak ng Top Ten Most Outstanding Fisherfolk.

Bahagi ang MOA signing ceremony ng pagdiriwang ng ika-17th Navotas cityhood anniversary. (Richard Mesa)

NAIS ng isang eksperto na maamyendahan ang Vape Law at maitaas ang legal vaping age sa 25 mula sa kasalukuyang 18.

Sa health literacy media conference sa Subic, Olo­ngapo City, sinabi ng pulmonologist na si Dr. Maricar Limpin, dating pangulo ng Philippine College of Chest Physicians, na kailangan nang maamyendahan ang naturang batas na kilala rin sa tawag na Vaporized Nicotine and Non-Nicotine Products Regulation Act.

Ipinaliwanag ni Limpin na sa kasalukuyan, kahit ang mga batang edad 13 at 15 ay gumagamit na ng vape habang ang mga nagkakasakit naman dahil sa vape ay nasa edad 21 hanggang 23-anyos lamang.

“Ibig sabihin, iyong batas na allowing purchase [ng vape]… dating 21 na binaba pa sa 18. So sigu­ro itaas na lang uli natin. Gawin na lang nating, ­ideally dapat 25,” aniya pa.

Paliwanag ni Limpin, ang pag-mature ng control center ng utak ay nagaganap sa edad na 25 at sa edad aniya na ito ay maaari nang mag-isip ang isang indibidwal kung makasasama sa kanya ang isang gawain.

Sa ganitong edad aniya ay mas kaya na ring kontrolin ng isang tao ang kanyang sarili at hindi na basta nagpapadala lamang sa kanyang mga nakikita sa iba.

Sakaling hindi kaya ang edad na 25 ay maaa­ring gawin na lamang itong 21-anyos.

Hindi lamang naman aniya sa vaping ito maaaring iaplay, kundi sa pag-inom rin ng mga nakalalasing na inumin.

ITINALAGA  ni Pangulong Ferdinand Marcos Jr. si retired Judge Jaime Santiago bilang director ng National Bureau of Investigation (NBI).

Si Santiago ay nanumpa na sa kanyang puwesto kay Executive Secretary Lucas Bersamin kahapon ng umaga.

Nagsilbi si Santiago sa Western Police District (WPD) mula 1979 hanggang 2000. Nagtapos din siya ng BS Crimino­logy sa Philippine College of Criminology (PCCR) mula 1978 hanggang 1988 at kumuha ng kursong Law sa Manuel L. Quezon University (MLQU-LAW) mula 1989 hanggang 1993.

Nakilala rin siya bilang isang “sharpshooter” mula sa Special Weapons and Tactics (SWAT) noong panahon ng WPD at naisapelikula rin ang kanyang buhay noong 1996.

Naging Criminal Law professor din si Santiago sa Emilio Aguinaldo College, Philippine College of Criminology at sa Emilio Aguinaldo College. Nagsilbi rin siyang acting executive/presi­ding judge ng Regional Trial Court (RTC) sa Manila at Tagaytay, at dating Metropolitan Trial Court (MeTC) judge sa Maynila.

Agad namang nag-courtesy call sa mga opisyal ng Department of Justice si Santiago kahapon. Kabilang aniya sa kanyang tututukan sa kanyang bagong tungkulin ay ang pagsugpo ng cybercrimes at scammers sa bansa at pabibilisin pa ang pro­seso nang pagkuha ng NBI clearance.

Ayon kay Santiago, ilan sa marching orders sa kanya ng DOJ ay pagandahin pa ang serbisyo ng NBI at ibalik ang tiwala ng publiko sa ahensiya.  (Daris Jose)

BINUKSAN na ng Social Security System (SSS) ang pintuan upang tumang­gap ng aplikasyon ng calamity loan para sa mga miyembro nito na nakatira at nagtatrabaho sa Taiwan na naapektuhan ng nagdaang 7.2 magnitude na lindol sa nasabing bansa noong Abril 2024.

Ayon sa SSS, ang naturang loan ay bukas sa mga SSS members sa Taiwan hanggang Agosto 20, 2024.

Ayon kay SSS president at CEO Rolando Macasaet ang loan applications ay maaaring isumite sa My.SSS account.

“However, members must first visit the SSS Taiwan Foreign Office in Neihu District, Taipei City, to secure a Cala­mity Loan Reference Number (CLRN) needed in their loan applications. The CLRN is a unique 12-alphanumeric identifier provided to SSS members and is among the requirements for the calamity loan,” sabi ni Macasaet.

Sa ilalim ng programa, ang mga miyembro ay maaaring makakuha ng loan equivalent sa isang buwang salary credit o hanggang P20,000.

Ang mga requirements ng calamity loan ay dapat nakaregister sa My.SSS account sa www.sss.gov.ph at may halos 36 monthly contributions, OFW SSS member at  nakatira sa Taiwan nang maganap ang lindol at walang past due na loan sa SSS.

PATULOY na pinupunan ni Pangulong Ferdinand Marcos Jr., ang mga mahahalagang posisyon sa gobyerno.

Sa katunayan, nagtalaga ang Pangulo ng iba’t ibang personalidad bilang mga bagong opisyal na bubuo sa Department of Foreign Affairs, Department of Health, Department of Information and Communications Technology, Department of Justice, Department of Labor and Employment, Department of Interior and Local Government, Department of Trade and Industry, Department of Transportation, Office of the President at Department of Finance.

Sa Department of Foreign Affairs, itinalaga ng Pangulo sina Raymond R. Balatbat, Chief of Mission, Class II bilang Ambassador Extraordinary and Plenipotentiary to the Kingdom of Saudi Arabia na may concurrent jurisdiction sa Republic of Yemen; Cathe Ryne Denice S. Aguilar, Foreign Service Officer, Class III; Nonito S. Cabrera Jr., Foreign Service Officer, Class III at Chryzl T. Sicat, Foreign Service Officer, Class III.

Sa Department of Health ay itinalaga naman ng Pangulo sina Paolo S. Teston bilang Assistant Secretary, Ferdinand M. Benbenen, Director IV at David A. Aventura Jr., bilang Executive Director.

Pinangalanan din ng Punong Ehekutibo si Maria Delia S. Presquito bilang Director IV ng Department of Information and Communications Technology (National Privacy Commission); Hilda F. Ibuyan, bilang miyembro ng Board of Pardons and Parole ng Department of Justice; Aldwin F. Alegre bilang Deputy Commissioner III ng Bureau of Immigration; at Raymond Anthony C. Dilag bilang Commissioner ng Presidential Commission on Good Government.

Sa Department of Labor and Employment (National Labor Relations Commission), itinalaga ng Chief Executive si Agnes Alexis L. De Grano bilang Presiding Commissioner, Sixth Division at Gavino R. Menses Jr., bilang Commissioner, tatayong kinatawan ng Employer Sector, Sixth Division.

Sa National Wages and Productivity Commission ay itinalaga ni Pangulong Marcos si Edgar B. Lim, bilang miyembro, tatayong kinatawan ng Employees Sector, Regional Tripartite Wages and Productivity Board, Region IX; Roberto G. Valerio bilang miyembro, tatayong kinatawan ng Employees Sector, Regional Tripartite Wages and Productivity Board, Region IX at Princess Nellaine S. Yting bilang miyembro, tatayong kinatawan ng Workers Sector, Regional Tripartite Wages and Productivity Board, Region IX.

Sa kabilang dako, sa Department of the Interior and Local Government (Philippine Commission on Women) ay itinalaga ng Pangulo si Catalina L. Pizarro bilang miyembro, tatayong kinatawan ng Senior Citizens Sector at Myrna T. Yao bilang miyembro, tatayong kinatawan ng Business and Industry Sector.

Sa Department of Trade and Industry ay itinalaga ng Pangulo si Cleotilde M. Duran bilang Provincial Trade and Industry Officer habang sa Philippine Creative Industries Development Council ay itinalaga naman nito si Conrado T. Onglao bilang miyembro, Public Sector Representative ng Cultural Sites Domain.

Sa Department of Transportation (Civil Aeronautics Board) ay itinalaga ng Pangulo si Maria Elbam S. Moro bilang Deputy Executive Director III; National Intelligence Coordinating Agency (National Maritime Aerial Reconnaissance and Surveillance Center) Jesus Leonardo M. Auxilio bilang Executive Director habang sa Office of the President (Games and Amusement Board) ay itinalaga si Francisco J. Rivera bilang chairman.

Samantala, sa Presidential Commission on Good Government (Bataan Shipyard and Engineering Company Inc., ay itinalaga ni Pangulong Marcos si Anthony C. Castelo bilang vice-chairman/ Chief Operating Officer at miyembro ng Board of Directors.

Sa Department of Finance (Securities and Exchange Commission) ay itinalaga ng Pangulo si Rogelio V. Quevedo bilang Commissioner.

Tanging korte lamang ang maaring magbigay ng kautusan para mabawi ang mga nakumpiskang colorum na sasakyan.

Sinabi ng Land Transportation Office (LTO), na hindi sila basta naglalabas ng mga nakumpiskang colorum na sasakyan kahit na nakapagbayad na ang mga operators ng mga multa.

Giit ni LTO chief Vigor Mendoza na marapat na kumuha ang mga operators ng court order bago nila mai-release ang nasabing sasakyan.

Layon ng nasabing hakbang ay para tuluyang mapahinto ang operasyon ng colorum na sasakyan sa bansa.
Inirereklamo kasi ng mga legal na may prankisa na nababawasan ang kanilang kita dahil sa talamak an pamamasada ng mga kolurm na sasakyan sa bansa.

Dumaranas umano ng marahas na pagdidisiplina sa kanilang mga tahanan ang halos 400 milyong mga bata sa buong mundo, batay sa isinagawang pag-aaral ng UN Children’s Fund (UNICEF).

Ang mga naturang bata ay may edad 5 pababa kung saan natukoy na dumaranas sila ng pangmamaltrato, physical at psychological discipline katulad ng pamamalo at pang-iinsulto, atbpa.

Kabilang sa mga psychological abuse na kinokonsidera ng UNICEF ay ang pagsigaw sa mga bata, at pagtawag sa kanila bilang mga tamad at bobo.

Habang ang physical abuse ay kinabibilangan ng pamamalo, pananampal, panggugulo, at iba pang paraan ng pananakit sa mga bata.

Mula sa halos 400 million na mga bata, 300 million sa kanila ang umano’y nakakaranas ng physical punishment.

SInabi rin ng UNICEF na bagaman ipinagbabawal ang corporal punishment sa mga bata, halos 500 million ng mga bata umano sa buong mundo na may edad lima pababa ay walang legal na proteksyon laban dito.

Ayon kay UNICEF Executive Director Catherine Russell, kung ang mga bata ay laging nakakaranas ng physical o verbal abuse sa kanilang mga tahanan, o kung sila ay pinagkakaitan ng social at emotional care mula sa kanilang mga magulang, maaapektuhan ang kanilang pagmamahal sa sarili at kabuuang pagtanda. (Gene Adsuara)

BALIK na ang online transactions ng Philippine National Police-Civil Security Group’s online system.

Ito ay matapos na naayos na nila ang naganap na data breach noong Mayo 17.

Sinab ni CSG spokesperson Lt. Col. Eudisan Gultiano, na matitiyak na ngayon na ang Firearms and Explosives Office (FEO) online system ay mayroon ng mga bagong security features para maiwasan ang data breach.

Patuloy na rin silang tumatanggap ng mga aplikasyon ng firearms registration. (Daris Jose)