ISANG umano’y tulak ng ilegal na droga na itinuturing bilang High Value Individual (HVI) ang natimbog ng pulisya sa ikinasang buy bust operation sa Valenzuela City, kamakalawa ng gabi.

Kinilala ng bagong hepe ng Valenzuela police si P/Col. Nixon Cayaban ang naarestong suspek na si alyas ‘Dante Lalog’, 38, ng Tañada Subd., Brgy. Gen T De Leon.

Sa kanyang ulat kay NPD Director P/BGen. Rizalito Gapas, sinabi ni Col. Cayaban na nakatanggap ng impormasyon ang mga operatiba ng Station Drug Enforcement Unit (SDEU) na patuloy pa rin umano ang suspek sa kanyang ng ilegal drug activities kaya ikinasa nila ang buy bust operation kontra sa kanya.

Nang tanggapin ng suspek ang marked money mula sa pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba dakong alas-5:00 ng hapon sa Karen Avenue, beside THOA bastketball Court, Brgy. Gen. T De Leon.

Ani PMSg Ana Liza Antonio, nakumpiska sa suspek ang nasa 5 grams ng hinihinalang shabu na may katumbas na halagang P34,000 at buy bust money na isang tunay na P500 bill at 10-pirasong P1,000 boodle money.

Sa record ng SDEU, dati ng naaresto ang suspek dahil din sa pagbebenta ng ilegal na droga subalit, nang makalabas ay muli naman umanong nagbenta ng shabu.

Mahaharap ang suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)

HALOS P.2 milyong halaga ng droga ang nasamsam sa apat na hinihinalang drug personalities matapos maaresto ng pulisya sa magkahiwalay na lugar sa Caloocan City.

Sa nakarating na report kay Caloocan police chief P/Col. Ruben Lacuesta, habang nagpapatrulya ang mga tauhah ng Cadena De Amor Police Sub-Station sa Robes 1, Brgy. 175 dakong alas-10:57 ng gabi nang makita nila ang isang lalaki na may iniabot na isang plastic sachet ng hinihinalang shabu sa kanyang kausap.

Nang lapitan nila, tumakbo ang mga suspek kaya hinabol nila ang mga ito hanggang makorner si alyas ‘Ungas’ at nakuha sa kanya ang isang dalawang medium plastic sachets na naglalaman ng 20 grams ng hinihinalang shabu na may estimated value na P136,000 habang nakatakas ang nag-abot sa kanya ng droga.

Bandang alas-11:50 ng gabi nang maaresto naman ng mga tauhan ng Caloocan Police Sub-Station 13 si alyas ‘Tobats’ sa Phase 7C, Kaagapay Road,  Brgy. 176, Bagong Silang matapos makuhanan ng isang medium transparent plastic sachet na naglalaman ng nasa 4.5 grams ng hinihianalang shabu na may katumbas na halagang P30,600.00.

Sa Sawata St., Brgy. 35, natimbog naman ng mga tauhan ng Tuna Police Sub Station-1 na nagsasagawa ng anti-criminality operation ang dalawa pang drug suspects matapos makuhanan ng dalawang plastic sachets na naglalaman ng aabot 4.1 gramo ng umano’y shabu na nagkakahalaga ng P27,880.00.

Iisyuhan lang sana sila ng mga pulis ng Ordinance Violation Receipt dahil sa paglabag sa umiiral na ordinansa ng lungsod na pagsisigarilyo sa pampublikong lugar subalit, tumakbo ang mga suspek kaya hinabol sila ng mga arresting officers hanggang sa makorner at maaresto, alas-11:30 ng gabi.

Mahaharap ang mga suspek sa kasong paglabag sa Comprehensive Dangeorus Drug Act of 2002. (Richard Mesa)

WALA ng buhay nang matagpuan ang isang palaboy na lalaki matapos umanong magbigti sa ilalim ng isang footbridge sa Caloocan City.

Inilarawan ng pulisya ang biktimang si alyas “Pogi”, ayon sa bansag sa kanya ng kanyang mga kapwa palaboy na nasa edad 40 hanggang 50, nakasuot ng pulang t-shirt, short pants at pulang tsinelas.

Sa ulat nina P/SSg. Nino Nazareno Paguiringan at P/SSg. Rodolfo King Bautista kay Caloocan police chief P/Col. Ruben Lacuesta, alas-7:20 ng umaga nang makita ang nakabiting bangkay ng biktima sa ilalim ng footbridge sa kanto ng EDSA at A. De Jesust St. na may nakapulupot na kable sa kanyang leeg.

Unang sinisi umano ng ilang mga netizen ang sala-salabat na kable ng telcos sa lugar na posible umanong pumulupot sa leeg ng biktima na naging sanhi ng kanyang kamatayan.

Gayunman, lumutang ang 68-anyos at 41-anyos na kasamahang palaboy ng biktima at nagpahayag sa pulisya na pagpatiwakal umano ang biktima na sanhi ng kamatayan nito kung kaya wala umanong kinalaman ang mga sala-salabat na kable o ang “spaghetti” wire sa kanyang pagkamatay.

Sa pahayag ng mga testigo sa pulisya, napansin na nila ang panginginig ng katawan ng biktima at hindi mapakali bunga ng depresyon bago matuklasan ang kanyang bangkay.

Patuloy namang hinahanap ng pulisya ang pinakamalapit na kaanak ng biktima para sa kanyang pagkakakilanlan. (Richard Mesa)

NASAMSAM ng pulisya sa magkapatid na ginang na sangkot umano sa pagtutulak ng droga ang mahigit P.5 milyong halaga ng shabu makaraang maaresto sa buy bust operation sa Caloocan City, Martes ng umaga.

Kinilala ni Caloocan police chief P/Col. Ruben Lacuesta ang naarestong mga suspek na sina alyas Pinky, 54 ng Brgy. 5 at alyas Lucel, 46 ng Malolos, Bulacan.

Ayon kay Col. Lacuesta, ikinasa ng mga operatiba ng Caloocan Police Station Drug Enforcement Unit (SDEU) sa pangunguna ni P/Lt. Restie Mables ang buy bust operation kontra sa mga suspek matapos ang natanggap na impormasyon hinggil sa umano’y ilegal drug activities ng mga ito.

Matapos tanggapin ng mga suspek ang P6,500 marked money na kinabibilangan ng isang tunay na P500 bill at anim pirasong P1,000 boodle money mula sa pulis na nagpanggap na buyer kapalit ng isang plastic sachet ng shabu ay agad silang inaresto ng mga operatiba sa Jacinto St., Brgy. 5.

Ani Lt. Mables, nakumpiska nila sa mga suspek ang humigi’t kumulang 77 grams ng hinihinalang shabu na may standard drug price value na P523,600.00, buy bust money, cellphone at coin purse.

Sinabi ni Col. Lacuesta na sasampahan nila ang mga suspek ng kasong pagsasabuwatan, pag-iingat at pagbebenta ng ilegal na droga sa ilalim ng R.A. 1965 o ang Comprehensive Dangerous Drug Act of 2002 sa piskalya ng Lungsod ng Caloocan.

Pinuri naman ni Northern Police District (NPD) Director P/BGen. Rizalito Gapas ang Caloocan police sa kanilang pagsisikap para mahuli ang mga taong sangkot sa pagpapakalat ng ilegal na droga na nagresulta sa pagkakatimbog sa mga suspek. (Richard Mesa)

NASAWI ang 36-anyos na lalaki habang sugatan naman ang kanyang kapatid matapos pagsasaksakin ng isa sa apat na kalugar makaraang umawat ang mga biktima sa away sa Malabon City.

Dead-on-arrival sa Makatao hospital sanhi ng tinamong tatlong saksak sa katawan ang biktimang si Marlon Dollete, habang ginagamot naman sa Tondo Medical Center sanhi ng saksak sa ibabang bahagi ng dibdib ang kanyang kapatid na si Flaviano, 27, kapwa ng Blk 15, Lot 17, Karisma Ville, Brgy. Panghulo

Nakapiit naman ngayon habang nahaharap sa kaukulang kaso ang mga suspek na sina alyas Ryan, 18, alyas Joven, 28, at alyas Seth, 27, habang pinaghahanap pa ng pulisya si alyas Samboy, nasa hustong gulang, pawang residente ng Alley 9, Karisma, Brgy. Panghulo.

Sa ulat nina PSSg Jeric Tindugan at PSSg Allan Bermejo Jr kay Malabon police chief P/Col. Jay Baybayan, dakong alas-6:40 ng Linggo ng gabi nang maganap ang insidente sa Karisma Village, Road 4, Brgy., Panghulo.

Sa pahayag ng mga saksi sa pulisya, nag-iinuman ang mga suspek malapit sa naturang lugar nang isang alyas Roderick na nangungupahan sa isang apartment sa lugar ang nagbabala sa kanila na ikinagalit ng mga ito at hinanap si ‘Roderick”.

Nang makita, sinapak ni ‘Ryan’ sa mukha si ‘Roderick” hanggang sa umawat na ang iba pang mga nangungupahan kabilang ang magkapatid subalit, pinagtulungang hawakan ng tatlo sa mga suspek ang mga biktima bago pinagsasaksak ni ‘Samboy’.

Matapos ang insidente, mabilis na tumakas ang mga suspek subalit, naaresto naman sa follow-up operation ang tatlo sa kanila at narekober ang isang bladed weapon (bolo) habang isinugod naman ang mga biktima sa nasabing pagamutan subalit, hindi na umabot ng buhay si Marlon, samantalang inilipat sa TMC hospital ang kanyang kapatid. (Richard Mesa)

TINULIGSA ni House Deputy Minority Leader at ACT Teachers Party-list Rep. France Castro ang idinepensang P125 million confidential funds na nakalaan sa opisina ni Vice President Sara Duterte.

Ayon sa mambabatas, ang kontrobersiyal na kaso ay hindi lamang “theoretical” kundi naging sanhi para hindi mailaan ang naturang milyong pisong pondo sa mga Pilipino na mas nangangailangan.

Sinabi ng mambabatas na nilabag ng illegal at unconstitutional transfer ng P125M sa Office of the Vice President para sa confidential funds ang lahat ng rules sa tamang paggamit ng naturang pondo.

“It represents a massive redirection of public resources away from essential services and towards opaque purposes with no accountability. It is a glaring example of bureaucrat capitalism and should be stopped,” ani Castro.

Tinukoy  ni Castro ang petition na inihan niya kasama ang iba pang miyembro ng Makabayan Bloc sa Supreme Court na kumukuwestiyon sa constitutionality ng confidential funds na ibinigay sa opisina ng VP noong 2022.

Ang pondo ay mabilis na nagamit sa loob ng 11-araw lamang, ayon sa Commission on Audit.

“The petitioners, including myself, Reps. Brosas and Manuel, former Reps. Zarate, Gaite, Cullamat, Palatino, and Bayan Muna Chairman Neri Colmenares, are seeking the restitution of these P125 million in public funds that were unlawfully used with no oversight. We have asked the Supreme Court to direct COA to fully audit how this money was spent,” dagdag ni Castro.

Sinabi ni Castro na sa 2022 national budget ay walang alokasyon sa anumang confidential funds para sa civilian agencies tulad ng Office of the Vice President.

“There was no congressional authorization for the OVP to receive and spend P125 million in confidential funds, in clear violation of our laws,” giit pa nito. (Vina de Guzman)

INARESTO ng mga operatiba ng National Bureau of Investigation-Cybercrime Division (NBI-CCD) ang mga opisyal at empleyado ng isang recruitment agency  dahil sa patong-patong na reklamo ng kanilang mga aplikante .

Nag-ugat ang kaso dahil sa reklamo ng kamag-anak ng isa sa biktima kung saan ang mga aplikante umano ay kinukulong sa tanggapan ng Maanyag International Manpower Corp sa Paranaque City. Ang kanilang pasaporte at iba pang mga travel documents ay hawak din nila sa pangamba na isusumbong sila sa pulisya  kung aalis sila.

Bunsod nito, nagsagawa ng operasyon ang mga operatiba ng NBI-CCD na nagresulta sa pagkaka-rescue ng 15 biktima.

Kinumpirma naman ng mga biktima ang nabanggit na mga reklamo at sinabi nila  kinakailangan umano nilang magtrabaho, kabilang ang paglilinis at paglalaba ng mga damit ng mga kanilang office staff at pamilya nil ana siyang kabayaran sa kanilang mga dokumento, processing fee at airplane ticket pabalik sa kanilang probinsiya.

Kasong paglabag sa Section 5 of R.A. No. 10022 (Migrant Workers and Overseas Filipinos Act of 1995, as amended); Section 4 of R.A. No. 10364 (Anti-Trafficking in Persons Act of 2003); Estafa sa ilalim ng Article 315  ng Revised Penal Code; at Serious Illegal Detention sa ilalim ng Article 267 ng Revised Penal Code, all in relation to Section 6 of R.A. No. 10175 (Cybercrime Prevention Act of 2012)  ang kinakaharap ng mga inarestong opisyal at empleyado . GENE ADSUARA

PRAYORIDAD ng Maharlika Investment Corp. (MIC), ahensiya na mangangasiwa sa sovereignty wealth fund, ang pamumuhunan sa energy transmission lines sa iba’t ibang rehiyon.

Sinabi ni MIC President and Chief Executive Officer Rafael D. Consing Jr., na marami ng investments sa ‘generation at distribution side’ sa sektor ng enerhiya.

“So Maharlika will be focused on lines, just the transmission lines. We do not see ourselves investing in the generation side or the distribution side,” ang sinabi ni Consing.

“Also if you look at where investments in the energy sector is most required, it is in the lines,” aniya pa rin sabay sabing “So therefore we want to be able to make a difference by focusing only on the grid, on building island grids.”

Aniya pa, magiging bahagi ito ng P35 billion na investments sa energy projects ngayong taon.

Nauna rito, nilagdaan ni Consing kasama ang mga opisyal mula sa National Electrification Administration, at Palawan Electric Cooperative (PALECO), ang isang memorandum of agreement na magpapahusay sa electrical infrastructure ng PALECO.

Layon ng kolaborasyon o pagtutulungan na gawing matatag ang suplay ng kuryente sa Palawan upang mapanatili na makapaghikayat ng mga negosyante at industriya sa lalawigan para sa paglago ng ekonomiya nito.

Nakamandato sa kasunduan na ang mga partido ay ‘mutually provide technical assistance and share relevant data to achieve this goal and direct MIC to conduct studies to assess the present electrical system of Palawan and determine ways to improve it.”

Mayroon namang diskresyon ang MIC na tustusan o gastusan ang pag-upgrade rito, subject sa availability ng pagpopondo at dapat ay consistent sa Investment strategy at risk management frameworks nito.

Samantala, nakatakda namang palawigin ng PALECO ang lahat ng tulong na may kaugnayan sa implementasyon ng memorandum at makapagbigay ng ‘technical at operational expertis” kabilang na ang access sa kaugnay na data at information, sa mga collaborators o katuwang.

“This project will directly enhance the quality and reliability of electricity services across Palawan, from its bustling urban centers to its remotest corners,” ayon kay Consing.

“With the province aiming to double its tourism visits to 5 million, this investment is not just an option; it is an imperative,” dagdag na wika nito. (Daris Jose)

MULING itinalaga ni Pangulong Ferdinand R. Marcos Jr. si Hans Leo Cacdac bilang ad interim Secretary ng Department of Migrant Workers (DMW).

Ang reappointment ni Cacdac, makikita sa listahan ng presidential appointees na ipinalabas ng Malakanyang ay patunay na patuloy na ‘nagtitiwala at kumpiyansa’ ang Pangulo kay Cacdac.

Ipinagpaliban naman ng CA ang kumpirmasyon ni Cacdac dahil ang Second Regular Session ng 19th Congress ay nag- adjourn na.

Bago pa ito, itinalaga na ng Pangulo si Cacdac bilang ad interim Secretary ng DMW nito lamang Abril ng taong kasalukuyan, 7 buwan matapos na italaga siya bilang officer-in-charge ng departmento noong Setyembre 2023. Itinalaga siya bilang DMW officer-in-charge makaraang pumanaw si dating Secretary Susan “Toots” Ople noong Agosto ng nakaraang taon.

Samantala, si Cacdac ay nagsilbi bilang Undersecretary ng DMW; Executive Director V ng Overseas Workers Welfare Administration (OWWA); Executive Director V ng Philippine Employment Administration (POEA); at Undersecretary ng Department of Labor and Employment (DOLE).

Nagsilbi rin siya bilang Deputy Executive Director V ng POEA; Executive Director IV ng National Conciliation Mediation Board-DOLE; Director IV ng Bureau of Labor Relations-DOLE; at Associate Lawyer and Urban Poor Unit Coordinator ng Sentro ng Alternatibong Lingap Panligal (SALIGAN) sa pribadong sektor. (Daris Jose)