PINURI ng chairman ng House Committee on Dangerous Drugs ang pinaiiral na bloodless anti-illegal drug campaign ni Pangulong Bongbong Marcos.

Ayon kay Surigao del Norte Rep. Robert Ace Barbers, ang bagong pamamaraang ito ay ganap na nagpahinto sa mga pang-aabuso ng mga dating nagpapatupad ng batas kontra sa iligla na droga na nag-aakusa, humahatol, at nagpapatupad ng parusa sa mga pinaghihinalaang drug trafficker, adik, at gumagamit ng ilegal na droga.

Sinabi pa ni Barbers na ang kasalukuyang pamamaraan ng administrasyon laban sa droga ay mas epektibo at makatao. Ayon sa kanya, nakamit nito ang higit pa sa mga inaasahang resulta nang hindi gumagamit ng extra-judicial killings.

Ayon sa mga ulat, sinabi ni Barbers na ang opisyal na bilang ay nagpakita na umabot sa 6,229 na napaslang na drug personalities sa pamamagitan ng extra-judicial killings hanggang noong Marso 2022, habang tinatayang higit sa 20,000 sibilyan ang napatay sa ilalim ng nakaraang administrasyon ayon naman sa tala ng mga human rights group.

Noong 2022, hinimok ng noo’y si outgoing President Rodrigo Duterte ang kaniyang kahaliling si Marcos Jr. na ipagpatuloy ang giyera laban sa droga sa “kanyang sariling paraan,” kung saan idineklara naman ni Marcos Jr. na mas tututukan niya ang pagpigil at rehabilitasyon ng mga nalulong sa droga, at nagsabing “ang pagpatay ay hindi kailanman bahagi ng kanyang plano.”

Sa kanyang ikatlong State of the Nation Address (SONA) noong Lunes, muling ipinahayag ni Pangulong Marcos Jr., ang kanyang polisiya na magpapatuloy siyang susunod at susundin ang umiiral na polisiya laban sa iligal na droga na nakatuon sa ligal at matuwid na paraan na mas makatao at ang pagpaslang ay hindi kailanman bahagi nito.

Pinuri ni Barbers ang kasalukuyang mapayapang kampanya laban sa droga, kung saan naitala 71,500 operations, nakumpiska ang halagang P44 bilyon ng ilegal na droga, at naaresto ang 97,000 na drug personalities, kasama na rito ang higit sa anim na libo na high-value targets. Kasama rin sa mga naaresto ang 440 na empleyado ng gobyerno, 42 ang uniformed personnel, at 77 mga halal na opisyal.

Ibinunyag din ng Pangulo na ang kasalukuyang kampanya laban sa droga ay nagresulta ng freezing of assets ng mga big-time drug traffickers na nagkakahalaga ng higit sa P500 milyon, at conviction rate na 79 porsyento laban sa mga kasong isinampa sa korte para sa iligal na droga.

Habang ang gobyerno ay nakatuon sa pag-iwas at rehabilitasyon ng mga pinaghihinalaang drug suspects, hinimok ni Barbers ang mga awtoridad na may kinalaman sa anti-drug operation na mas bigyang-pansin ang pagbawas ng suplay ng droga kaysa sa pagbawas ng demand.

Sa isang ulat na ginawa ng US International Narcotics Control Strategy noong 2010, tinatayang ang ilegal na kalakalan ng droga sa Pilipinas ay nasa $6.4 hanggang $8.4 bilyon taun-taon.

Dahil sa geographical location ng bansa, ginagamit ng mga international drug syndicate, na karamihan ay mga miyembro ng Chinese drug triad, ang Pilipinas bilang transit hub para sa ilegal na kalakalan ng droga. Gumagamit sila ng mga local drug syndicate at gang bilang mga “mules” para mag-transport ng droga patungo sa ibang mga bansa. (Vina de Guzman)

NAGMISTULANG ‘water world’ ang malaking bahagi ng Metro Manila sa mala-Ondoy na malawakang pagbaha dulot ng matin­ding epekto ng southwest monsoon na pinalala pa ng bagyong Carina, ayon sa report na tinanggap ng National Disaster Risk Reduction and Management Council (NDRRMC) nitong Miyerkules.

Dahil dito, isinailalim na sa state of calamity ang buong Metro Manila matapos aprubahan ng Metro Manila Council ang rekomendasyon ni Interior and Local Government Secretary Benhur Abalos kay Pangulong Ferdinand Marcos Jr.

Sa ginanap na situation briefing sa Camp Aguinaldo na pinanguhan ng Pangulo, sinabi ni Abalos na makabubuting isailalim sa state of calamity ang MM upang mabigyan ang mga LGU ng access sa mga karagdagang pondo para sa pagtugon sa kalamidad, kasama na dito ang paglalatag ng price freeze sa mga basic goods.

Ayon kay Abalos, naglabas na rin ito ng mga direktiba sa mga LGU upang pabantayan ang mga sitwasyon sa ground level, tumulong sa mga evacuation. Malaking bahagi ng Metro Manila at kalapit na probinsya ang binaha.

Ayon sa ulat, maraming mga pangunahing highway at inner roads ang dumanas ng mula gutter hanggang abot baywang na lalim ng tubig baha dahil sa walang humpay na malalakas na pag-ulan simula pa nitong Martes ng gabi na tumindi hanggang umaga nitong Miyerkules.

Iniulat ang mga pagbaha sa mga lungsod ng Manila, Marikina, Quezon, Pasay, Taguig at Valenzuela. Gayundin sa Mandaluyong City at lungsod ng San Juan.

Sinabi ni Abalos na 70% ng Navotas City, 80% ng Malabon City at 60% ng Valenzuela City ay binaha dahil na rin sa nawasak na flood control.

Maraming mga pasahero ang na-stranded habang kaunti lamang ang mga bumibiyaheng sasakyan dahil hindi makakalusot sa baha at may mga tumirik at inanod ng baha. Nagdulot rin ang mga pagbaha ng pagkakabuhol-buhol ng daloy ng trapiko sa malaking bahagi ng Metro Manila.

Magugunita na ang bagyong Ondoy ay naminsala sa malaking bahagi ng bansa dahil sa idinulot na malakas na ulan na kumitil ng buhay ng 710 katao, 439 missing habang nasa P6.2 bilyon ang iniwang pinsala noong Setyembre 2009. (Daris Jose)

UMALIS ng bansa patungo Germany si Vice President Inday Sara Duterte, kasama ang pamilya nito at ang kanyang ina, madaling araw ng July 24 .

Pasado ala-una ng madaling araw kahapon ng makalipad sa NAIA ang Emirates Airlines flight EK-335, matapos ma-delay ito patungong Munich, Germany via Dubai.

Hindi pa nagbibigay ng ano mang opisyal na statement ang Office of the Vice President kung bakit umalis si VP Inday Sara sa gitna ng delubyong nararanasan ngayon ng Sambayanan Filipino lalo na sa Metro Manila dulot ng baha at sama ng panahon.

Kasama ni VP Sara ang kanyang asawang si Mans Carpio mga anak nila at ina nitong si Elizabeth Zimmerman. (Daris Jose)

TINIYAK ni Education Secretary Sonny Angara na nakatakdang ipalabas ang P5,000 “chalk allowance” para sa mga guro kasabay ng pagbubukas ng klase sa Hulyo 29, araw ng Lunes.

“‘Yung chalk allowance will be released very soon, in time for the opening [of classes]. ’Yun talaga ‘yung timing nun eh,” ayon kay Angara.

“Pagka-bukas ng klase, may allowance na si teacher para iyong pangangailangan, iyong pagkukulang doon sa kanyang classroom, pwede niyang punan o dagdagan,” aniya pa rin.

Sinabi pa nito na ang cash allowance ay tax-free.

Madaragdagan pa aniya ito at magiging P10,000 sa susunod na taon.

Nauna rito, ganap nang batas ang panukalang magtataas sa P10,000 teaching allowance ng mga guro sa pampublikong paaralan sa buong bansa.

Ito’y matapos lagdaan ni Pangulong Ferdinand Marcos Jr., ang RA 11997 o Kabalikat sa Pagtuturo Act sa Palasyo ng Malacañang.

Sa ilalim ng batas, mula sa P5,000 ay gagawin nang P10,000 taunang teaching allowance ng mga guro na maaaring gamitin sa pagbili ng teaching supplies at materials tulad ng chalk, incidental expenses, at iba pang gastos kapag nagtuturo.

Samantala, para naman kay Angara, isa sa may akda ng batas noong siya ay isa pa lamang senador, na ang batas ay “results in fewer instances when teachers have to make out-of-pocket expenses in the performance of their duties.” (Daris Jose)

MAS maraming pamilyang Filipino ang nakaranas ng involuntary hunger nito lamang second quarter ng 2024 kumpara sa nakalipas na quarter.

Ito ang lumabas sa resulta ng survey ng Social Weather Stations (SWS), ipinalabas araw ng Martes, Hulyo 23, natuklasan ng SWS na may 17.6% ng pamilyang Filipino ang nakaranas ng involuntary hunger, pagiging gutom at wala talagang makain, kahit isang beses sa nakalipas na tatlong buwan.

Sinabi pa ng SWS na “the figure was 3.4 points above the 14.2 percent in March 2024 and the highest since the record high of 30.7 percent during the Covid-19 lockdowns in September 2020.”

Gaya nitong Marso, natuklasan sa June survey na ang Kalakhang Maynila ang pinakamataas, naapektuhan ang 20% ng pamilya, sinundan ng Balance Luzon (Luzon sa labas ng Metro Manila) na may 19.6%, Mindanao na may 15.7% at Visayas na may 13.7%.

Iniugnay ng SWS ang 3.4-point na pagtaas sa pagkagutom sa pagtaas sa Mindanao (mula 8.7% hanggang 15.7%), Balance Luzon (mula 15.3% hanggang 19.6%), at Metro Manila (mula 19% hanggang 20%), sinamahan ng bahagyang pagbabago sa Visayas ( mula 15% na naging 13.7%).

Sinabi ng SWS na ang 17.6% hunger rate nito lamang Hunyo ay kabuuan ng 12.8% na nakaranas ng “moderate hunger” at 4.9% na nakaranas naman ng “severe hunger.”

Ang “moderate hunger” ay tumutukoy sa mga nakaranas ng pagkagutom “only once” o “a few times” sa nakalipas na tatlong buwan habang ng “severe hunger” ay tumutukoy naman sa mga nakaranas ng “often” o “always” sa nakalipas na tatlong buwan.

Kumpara nitong buwan ng Marso, ang “moderate hunger” ay hirap na gumalaw mula 12.2% habang ang “severe hunger” ay tumaas ng 2%.

Sa Kalakhang Maynila, ang “moderate hunger” ay bumaba sa 13.3% mula sa 14.3% habang ang “severe hunger” ay tumaas sa 6.7% mula sa 4.7%.

Sa Balance Luzon, tumaas ang “moderate hunger” sa 14.5% mula sa 13.1% habang ang “severe hunger” ay tumaas sa 5.1% mula sa 2.1%

Samantala, sa Visayas, bumaba ang “moderate hunger” sa 10.7% mula sa 13.7% subalit ang “severe hunger” ay tumaas sa 3% mula sa 1.3%

Sa Mindanao, tumaas ang “moderate hunger” sa 10.7% mula sa 8%, at maging ang “severe hunger” sa 5% mula 0.7%

Ang SWS Survey ay isinagawa mula Hunyo 23 hanggang Hulyo 1 sa pamamagitan ng face-to-face interviews sa 1,500 adults na may edad na 18 taon pataas sa buong bansa. (Daris Jose)

PERSONAL na binisita at kinamusta nina Mayor John Rey Tiangco, at Cong. Toby Tiangco ang nasa 200 pamilyang pansamantalang nanunuluyan sa Tanza National High School matapos lumubog sa baha ang kanilang bahay dahil sa pananalasa ng bagyong Carina. Pinaalalahanan nila ang lahat na mag-ingat at manatili muna sa kanilang tahanan para sa manatiling ligtas ang bawat isa dahil sa possible pa rin na mga pag-ulan at mataas na high tide, ngunit operational naman anila lahat ng kanilang mga pumping stations para mabawasan ang pagtaas ng tubig. (Richard Mesa)

NAGPATUPAD ang Marikina City Government ng forced evacua­tion sa kanilang mga residente at inilikas sila sa ligtas na lugar kasunod na rin ito nang tuluyan nang pag-apaw ng Marikina River, dulot ng malalakas na pag-ulan dahil sa bagyong Carina at Habagat.

Mismong si Marikina City Mayor Marcelino Teodoro na ang nagkumpirma na hanggang 2:00PM Miyerkoles ng hapon ay umabot na sa 20 metro ang antas ng tubig sa Marikina River.

Ito ay nangangahulugang nasa ikatlong alarma na ang ilog, na hudyat na kinakailangan na ng puwersahang paglilikas ng mga residente. Bukas na rin umano ang lahat ng flood gates ng Manggahan.

Sa update naman ng Marikina Public Information Office, dakong 5:30AM nang itaas ang unang alarma sa ilog, matapos na tumaas ang antas ng tubig sa 15 metro. Nangangahulugan ito na kailangan nang mag­handa upang lumikas ang mga residente.

Pagsapit naman ng 6:45AM, tumaas ang antas ng tubig sa ilog sa 16 na metro o ikalawang alarma, na nangangahulugan ng boluntar­yong paglikas ng mga residente.

Dakong 10:00AM naman nang umabot sa 18 metro ang water level sa Marikina River, na hudyat ng ikatlong alarma.

Patuloy ang pag-ulan sa Metro Manila at iba pang panig ng bansa, kaya’t inasahan na ang patuloy na pagtaas ng tubig sa ilog, gayundin ng mga pagbaha.

Inaasahan namang mananatili muna ang mga inilikas na residente sa mga evacuation cen­ter hanggang sa tulu­yang humupa ang baha sa kani-kanilang mga tahanan.

Paniniguro ng alkalde, tuluy-tuloy ang paglilikas nila sa mga residente, gayundin ang pamamahagi ng tulong, gaya ng mga pagkain, tubig at mga pangunahing pangangailangan sa mga residente.

Aminado si Teodoro na kakaiba ang naranasan nilang ulan sa ngayon dahil sa ilang oras na tuluy-tuloy na malakas na pag-ulan.

Nanawagan rin si Teodoro ng tulong dahil kailangang-kailangan umano ng mga residente nila sa ngayon ng mga tubig, pagkain, gamot at iba pang mga pangunahing pangangailangan.

INATASAN ng Department of Human Settlements and Urban Development (DHSUD) ang lahat ng regional directors na maghanda ng emergency shelters para sa mga residente na tiyak na madi-displaced dahil sa mataas na tubig-baha at iba pang matinding epekto ng bagyong “Carina”.

Sinabi ni DHSUD Secretary Jose Rizalino Acuzar, isang memorandum ang ipinalabas para paganahin ang regional shelter clusters bilang tugon sa epekto ng weather disturbance.

“This is to ensure readiness of the cluster teams to respond to shelter needs of typhoon-affected areas. We are always ready to provide assistance to our affected kababayan,” ayon kay Acuzar.

Ang aktibasyon ng pinaganang shelter clusters ay tugon sa advisory mula sa Philippine Atmospheric, Geophysical and Astronomical Services Administration (Pagasa) hinggil sa malakas na pagbagsak ng ulan sa Kalakhang Maynila, Region 3 at ilang bahagi ng Region 1, 2, 4A, 4B at 5 na maaaring magresulta ng pagbaha at landslides.

Ang kautusan ay iniatas sa DHSUD Regional Offices 1, 2, 3, 4B, 6, 7, 9, 10, 11, 12 13, Cordillera Administrative Region at National Capital Region.

Sa kabilang dako, sinabi ni DHSUD Undersecretary for Disaster Response Randy Escolango na ang regional offices ay inatasan na mahigpit na i-monitor ang kani-kanilang ‘areas of jurisdiction’ at kung kinakailangan ay bilisan ang emergency response at humanitarian assistance.

“The regional directors, are enjoined to coordinate with the respective shelter cluster members within their regions and convene using all available means,” anito.

“We need to ensure that affected families have enough resources and safe shelter. Our regional offices will lead the consolidation of validated reports from the ground so we can take appropriate actions. Secretary Acuzar made it clear that DHSUD must provide the needs of affected families in a timely manner,” ayon pa rin kay Escolango.

At upang matiyak ang ‘real-time reporting at corresponding actions’ ay sinabi ni Escolango na inaatasan ang regional directors na magsumite ng araw-araw na situational report.

Tinatayang daan-daang pamilya ang apektado at napilitan na umalis ng kanilang tahanan dahil sa mataas na tubig-baha dulot na malakas na pag-ulan sa mga nakalipas na ilang araw. (Daris Jose)

TINIYAK ni Department of Social Welfare and Development (DSWD) Secretary Rex Gatchalian na nakahanda na ang departamento na magbigay ng tulong sa local at foreign nationals na maaapektuhan ng nalalapit na pagsasara ng Philippine Offshore Gaming Operators (POGOs) operations sa pagtatapos ng taon.

“Una sa lahat, base sa aming datos, ang karamihang nagtatrabaho o maaaring ma-displace sa mga POGO centers are non-Filipino citizens, although mayroon pa ring mga Filipino,” ayon kay Gatchalian sa isinagawang 2024 Post-SONA Discussions on Environmental Protection and Disaster Risk Reduction.

“The non-Filipino citizens, normally, are victims of human trafficking and we have to work with their respective embassies, which we have done in certain cases, doon sa mga illegal POGOs to make sure that they are, first, provided [with assistance]. Kahit hindi sila mga Filipino, bulnerable at biktima rin sila,” ayon pa rin kay Gatchalian.

Nauna rito, tuluyan nang ipinagbawal ni Pangulong Marcos ang operasyon ng POGO sa bansa.

Sa mahigit na isang oras na State of the Nation Address (SONA) ng Pangulo ay inanunsiyo niya ang pag-ban sa POGO, dahilan para umani ito ng sigawan at standing ovation sa mga bisita sa plenaryo ng Kamara.

Ayon pa kay Pangulong Marcos, nagpapanggap na legitimate entities ang operasyon ng POGO subalit nagdudulot ito ng mas higit pa rito na mula sa gaming ay nagiging financial scamming, money laundering, prostitution, human trafficking, kidnapping, brutal torture at maging murder.

Kailangan na aniya na matigil ang pang-aabuso at hindi pagrespeto sa ating batas at kailangan na rin matigil ang panggugulo ng POGO sa ating lipunan at paglapastangan sa ating bansa.

Inatasan na rin ng Pangulo ang Philippine Amusement and Gaming Corporation (PAGCOR) na itigil at ihinto ang operasyon ng POGOs bago matapos ngayong taon.

Habang inatasan din ni Pangulong Marcos ang Department of Labor and Employment (DOLE) sa pakikipag-koordinasyon sa economic managers na hanapan ng bagong trabaho ang mga Filipino na mawawalan ng trabaho.

Sa pamamagitan aniya nito ay mareresolba ang mga problema na kanilang kinakaharap bagamat hindi naman lahat ay mareresolba nito.

Tinukoy naman ni Gatchalian ang DSWD at Department of Justice na “jointly operating” ang Inter-Agency Council Against Trafficking-Tahanan ng Inyong Pag-asa (IACAT-TIP) Center, isang multi-purpose building na nagbibigay ng matutuluyan o kanlungan para sa mga victim-survivors ng human trafficking.

“We house them there temporarily, work with their governments, so they can go home safely in the fastest possible time,” ayon kay Gatchalian.

Para naman sa mga displaced Filipino workers, tinuran nito na ang DSWD ay maaaring magbigay ng cash aid sa ilalim ng Assistance to Individuals in Crisis Situation (AICS) program.

Ibibigay din ang cash assistance upang magawa ng mga ito na makapagsimula ng maliit na negosyo sa ilalim ngSustainable Livelihood Program (SLP) upang makatulong na makabawi at makabangon mula sa krisis.

“Kung sakaling ang madi-displace ay mamamayan natin, mayroon tayong AICS. The loss of livelihood is a crisis. It is defined as a crisis so mayroon tayong immediate intervention dyan na social welfare. Ibig sabihin ay ayuda kaagad kasi ayaw natin na mawala ang pagkain nila sa mesa, sa hapag,” ang pahayag ni Gatchalian.

“Kung gusto nilang pumasok sa entrepreneurship, sa pagtatayo ng maliit na negosyo, then we can guide them and give them necessary grants sa pamamagitan ng SLP,” dagdag na wika nito.

Sa kabilang dako, sinabi naman ni Gatchalian na ginawa ng DSWD na shelter ang POGO hub para sa families and individuals in street situations (FISS) na umabot sa ilalim ng “Oplan Pag-Abot” program ng departamento.

“These are big facilities na mala-hotel. What we have to do is retrofit a little and put it to good use,” aniya pa rin.

Ang dating POGO building ay isang six-story structure na matatagpuan sa kahabaan ngWilliams Street sa Pasay City. (Daris Jose)

SINABI ni dating Pangulong Rodrigo Duterte na walang kinalaman ang Hakbang ng Maisug sa pagpapalabas ng di umano’y video na nagpapakita na may isang lalaki na may pagkakahawig kay Pangulong Ferdinand R. Marcos Jr. ang gumagamit ng ipinagbabawal na gamot bago pa ang State-of-the-Nation Address.

“The Hakbang ng Maisug national leadership has nothing to do with the release of the video footage showing President Ferdinand Marcos Jr. in the act of snorting cocaine in Maisug gatherings in Canada and the USA,” ang sinabi ni Duterte, araw ng Martes, Hulyo 23 tungkol sa “polvoron” video.

Sinabi ni Duterte na ang video na umiikot ngayon sa iba’t ibang social media platforms ay gawa ng Maisug “volunteers” sa dalawang lugar kung saan walang kaalaman at pahintulot ng Maisug organizing committee.

“The members of the Maisug leadership were just as surprised as the rest of the country when they saw the video for the first time,” ayon kay Duterte.

Ayon pa kay Duterte, kagyat namang hinamon ng kasalukuyang administrasyon ang ‘authenticity’ ng video, tinawag itong “obviously fake video” at isang “malicious crude attempt to destabilize the administration.”

Binigyang diin ni Duterte na ang mahinang pagtatangka ng administrasyon na i-dismiss ang video sa pamamagitan ng simpleng pagtanggi ay nagpalakas lamang ng kumukulong paghihinala sa drug addiction ni Pangulong Marcos.

Aniya, batid ng kahit na sinumang abogado na ang pagtanggi ay ” weakest form of defense.”

“Even the ordinary man on the street knows that the best way to put the issue to rest is for President Marcos to undergo a hair follicle drug test. When undertaken by a credible drug testing center, a negative result would erase all doubts once and for all,” ang sinabi ni Duterte.

Binatikos naman ni Duterte ang “feigned laughter, feeble denial, and complete silence” ni Pangulong Marcos sa halip na ang naging tugon nito ay isailalim siya sa drug test.

Aniya, ang drug user para sa Pangulo ay “no laughing matter” at dapat na siya ang unang makaalam.

Idinagdag pa niya na ang ‘critical juncture’ sa kasaysayan ng bansa, ay nang magbanta siyang magpapadala ng sundalo sa giyera, ang ‘drug habit’ ng Pangulo ay nagpapakita rin ng malinaw at kasalukuyang panganib.

“With due apologies to all the experts who vouched for the authenticity of the video, the refusal of President Marcos to undergo the hair follicle drug test is the best proof not only of the video’s authenticity but, worse, his drug addiction,” ang sinabi ni Duterte.

Winika pa ni Duterte na ang inilabas na pagtanggi ng Department of National Defense (DND) ay isang malaking sampal sa mukha ng bawat makabayan at kagalang-galang na sundalo na bitbit ang “highest code of conduct” ng militar.

“It is bad enough that the DND has to do the dirty job of issuing the denial, and it is worse that in doing so, it has become a party to a despicable act it should have been fighting against in the first place,” ayon kay Duterte.

Sa kabilang dako, kinuwestiyon naman ni Duterte ang mainstream media, minsan na naging ‘most unrestrained press’ sa Asya, sa halip na komprontahin si Pangulong Marcos sa isyu ay mas pinili pa na tumingin sa ibang paraan.

Binatikos din ni Duterte ang Senado at Kongreso sa di umano’y pagsuporta kay Pangulong Marcos sa gitna ng moral at legal crisis.

Aniya, may pagkakataon ang mga ito na magpunta sa tamang bahagi ng kasaysayan subalit sinayang lamang ng mga ito.

“By this act of showing in public what had been long whispered in private, the men and women of Maisug have proven themselves worthy to be called Filipinos,” ang sinabi ni Duterte.

Tinuran pa ni Duterte na in-exposed ng Maisug ang kanilang sarili sa panganib at kapahamakan subalit handa naman ang mga ito na mag sakripisyo na alisin ang pinuno ng estado na isang malaking kahihiyan sa buong mundo.

Binigyang-diin ni Duterte na sa mga susunod na araw ay magiging mahalaga sa bawat Filipino at bansa dahil mangangailangan ito ng desisyon ng bawat Filipino kung magiging bahagi ng MG naghahangad ng katotohanan at iyong sasama na lamang sa coverup.

“It is a choice between standing up and demanding that this country enforce the law without fear or favor or hiding in fear and self-preservation. It will not be an easy choice. Either way, it will define us individually and as a people,” ayon kay Duterte.

Aniya pa rin, “staying neutral is a vote of confidence for an administration with no compunction.”

Kung anumang ang maging desisyon ani Duterte at pipiliin, ang consequences ay mananatili sa mga tao. (Daris Jose)