SA layuning makapagbigay ng accessible at abot-kayang mga event space para sa Pamilyang Valenzuelano, pinasinayaan ng Pamahalaang Lungsod ng Valenzuela, sa pangunguna ni Mayor WES Gatchalian ang isa pang WES Events Space sa Brgy., Canumay West.

Ang pasilidad ay nagsisilbing ikatlong WES Events Space sa lungsod, kasunod ng matagumpay na pagbubukas sa Barangay Dalandanan at Lawang Bato.

Ang makabagong pasilidad, na nagkakahalaga ng PhP 68,509,504.80, ay isang tatlong palapag na gusali. Kabilang sa mga pangunahing tampok nito ang isang Events Hall na may Bridal Room at Kusina, isang Basketball Court na may mga Shower Room at Toilet, isang Administrative Office, at maluwag na Parking Area.

Layunin ng WES Events Space na magbigay ng karagdagang venue para sa iba’t ibang okasyon para sa Pamilyang Valenzuelano. Dinisenyo ito upang matugunan ang malawak na hanay ng mga aktibidad sa komunidad at inaasahang magiging sentrong hub para sa mga pagtitipon, mga kaganapang pampalakasan, at mga espesyal na pagdiriwang sa Barangay Canumay West.

Ang rates para sa pag-upa ng event space ay nakaayos upang ma-access para sa komunidad. May reservation fee na PhP 1,000, na mababawas sa kabuuang bayad. Ang gastos sa unang tatlong oras, kabilang ang pagpasok at paglabas, ay PhP 6,000, na may karagdagang singil na PhP 1,500 para sa bawat susunod na oras.

Binigyang-diin ni Mayor WES Gatchalian, sa kanyang mensahe sa inagurasyon, ang kahalagahan ng bagong pasilidad.

“Gusto po nating gawing mas maayos na lugar ang Valenzuela para sa lahat, isang lugar na may ospital, isang lugar na may unibersidad, lugar na hindi tayo takot na umuwi nang gabi dahil ligtas na at marami pang iba, kaya sana ay tulungan ninyo ako gawing mas liveable city ang ating lungsod.” aniya. (Richard Mesa)

MALUGOD na tinanggap ng Navotas ang mahigit 347 mga skilled workers matapos ang kanilang pagtatapos sa Navotas Vocational Training and Assessment (NAVOTAAS) Institute.

Sa bilang na ito, 20 ang nakakumpleto at nakatanggap ng national certification (NC) I para sa Automotive Servicing, habang 43 ang pumasa sa NC II assessment para sa Barista; 40 ang Bread and Pastry Production, at 18 ang Food and Beverage Services.

Nasa 21 trainees naman ang nakatapos ng Electrical Installation and Maintenance; 13, Pagbibihis; 14 Massage Therapy; 52, Shielded Metal Arc Welding NC II; at 29, Housekeeping NC II.

Tatlumpu’t dalawang trainees din ang nakatapos ng Japanese Language and Culture, habang 65 trainees ang nakatapos ng Korean Language and Culture.

Sa kanyang mensahe, ibinahagi ni Mayor John Rey Tiangco sa mga nagsipagtapos ang mga sikreto ng tagumpay.

“Aside from continuous learning and constant upgrading of your skills and knowledge, you have to possess the right attitude to build good working relationships,” sabi ni Tiangco.

“Practice strong work ethic. Always persevere to be the best version of yourself and find ways to be of more value to the industry or institution you are working for and the clients you serve,” dagdag niya.

Pinaalalahanan din ni Tiangco ang mga nagsipagtapos na sakaling magpasya silang ipagpatuloy ang kanilang pagsasanay, malugod silang mag-enrol sa iba pang kursong teknikal-bokasyonal na inaalok ng NAVOTAAS Institute.

Hinikayat pa niya ang mga trainees na mag-avail ng Tulong Puhunan at Tulong Negosyo programs ng lungsod kung nais nilang ituloy ang pagnenegosyo.

Ang Navotas ay kasalukuyang mayroong tatlong training center na nag-aalok ng libreng teknikal at vocational na kurso sa mga Navoteño. Ang mga hindi residente, sa kabilang banda, ay maaari ring mag-enroll nang may bayad.

Ang aktibidad ay isinagawa kasabay ng pagdiriwang ng ika-17 anibersaryo ng pagiging lungsod ng Navotas. (Richard Mesa)

PERSONAL na dumalo si Mayor John Rey Tiangco sa araw ng pagtatapos ng mahigit 347 skilled workers sa Navotas Vocational Training and Assessment (NAVOTAAS) Institute, bilang ng pagdiriwang ng ika-17 anibersaryo ng pagiging lungsod ng Navotas. Sa kanyang mensahe, binati at ibinahagi ni Mayor Tiangco sa mga nagsipagtapos ang mga sikreto ng tagumpay. (Richard Mesa)

ALINSUNOD sa ika-17th cityhood anniversary ng Navotas, pinasinayaan at pinabasbasan ng pamahalaang lungsod sa pangunguna nina Mayor John Rey Tiangco, at Cong. Toby Tiangco na sinaksihan ng iba pang mga opisyal ang bagong bukas na MARTINIKO pumping station. Ito ay malaki ang maitulong sa pagpigil sa mataas na pagbaha tuwing high tide o kung mayroong malakas na bagyo. (Richard Mesa)

NAGSAGAWA ang Valenzuela City, sa pakikipagtulungan ng Synergeia Foundation at DepEd Valenzuela ng komprehensibong pagsasanay para sa mga guro bilang paghahanda para sa Valenzuela Reading Camp 2024 sa WES Events Space Lawang Bato.

64 na guro, na kilala rin bilang “reading coordinators ang sumailalim sa komprehensibong pagsasanay sa pagtuturo sa Valenzuela Reading Camp 2024 Training for Teachers. Ang mga gurong ito ay naatasang maging pangunahing facilitator para sa paparating na Reading Camp. Bilang pangunahing mga kasosyo, ang Synergeia Foundation, na pinamumunuan ni Dr. Milwida Guevara, at ang Tanggapan ng Bise Alkalde ay nanguna sa sesyon ng pagsasanay.

Ang bawat reading coordinator ay binigyan ng modular kit na nagdedetalye ng tamang diskarte sa pagtuturo para sa mga mag-aaral na nakakaranas ng mga hamon sa pagbabasa at pagbigkas – lalo na sa mga nasa ilalim ng “frustrated readers” at “non-readers”.

Personal na sinanay ni Dr. Guevara ang mga guro tungkol sa mga teknik tulad ng mga ponema o tamang pagbigkas ng mga titik at pantig, gayundin ang mga kinakailangang pamamaraan upang mahikayat ang kanilang mga mag-aaral na basahin ang mga salita nang tumpak.

Binigyang-diin ni Dr. Guevara ang kahalagahan ng pagiging malikhain sa pagtuturo; upang hayaang matuto ang kanilang mga estudyante sa pamamagitan ng pag-activate ng kanilang limang pandama, paglalaro ng masasayang laro, at paggalaw ng katawan.

Ang pagsasanay ay isinagawa para sa isang araw lamang, mula 8:00 AM hanggang 5:00 PM. Sa susunod na araw, isa pang pagsasanay ang gaganapin para sa 128 Teacher’s Aides, pangunahin ang mga boluntaryong estudyante ng PLV upang ihanda sila para sa Reading Camp. Dalawang guro ang itinalaga para sa bawat guro upang tulungan sila sa pagpapatupad ng programa.

Ipinaabot din ni Educ 360 Action Officer Vice Mayor Lorie Natividad-Borja ang kanyang suporta sa mga dedikadong guro ng Reading Camp. Binigyang-diin niya na ang mga gurong ito ang magiging pag-asa ng mga nahihirapang mag-aaral sa pag-aaral at pagbabasa nang maayos at, sa huli, ihanda sila para sa hinaharap.

Ang Valenzuela Reading Camp 2024 ay ilulunsad sa Hulyo 10, 2024 kung saan may kabuuang 1,246 na na-assess na student-beneficiaries ang inaasahang lalahok sa programang ito.

(Richard Mesa)

HIMAS-REHAS ang dalawang manyakis na lalaki na kapwa wanted sa kaso ng panggagahasa matapos masakote ng pulisya sa magkahiwalay na manhunt operation sa Caloocan City.

Sa ulat ng Caloocan City Police kay Northern Police District (NPD) Director P/BGen. Rizalito Gapas, dakong alas-9 ng gabi nang maaresto ng mga operatiba ng Station Intelligence Section (SIS) ng Caloocan police ang 19-anyos na lalaking akusado sa Phase 4, Powerline, Brgy., 176, Bagong Silang.

Ang akusado na nakatala bilang top 6 most wanted person sa Northern Police District (NPD) ay binitbit ng pulisya sa bisa ng warrant of arrest na inisyu ni Presiding Judge Raymundo G Vallega ng Regional Trial Court (RTC) Branch Branch 130, Caloocan City noong June 25, 2024, para sa kasong Rape under Art. 266-A (1) (A) of the RPC in relation to Sec. 5 (A) R.A. 8369 (2 Counts).

Nauna rito, bandang alas-8:40 ng gabi nang madakip din ng kabilang team ng SIS sa manhunt operation sa Macabud Street Barangay 179, Amparo, ang isa pang akusadong lalaki sa panggagahasa.

Pinosasan ng mga operatiba ng SIS ang 20-anyos na akusado sa bisa ng warrant of arrest na inisyu din Caloocan City RTC Branch 130 noong June 3, 2024, para sa kasong Rape.

Kapwa pansamantalang nakapiit ang mga akusado sa custodial facility unit ng Caloocan CPS habang hinihintay ang pagpapalabas ng commitment order mula sa hukuman. (Richard Mesa)

BINITBIT sa selda ang dalawang lalaki matapos makuhanan ng hindi lisensyadong baril sa magkahiwalay na lugar sa Caloocan City.

          Batay sa ulat, dakong alas-11:00 ng gabi, nagsasagawa ng checkpoint ang mga tauhan ng Caloocan Police Sub-Station (SS-9) sa Malapitan Road, Brgy. 171, Bagumbong nang parahin nila ang isang lalaki na sakay ng motorsiklo dahil sa paglabag sa dress code.

Saglit na bumagal ang rider subalit, bigla na lamang nitong pinahaharurot ang minamanehong motor kaya hinabol siya ng mga pulis hanggang sa magawang makorner.

Nang kapkapan, nakumpiska sa suspek na si alyas ‘Boy Bakal’ ang isang caliber .45 pistol na may isang magazine na kargado ng anim na bala at isa pang extrang magazine na kargado ng apat na bala.

Nang hanapan siya ng mga papeles hinggil sa legalidad ng naturang baril ay walang naipakita ang suspek kaya binitbit siya ng mga pulis.

Ala-12:55 ng hating gabi nang arestuhin naman ng mga tauhan ng Sub-Station (SS-13) si alyas ‘Tukmol’ matapos makuhanan ng isang caliber .38 revolver na kargado ng dalawang bala at walang kaukulang papeles makaraang takbuhan ang mga pulis na sumita sa kanya dahil sa paninigarilyo sa pampublikong lugar sa Phase 8, Bagong Silang, Brgy.176.

Mahaharap ang mga suspek sa kasong paglabag sa Art. 151 of RPC at RA 10591 “Comprehensive Firearms and Ammunation Regulation Act”. (Richard Mesa)

NABISTO ang dalang mahigit P50K halaga ng shabu ng dalawang lalaki nang takbuhan ang mga pulis na sumita sa kanila dahil sa paglaba sa ordinansa sa Caloocan City.

Sa ulat, habang nagpapatrolya ang mga tauhan ng Caloocan Police Sub-Station (SS-2) sa 2nd Aveune, Brgy. 120 nang makita nila ang dalawang lalaki na nagyoyosi sa pampubliko lugar dakong alas-6:45 ng gabi na malinaw na paglabag sa umiiral na ordinansa ng lungsod.

Nang lapitan nila para isyuhan ng Ordinance Vilolation Receipt (OVR) ay tumakbo umano ang mga suspek para tumakas kaya hinabol sila ng mga pulis hanggang sa makorner at maaresto.

Nang kakapan, nakumpiska sa mga suspek na sina alyas ‘Ungas’ at alyas ‘Batak’ ang tig-isang transparent plastic sachet na naglalaman ng nasa 8.5 grams ng hinihinalang shabu na may katumbas na halagang P57,800.00.

Mahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)