NILINAW ng lokal na pamahalaan ng Balayan, Batangas na hindi sila magpapatupad ng lockdown.

Sa kabila ito ng na-detect na kaso ng mpox sa kanilang bayan, matapos ang ilang pagsusuri.

Ayon kay Balayan Mayor Emmanuel Fronda II, hindi dapat maapektuhan ang buong operasyon ng kanilang lugar.

Ang mahalaga aniya ay natukoy agad ang pasyenteng may mpox at ang mga taong nagkaroon ng closed contact dito.

Nabatid na ang kaso ng naturang virus sa Balayan ay pang-14 na recorded case sa bansa at isa umanong 12-anyos na batang lalaki.

Hindi na tinukoy ang pagkakakilanlan ng biktima upang hindi maging biktima ng bullying o harassment ang bata at ang kanilang pamilya.

Tiwala naman si Mayor Fronda na ginagawa ng local health officials ang kanilang tungkulin para maiwasan ang pagkalat ng sakit sa iba pang mga residente. (Daris Jose)

INATASAN ng Commission on Audit (COA) si Vice President Sara Duterte na isoli ang P73.28 milyon na bahagi ng P125 milyong confidential funds na ginasta ng tanggapan nito sa loob ng 11 araw noong Disyembre 2022 dahil ang nasabing item ay itinuturing na ‘disallowed fund” sa ilalim ng regulasyon ng pamahalaan.

Ang “COA’s notice of disallowance” na may petsang Agosto 8, 2024 ay nabunyag sa budget hearing ng House Committee on Appropriations sa panukalang P2.037 bilyong pondo ng tanggapan ni Sara para sa 2025.

Una nang lumutang na ang P125 milyong confidential funds ay ginasta ng OVP sa loob ng 11 araw noong Disyembre 2022. Ang paghimay sa pondo ng OVP ay inabot ng gabi pero walang napigang tugon ang mga mambabatas.

“The disallowed expenditures, amounting to nearly two-thirds of the total confidential funds, included payments for rewards in the form of goods rather than cash, and the procurement of tables, chairs, desktop compu­ters and printers — expenses that appeared inconsistent with the intended use of confidential funds,” anang COA.

Ipinaliwanag ni COA Assistant Commissioner Alexander Juliano na ang ibig sabihin ng “notice of disallowed funds” ay sobra-sobrang paggasta, wala sa item na kung sa gamot ay bultu-bulto na labis sa pangangailangan na nasayang matapos na ma-expired.

Sinabi naman ni Deputy Minority Leader at ACT Teachers Partylist Rep. France Castro na ang P40-M sa confidential funds ng OVP ay ginasta sa medical at food aid na kinuwestiyon ang mabilisang paggasta sa nasabing halaga.

“So ang ibig sabihin ito, Madam Chair, konting math, pumapatak na ?3.64 million kada araw ang gastos para sa food and medical aid. So hindi natin maintindihan paano ito ginastos in 11 days,” ayon pa kay Castro. (Daris Jose)

“I DON’T THINK SO.”

ITO ang naging tugon ni Pangulong Ferdinand Marcos Jr., sa isang ambush interview matapos pangunahan ang Oath-Taking Ceremony para sa mga newly elected officers ng National Press Club (NPC), Kapisanan ng mga Broadcasters ng Pilipinas (KBP) Malacañang Press Corps (MPC), Presidential PhotoJournalists Association (PPA) at Malacañang Cameraman Association (MCA) sa Heroes’ Hall, Palasyo ng Malakanyang, araw ng Martes, Agosto 27 nang tanungin kung may nangyaring paglabag sa karapatang pantao nang pumasok ang 2,000 pulis sa Kingdom of Jesus Christ (KOJC) compound para hanapin si Pastor Apollo Quiboloy.

“The reason we did this was so that we can contain the peace. The only way to maintain the peace is to make sure that the area is safe and is secure,” ayon sa Punong Ehekutibo.

Kinonsidera rin ng Pangulo ang 30-hectare compound kung saan kailangan talaga ng maraming tao. Hindi aniya puwedeng gawin ito ng isang dosenang pulis lamang.

“Hindi na bale ‘yung lumalaban o nagre-resist, nanghaharang. Di na bale muna ‘yon, para lang ‘yung pag-inspeksyon ng 30 hectares kailangan mo na agad ng maraming tao. So I do not see. I think what they’re talking about, political na ‘yan,” ayon pa rin sa Pangulo.

Bukod dito, binigyang diin ng Pangulo na lahat ng pumasok na pulis sa compound ay hindi armado at walang baril kahit isa.

Hindi rin aniya gumamit ng tear gas ang mga pulis.

“Wala kaming ginawang ganoon. So anong human rights violation. Marami lang. Kung kokonti, mas marami pang nasaktan na supporters ng KOJC, maraming nasaktan na pulis dahil manlalaban. Kung marami tapos agad ang problema, so that’s what we’ve done,” ang sinabi ng Pangulo.

Sa kabilang dako, hindi aniya niya maintindihan kung bakit dinadamay ni Quiboloy ang mga tauhan nito.

“Kasi sinasabak niya mga tauhan niya eh wala namang kasalanan mga ‘yan, they just believe, they are looking for an answer, a value system and they think they have found it with Quiboloy, but they did not sign up to be in the frontline of this kind of thing that’s happening now, that they’ll protect him from arrest even when he has case was filed against him not only here in PH but also in the US,” litaniya nito.

“I suppose I can understand their disagreement with us, even anger, but all the police are doing is enforcing the warrant of arrest against Apollo Quiboloy,” aniya pa rin. (Daris Jose)

MANANATILI sina Shiela Guo at Cassandra Li Ong sa Bureau of Immigration sa Maynila.

Si Shiela ay kapatid ni dismissed mayor Alice Guo.

Kasunod ito ng pagbalik nila sa Pilipinas matapos harangin at arestuhin sa Indonesia.

Ayon kay Department of Justice (DOJ) spokesperson Asec. Mico Clavano, kakaharapin ng dalawa ang mga reklamong paglabag sa immigration laws.

Matatandaang may inilabas nang arrest order laban sa kanila ang Kongreso dahil sa hindi nila pagdalo sa mga pagpapatawag para sa hearing ukol sa POGO.

TINIYAK ni Pangulong Ferdinand Marcos Jr. na may ulong gugulong sa pagtulong para makalabas sa bansa ang pinatalsik na alkalde ng Bamban, Tarlac na si Alice Guo.

Sinabi nito na ang insidente ay nagpapakita ng kurapsyon sa justice system na siyang magpapahina ng tiwala ng publiko.

Giit pa ng Pangulo na kanyang isasapubliko ang sinumang indibidwal na nasa likod ng pagpapalabas sa bansa kay Guo.

Dagdag pa ng Pangulo na umuusad na ang imbestigasyon ang sinumang napatunayan na nasa likod ng insidente ay kaniyang papanagutin sa batas.

Walang puwang aniya sa gobyerno ang sinumang opisyal na inuuna ang personal na interest kaysa pagsilbi sa publiko.

Narito ang pahayag ng Pangulo:

“The departure of 𝗔𝗹𝗶𝗰𝗲 𝗚𝘂𝗼 has laid bare the corruption that undermines our justice system and erodes public trust. 𝗟𝗘𝗧 𝗠𝗘 𝗕𝗘 𝗖𝗟𝗘𝗔𝗥: 𝗛𝗲𝗮𝗱𝘀 𝘄𝗶𝗹𝗹 𝗿𝗼𝗹𝗹. We will 𝗲𝘅𝗽𝗼𝘀𝗲 the culprits who have betrayed the people’s trust and aided in her flight. A full-scale investigation is already underway, and those responsible will be suspended and will be held accountable to the fullest extent of the law. There is no room in this government for anyone who places personal interest above serving the Filipino people with honor, integrity and justice.”

Reaksyon ito ng Pangulo sa napabalitang umalis na sa bansa si Guo kahit na may kinakaharap itong kaso na nauugnay sa operasyon ng Philippine Offshore Gaming Operation. (Daris Jose)

NASUNGKIT ni Carlos Yulo ang gintong medalya sa floor exercise gymnastics ng 2024 Paris Olympics.

Nakapagtala nang nakamamanghang 15.00 iskor si Yulo na may 6.600 difficulty at 8.400 sa execution upang maiuwi ang gintong medalya sa Pilipinas.

Inangkin ng 24-anyos na tubong Leveriza, Manila ang ginto mula sa nahakot na 15.000 points sa paborito niyang men’s artistic gymnastics floor exercise event Sabado, Aug. 3 sa 2024 Olympics sa Bercy Arena sa Paris, France.

Matapos opisyal na ideklara na siya ang nagwagi ay bumuhos na ang luha ni Yulo at napaupo sa sahig.

Tinalo ni Yulo para sa gold medal sina Artem Dolgopyat (14.966 points) ng Israel at Jake Jarman (14.933 points) ng Great Britain.

Nauna nang naglista si Yulo ng 14.766 points sa qualification ng nasabing event matapos magposte ng 14.333 points sa nakaraang all-around finals kung saan siya nabigong makakuha ng medalya.
Sa 2021 Tokyo Games ginawa ni Yulo ang kanyang Olympic debut.

Ngunit dahil sa kakulangan sa eksperyensa ay tumapos si Yulo bilang No. 44 sa individual all-around at nabigong mag-qualify sa floor exercise.

Nakatakda pa siyang sumabak sa vault finals kagabi Linggo,kung saan maaari siyang maging kauna-una¬hang Pinoy athlete na nanalo ng dalawang Olympic gold.

Ito na ang pangalawang ginto sa kasaysayan ng bansa matapos na unang masungkit ni Hidilyn Diaz ang gintong medalya sa weightlifting competition noong 2020 Tokyo Olympics. (Daris Jose)

INANUNSYO ng Department of Agriculture (DA) na nakatakda itong maglunsad ng bagong inisyatiba na naglalayong gawing affordable ang presyo ng bigas para sa mga Filipino consumer.

Sinabi ng DA na ilulunsad nila ang Rice-for-All program, araw ng Huwebes, Agosto 1, 2024.

Ang bagong programa ay ‘follow up’ sa P29 Rice Program, na naging available para sa pagbebenta ng mas murang bigas sa halagang P29 per kilo lamang para sa vulnerable sectors.

“Rice under the Rice-for-All program will initially be sold at P45 a kilo. It will be adjusted depending on the movement of rice prices but it will definitely be lower than retail prices in general,” ayon kay Agriculture Secretary Francisco Tiu Laurel Jr.

Sinabi pa ng DA na ang Rice-for-All program ay magbebenta sa general public ng well-milled rice na kukunin mula sa rice importers at local traders na limitado lamang sa 25 kilo kada customer kada isang araw.

Sa kabilang dako, sinabi naman ni DA Assistant Secretary at spokesperson Arnel de Mesa na ang Rice-for-All program ay unang iaalok sa apat na Kadiwa outlets — FTI sa Taguig City, Bureau of Plant Industry sa Maynila, Potrero sa Malabon, at sa Caloocan.

Idinagdag pa ni De Mesa na ang bagong programa ay naglalayon na tulungan ang mas maraming Filipino consumers na makayanan ang epekto ng mataas na presyo ng pagkain, naimpluwensiyahan ang inflation at interest rates.

Gayunman, sinabi ni Tiu Laurel na ang Rice-for-All program ay magiging panibagong hakbang tungo sa pagsasakatuparan ng hangarin at vision ni Pangulong Ferdinand “Bongbong” Marcos Jr. na tiyakin ang availability ng ‘affordable food.’

“President Marcos wants to ensure that every Filipino has access to affordable food during these trying times,”ayon sa Kalihim.

“In line with this, we will continue to expand the Kadiwa network and make available more basic goods to the general public,” ang sinabi pa rin ni Tiu Laurel.

Samantala, sinabi naman ni De Mesa na ang Rice-for-All program ay makatutulong din sa DA na patagalin ang P29 Rice Program.

Sinabi pa niya na P29 Rice Program ay I-extend sa dalawa pang lugar gaya ng Sta. Rosa City sa Laguna at Antipolo City sa Rizal, itinaas ang network covered ng programa sa 17 sites.

Ang 17 Kadiwa outlets na operational para sa P29 Rice Program ay matatagpuan sa susunod na lugar: Bureau of Animal Industry and National Irrigation Administration sa Quezon City; Bureau of Plant Industry sa Manila; Food Terminal Inc. sa Taguig City; PhilFIDA sa Las Piñas; Prang Covered Gym sa Marikina City; Llano, Caloocan City; Valenzuela City; PFCC sa Malabon; Navotas Institute sa Navotas City; Brgy. Fortune at BF City sa Marikina City; San Jose del Monte City sa Bulacan; Bacoor, Cavite; San Pedro City Hall sa Laguna; Sta. Rosa City Hall sa Laguna; at Antipolo City, Rizal.

“Both the P29 Rice and Rice-for-All programs are designed to make this essential staple more accessible and affordable for every Filipino, in line with President Marcos’ vision of ‘Walang magugutom sa Bagong Pilipinas,” ayon kay De Mesa. (Daris Jose)

INANUNSIYO ng mga top US officials na ang Washington DC ay maglalaan ng tulong na nagkakahalaga ng USD500 milyon (humigit-kumulang PHP29.3 bilyon) para tumulong sa kasalukuyang programa ng modernisasyon ng Armed Forces of the Philippines (AFP) at ng Philippine Coast Guard (PCG).

Ginawa nina US Secretary of State Antony Blinken at Department of Defense Secretary Lloyd Austin III ang anunsyo sa ginanap na 2 + 2 Ministerial Meeting kasama ang kanilang mga counterpart sa Pilipinas na sina Foreign Affairs Secretary Enrique Manalo at Defense Secretary Gilberto Teodoro Jr.,

Ang 2+2 meeting ay ginanap kanina sa Camp Aguinaldo, Quezon City.

” We’re now allocating an additional USD500 million in foreign military financing (FMF) to the Philippines to boost security collaboration with our oldest treaty ally in the region,” pahayag ni Blinken.

“Ayon kay Blinken ang nasabing grant ay panibagong hakbang para palakasin pa ang alyansa ng Pilipinas at US at maituturing na once-in-a generation investment para tulungan ang modernization program ng AFP at PCG.

“Samantala, inihayag naman ni US Defense Secretary Lloyd Austin nakikipag-ugnayan ngayon ang US sa Pilipinas para makamit ang isang Malaya at bukas na Indo-Pacific.

” And together we are taking bold steps to strengthen our alliance. Today, as you heard Secretary Blinken and I announced that we are poised to deliver a once-in-generation investment to help modernize the AFP and the PCG,” pahayag ni Austin.

(Daris Jose)