ISINAILALIM ng National Grid Corporation of the Philippines (NGCP) ang Luzon grid dahil sa pagpalya ng kuryente sa Luzon.

Dahil dito kaya pinasisilip ni Pangulong Ferdinand Marcos Jr. sa Department of Energy (DOE) ang dahilan ng pagpalya ng power generation plants.

Inamin naman ng DOE na wala silang nakikitang problema sa transmission lines dahil natapos na ng NGCP ang malaking proyekto nito, tulad ng Cebu-Negros Panay 230kilovolt backbone, Mindanao-Visayas interconnection project at Hermosa San Jose line.

Sa inisyal na paliwanag ni DOE Assistant Secretary Mario Marasigan, biglaan ang pagpalya ng Pagbilao units 1 at 2 at pinalamig pa ang system kaya hindi pa ito mapasok ng mga maintenance crew para mainspeksyon.

Bagama’t hindi pa anya matukoy ang pangunahing dahilan ng pagpalya, posible na dulot ito ng tagas sa boiler tube.

Ayon kay Marasigan, ang ganitong mga pangyayari sa mga power generation plant ay maituturing na outside management control o wala sa control ng power plant operator ang sitwasyon.

Tiniyak naman niya na nagpapatupad sila ng regular monitoring sa sitwasyon o halos 30 minutong pagbabantay, bagamat hindi pa masabi ni Marasigan kung ano ang magiging sitwasyon naman ng grid sa susunod na mga araw depende kasi ito sa magiging kondisyon ng planta.

Ipinaliwanag din ni Marasigan na ang sinasabing pagpalya ng 19 power generation plants ay hindi sabay-sabay kundi sa magkakaibang panahon ito nangyari dahil sa ibat ibang dahilan at kabilang dito ang panahon ng tag-init kaya nagbawas ng kapasidad ang ibang planta.

Habang hydro power plants ang ibang generation plants kaya nakadepende ito sa tubig at dahil bumaba ang lebel ng tubig kaya hindi kinayang makapag-fully operate. (Daris Jose)

PINANGUNAHAN ni Pangulong Ferdinand R. Marcos Jr. ang pag-inspeksyon sa mahigit na dalawang tonelada ng shabu na nagkakahalaga ng P13.3 billion sa Batangas.

Ang nakumpiskang illegal na droga ay itinuturing na “biggest drug haul in Philippine history.”

Sa isang panayam, matapos ang pag-inspeksyon, sinabi ng Pangulo na nagawa ng mga arresting agents na mahuli ang isa sa mga suspek na hindi gumamit ng anumang karahasan.

Nagawa ng mga pulis na dakpin ang suspek na nagmamaneho ng van sa isang road checkpoint sa Alitagtag, Batangas, araw ng Lunes.

“This is the biggest shipment of shabu na nahuli natin. But not one person died. Walang namatay, walang nagputukan, walang nasaktan. Basta’t in-operate natin na dahan-dahan,” ang sinabi ni Pangulong Marcos.

“‘Yun naman dapat ang approach. Para sa akin, ‘yun naman dapat ang approach para sa drug war na ang pinaka-importante is matigil natin ang pag-ship ng mga drugs dito sa pag-pasok dito sa Pilipinas,” dagdag na wika nito.

Sa ngayon, sinusubaybayan ng mga awtoridad ang ‘source’ ng ilegal na droga, itinuturo na hindi ito ‘locally manufactured.’

Sa kabilang dako, inirekumenda naman ng Department of Interior and Local Government (DILG) ang “spot promotion” ni Alitagtag Municipal Police Station Chief P/Captain Luis de Luna Jr. na ‘one rank higher’ kasunod ng matagumpay na illegal drug operation.

Para kay De Luna, nagsasagawa sila ng regular checkpoint sa Barangay Pinagkrusan nang i-flagged down nila ang kahina-hinalang passenger van, nagresulta ng pagkakasamsam sa illegal na droga.

“Mayroon po kaming regular checkpoint na isinasagawa dito sa Bayan ng Alitagtag, as part of the intensified crime prevention. So, part of it, pina-flag down po namin ang mga sasakyan,” ang sinabi ni De Luna sa mga mamamahayag.

“Kung mayroong suspicious, sina-subject po namin for inspection po. Kagaya po ng nangyari dito sa pangyayaring ito, ‘yun po ang naging resulta, nasabat po namin ang ganitong kalaking halaga po ng shabu po,” dagdag na pahayag nito.

Nauna rito, inaresto ng mga awtoridad ang isang driver ng van matapos mahulihan ng bultong-bultong shabu na tinatayang nasa P13.3 bilyon sa isang checkpoint operation sa Alitagtag, Batangas.

Sa ulat na ipinadala ni Batangas Police Provincial Director Police Colonel Samson Belmonte kay PRO Calabarzon Regional Director P/BGen. Paul Keneth Tuhay Lucas, nabatid na habang ang operating teams ng Alitagtag MPS ay nagsasagawa ng anti-criminality checkpoint operation sa Barangay Pinagkrusan, ay dumaan ang isang kulay silver na Foton passenger van na may plakang CBM5060.

Nang usisain ng mga ang kinakailangan na dokumento, napansin ng mga awtoridad na balisa at hindi mapakali ang driver ng nasabing van.

Dahil dito, agad na inusisa at tiningnan ng mga pulis ang laman ng likod ng sasakyan at boluntaryong tinanggal ng driver na suspek ang kulay asul na toldang  nakatakip sa mga nakalagay sa sasakyan.

Laking gulat ng mga awtoridad nang bumulaga sa kanila ang bulto-bultong hinihinalang shabu na nag-resulta sa pag-aresto sa suspek.

Kinilala ni P/BGen Lucas, ang arestadong suspek na si Alajon Michael Zarate, 47, residente ng Project 4, Masagana, Quezon City.

Pinapurihan naman nina DILG Secretary Benhur Abalos at PNP Chief Rommel Francisco Marbil ang mga tauhan ng Alitagtag Municipal Police Station sa pangunguna ni Officer in Charge (OIC) Police Captain Luis Q. De Luna dahil sa malaking accomplishment ng PNP sa kampanya laban sa iligal na droga. (Daris Jose)

NANINIWALA si House Speaker Martin Romualdez na isang tagumpay ang pagbibigay ng katiyakan ng Estados Unidos at Japan kay Pangulong Ferdinand Marcos Jr., na suportado ng mga ito ang interes at soberenya ng Pilipinas sa West Philippine Sea (WPS).

Ito ay batay sa inilabas na Joint Vision Statement nina US President Joe Biden, Japan Prime Minister Fumio Kishida at Pangulong Marcos matapos ang makasaysayang trilateral meeting sa Washington DC, noong Huwebes.

Kinondena rin ang tatlong lider ang ginagawang panggigipit ng coast guard ng China at mga barkong pangisda nito na nanghaharas sa mga Pilipino sa WPS.

Binigyan diin ng tatlong lider na pinal at legally binding ang Arbitral Tribunal ruling sa Second Thomas Shoal (Ayungin Shoal) na nagsasabing sa Pilipinas ang WPS na nasa loob ng Exclusive Economic Zone (EZZ) ng Pilipinas at dapat itong  kilalanin ng China.

Sa talumpati ni US President Biden sa trilateral meeting, binigyan diin nito na anumang pag-atake sa eroplano, sasakyang pandagat o sa Armed Forces of the Philippines sa South China Sea ay agad na ipatutupad ang Mutual Defense Treaty (MDT).

Umaasa rin ang pinuno ng Kamara na ang makasaysayang pagpupulong ay makatutulong upang humupa ang tensyon sa WPS para na rin sa kabutihan ng lahat ng stakeholders.

Tiniyak din ni Romualdez, ang suporta ng Kamara kay Pangulong Marcos sa kanyang pagsisikap na pangalagaan at proteksyunan ang interes ng bansa sa WPS gayundin ang pagsusulong ng kapayapaan at katatagan sa Indo-Pacific Region.

Sa Joint Vision statement, ipinahayag ng tatlong pinuno ang lumalala at paulit-ulit na panggigipit ng China sa mga sasakyang pandagat ng Pilipinas, sa malayang paglalakbay sa karagatan, gayundin ang paghadlang sa pagdadala ng suplay ng pangangailangan sa Second Tomas Shoal na isang mapanganib na hakbang at nagpapalala sa sitwasyon.

Binabanggit din sa pahayag ang mariing pagtutol sa anumang balak ng China na pwersahang baguhin ang status quo sa East China, sa pamamagitan ng mga hakbang na guluhin ang matagal nang pamamahala ng Japan sa Senkaku Islands.

Nananawagan din ang tatlong pinuno ng bansa sa pananatili ng kapayapaan at katatagan hanggang sa Taiwan Strait, na isang katunayan ng pandaigdigang seguridad at kasaganaan.

Kumpiyansa naman ang pinuno ng Kamara sa paninindigan ng U.S at Japan sa joint statement na patuloy na susuporta sa pagpapalakas ng kakayahan ng Philippine Coast Guard, kasama na rito ang pagbibigay ng Japan ng labindalawang mga barko ng Coast Guard at karagdagang limang barko sa Pilipinas. (Daris Jose)

NAGLABAS  na rin ang Pasig City Regional Trial Court (RTC) ng warrant of arrest laban kay Kingdom of Jesus Christ (KJC) leader at founder Pastor Apollo Quiboloy , Huwebes, kaugnay ng kinakaharap nitong kaso ng human trafficking.

Ito na ang ikalawang arrest warrant laban kay Quiboloy matapos na una na siyang isyuhan ng mandamyento-de-aresto ng Davao City RTC noong nakaraang linggo dahil sa mga kasong child at sexual abuse.

Nabatid na inisyu ni Pasig RTC Branch 159 Acting Presiding Judge Rainelda Estacio-Montesa ang naturang arrest order kasunod nang pagbasura nito sa mosyon ng kampo ni Quiboloy, na humihiling na suspindihin muna ang proceedings sa kanyang kaso at ipagpaliban ang pagpapalabas ng warrant laban sa kanya.

Idinahilan ng kampo ni Quiboloy na dapat lamang na masuspinde ang criminal proceedings dahil may nakabinbin pa silang motion for reconsideration sa tanggapan ni Department of Justice (DOJ) Secretary Jesus Crispin Remulla hinggil dito.

Gayunman, sinabi ng prosekusyon na batay sa Rule 116 ng Rules on Criminal Procedure, pinahihintulutan lamang ang suspensiyon ng arraignment base sa paghahain ng isang petition for review sa DOJ at hindi sa motion for reconsideration sa isang resolusyon para sa petition for review.

“After consideration of the arguments brought forth by the parties, the court finds the Motion to Defer/Suspend Proceedings and Hold in Abeyance Issuance of Warrant of Arrest to be a prohibited motion and should therefore be denied,” nakasaad pa sa kautusan ng korte.

Bukod kay Quiboloy, kasama rin sa ipinaaaresto ng Pasig RTC sina Jackielyn W. Roy, Cresente Canada, Paulene Canada, Ingrid C. ­Canada, at Sylvia Cemañes.

Nabatid na ang kasong kinakaharap nina Quiboloy ay nasa ilalim ng Republic Act No. 9208 o The “Anti-Trafficking in Persons Act of 2003” na isang non-bailable offense. (Daris Jose)

DUMATING na si Pangulong Ferdinand R. Marcos Jr. sa Washington, DC, Miyerkules ng gabi kasama ang delegasyon ng Pilipinas para sa trilateral meeting kasama ang Estados Unidos at Japan.

Dumating ang eroplanong lulan ang Pangulo kahapon ng alas- 7:47 ng gabi sa Joint Base Andrews sa Maryland kung saan ay mainit siyang sinalubong mga opisyal ng Philippine Embassy at Estados Unidos.

Ang Pangulong Marcos ay mayroong two-day working visit, una na rito ay para sa trilateral meeting kasama sina US President Joe Biden at Japanese Prime Minister Fumio Kishida para palakasin ang economic at maritime cooperation ng tatlong bansa.

Nauna rito, bago pa umalis ng Maynila, sinabi ng Pangulo na ang kanyang pagbisita sa Estados Unidos ay resulta ng kanyang nakalipas na pakikipagpulong kina Prime Minister Kishida at US Vice President Kamala Harris noong Setyembre ng nakaraang taon sa Jakarta, Indonesia.

Winika pa ng Pangulo na layon niya na i-explore ang mga paraan ng pagsusulong ng kooperasyon lalo na larangan ng “critical infrastructure, semiconductors, digitalization at cybersecurity, bukod sa iba pa.

Samantala, nakatakda namang makapulong ni Pangulong Marcos ang mga business leaders sa Estados Unidos at imbitahan ang mga ito na mamuhunan sa Pilipinas. (Daris Jose)

HINDI inisip ni Pangulong Ferdinand Marcos Jr. ang magdeklara ng national state of calamity sa gitna ng epekto ng El Niño phenomenon.

Sa isang ambush interview sa Bacolod City, araw ng Lunes, sinabi ng Chief Executive na maaaring maramdaman ang epekto ng phenomenon subalit hindi naman ito mapanganib.

”Ang katotohanan niyan lahat maaapektuhan, ngayon gaano kalala ang magiging effect ng El Niño… It’s really, ang mga probinsya sa western side na… Western Luzon tapos dito Region 6. So those are the areas na nagde-declare ng calamity but the other areas, although ramdam pa rin, hindi naman critical,” ayon kay Pangulong Marcos.

”As a matter of fact, kasi naglagay nga tayo ng mga dam, patuloy na inaayos ang ating irigasyon, we should and we are trying to find new techniques of planting. We are harvesting more palay now than we are last year, that’s despite the El Niño, so it’s taking effect,” dagdag na wika nito.

Tinatayang nasa 18 local government units (LGUs) na ang nagdeklara ng state of calamity dahil sa epekto ng nagpapatuloy na El Niño phenomenon.

Sa kabilang dako, batay sa pinakabagong report, ipinakita ng National Disaster Risk Reduction and Management Council na ang mga apektado ng LGUs ay ang 11 bayan sa lalawigan ng Occidental Mindoro

1. Bulalacao, Oriental Mindoro

2. Mandalay, Oriental Mindoro

3. San Vicente, Palawan

4. San Andres, Romblon

5. Mayoyao, Ifugao

6. Sinaloa, Antique

7. Zamboanga City

Base naman sa data mula sa Department of Agriculture (DA) na ang pinsala at pagkalugi sa agriculture sector dahil sa nakapapasong init ay tumama sa mahigit sa P2.63 bilyong piso.

Samantala, sinabi ni Presidential Communication Office Assistant Secretary Joey Villarama, tagapagsalita ng Task Force El Niño na mas maraming indibiduwal na lungsod at munisipalidad ang nagpahayag ng kanilang interest sa deklarasyon subalit “still need to fulfill the criteria to declare a state of calamity.”

Hindi pa inirerekomenda ng Office of the Civil Defense (OCD) ang pagdedeklara ng state of calamity sa Pilipinas dahil sa El Niño.

Ito ay kahit na inaasahang mararanasan ng mahigit 50 probinsiya ang matinding tagtuyot sa mga susunod na buwan.

Paliwanag ni OCD Administrator USec. Ariel Nepomuceno na sa ngayon nasa 20 probinsiya ang nakakaranas ng mahigpit na tagtuyot at inaasahan na sa buwan pa ng Abril posibleng titindi ito. Sinabi din nito na magkakaiba ang sitwasyon sa bawat probinsiya.

Ginawa ni Nepomuceno ang naturang pahayag kasabay ng kaniyang pagbisita sa Oriental Mindoro kung saan ang nagdeklara na ng state of calamity sa may bayan ng Bulalacao dahil sa El Nino.

(Daris Jose)

NAIHAIN na ng ­Philippine National Police (PNP) ang 2 warrant of arrest sa kasong Child Abuse  at  Sexual abuse na ipinalabas ng Davao City Regional Trial Court laban kay Kingdom of Jesus Christ leader Apollo Quiboloy at 5 iba pang mga akusado, nitong Miyerkules.

Ayon kay BGen Alden Delvo, Davao Region Police Director, naisilbi na ang 2 warrant of arrest sa paglabag sa Republic Act 7610 o (The Special Protection of Children Against Abuse, Exploitation, and Discrimination Act) sa Kingdom of Jesus Christ para kay Quiboloy

“Pumunta kami sa Kingdom of Jesus Christ kay Apollo Quiboloy dito sa airport at sinerve namin ‘yung WOA, binigay namin sa administrator sa gusali or building na ‘yun” saad ni Delvo.

Aniya, nakausap na nila ang lawyer ni Quiboloy para sa pagsuko nito para siya makapag-bail batay sa ipinalabas na warrant of arrest ng korte.

“Yung WOA ni Pastor Quiboloy under his name only has a P200,000 bail bond for other sexual abuse and then the rest na kasama rin naman si Pastor Quiboloy are 80,000 for other acts of child abuse under sec. 10 of RA 7610,” ani Delvo.

Umaasa si Delvo na lalantad o susuko si Quiboloy sa mga darating na mga araw bagama’t sakaling mabigo ito ay maglu­lunsad sila nang manhunt laban sa nasabing Pastor.

“Well of course just like any other WOA there will be a manhunt operation. He will be a fugitive, alam mo naman may WOA siya the authorities will exert effort in arresting him” dagdag ni Delvo.

Kaugnay nito sinabi ni Delvo na nasa kustodiya ng National Bureau of investigation (NBI) si Tamayong Brgy. Captain Cresente Canada, isa sa 5 akusado matapos ito sumuko nang lumabas ang warrant of arrest laban sa kanya.

Boluntaryo namang sumuko ang mga akusadong sina Paulene ­Canada at Sylvia Cemanes.

Una rito ay naglabas ng warrant of arrest ang Davao court laban kay ­Quiboloy at limang iba pa dahil sa kasong child abuse. (Daris Jose)

BINAWI ng Phivolcs ang nauna nitong tsunami advisory matapos ang magnitude 7.5 na lindol na tumama hilagangsilangan ng Taiwan.

Miyerkules nang nagbabala ng “high tsunami waves” ang Phivolcs sa ilang bahagi ng Pilipinas na kaharap ng Karagatang Pasipiko, kabilang na ang Batanes Group of Islands, Cagayan, Ilocos Norte at Isabela.

“Based on available data of our sea level monitoring stations facing the epicentral area, no significant sea level disturbances have been recorded since 07:58 AM up until this cancellation,” sabi ng Phivolcs.

“With this, any effects due to the tsunami warning have largely passed and therefore DOST-PHIVOLCS has now cancelled all Tsunami Warnings issued for this event.”

Kahapon ng umaga nang sabihin ng Phivolcs na bandang 8:33 a.m. hanggang 10:33 a.m. darating ang mga alon dulot ng naturang lindol.

Una nang inirekomenda ng state seismologists ang pagpapalikas ng mga residente mula sa mga naturang lugar patungo sa matataas na erya o hindi kaya’y palayo sa mga anyong tubig.

Una nang sinabi ni Wu Chien-fu, direktor ng Seismology Center ng Central Weather Administration ng Taipei, na ito na ang pinakamalakas na lindol nangyari sa bansa sa loob ng 25 taon.

Setyembre 1999 nang huling magkaroon ng mas malakas na pagyanig dahil sa magnitude 7.6 na lindol, bagay na pumatay ng 2,400 katao. (Daris Jose)