INAASAHANG ipalalabas ng Department of Trade and Industry (DTI) ang price guide para sa Noche Buena products.

Ito’y sa gitna ng nakabinbin na price hike petition para sa holiday ham na sinasabing maaaring tumaas ng 4%.

“It will be out (price guide)  by the second week of November because not all of the manufacturers have submitted their position and prices,” ayon kay DTI Usec. Maria Blanca  Kim Bernardo- Lokin.

Aniya, may 80% ng mga manufacturer na nagpo-produce ng goods na kabilang sa  taunang Noche Buena price guide ng DTI ang nagsumite ng kanilang posisyon sa usapin.

At sa tanong kung  dapat bang asahan ng publiko ang pagtatas sa presyo ng mga sangkap ng pagkain ngayong holiday season, sinabi ni Bernardo-Lokin na nakakuha naman sila ng suporta mula sa Federation  of Filipino- Chinese Chambetrs of Commerce and Industry, INC. (FFCCCII) na huwag munang magkasa ng anumang  pagtaas ng presyo ngayong taon.

Kabilang sa mga miyembro ng FFCCCII ay ang local retailers, merchant association at mga  food manufaturer. (Daris Jose)

HINILING  ng isang mambabatas sa Department of Justice na ikunsidera ang pagsasagawa ng pagdinig ng kaso laban sa mga opisyal ng SBSI officials sa Metro Manila sa halip na sa Surigao del Norte.

“I doubt very much the courts in Surigao del Norte will be able to try the cases against SBSI because of fear SBSI has sowed in that province,” pahayag pa ni House deputy minority leader Rep. Bernadette Herrera.

Pinasalamatan naman ng mambabatas ang Department of Justice at National Bureau of Investigation sa pagapatupad nito ng Child Marriage Ban Law (RA 11596) laban sa SBSI.

Hiniling din nito sa dalawang ahensiya na ikunsidera ang pagsasampa ng kasong malversation of public funds, violations of firearms laws, serious illegal detention, at terrorism kung kinakailangan.

“This alleged cult called SBSI has all the characteristics of a terrorist group,” dagdag pa ng mambabatas.

Maging aniya ang Department of Interior and Local Government at Department of Environment and Natural Resources ay dapat ding gamitin ang kanilang administrative powers laban sa SBSI.

“DILG should keep close watch over the municipalities and barangays where the SBSI wields influence,” pagtatapos ni Herrera. (Ara Romero)

KAPWA nanguna ang Department of Public Works and Highways (DPWH) at Department of Social Welfare and Development (DSWD) sa paggasta ngayong third quarter ng taon.

Ito ang isiniwalat ni  National Economic and Development Authority (NEDA) Undersecretary Rosemarie Edillon sa Palace press briefing, araw ng Martes matapos ang sectoral meeting kasama si Pangulong Ferdinand Marcos Jr.

Bagama’t una nang tumanggi si Edillon na  sagutin kung ano ang mga ahensiya ng pamahalaan ang nag-improve ang kanilang paggasta, kalaunan ay sinabi nito na nanguna ang DPWH pagdating sa capital spending na sinundan naman ng DSWD.

Ang government spending,  ang sinasabi ng mga  economic managers ng bansa na siyang makakapagpa-improve sa growth rate sa pagtatapos ng taon, isa sa tatlong agenda na tinalakay ni Pangulong Marcos.

Ang dalawang iba pa ay ang food inflation at non-food inflation.

“Iyong sa spending, ni-report ng DBM iyong naging progress natin na actually for this third quarter, mataas ang naging spending ng mga ahensya,”  ayon kay Edillon.

Ipinaliwanag pa nito na nagawang isumite ng mga ahensiya ang kanilang “catch-up plans, habang marami sa mga ito ang nag- improve ang kanilang paggasta para sa  third quarter.

“So, we’re expecting,  yeah.. actually that’s until end of September na pala iyong datos nila. So, talagang  we’re able to plug naman those holes,” ang pahayag ni Edillon.

Matatandaang, buwan ng Agosto ngayong taon ay sinabi ni NEDA Secretary Arsenio Balisacan na ang pagpapabilis sa implementasyon ng mga proyekto at programa ay mapakikinabangan ng ekonomiya para sa  second half ng 2023.

Isiniwalat din nito na ipinresenta ng ahensiya ang  catch-up plans at action plans para sundin ng mga ahensiya ng gobyerno.

Samantala, tinalakay naman ni  Edillon ang  report  mula sa Sub-committee on Inflation and Market Outlook, nilikha ni Pangulong  Marcos na may layuning  “to provide advice anticipating the developments either in the country and especially outside.”

“The directive from the subcommittee was to prepare for the El Niño phenomenon, especially in the agricultural sector since there are ways to ramp up the production in provinces that will be less likely to be affected by the extreme climate,” ayon kay Edillon.

Binigyang diin din nito ang pangangailangan na masusing i-monitor ang presyo ng langis pagdating sa larangan ng epekto sa non-food items  sa  overall inflation ng bansa.

“With respect to non-food inflation, ang nakita namin na medyo kailangan nating bantayan  is still the fuel prices which hindi naman natin masyadong magagawaan ng paraan except really to manage the demand in which case it’s really energy conservation,” ang litaniya ni Edillon.

Samantala, kumpiyansa naman si Edillon na maging ang epekto ng  Israel-Hamas conflict sa fuel at energy prices sakali’t umigting  ay maaaring ma-contain ng pagtatapos ng ilang  energy power plants at transmission projects ngayong taon o sa unang bahagi ng susunod na taon.

ISINAPINAL na ang implementing rules and regulations (IRR) ng Maharlika Investment Fund (MIF), isang linggo matapos na suspendihin ang implementasyon nito.

“The Investment Rules and Regulations of Maharlika Investment Fund have been finalized,” ayon kay Pangulong Ferdinand  Marcos Jr. sa kanyang Instagram.

“Upon our approval, we’ll swiftly establish the corporate structure, getting the MIF up and running,” dagdag na pahayag nito.

Ang simula ng pagpapatakbo sa IRR ng IMF ay ipinalabas noong Agosto, subalit inanunsyo ni Pangulong Marcos ang suspensyon ng  implementasyon nito “pending further study” noong Oktubre 18.

Bago umalis patungong Saudi Arabia noong nakaraang buwan, nilinaw ni Pangulong Marcos na hindi itinigil ang MIF, sabay sabing tinatrabaho ng pamahalaan para maging operational ang MIF ngayong taon.

“We are, the organization of the Maharlika Fund proceeds apace, and what I have done though, is that we have found more improvements we can make, specifically to the organizational structure of the Maharlika Fund,” ayon kay Pangulong Marcos.

Winika  pa ng Punong Ehekutibo  na ang suspensyon ng IRR ay hindi dapat ma-misinterpret o mabigyan ng ibang kahulugan  bilang “judgement of rightness o wrongness of the MIF.”

Binigyang-diin din ng Pangulo kinonsulta ang mga  economic manager at “personalities who will actually be involved in the fund” sa  MIF.

Matatandaang, nilagdaan ni Pangulong Marcos ang Maharlika Investment Fund (MIF) Act of 2023 sa Malakanyang, kung saan inilagay ang kauna-unahang sovereign wealth fund ng Pilipinas na susuporta sa mga layunin sa ekonomiya ng Administrasyon.

“Ang MIF ay isang matapang na hakbang tungo sa makabuluhang pagbabago ng ekonomiya ng ating bansa,” pahayag ni Pangulong Marcos sa seremonya ng paglagda.

“Just as we are recovering from the adverse effects of the pandemic, we are now ready to enter a new age of sustainable progress, robust stability, and broad-based empowerment.” aniya pa rin.

Sa paglagda ng Republic Act (RA) No. 11954 bilang batas, ang bansa ay magkakaroon ng kapasidad at kakayahan na mamuhunan sa lahat ng napakahalagang proyektong ito tulad ng agrikultura, imprastraktura, digitalization pati na rin ang pagpapalakas ng value chain.

Ang mga institusyong financing ng gobyerno ay magsasama-sama na ngayon ng mga mapagkukunang pinansyal na hindi utang para hindi maalis ang iba pang mga obligasyon sa pagpapautang na kailangan nilang tuparin sa ilalim ng kani-kanilang mga mandato.

Higit pa rito, ang pondo ay may potensyal na mag-funnel sa panlabas na financing, na binabawasan ang pasanin ng pamahalaan upang tustusan ang imprastraktura sa pamamagitan ng mga paghiram, mga buwis.

“Through the fund, we will accelerate the implementation of the 194 National Economic and Development Authority Board-approved, NEDA-approved, flagship infrastructure projects.” ayon sa Pangulo.

Kasunod ng paglagda sa MIF Act, nakatakdang ihanda ng Administrasyon ang mga implementing rules and regulations (IRR) para sa paglikha ng Maharlika Investments Corp. (MIC), na magiging tanging sasakyan para sa pagpapakilos at paggamit ng MIF para sa mga pamumuhunan.

Ang MIC ay inaasahang magkakaroon ng hindi bababa sa P75 bilyon na paid-up capital ngayong taon, P50 bilyon mula sa Land Bank of the Philippines (LBP) at P25 bilyon mula sa Development Bank of the Philippines.

Samantala, ang kontribusyon mula sa national government ay manggagaling sa “total declared dividends ng Bangko Sentral ng Pilipinas’; share ng national government mula sa kinita ng  PAGCOR; Properties, real at personal na i-identify ng  DOF-Privatization and Management Office at iba pang maaaring pagkuhanan gaya ng royalties at/o special assessments.

Sa ilalim ng batas, ang MIF ay mayroong authorized capital stock na P500 billion.  (Daris Jose)

SA tulong ng kanyang Facebook at social media account, naaresto ang isang suspek at natunton ang kanyang tinangay na motorsiklo sa Bacoor City, Cavite Linggo ng hapon.

Kasong paglabag sa PD 1612 (Anti-Fencing Law) ang kinakaharap ng suspek na si alias ‘Jack’ nasa wastong edad dahil sa reklamo ni Rodrigo Navarette Jr y Luna, nasa wastong edad.

Sa ulat, ipinarada ng biktima ang kanyang motorsiklo na Honda TMX 155 na may side car sa harapan ng Maliksi Elementary School sa Brgy Bayanan, Bacoor City Cavite subalit nang balikan nito at nawawala na.

At sa pamamagitan ng footage sa Closed Circuit Television (CCTV) sa lugar, nalaman nito na tinangay ng suspek.

Dahil dito, in-post ng biktima sa kanyang Facebook account, gayundin sa Messenger account sa  group ng kanyang kapwa motorcycle driver. Hinggil sa pagkawala nito.

Ilang sandali lang nang nakatanggap siya ng tawag mula sa lanyang kapwa driver na nakita ang side car nito sa Brgy talon 5, las Pinas City,

Isa pang tawag ang kanyang natanggap na nakita ang kanyang motorsiklo sa bahay ng suspek sa Brgy Bayanan, Bacoor City, Cavite at pinamamadali ito dahil sinisimulan ng katayin.

Agad na ipinagbigay alam sa pulisya kung saan nagtungo sa lugar dakong alas-2:00 kamakalawa ng hapon  na nagresulta sa pagkaka-aresto sa suspek.

Narekober sa bahay ng suspek ang ilang piraso ng kanyang motorsiklo na kinatay kabilang ang kanyang side car at  mug wheels. GENE ADSUARA

MALAPIT nang magkaroon ng karagdagang istasyon ng bumbero ang Navotas City kasunod ng paglagda ng 30-taong usufruct sa pagitan ng pamahalaang lungsod at ng Bureau of Fire Protection (BFP).

Sa ilalim ng kasunduan, magagamit ng BFP ang 444-square meter lot sa Brgy. Navotas East para sa iminungkahing Navotas Central Fire Station at iba pang pasilidad.

Pinirmahan ni Mayor John Rey Tiangco ang kasulatan kasama si FCSupt Nahum B. Tarroza, Regional Director ng Bureau of Fire Protection–National Capital Region; FSupt Jude G. de los Reyes, City Fire Marshal; at Jayne B. Rillon, City General Services Officer.

“Preparation for this usufruct took us five years. Because of limited spaces in our city, we had to expropriate parcels of land for our new central fire station,” paliwanag ni Tiangco.

“Navotas has fire stations at Brgy. Sipac Almacen, Tangos North, and Tanza 1. Building an additional station would increase our efficiency in responding to emergencies, so we can prevent incidents that could claim lives and property,” dagdag niya.

Samantala, nagbigay din ang pamahalaang lungsod ng dalawang fireboats sa Navotas City Fire Station at isang patrol boat sa Bantay Dagat.

Dumalo din sa event si BFP-NCR Assistant Regional Director SSupt. Rodrigo N. Reyes, at Fire District 2 Fire Marshall Supt. Douglas M. Guiyab. (Richard Mesa)

TINUTUGIS ng Manila Police District (MPD) ang grupo ng siyam na kalalakihan na umano’y responsible sa pagkamatay ng isang 20-anyos na estudyante sa isang Restobar Biyernes ng madaling araw noong October 20.

Inaalam pa ang pagkakakilanlan sa grupo ng kalalakihan na suspek na pagpatay kay   Randall Bonifacio Y Rillion ng 3192 Int 22, Pilar St., Brgy 199, Tondo na namatay dakong alas-4:00 ng madaling araw noong August 21 habang ginagamot sa Tondo Medical Center.

Sa ulat ni Police Staff Sergeant  Boy Niño Baladjay,  dakong alas-5:10  ng umaga noong October 20, 2023 nang naganap ang insidente kung saan nag-inuman ang biktima at ilang kaibigan nito sa loob ng  Baluarte Bar and Restaurant sa 631 Northbay Blvd., Tondo, Manila at papauwi na sana sila nang ilang grupo ng kalalakihan ay walang sabi-sabing pinukpok ang biktima gamit ang isang hollow blocks na nagresulta sa sugat sa ulo.

Matapos ang insidente ay mabilis na tumakas ang mga suspek habang agad na isinugod ang biktima sa ospital subalit namatay habang ginagamot.

Ang insidente ay hindi kaagad na inimbestigahan ng pulisya makaraang humiling ang pamilya at mga saksi nito na ipagluksa muna ang labi ng kanilang anak at nitong Martes, dakong alas-1:30 kahapon ng tanghali ay personal na nagtungo ang pamilya nito sa pulisya para imbestigahan ang nasabing insidente. GENE ADSUARA

NANANAWAGAN si House Deputy Majority Floor Leader at ACT-CIS Cong. Erwin Tulfo sa pamahalaan na magtatag na ng isang ahensya para protektahan at labanan ang anumang pag-atake ng mga hackers, o mas malala pa, ng mga cyber terrorists, sa mga computer at data systems sa bansa.

Ito’y matapos ang sunud-sunod na pag-atake ng mga hackers sa mga computer data system at websites ng iba’t ibang ahensya ng pamahalaan tulad ng PhilHealth, Department of Information, Communication and Techno­logy at maging ng House of Representatives.

Ayon kay Cong. Tulfo, “nakita natin na kung gaano ka-vulnerable at helpless ang mga ahensya natin sa pag-atake ng mga hacker sa mga websites o mga computer files ng mga government agencies natin.”

Aniya, marami ng bansa ang nagtatatag na ng cyber security agency dahil online o digital na ang halos lahat ng transaction pati ang komunikasyon sa buong mundo.

Para kay Tulfo, ang itatag na cyber security office o agency ay may kakayahan na pangalagaan at protektahan ang mga digital files ng gobyerno laban sa mga pag-atake ng mga ordinaryong hackers at posibleng cyber terrorists.

Ang nangyari raw sa isang bangko at isang e-wallet company na napasok ng mga hacker ilang buwan na ang nakakaraan ay isang paalala raw na nasa cyber space na rin ang mga sindikato. (Daris Jose)

IPAPAKALAT ng Manila Police District (MPD) ang may 800 na kapulisan sa mga sementeryo sa lungsod bilang paghahanda sa Undas 2023.

Ayon kay MPD Chief Police Col. Thomas Ibay, nasa 450 ang kanyang idedeploy sa loob at labas ng Manila North Cemetery habang 350 naman sa Manila South Cemetery.

Dagdag pa ng bagong talagang Direktor ng MPD na maagang ipapakalat sa Sabado ,Okt.28 ang kanilang mga kapulisan.

Ayon pa kay Ibay, bukod sa idineploy na mga pulis sa semeteryo, may mga karagdagang nakalatag ding pwersa ng MPD at NCRPO kaugnay ng BSKE 2023.

Nakakatulong din sa dalawang aktibidad ang iba’ t ibang hanay ng mga force multipliers mula sa pribado at pampubliko.

Habang nakatutok at nakaalerto rin ang mga nag-iikot na bike, mobil, motorcycle, patrol unit ng mpd sa mga pamilihan, pampublikong lugar o pasyalan upang mapanatili ang kaligtasan ng mga Manileño sa lungsod. GENE ADSUARA

ITINALAGA ni Pangulong Ferdinand Marcos Jr. si Brig. General Jesus Nelson B. Morales (PAF) bilang  Commander ng Presidential Security Group (PSG).

Pinalitan ni Morales sa puwesto si  Brig. General Ramon P. Zagala (PA) na nakatakdang umupo para sa kanyang bagong papel bilang  Commander ng Civil Relations Service ng  Armed Forces of the Philippines, ang nakasaad sa kalatas na ipinalabas ni Communication Secretary Cheloy Garafil.

Si Morales  ay nagsilbi bilang  deputy wing commander ng Tactical Operations Wing Eastern Mindanao ng PAF na nakabase sa Davao City.

Habang si Zagala  naman ay nagmula sa pamilya na may pamana ng militar, may tatlong henerasyon mula sa kanyang lolo na si  Col. Ramon Zagala, at ama na si  Maj. Gen. Rafael Zagala. (Daris Jose)