SA halip na multa lang, sa loob ng selda humantong ang isang lalaki matapos mabisto ang dalang baril nang tangkain takasan ang mga pulis na sumita sa kanya dahil sa paninigarilyo sa ipinagbabawal na lugar sa Caloocan City, kamakalawa ng gabi.

Ayon kay Caloocan police chief P/Col. Ruben Lacuesta, habang nagpapatrolya ang mga tauhan ng Police Sub-Station 13 sa kahabaan ng Phase 8A, Bagong Silang, Brgy., 176, dakong alas-8:30 ng gabi nang matiyempuhan nila ang isang lalaki na nagyoyosi sa pampublikong lugar na malinaw na paglabag sa umiiral na ordinansa ng lungsod.

Nang lapitan para isyuhan ng Ordinance Violation Receipt (OVR), nagtangka itong tumakas subalit, nagawa rin siyang makorner ng humabol na mga pulis at dito nila napansin ang puluhan ng baril na nakausli sa kanang baywang ng suspek na si alyas “Boy”.

Kaagad kinumpiska ng mga pulis sa suspek ang dalang isang cal. 38 revolver na kargado ng dalawang bala at nang hanapan siya ng kaukulang dokumento hinggil sa legalidad ng naturang armas ay wala siyang naipakita kaya binitbit siya sa selda.

Pinuri naman ni Northern Police District (NPD) Director P/BGen. Rizalito Gapas ang Caloocan police sa kanilang pinaigting na police visibility sa lungsod bilang tugon sa inilatag na agenda ng PNP Chief na “Aggressive and Honest Law Enforcement Operations” na nagresulta sa pagkakadakip sa suspek na mahaharap sa kasong paglabag sa Comprehensive Firearms and Ammunition Regulation Act. (Richard Mesa)

PATULOY na nakikipag-ugnayan ang Pilipinas sa foreign governments para masiguro na protektado ang mga Filipino seafarer lalo na sa Red Sea.

Sa press briefing sa Malakanyang, sinabi ni DFA Undersecretary for Migration Eduardo Jose de Vega na kinikilala nito ang naging pahayag ng United Nation Security Council na kinokondena ang ginawang pag-atake sa merchant vessels sa Gulf of Aden.

“So we have allies, we have friends with us and countries in the region are also assisting in the operations that they are conducting in response to this Houthi attacks,” ayon kay de Vega.

“We have been in touch with the United Kingdom and USA to ensure that no harm comes to seafarers,” dagdag na wika nito.

Sa 17 Filipino na sakay ng vessel Galaxy Leader, biktima rin ng pag-hijack ng mga Houthi rebels sa nakalipas, sinabi ni De Vega na nagpapatuloy ang pagsisikap ng pamahalaan na madaliin ang pagpapalaya sa mga ito.

“The 17 are still being held in Al Hudaydah in Yemen and the Philippines is “working with friendly governments to see if they could be released,” ayon kay De Vega.

“The Houthis are consistent in their statement that it would need an end to the war in Gaza before they will release the ship or seafarers,” aniya pa rin sabay sabing “But, at the very least, we know that the seafarers are safe. Of course, they’re not in the best of conditions, but they are safe and able to contact their families.”

Samantala, winika ni De Vega na inaasahan ng DFA na pag-uusap an sa working visit ni Pangulong Ferdinand R. Marcos Jr. sa Germany and posibleng maritime cooperation para paigtingin ang proteksyon para sa seafarers sa itinuturing na ‘volatile region.’ (Daris Jose)

KUMPIYANSA si Pangulong Ferdinand Marcos Jr., na ang suporta ng Estados Unidos sa ilalim ng CHIPS Act ay magpapalakas sa semiconductor sector ng Pilipinas kabilang na ang propesyonal nito.

Sinabi ng Pangulo na inaasahan na ang Pilipinas ay makapagpo-produce ng 128,000 semiconductor engineers at technicians na mami-meet ang demand ng teknolohiya sa susunod na mga taon.

“So, with the potential support from the United States under the CHIPS Act, we are poised to churn out a robust talent pool of 128,000 semiconductor engineers and technicians by the year 2028, ready to meet the expanding needs of high-technology industries,” ang naging pahayag ni Pangulong Marcos sa isinagawang courtesy call ng US government at Presidential Trade and Investment Mission (PTIM) delegation sa Palasyo ng Malakanyang.

Pinahihintulutan ng CHIPS Act ang bagong pagpopondo para palakasin ang pagsasaliksik at manufacturing ng semiconductors sa Estados Unidos.

Titiyakin din ng batas ang pamumuno ng Estados Unidos sa teknolohiya na bubuo ng pundasyon sa lahat mula automobiles hanggang household appliances hanggang defense systems.

Tiniyak ni Pangulong Marcos na handa ang Pilipinas na suportahan ang mga kumpanya ng Estados Unidos sa kanilang “research and development endeavors” at maging sa iba pang support operations.

“With our standing proposition to the US semiconductor companies to invest in a laboratory-scale wafer fabrication facility in the Philippines, we can support the R&D (research and development), and advanced assembly, packaging, and test requirements of U.S. companies that are into semiconductors and electronics manufacturing services,” ayon kay Pangulong Marcos.

Kumpiyansang ipinahayag din ni Pangulong Marcos na makakaya ng mga Filipino professionals na lumikha ng prototypes at tape-outs ng integrated circuits. Ang integrated circuit ay isang grupo ng mga electronic circuits na pinagsama-sama sa isang maliit na chip ng materyal pansemikonductor, kadalasang silicon. Ito ay nagagawang mas maliit sa mga circuitna gawa sa sari-sariling electronic components; at upang maugnay sa development ng cutting-edge, high-value products at services.

Samantala, sinabi ni Pangulong Marcos na makapag-aambag ito sa pagsusulong ng technology-driven economy.

Sa kabilang dako, hinikayat naman ni Pangulong Marcos ang mga American firms na magpartisipa sa “Build, Better, More” program ng administrasyon, naglalayong i-develop ang 198 high-impact priority infrastructure flagship projects (IFPs).

“This is not the only important infrastructure that we need. Through the “Build, Better, More” program, we aim to launch 198 high-impact priority infrastructure flagship projects (IFPs), totaling USD 148 billion (PhP 8.8 trillion),” ayon kay Pangulong Marcos.

“We eagerly welcome participation by US investors in these transformative initiatives,” dagdag na wika ng Chief Executive.

Bukod dito, nanawagan din ang Pangulo sa mga American businessmen na mamuhunan sa pag-develop ng energy sector ng bansa at mahahalagang metals exploration at processing, bukod sa iba pang mga lugar.

Ang pagdating ng US mission sa Maynila ay tanda ng pagsasaktuparan ng commitment ni US President Joe Biden kay Pangulong Marcos nang mag-state visit ang huli sa Washington, D.C. noong May 2023.

Matatandang, nangako si Biden na magpapadala ng high-level presidential delegation sa Pilipinas para palakasin ang investment at trade relations sa pagitan ng dalawang bansa.

Noong nakaraang taon, sinabi ng Presidential Communications Office (PCO) na ang US ay puwesto sa pangatlo mula sa 230 trading partners ng Pilipinas, pang-una sa export market, at pang-lima naman sa import source. (Daris Jose)

NALAMBAT ng pulisya ang isang wanted person na miyembro ng ‘Parojinog Group’ matapos matunton sa kanyang pinagtataguang lugar sa Valenzuela City, kamakalawa ng gabi.

Sa ulat ni District Special Operation Unit (DSOU) chief P/Lt. Col. Robert Sales kay Northern Police District (NPD) Director P/BGen. Rizalito Gapas, nakatanggap sila ng impormasyon hinggil sa pinagtataguang lugar ng akusado na si alyas ‘Jose’.

Alinsunod sa inilatag na agenda ng PNP Chief na “Aggressive and Honest Law Enforcement Operations”, agad nagsagawa ang DSOU sa pangunguna ni P/Major Marvin Villanueva, kasama ang mga tauhan ng NPD-DID at NDIT-RIU NCR ng joint manhunt operation na nagresulta sa pagkakaaresto sa akusado dakong alas-5 ng hapon sa Lamesa Brgy. Ugong, Valenzuela City.

Ani Major Villanueva, inaresto nila ang akusado sa bisa ng warrant of arrest na inisyu ni Presiding Judge Merianthe Pacita M Zuraek ng Regional Trial Court Branch 51, Manila noong February 22, 2021, para sa kasong Robbery by a Band under Art. 294 (5) in relation to Art. 295 and Art. 296 or Revised Penal Code as Amended.

Pansamantalang ipiniit ang akusado sa NPD-CFU sa Langaray Street, Kaunlaran Village, Barangay 14, Caloocan City habang hinihintay ang pagpapalabas ng commitment order mula sa korte. (Richard Mesa)

MARIING itinanggi ng Tsina na hina-harass nito ang Pilipinas sa kabila ng napaulat na agresyon na ginawa nito sa Philippine vessels, kabilang na ang mapanganib na pagmaniobra, araw ng Martes, Marso 5 na nauwi sa banggaan ng mga barko ng magkabilang panig.

      “There is no such situation of China ‘harassing’ the Philippines,” ayon kay China’s Foreign Ministry spokesperson Mao Ning.

      Gayunman, wala pang 24 oras mula nang sabihin ni Mao ang kanyang pahayag, isang video ang ipinalabas ng Philippine Coast Guard na salungat sa posisyon ni Mao.

      Makikita sa video na hinaharang ng China Coast Guard (CCG) vessel ang ruta ng mas maliit na barko ng Philippine counterpart nito.

      “Their reckless and illegal actions led to a collision between MRRV-4407 and China Coast Guard 21555 that resulted to minor structural damage to the PCG vessel,” ayon kay PCG spokesman Jay Tarriela sa kanyang X account.

      Nauna rito, sa isang panayam kay Foreign Affairs Secretary Enrique Manalo sa Melbourne, hinikayat nito ang Tsina na “stop harassing us.”

“If Beijing would refrain from its harassment, then “there wouldn’t be any news to report” about its aggressive activities,” dagdag na pahayag ni Manalo.

Ang ganting tugon naman ng Tsina ay “the reason behind the recent maritime developments,” na halos nauugnay sa mga aksyon nito sa tubig “is that the Philippines has frequently made provocative moves in the South China Sea, infringing on China’s territorial sovereignty and maritime rights and interests.”

      “China has taken necessary measures in accordance with law to defend its own sovereignty, rights and interests,” ayon pa rin kay Mao.

(Daris Jose)

BAGSAK sa kalaboso ang isang lalaki nang posasan ng pulisya makaraang maaktuhan may bitbit na shotgun na kargado ng bala habang pagala-gala sa Malabon City.

Sa imbestigasyon ng Malabon police, nakatanggap ng sumbong mula sa mga residente sa Pilapil St., Brgy , Catmon ang mga tauhan ng Police Sub-Station-4 hinggil sa isang lalaki na mistulang nasa “war zone” kung umasta dahil armado ng baril.

Kaagad silang nagresponde sa nasabing lugar kung saan natiyempuhan nina P/SSg. Bernardino Bernal at P/Cpl. Rochester Bocyag ang suspek na nakilala sa alyas ‘Rodel’ na palakad-lakad habang may bitbit na na baril.

Bago pa makaporma, kaagad dinamba ng mga pulis suspek at nakumpiska sa kanya ang isang 12 gauge shotgun na may tatak na “Squibman” at kargado ng dalawang bala.

Nabigo naman si ‘Rodel’ na magpakita ng dokumento na magpapatunay na legal ang pagmamay-ari at pagdadala niya ng mataas na uri ng armas kaya isinelda kaagad siya ng mga pulis. (Richard Mesa)

UMABOT sa halos P.2 milyong halaga ng droga ang nasabat sa dalawang drug suspects matapos matimbog ng pulisya sa isinagawang buy bust operation sa Valenzuela City, Martes ng madaling araw.

Kinilala ni Valenzuela police chief P/Col. Salvador Destura Jr. ang mga naarestong suspek na sina alyas Nelson, 54 ng Coloong 2, at alyas Peter, 34, Technical Crew at residente ng Fellow 1 Subd., Rincon.

Sa kanyang report kay Northern Police District (NPD) Director P/BGen. Rizalito Gapas, sinabi ni Col. Destura na ikinasa ng mga operatiba ng Station Drug Enforcement Unit (SDEU) ng Valenzuela police sa pangunguna ni PEMS Restie Mables sa ilalim ng pangangasiwa ni P/Cpt. Ronald Sanchez ang buy bust operation laban kay ‘Nelson’ matapos ang natanggap na impormasyon hinggil sa umano’y pagbebenta nito ng ilegal na droga.

Nang tanggapin ni ‘Nelson’ ang isang P500 bill marked money na may kasamang apat pirasong P1,000 boodle money mula sa isang pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba dakong ala-1:50 ng madaling araw sa tapat ng kanyang bahay, kasama si ‘Peter’.

Nakumpiska sa mga suspek ang nasa 27 grams ng hinihinalang shabu na may standard drug price value na P183,600.00, buy bust money, P150 recovered money, dalawang cellphone at isang motorsiklo.

Ani SDEU investigator PSSg Carlos Erasquin, kasong paglabag sa Sections 5, 11 at 26 under Article 2 of R.A 9165 (Comprehensive Dangerous Drug Act of 2002) ang isasampa nila laban sa mga suspek sa Valenzuela City Prosecutors Office. (Richard Mesa)

NAG-UWI ng multiple awards ang Public Employment Service Office (PESO) – Valenzuela matapos kilalanin ng Department of Labor and Employment – National Capital Region (DOLE – NCR) bilang Best Performing PESO sa NCR 2023 sa pamumuno ni Mayor WES Gatchalian.

Nakamit ng PESO-Valenzuela ang tatlong core function awards na Best in Referral and Placement, Best in Labor Market Information at Best in Career Guidance and Employment Coaching.

Ang Labor Market Information Award ay isang pagkilala sa epektibong pagpapakalat ng impormasyon ng departamento, kabilang ang client-specific information, education, communication tools to employers at future workers tungkol sa mga kalagayan sa merkado ng future workers sa pamamagitan ng trabaho, mga in-demand na posisyon, at mga kakulangan sa kasanayan.

Sa kabilang banda, ang Referral and Placement plaque ay para sa pagkakaloob ng mga serbisyo sa lungsod na nagpapadali sa trabaho, tulad ng job fairs at partnerships sa business sector, habang ang Career Guidance and Employment Coaching award ay para sa pagbibigay sa mga tao ng foundational knowledge sa pangunahing impormasyon sa labor market na magagamit ng mga naghahanap ng trabaho.

Maliban sa nakamit na mga pagkilala, ang PESO-Valenzuela ay nahigitan pa ang mga kalapit na lungsod nito sa NCR sa pambihirang pagganap nito sa pagpapadala ng mataas na bilang ng mga mag-aaral upang magtrabaho kasama ang kanilang mga kasosyo mula sa pribadong sector.

Alinsunod dito, binigyan sila ng isang espesyal na citation, na humakot ng isa pang tropeo para sa Efficient Special for Employment of Students with the Private Sector—na nagbabawal sa malawak na pagsisikap ng lokal na pamahalaan sa pagtugon sa problema sa kawalan ng trabaho sa lungsod.

Pinuri naman ni Mayor Wes si Ms. Josephine Osea, Valenzuela PESO Manager, na nakatanggap din ng espesyal na pagkilala sa pagkakaroon ng Public Employment Service National Certificate IV, at kauna-unahang certified PESO Manager na nagkaroon ng naturang sertipiko sa NCR. (Richard Mesa)

NALAMBAT ng pulisya ang tatlong most wanted persons sa ikinasang manhunt operations sa magkakahiwalay na lugar sa Valenzuela City.

Ayon kay Valenzuela police chief P/Col. Salvador Destura Jr., dakong alas-12:30 ng tanghali ng February 27, nang maaresto ng pinagsamang mga tauhan ng Warrant and Subpoena Section (WSS) ng Valenzuela CPS at Northern NCR Maritime Police Station, Navotas City ang isang lalaking akusado sa Blk. 17, Lot 2, M. Delos Reyes Street, Lupang Sinilangan, Barangay Gen. T. De Leon.

Binitbit ng pulisya ang akusado sa bisa ng warrant of arrest na inisyu ni Presiding Judge Mateo B Altarejos ng Regional Trial Court (RTC) Branch 16, Valenzuela City noong February 26, 2024, para sa kasong Acts of Lasciviousness under the RPC in rel. to Sec. 5(b) as amended by R.A. 11648 – The Anti-Rape Law of 1997.

Nauna rito, ala-1:00 ng madaling araw nang madakip naman ng mga tauhan ng Malinta Police Sub-Station 4 sa pangunguna ni SS4 Commander P/Cpt. Doddie Aguirre, kasama si PSMS Roberto Santillan at EX-O Mark Guerrero at tanod na si Argie Gamo ang akusado na si alyas “Raily Francisco”, 26 ng Pinalagad, Brgy. Malinta.

Ani PSMS Santillan, inaresto nila ang akusado sa bisa ng warrant of arrest na inisyu noong February 26, 2024 ni Presiding Judge Maria Nina Juaban Santos ng Valenzuela RTC Branch 171 para sa kasong Homicide na may inirekomendang piyansa na P120,000 para sa kanyang pangsamantalang paglaya.

Habang bandang alas-6:20 ng gabi nang arestuhin naman ng mga tauhan ng WSS ng Valenzuela CPS sa Padrigal St., Brgy., Karuhatan ang isa pang lalaking akusado sa bisa ng warrant of arrest na inisyu ni Caloocan City RTC Branch 129 Presiding Judge Rose Sharon Santiago Cordero-Abila noong January 29, 2024, para sa kasong Murder.

Pinuri naman ni Northern Police District (NPD) P/BGen. Rizalito Gapas ang Valenzuela police sa pagtugon nila sa inilatag na agenda ng PNP Chief na “Aggressive and Honest Law Enforcement Operations” na nagresulta sa pagkakaaresto sa tatlong mga MWP. (Richard Mesa)