NANGAKO ang gobyerno ng Pilipinas na pangangalagaan nito ang lumalalim na bilateral relations sa Cambodia gaya ng ginagawa nitong patuloy na pangangalaga sa mga kaalyadong estado sa buong mundo.

Inihayag ito ni Pangulong Ferdinand Marcos Jr. sa courtesy call ni Cambodia’s Deputy Prime Minister Sok Chenda Sophea, araw ng Martes.

“I hope we can continue this. We will foster this relationship and continue to improve the relationship that we have had for many, many years,” ayon kay Pangulong Marcos.

Si Sok Chenda Sophea ay nasa Pilipinas para tumayong co-chair para sa 4th meeting ng Cambodia-Philippines Joint Commission for Bilateral Cooperation sa Pilipinas bunsod na rin ng imbitasyon ng Department of Foreign Affairs.

Layon ng pagpupulong na i-assess ang progreso kung saan ginawa ang pagpapatupad ng mga kasunduan na napagtagumpayan ng dalawang bansa sa panahon ng 3rd meeting ng Cambodia-Philippines JCBC noong December 2021.

Kapwa naman napanatili ng Pilipinas at Cambodia ang masayang ugnayan ng mga ito simula ng magpatuloy ang kanilang diplomatic relations noong 1995. (Daris Jose)

TIWALA ang Philippine National Police (PNP) na bilang na ang araw ni Kingdom of Jesus Christ leader Pastor Apollo Quiboloy na pinaniniwalaang nagtatago sa underground bunker ng KOJC Compound matapos na ma-detect ang ‘heartbeat’ nito.

Ayon kay PNP Region XI spokesperson Catherine Dela Rey, na-detect ang heartbeat ni Quiboloy matapos na gamitin ng PNP ang kanilang ground-penetrating radar sa underground bunker na nasa KOJC compound. Sa ngayon aniya, hinahanap nila ang pasukan ng bunker.

“As of now, what we’re really looking for is the entrance to the bunker because the life detection device we used has positively detected heartbeats underground,” ani Dela Rey.

Sa katunayan umano maraming heartbeats ang na-detect sa bunker na indikasyon na posibleng nasa ilalim ng lupa nagtatago si Quiboloy.

Nabatid na ang ground penetrating radar ay naglilikha ng imahe sa pamamagitan ng radar pulses. Natutukoy din nito ang heartbeats, kilos at heat signature.

Samantala, tatlong protesters ang dinakip bunsod ng ginawang pagharang at pananakit sa mga pulis.

Pitong pulis ang nagtamo ng mga sugat sa iba’t ibang bahagi ng katawan matapos kuyugin ng mga miyembro ng KOJC nang sumiklab ang tensiyon sa isinagawang prayer at lightning rally kamakalawa ng kagabi sa harapan ng compound.

Subalit imbes na kandila ang sindihan ay nagsunog na ng gulong ng sasakyan ang mga ito at humarang na sa gitna ng kalsada dahilan upang awatin ng mga pulis at doon na nagsimula ang kaguluhan.

Nahaharap ang tatlo sa kasong obstruction of justice at direct assault. (Daris Jose)

KINUMPIRMA ng Bureau of Immigration (BI) na nasa Indonesia na si dismissed Bamban, Tarlac Mayor Alice Guo.

Ayon kay BI spokesperson Dana Sandoval, bumiyahe si Guo mula sa Pilipinas patungong Malaysia noong Hulyo 16, at dumating sa Indonesia mula sa Singapore noong Agosto 18.

“Sa atin pong pagbantay sa mga counterpart intelligence information, nalaman natin nasa Indonesia ngayon. Tumawid siya from Singapore the other day, August 18,” ani Sandoval.

Aniya pa, nagsasagawa ngayon ng back­tracking ang BI sa mga galaw ni Guo upang matukoy kung sinu-sino ang mga taong tumulong sa kanya upang makalabas ng bansa.

Hindi rin aniya nila ina­alis ang posibilidad na may ilang opisyal ng BI na nasa likod nito.

Dagdag pa niya, maaaring maipa-deport pabalik ng Pilipinas si Guo, kung kakanselahin ang kanyang mga dokumento.

Sinabi naman ni BI Commissioner Normal Tansingco na base sa kanilang natanggap na impormasyon, hindi dumaan si Guo sa immigration nang lumabas ng Pilipinas.

Kasabay nito, Iniutos na ni Executive Secretary Lucas Bersamin nitong Martes, Agosto 20 ang kanselasyon ng Philippine passport ni Guo.

Ang memorandum ay inilabas ni Bersamin sa Department of Foreign Affairs (DFA) at Department of Justice.

Ayon kay Bersamin, dapat magsagawa ng “appropriate action” para sa pagkansela ng mga pasaporte ni Guo at ng kanyang mga kamag-anak na sina Wesley Guo, Sheila Leal Guo, at Cassandra Li Ong, ang awtorisadong kinatawan ng Philippine Offshore Gaming Operators (POGO) na ni-raid sa Porac, Pampanga.

Sinabi rin ni Bersamin na si Guo ay may arrest order sa Senado dahil sa ­ilang beses na pag-isnab sa pagdinig tungkol sa POGO.

“The DFA Secretary may cancel a passport in the interest of national security. Under the same law, one of the grounds for the cancellation of a Philippine passport is when the court issues an order for its cancellation as the holder is a fugitive from justice,” ani Bersamin.

Matatandaang sa privilege speech ni Sen. Risa Hontiveros sa Senado nitong Lunes, ibinunyag niya na si Guo ay umalis ng bansa patungong Kuala Lumpur, Malaysia noong Hulyo 18 pa.

Una nang nabunyag na si Guo at ang Chinese citizen na si Guo Hua Ping ay iisa dahil magkapareho ang kanilang mga fingerprints. (Daris Jose)

SUPORTADO ni House Committee on Appropriations Vice Chair at Navotas Representative Toby Tiangco sa pag-apruba ng ‘ayuda’ funds sa panukalang 2025 budget.

“Nasa P253.3B ang allocation para sa iba’t ibang ayuda para sa mga kababayan nating nangangailangan. Napakahalaga na ito ay maipasa nang buo para siguradong walang maantala sa mga plano ni President Bongbong na palawakin ang mga tulong na maaaring matanggap mula sa gobyerno,” ani Tiangco.

“President Bongbong announced in his third SONA the expansion of DOH’s Cancer Assistance program and the proposal to allocate P1.205B for this initiative will greatly unburden Filipinos who suffer from this disease,” dagdag niya.

Pinuri rin ni Rep. Tiangco ang pagtaas ng panukalang budget allocation para sa Pantawid Pamilyang Pilipino Program (4Ps) ng Department of Social Welfare and Development.

Nauna nang inanunsyo ng Department of Budget and Management ang panukalang 4Ps budget na 7.4% na mas mataas kaysa noong nakaraang taon, kung saan ang panukalang 2025 na pondo ay nasa P114.1 bilyon.

Isinusulong din ng Navotas solon ang pagtaas ng iba pang assistance programs tulad ng fuel subsidy program ng Department of Agriculture para sa mga magsasaka at mangingisda dahil patuloy na nagbabago ang presyo ng mga produktong petrolyo.

Inihayag ng DBM na nagmumungkahi ito ng P35.1B at P4.4B na pagpopondo para sa DSWD’s Protective Services for Individuals and Families in Difficult Circumstances Program at Sustainable Livelihood Program, respectively.

Samantala, ang inilunsad kamakailan na Food Stamps Program ng ahensya ay may panukalang P1.9B alokasyon habang ang TUPAD ng Department of Labor and Employment ay nagmungkahi ng P14.1B na badyet.

“I appreciate the administration’s clear focus and commitment to expanding assistance programs that can provide both short-term relief and long-term support towards poverty alleviation. It is imperative that Congress throws its full support for these programs because they can directly benefit poor Filipinos, provide economic relief, and give them opportunities to uplift their lives and that of their families,” sabi ni Tiangco. (Richard Mesa)

INANUNSYO ng Presidential Communications Office (PCO) ang pagbibitiw sa puwesto ni Secretary Fred Pascual mula sa Department of Trade and Industry (DTI), epektibo Agosto 2, 2024.

Si Pascual ay babalik sa pribadong sektor.

Nauna rito, nakipagpulong muna si Pangulong Ferdinand Marcos Jr. kay Pascual sa Palasyo ng Malakanyang para tanggapin ang pagbibitiw nito sa puwesto at kilalanin ang napakahalagang serbisyo nito sa paggabay sa restorasyon at transpormasyon ng ekonomiya ng Pilipinas.

“His focus on MSMEs was absolutely correct, and we are beginning to see the fruits of that policy. We are sorry to lose him, but we respect his decision that this is the time for him to return to the private sector,” ayon kay Pangulong Marcos.

Samantala, kaagad namang sisimulan ang paghahanap ng magiging kapalit ni Pascual upang matiyak ang tuloy-tuloy na transisyon at pagpapatuloy ng mga inisyatiba ng departamento. (Daris Jose)

NAGPAABOT ng kanyang pakikidalamhati si United States President Joe Biden sa mga Filipinong nawalan ng mahal sa buhay o nasawi dahil sa pananalasa ng bagyong Carina at Southwest Monsoon (Habagat).

Ipinaabot ni Biden ang kanyang mensahe kay US Secretary of State Antony Blinken sa joint courtesy call nila ni Defense Secretary Lloyd Austin kay Pangulong Ferdinand Marcos Jr., sa Palasyo ng Malakanyang, araw ng Martes.

“Let me just start by sending our deepest condolences to all the victims of the recent typhoon and to say again, anything we can do to be of assistance, we welcome doing that,”ang sinabi ni Blinken kay Pangulong Marcos.

“Thirty-nine people reportedly died due to the Habagat and tropical cyclones Carina and Butchoy,” ayon naman sa National Disaster Risk Reduction and Management Council (NDRRMC).

Sa kabilang dako, nagpaabot din ng kanyang pakikidalamhati si Austin para sa mga labis na naapektuhan ng masamang panahon at malawakang pagbaha na idinulot sa maraming lugar sa Luzon.

“And I’ve said a number of times that we’re more than allies, we’re family and it always feels that way when, you know, I’m working with our colleagues,” ayon kay Austin.

Pinasalamatan naman ni Pangulong Marcos ang US government para sa pagpapaabot ng kanilang pakikidalamhati sa Filipino community.

Muli namang ni-renew ni Pangulong Marcos ang commitment ng Pilipinas para palakasin ang working relationship sa Estados Unidos.

“We are very happy to see you once again. I’m a bit surprised considering how interesting your political situation has become back in the States, but I’m glad that you found the time to come and visit with us,” ang tinuran ni Pangulong Marcos.

Samantala, sinabi naman ni Blinken na sila’y “very, very pleased” na bisitahin ang Pilipinas at ipaabot ang mainit na pagbati Biden at US Vice President Kamala Harris.

Sina Blinken at Austin ay nasa Pilipinas para sa 4th Philippines-US Foreign and Defense Ministerial Dialogue (2+2 Dialogue), na hinost ng Pilipinas para sa kauna-unahang pagkakataon.

Ang mga nakalipas na pagpupulong ay idinaos sa Washington DC.

Sa naturang courtesy call kay Pangulong Marcos, sinabi ni Austin na ‘looking forward’ ang Estados Unidos na palakasin ang bilateral relationship nito sa Pilipinas sa susunod na apat na taon, bago pa ang November elections. (Daris Jose)

NAGPALABAS ng mapa ang Philippine Space Agency (PhilSA) na nagpapakita ng potensiyal na laki o lawak ng oil spill mula sa tumaob na Philippine-flagged Motor Tanker Terra Nova sa lalawigan ng Bataan.

“It includes the tanker’s location as well as a satellite image of the oil leak that was taken at 5:40 a.m.,” ayon sa PhilSA.

“The image was retrieved from the International Charter Space and Major Disasters, which provides Earth-observation satellite data to support disaster management efforts,” ayon naman sa ulat.

”Please be advised that this map is still subject to field validation,” ang sinabi naman ng PhilSA.

Samantala, kumikilos na ang awtoridad para ma-contain ang tumagas na lang is mula sa lumubog na Philippine-flagged Motor Tanker Terra Nova sa may parte ng Manila Bay sa may bayan ng Limay sa probinsiya ng Bataan.

Ayon kay Philippine Coast Guard Rear Admiral Armand Balilo, sakaling lahat ng 1.4 milyong litro ng langis na laman ng tanker ay tumagas sa dagat, maaaring umabot ito sa baybayin ng kapital ng bansa sa Maynila.

Kung nagkataon ito na ang maituturing na pinakamalalang oil spill sa kasaysayan ng bansa.

Sa kasalukuyan, ayon sa PCG official tanging ang working fuel ng tanker o langis na ginamit ng tanker ang tumagas na minimal lamang.

Mayroon naman aniyang contingency plan ang ahensiya kabailang na pagdating sa worst-case situation.

Pinakilos na rin ang marine environmental protection personnel ng PCG para mapigilan ang oil slick.

Nagpadala na rin ang PCG ng personnel sa Navotas, Bulacan at pampanga para imonitor at paghandaan ang posibleng oil spill kasunod ng insidente at idineploy na rin ang BRP Melchora Aquino para magsagawa ng serach and rescue operations.

Ayon sa opisyal, nasa 16 mula sa 17 crew na lulan ng tanker ang naisalba na at patuloy na hinahanap ang mga nawawalang tripulante.

Una rito, patungo sana ang MT Terra Nova sa Iloilo para maghatid ng langis nang tumaob at kalauna’y lumubog ang tanker sa silangan ng Lamao Point sa bayan ng Limay bandang 1:10am nitong Huwebes. (Daris Jose)