ISANG  grand welcome at awarding ceremony  ang naghihintay sa mga Filipino medalists  ng 2023 Asian Games, mamayang gabi, araw ng Miyerkules, Oktubre 25.

Ang nasabing event ay tinawag na ‘Gabi ng Parangal at Pasasalamat Para sa Bayaning Atletang Pilipino’.

Ang Office of the President (OP) sa pakikipagtulungan sa  Presidential Communications Office,  ang magho- host  ng nasabing selebrasyon na gaganapin sa Rizal Memorial Coliseum.

Ang naturang  event  ay isang “special recognition” ni Pangulong Ferdinand R. Marcos, Jr.  bilang pagkilala sa sakripisyo at pagdiriwang sa tagumpay ng mga tinatawag na “modern-day heroes” na nag-uwi ng  karangalan, papuri at saya sa mga kapwa Filipino.

Sa kabilang dako,  makatatanggap naman ang lahat ng  33 Filipino medalists  ng Presidential Citation  bilang pagkilala sa kanilang ipinamalas na kahusayan at achievements sa kani-kanilang mga sports sa kamakailan lamang na nagtapos na 2023 Asian Games sa Hangzhou, China.

Sa gayong paraan, tataas ang  interest at kamalayan ng mga kabataan at iba pang aspiranteng atletang Filipino sa ‘sports.’

Ang bawat  medalists ay makatatanggap ng insentibo mula sa Philippine Sports Commission (PSC) sa pamamagitan ng  Philippine Amusement and Gaming Corporation (PAGCOR), may kabuuang P19.1 milyong piso. May karagdagang insentibo naman mula sa  Office of the President, umaabot sa halagang  P22.8 milyong piso.

Samantala, makakasama naman ng Asian Games 2023 medalists ang kani-kanilang mga pamilya sa naturang event.

Ang mga estudyante o mga mag-aaral mula sa iba’t ibang eskuwelahan, kolehiyo at unibersidad sa Kalakhang Maynila ay magpapartisipa sa  musical celebration na may kasamang pagganap ng  Konsyerto sa Palasyo artists at musicians.

“The medals received by our athletes during the Asian Games 2023 are a testament to the fact that Filipinos in the international sports arena are truly world-class. The government aims to continue supporting our athletes in many more international sporting events as we work together towards a Bagong Pilipinas,” ayon sa Malakanyang. (Daris Jose)

WALANG pag-aalinlangan ang isang matataas na opisyal ng Kamara na ang anti-drug operations ng administrasyon ni Pangulong Marcos ay mas magiging matagumpay sa pinaigting na operasyon ng mga otoridad subalit mas konti ang inaasahang mamamatay.

“The 52% significant drop in the number of fatalities, as reported by PDEA (Philippine Drug Enforcement Authority) is really a welcome development. For several years, we have been the subject of human rights abuses in this part of the world,” ani Antipolo City Rep. Romeo Acop, vice chairperson ng House Committee on Dangerous Drugs na pinamumunuuan ni Surigao del Norte Rep. Robert Ace Barbers.

Inatasan ni Speaker Ferdinand Martin Romualdez ang kongresista mula sa Antipolo, na isang retiradong police general, na tulungan si Barbers at Sta. Rosa City Lone District (Laguna) Rep. Dan Fernandez, ang chairperson ng House Committee on Public Order and Safety, sa pagtalakay sa mga isyu na mayroong kinalaman sa kampanya ng gobyerno laban sa ipinagbabawal na gamot.

Si Acop ang chairman ng House Committee on Transportation.

Nauna rito ay iniulat ng PDEA na bumaba ng 52% ang bilang ng mga namatay sa anti-illegal drugs operations. Bumaba ang bilang ng mga nasawi sa 19 mula Hulyo 2022 hanggang Setyembre 2023 mula sa 40 mula 2020 hanggang 2021.

Mayorya ng miyembro ng Kamara ang nagpahayag ng pagsuporta sa “bloodless anti-drug campaign” ng administrasyon kung saan umabot na sa P30 bilyon ang nasabit na ipinagbabawal na gamot mula ng magsimula ang termino ni Pang. Marcos.

Ang kabuuang halaga at bilang ng nasamsam ng pamahalaan ay mula sa datos ng PDEA, National Bureau of Investigation at Philippine National Police’s Drug Enforcement Group.

Kasama sa 4.4 tonelada ng ipinagbabawal na gamot na nakumpiska ang 200 kilo ng shabu extender na narekober sa Mabalacat, Pampanga noong Agosto; 560 kilo sa isang warehouse sa Mexico, Pampanga noong Setyembre, at 323 kilo na naharang sa Manila International Container Port sa Maynila noong Oktobre 4.

Kasama rin sa mga nasamsam na iligal na droga ang halos tatlong toneladang pinatuyong dahon ng marijuana.

Pinapurihan ni Senior Deputy Speaker Aurelio Gonzales Jr. (Pampanga) ang mga ahensya ng gobyerno sa kanilang matagumpay na mga operasyon. Siya ay kabilang sa mga kongresista na sumaksi sa pagsira ng PDEA sa mga ipinagbabawal na gamot noong nakaraang linggo sa Cavite.

Itinulak ni Gonzales ang pagsasagawa ng imbestigasyon ng Kamara matapos itong magpahayag ng pagkabahala dahil sa kanyang distrito umano idinaraan ang ipinagbabawal na gamot.

Suportado rin ni House Deputy Majority Leader Janette Garin, kinatawan ng Iloilo ang bloodless war on drugs ng gobyerno.

Sinabi ni Garin na sa nakaraang 16 na buwan ng pamumuno ni Pan. Marcos,  4.4 tonelada ng shabu na may street value na hindi baba sa P30 bilyon ang nakumpiska. (Daris Jose)

TINIYAK ng House committee on agriculture and food na tuloy tuloy ang gagawing pagbabantay sa presyo ng bigas, sibuyas at iba pang produktong agrikultural.

Ayon kay House Committee on Agriculture and Food Chairman Rep. Mark Enverga magpapatawag aniya ang komite ng mga pagdinig at pagsisiyasat at magdaraos ng konsultasyon sa mga stakeholder kung kinakailangan, upang mapigilan ang hindi makatwirang pagtaas sa presyo ng mga pangunahing bilihin.

Iginiit ni Enverga na hindi magpapatinag ang Kamara sa mga kritisismo matapos nitong ilipat ang confidential and intelligence funds (CIF) ng ilang ahensya para mapalakas ang paninindigan nito sa West Philippine Sea.

Sa unang bahagi ng taon, ikinasa ng komite ni Enverga ang apat na buwang pagsisiyasat sa biglang pagtaas ng presyo ng sibuyas ng umabot ng hanggang hanggang P800 kada kilo.

Nagresulta naman ito sa pagbaba ng presyo na naging P160 kada kilo. (Daris Jose)

NASAWI ang isang rider habang sugatan ang dalawa pang back rider  nang magsalpukan ang dalawang motorsiklo sa  Malate, Maynila kahapon ng madaling araw.

Sa ulat mula sa MPD-Traffic Enforcement Unit, nakilala ang nasawi  na si Orlie Magtibay y Villanueva, rider ng Honda click na my plakang 7330 IW .

Sugatan naman sina Aldrin Magtibay ,23; at Kristine Marie Templa,21 taong gulang.

Nangyari ang insidente ala 1:30 ng madaling araw ng Lunes sa Eastbound ng Quirino Ave.,corner Mabini St,Malate Manila .

Sa imbestigasyon, binabagtas ni Magtibay ang eastbound lane ng Quirino avenue at pagsapit sa kanto ng Mabini St, ay nabangga nito ang kanang bahagi ng motorsiklo na minamaneho naman ni Regine de Leon,30, na galing ng westbound ng nasabing lugar na dapat sana ay  liliko pakaliwa patungong southbound lane ng Quirino Avenue.

Dahil sa malakas na impact o pagkakabangga, tumilapon si Magtibay kaya nagtamo ng matinding pinsala sa ulo na nagresulta ng agarang nitong pagkamatay.

Patuloy ang isinasagawang imbestigasyon ng traffic bureau para sa pagsasampa ng kaukulang kaso sa Manila Prosecutors Office.GENE ADSUARA

UPANG higit pang palawigin at patatagin ang alyansa sa pagitan ng Valenzuela City at Tanauan City, pinangunahan nina Mayor WES Gatchalian at Mayor Nelson Collantes ang paglagda sa sisterhood agreement na ginanap sa Tanauan City Hall.

Sa bisa ng Resolution No. 2610, Series of 2023, na ipinasa ng Valenzuela City Council at Resolution No. 2022-2264, na nilagdaan ng Tanauan City Council, pormal na pinagtibay ang relasyong magkakapatid sa pagitan ng dalawang nabanggit na lungsod.

Maliban diyan, ikinategorya na rin nila ang developmental checklist na balak nilang pagtuunan ng pansin, upang magkaroon ng mas mahusay na pagpapalitan ng mga sistema ng gobyerno para sa sustainable growth ng kani-kanilang ekonomiya.

Kabilang ang anim na pangunahing ekonomiya pauunlarin ang Technical Exchange and Cooperation for Sustainable Development, Trade and Investment, Tourism, Information Technology, Human Development at Culture and Arts.

Bilang bahagi ng kanilang pagbisita sa pamamahalaan Tanauan City, nilibot ni Mayor WES, Vice Mayor Lorie Natividad-Borja, at ng buong konseho ng lungsod ang Sabang River Eco Park, Taal Lake, Honda Philippines Factory, at Apolinario Mabini Shrine and Museum.

Ang mga delegado mula sa Valenzuela ay naglalayon na obserbahan at pag-aralan ang kanilang mga pinakamahusay na kasanayan, industriya at pangangalaga ng mga kultural na palatandaan, na maaaring magamit para sa mga programa ng lungsod sa hinaharap.

Sa kanyang talumpati, tiniyak ni Mayor WES na ang lokal na pamahalaan ng Valenzuela ay lubos na susuporta at sasamahan ang Tanauan City sa oras ng kanilang pangangailangan.

“Kami po ay nagagalak na makita ang inyong mga programa at iba’t ibang mga imprastraktura. Naniniwala po ako [na] with the right vision ni Mayor Sonny, sa kaniyang dedication, at sincerity sa paglilingkod, na ang Lungsod ng Tanauan po ay hihigitan pa ang Lungsod ng Valenzuela sa mga darating na araw. Makakaasa po kayo na ang buong pamunuan ng Valenzuela ay buo ang commitment na aalalayan ang inyong Lungsod sa oras na inyong kakailanganin.” pahayag ni Mayor Wes. (Richard Mesa)

KASUNOD  na rin sa sunud-sunod na data system hacks sa mga government websites ipinag-uutos na sana ay sispindihin muna ang SIM card registration para sa mabantayan ang datos ng publiko.

Ayon kay Kabataan Partylist Rep. Raoul Manuel, kailangang itigil muna ang pagkuha ng online data ng mamamayang Pilipino hangga’t di naipapakita ng administrasyon na kaya nitong tiyakin ang cybersecurity ng bansa.

“Kalakhan sa mga SIM card ng ating mga kababayan ay connected sa mga social media accounts, messaging apps at online banking. Sensitibo ang mga personal data na ito, at delikado kapag napasakamay ng masasamang loob at naibuyangyang,” ani Manuel.

Dapat mapalakas muna aniya ang data protection mechanisms ng pamahalaan, at susi rito ang pagsuporta sa mga homegrown IT specialists. (Ara Romero)

PINAYAGAN na ang Ottawa, Canada  na tulungan ang Maynila na i-monitor ang coastal waters at high seas nito gamit ang  Canadian satellite surveillance program.

Ito’y matapos na kapwa  tintahan ng Pilipinas at  Canada ang isang kasunduan ukol dito.

Ayon sa Department of Foreign Affairs (DFA), ang Dark Vessel program ng Canada ay gumagamit ng satellite technology para mahanap at matunton ang mga barko na ilegal na nangingisda maski saan kahit pa naka-switch off ang kanilang  location transmitting devices  para makaiwas sa monitoring at surveillance.

“The Philippines and Canada signed an arrangement that will include the Philippine National Coast Watch Center in Canada’s Dark Vessel Detection System at the sidelines of the 6th Joint Commission for Bilateral Cooperation in Ottawa, Canada on 12 October 2023,” ang naging pahayag ng departamento sa kanilang X account.

Sinasabing tutulungan ng satellite program ng Canada ang Pilipinas na mamataan at matugunan ang problema sa karagatan gaya ng  illegal fishing at makakuha ng scientific data tungkol sa lawak ng kanilang teritoryo at  continental shelf.

Sa ulat, sinabi ng Philippine Coast Guard, na kahit pa nagsasagawa sila ng territorial patrols sa West Philippines Sea, marami pa ring mga vessels, kabilang na ang Chinese Coast Guard ships at militia vessels, ang madalas ay naka- turn off  ang kanilang  location transmitting devices para maiwasan na ma-detect ang kailang galaw sa pinagtatalunang katubigan.

Samantala, sinabi naman ni Colin Townson, pinuno ng political section  ng Canadian Embassy,  na ang teknolohiya ay “would enhance Philippine maritime domain awareness.” (Daris Jose)

MAPAPALAKAS  ng  infrastructure projects sa  Bulacan ang pagiging produktibo ng pagsasaka sa lalawigan.

Ito’y matapos na pasinayaan ang  Arterial Road Bypass Project Phase III (ARBP III) Contract Package 4 sa  San Rafael, Bulacan.

Winika ni Pangulong Ferdinand Marcos Jr., sa kanyang talumpati na binasa ni  Special Assistant to the President Antonio Ernesto Floirendo Lagdameo Jr. na ang proyekto ay mahalagang hakbang “towards the realization of our dream of a better Philippines that is filled with hope, brimming with optimism, and teeming with boundless opportunities.”

“With the enhanced road capacity and the substantially shortened travel time, this project will revolutionize not only the movement of people, but also of agricultural products and services, thereby boosting the productivity of the farming industry in Bulacan,” ayon pa rin sa talumpati.

“In time, this will attract even more investments, create more employment opportunities, and perpetuate a positive cycle of development that will benefit the province of Bulacan and its residents,” dagdag na pahayag nito.

Tinuran pa ni Pangulong Marcos na tinitingnan ng administrasyon na kompletuhin ang ARBP III sa Marso 2024.

Kaugnay nito, inatasan ng Pangulo si  Department of Public Works and Highways na tiyakin na ang lahat ng ‘outstanding issues’ partikular na ang may kinalaman sa road right-of-way—ay kaagad na matutugunan.

Nagpasalamat naman ang Pangulo sa  Japan International Cooperation Agency o JICA  para sa suporta nito sa proyekto.

Sa kabilang dako, sinabi naman ng Presidential Communications Offic na ang  ARBP III ay isa lamang sa ilang road projects sa iba’t ibang bansa.

Samantala, may 197 infrastructure flagship projects, kabilang ang transportation connectivity projects, sa iba’t ibang  “stages of development” sa ilalim ng  Build-Better-More Programpara suportahan ang nilalayon nito. (Daris Jose)

ANG pagbaba sa presyo ng langis sa  world market ay isang  ‘welcome news’ sa mga mamimili.

Inaasahan na mata-translate ito sa mas pagbaba ng  fuel costs at sa kalaunan ay  mabawasan ang presyur sa inflation.

Sa isang news forum sa Quezon City, sinabi ni Rizal Commercial and Banking Corp. (RCBC) chief economist Michael Ricafort na ang presyo ng langis ay nakapagtala ng  mahalagang pagbaba sa nakalipas na dalawang araw, bumaba ng  US$82 hanggang  US$83  kada bariles  mula sa kamakailan na mataas na  US$95 nito lamang Setyembre 28.

“At least that’s isa sa mga problema na puwedeng mababawasan dahil magkakaroon ng mga rollback ‘no. Kaya…at least iyong pressure sa inflation medyo mababawasan din po,” ayon kay Ricafort.

Winika pa ni Ricafort na ang mahalagang  rollbacks sa fuel prices ay inaasahan sa mga darating na araw.

“Iyon po ‘yung magandang balita, medyo expect po natin malakilaking mga rollback po iyan as early as this weekend pati po sa mga darating na araw lalo na kung ma-sustain po ito,” ani Ricafort.

Tinuran pa ni Ricafort  na “there is a softening demand for oil globally which is partly attributed to the proactive raising of interest rates by the US Central Bank to maintain price stability” sabay sabing “While the cooling of demand may raise concerns about the potential for an economic slowdown,  it is an unintended consequence of curbing inflationary pressure.”

“Maaaring unintended consequence naman po noon, kung may economic slowdown o recession,” ayon pa rin kay  Ricafort.

“Kasi kung hindi po nirenda iyang inflation, mag-i-spiral po iyan, aakyat po iyan nang aakyat. Learning from the lessons in the past economic cycles lalo na kung may politics of oil,” dagdag na pahayag nito. (Daris Jose)

NAKAPAGTALA  ang Bureau of Immigration (BI) ng higit sa walong milyong passenger arrivals mula Enero hanggang Setyembre ngayong taon, tanda ng pagsigla muli ng turismo at ekonomiya ng bansa.

Sinabi ni BI Commissioner Norman Tansingco na nakapagproseso sila ng kabuuang 8,117, 286 Filipino at dayuhang pasahero sa mga paliparan at port sa bansa.  Higit na malaki ito sa naitalang 2,873,423 sa parehong mga buwan noong 2022.

Pero malayo pa rin ito sa 11 milyong arrivals sa parehong period bago pa tumama ang pandemya ng COVID sa bansa.

Binanggit din ng BI ang naitala ng Department of Tourism (DOT) na higit apat na milyong dayuhang turista na dumating sa bansa mula nitong Enero.

“Palapit na tayo doon.  Ang malaking pagtaas sa mga dumarating na pasahero ay nagpapakita na ang turismo at international travel ay nasa rebound na,” ayon kay Tansingco.

Para mapabilis ang pagproseso sa mga pasahero, kasalukuyang bumibili ang BI ng dagdag na mga e-gates, dahil sa pamamagitan umano nito ay mapapataas ang bilang ng napo-proseso kahit sa maliit na espasyon nila sa mga paliparan. (Daris Jose)