SA gitna ng naranasang matinding init, nagpupursige ang Lungsod ng Valenzuela sa kultura at tradisyon sa dobleng pagdiriwang ng kapistahan ng 262nd Mano Po San Roque Festival 2024 at Mother’s Day sa Barangay Mabolo.

Napuno ng buhay at kultura ang Mabolo sa San Roque Festival kung saan sinimulan ang masiglang kasiyahan sa Sayaw-Pasasalamat parade ng bawat barangay na nagtanghal ng mga sayaw at pag-awit habang itinataas ang kanilang mga banner.

Ang Sayaw-Pasasalamat ay nangangahulugan bilang parangal sa patron na si San Roque o St. Roch, kung saan muling binuhay ng parada na ito ang tradisyon na may mga sayaw para sa mga taong nagnanais na makahanap ng tunay na pag-ibig at nag-aalay ng mga panalangin para sa kagalingan.

Bukod sa pasasalamat sa panibagong taon ng Mano Po San Roque, pinarangalan din sa banal na misa ang mga ina at mother figures sa pagdiriwang Mother’s Day bilang pagkilala sa kanilang mga paghihirap at marangal na sakripisyo para sa kanilang mga pamilya. Kasunod nito, ang pagbabasbas ng mga bagong SWAT vans at mobile showers at toilets.

Sa pagtatapos ng isang linggong selebrasyon, isang solemne na prusisyon ang naganap na naghatid ng imahen ng San Roque pabalik sa kapilya kung saan isang musical jamboree na nagtatampok ng mga banda at artista ang nagpasigla.

Bago ang araw ng Mano Po San Roque fiesta, ilang aktibidad din ang idinaos noong Mayo 3 hanggang 11 para itakda ang kasiyahan kabilang ang paligsahan sa sayaw, pageant, singing contest, battle of the bands, at sagalahan.

Sinaksihan ang masiglang pagdiriwang ng San Roque Festival nina Senator WIN Gatchalian, Mayor WES Gatchalian, Mayoress Tiffany Gatchalian, Bianca Manalo, Vice Mayor Lorie Natividad-Borja, at mga konsehal ng lungsod. (Richard Mesa)

TINURN-OVER ni Pangulong Ferdinand R. Marcos Jr. ang P80.9-million na halaga ng tseke sa Camp Navarro General Hospital (CNGH) mula sa Office of the President (OP).

Ang P80.9 million donation ng Pangulo ay gagamitin para bumili ng mga gamit para sa operating room ng ospital, diagnostics, ward, physical therapy, at iba pang kagamitan.

Iniabot ng Pangulo ang nasabing donasyon matapos na inspeksyunin ang bagong gawang gusali sa Western Mindanao Command (WESMINCOM) medical facility, araw ng Huwebes.

Ang tseke ay tinanggap ni CNGH chief Lt. Col. Giovanni R. Falcatan, nag- brief din sa Pangulo habang isinasagawa ang pag-inspeksyon sa bagong hospital building.

Sa kabilang dako, itinayo noong 1975, ang CNGH ay matatagpuan sa Upper Calarian, WESMINCOM, Zamboanga City, Zamboanga del Sur.

Isang 50 hanggang 100-bed capacity infirmary-level hospital, ang CNGH ay nagsisilbi sa mga sundalo, dependents, at awtorisadong sibilyan na kailangan ng ‘medical, surgical, at pediatric services’ sa lugar ng operasyon ng WESMINCOM.

Ang kamakailan lamang na pagkayari ng CNGH building ay magsisilbing Role III facility para makapaghatid ng mahahalagang medical service at suportahan kapuwa ang military at sibilyan sa ilalim ng hurisdiksyon ng WESMINCOM.

Ang ospital ay naka-programa para makapagbigay ng Role II functions para suportahan ang Camp Teodulfo Bautista Station Hospital sa Jolo, Sulu, nasa ilalim din ng kahalintulad na command. (Daris Jose)

SA kapistahan ng Diocesan Shrine and Parish of San Jose de Navotas, opisyal na kinilala ng Lungsod ng Navotas si San Jose bilang city patron at protector nito.

Nilagdaan ni Mayor John Rey Tiangco at ng city council ang City Ordinance No. 2024-05, na nagdeklara rin ng unang Linggo ng Mayo bilang Pistang Bayan ng Navotas.

Kasabay nito, itinayo ng lungsod ang imahe ni San Jose Glorioso bilang isang cultural heritage treasure sa pamamagitan ng City Ordinance No. 2024-04.

“This marks a significant milestone in our efforts to safeguard our city’s vibrant cultural and religious legacy,” ani Mayor Tiangco.

“Navoteños have already been devotees of San Jose even when Navotas was still a visita of Tondo more than 400 years ago. Designating San Jose as our City Patron and Protector reflects our deep-rooted reverence and unwavering devotion to him,” dagdag niya.

Itinatag ng Archdiocese of Manila ang noo’y bayan ng San Jose de Navotas noong July 1, 1959.

Noong 2021, ang Roman Catholic Bishop ng Caloocan Most. na si Rev. Pablo Virgilio S. David ay idineklara ni San Jose de Navotas bilang diocesan shrine.

Bukod dito, kinilala ng National Historical Commission ang San Jose Parish Church bilang “Simbahan ng Navotas.”

Bago ang declaration ceremony, isang solemn mass ang isinagawa na pinarangalan ni Congressman Toby Tiangco at ng kanyang asawang si Michelle.

Nakiisa rin si Cong. Tiangco kay Bishop David sa paglalahad ng mga plano para sa San Jose Perpetual Adoration Chapel at sa estatwa ni San Jose Glorioso sa patio ng simbahan.

“San Jose, revered as the patron saint of workers, families, and communities, occupies a special place in the hearts of Navotas residents. He inspires us to embody the virtues of humility, diligence, and faithfulness,” pahayag ni Mayor Tiangco. (Richard Mesa)

NAGPAHAYAG ng suporta si Navotas Representative Toby M. Tiangco sa panawagan ni Pangulong Bongbong Marcos na rebyuhin ang minimum wage rates sa bawat rehiyon.

Sa kanyang talumpati sa Labor Day, iniutos ni Marcos sa Regional Tripartite Wage and Productivity Boards na “initiate a timely review of the minimum wage rates in their respective regions, with due consideration to the impact of inflation amongst others.”

“This crucial move underscores our commitment to ensuring that our workers can afford basic necessities and live decent lives amidst the challenging economic landscape,” ani Cong. Tiangco.

“As we navigate through the repercussions of inflation and escalating living costs, it becomes vital to reassess our wage rates in consideration of the needs of our constituents,” dagdag niya.

Binanggit din ng mambabatas ng Navotas na tungkulin ng mga lingkod-bayan na pangalagaan ang kapakanan ng mga tao, lalo na ang mga walang sawang nagpapagal para mabuhay ang kanilang pamilya at mag-ambag sa pag-unlad ng bansa.

President Bongbong’s call for a wage review, with due consideration to the impact of inflation and other relevant factors, is not merely a matter of policy but a moral imperative. Let us stand united in our resolve to uphold the dignity and well-being of every Filipino worker,” pahayag ni Tiangco. (Richard Mesa)

TINIYAK ni Pangulong Ferdinand R. Marcos Jr. sa publiko ang plano at estratehiya ng gobyerno para patamlayin ang presyo ng kuryente sa gitna ng kasalukuyang mataas na demand ng elektrisidad.

Sinabi ni Pangulong Marcos sa isang ambush interview sa Pikit, Cotabato, na walang artificial crisis sa power sector. Ang meron aniya ang bansa ay ang power system overload dahil sa dry spell.

Patuloy na mino-monitor ng gobyerno ang situwasyon dahil sa pagsirit ng demand, sinabi ng Pangulo, ang pagbibigay katiyakan sa mga tao na gagawin ng gobyerno ang lahat at isakatuparan ang mga hakbang para kontrolin ang presyo ng elektrisidad.

“Ang naging consumption natin biglang tumaas talaga dahil napaka init. Kaya’t nakabantay kami ng husto.  Kaya naman nagkakaroon ng problema sa mga iba’t ibang sistema kaya namin tinututukan,” ang winika ng Pangulo.

“At ‘yung pagtaas ng [presyo]— mayroon kaming mga plano, mga strategy para hindi na magtaas ng presyo ng kuryente. At least for now, in this crisis time,” aniya pa rin.

Isa sa itinutulak ayon kay Pangulong Marcos ay ang hikayatin ang National Grid Corporation of the Philippines (NGCP) na magtayo ng transmission lines na ipinangako nito para palakasin ang “much-needed electricity” lalo na sa mga lugar na hindi konektado sa grid.

Samantala, ang Pangulo ay nasa Cotabato para pangunahan ang inagurasyon ng Malitubog-Maridagao Irrigation Project Stage II (MMIP II). (Daris Jose)

ITINANGGI ng Department of National Defense (DND) na may umiiral na kasunduan sa pagitan ng Chinese Government na magko-kompromiso sa soberanya at at karapatan ng Pilipinas sa West Philippine Sea (WPS).

Sinabi ni DND Secretary Gilbert Teodoro ang departamento ay walang kontak sa Chinese government simula pa noong 2023.

“This is all a part of the Chinese propaganda effort to steer the Filipino people’s attention away from the real issue and cause of the tensions in the West Philippine Sea, which is China’s obstinate refusal to adhere to UNCLOS, which they are a signatory to,” ayon sa kalatas.

Sinabi naman ng National Security Council na ang pahayag ng Tsina ay maituturing na “new model” na propaganda nagtatangkang ikuwadro ang Pilipinas bilang pinagmumulan ng tensiyon matapos na ito’y “reneged on its promises.”

“As [President Ferdinand ‘Bongbong’ Marcos Jr.] has clearly stated, there is no agreement whatsoever about Ayungin Shoal and that we shall continue to do all activities within the bounds of international law and we shall brook no interference in our lawful actions,” ayon kay NSC Assistant Director General Jonathan Malaya.

Sinabi pa ni Malaya na ang anumang pagkakaunawan kahit pa walang awtorisasyon o pahintulot ng Pangulo ay walang epekto.

Bukod pa sa hindi sasang-ayon ang bansa sa isang kasunduan na kikilalanin ang Ayungin Shoal bilang teritoryo ng Tsina.

“The Philippines never broke any agreement because there was none to begin with… As Ayungin Shoal is part of the exclusive economic zone of the Philippines, we cannot agree to any such understanding that violates the Philippine constitution or international law,” ayon kay Malaya.

Nanawagan naman ito sa publiko na tanggapin ang pahayag ng Tsina sa WPS “with a grain of salt.”

“It is a trap, nothing more, nothing less,” aniya pa rin.

Nauna rito, sinabi ng Tsina na may “common understanding” na naitatag sa pagitan ng Tsina at mga administrasyong Duterte at Marcos. (Daris Jose)

ANG KONEKSYON ng Mindoro provinces sa grid sa pamamagitan ng submarine cable ang nakikitang “long-term solution” ni Pangulong Ferdinand Marcos Jr. sa kanilang electricity supply concerns.

Pinag-usapan kasi ni Pangulong Marcos sa San Jose, Occidental Mindoro ang “fastest at best solution” sa problema sa suplay ng kuryente sa Mindoro island provinces.

Sinabi ng Pangulo na ang paggamit ng solar energy ang “fastest solution” sa usapin sa kuryente sa isla, maaaring mapunan ng ibang power sources gaya ng “wind, hydro, at geothermal.”

“Pero ang sa Mindoro, both Oriental and Occidental, ang long-term solution is ‘yung submarine cable para makabit na sa grid. Dahil ‘yun ang problema dito. Hindi pa nakakabit sa grid,” ayon sa Pangulo.

“So, naglalagay na tayo ng submarine cable para dito specifically sa Mindoro,” dagdag na wika ng Chief Executive.

Sa isang situation briefing sa epekto ng matinding tag-tuyot sa agriculture sector sa Occidental Mindoro, binanggit ni Vice Governor Diana Tayag ang problema sa elektridad at humingi na ng tulong sa national government para tugunan ang tinatawag na “power crisis” sa lalawigan.

“Apektado po ng problemang ito ang agricultural sector. Mahalaga po ito sapagkat ang maayos na supply ng kuryente ay siyang susi para ang mga magsasaka naming. Ma-capture ang full value po ng kanilang produkto,” ayon kay Tayag.

Samantala, tiniyak naman ng Pangulo na ginagawa na ng gobyerno ang lahat ng makakaya nito para mapigilan ang power interruptions, at maging ang installation o pagkakakabit ng mas maraming kable para makakonekta ang lalawigan sa ibang lugar. (Daris Jose)

INIHAYAG ni Speaker Ferdinand Martin Romualdez nitong Martes na pagtutuunan ng pansin ng kamara ang lehislasyon ukol sa pagpapalakas ng national security at economic development sa natitirang sesyon ng 19th Congress.

“As we embark on another session this April 29th, our legislative focus sharpens on the dual imperatives of national security and robust development. Recognizing that peace is the cornerstone of prosperity, we aim to enact laws that fortify our national defense and enhance our international security posture,” pahayag ni Romualdez sa isang forum sa Department of Foreign Affairs (DFA) na dinaluhan ng mga diplomats at government officials.

Ayon sa Speaker, importante ang mga ganitong inisyatibo sa pagmementina ng soberanya at katatagan upang magawa ng bansa na maisulong ang mga development goals ng walang pangamba sa anumang uri ng pagbabanta mula sa kabas.

Kabilang sa development agenda ng kamara ay ang pagpapalawig pa sa ilang mahahalagang usapin tulad ng healthcare, education, at digital infrastructure.

Sa isyu ng healthcare, nakatuon ang Kamara sa pagpapalawig sa access at pagpapabuti ng kalidad ng serbisyo, gawing mas abot kaya at accessible sa bawat pinoy ang health care.

Habang sa inisyatibo naman sa edukasyon, layon ng kamara na magkaroon pa ng  liberalized system upang makasunod sa global standards at maturuan ang kabataan ng mga bagong kakayanan upang makasabay ito sa makabagong ekonomiya.

Gayundin, sa isyu ng digital infrastructure at nais nilang masiguro na ang bawat pinoy ay makikinabang mula sa digital revolution.

“We aim not only to continue our current path but to accelerate our efforts. We are exploring innovative legislative measures that promote technological advancement and environmental sustainability. These initiatives are designed to ensure that the Philippines not only keeps pace with global trends but also sets a benchmark for innovation and responsible governance,” dagdag nito. (Vina de Guzman)

PAGSISIKAPAN ng gobyerno na tuldukan ang pagkagutom at tiyakin ang food security sa Pilipinas sa ilalim ng administrasyong Marcos.

Kaya nga ang panawagan ng Malakanyang ay government-wide approach para mapagtagumpayan ang hangarin ng pamahalaan.

Base sa two-page Memorandum Circular No. 47 na nilagdaan ni Executive Secretary Lucas Bersamin noong Abril 19, inatasan ang lahat ng ahensiya ng gobyerno at instrumentalities at lahat ng local government units na suportahan ang implementasyon ng Enhanced Partnership Against Hunger and Poverty (EPAHP) Program.

Ang EPAHP ay isang programa ng Task Force on Zero Hunger, na naglalayong “to institutionalize efforts to mitigate hunger and promote food and nutrition security by linking community-based organizations to prospective markets and providing credit assistance to support food production, processing and distribution.”

“It is imperative for all government agencies and instrumentalities to support the continuous and effective implementation of the EPAHP Program to bolster government efforts towards attaining zero hunger, food and nutrition security, and sustainable agriculture,” ang nakasaad sa MC.

Sa ulat, tumaas ang bilang ng mga pamil­yang Pinoy na nagugutom makaraang makapagtala ito ng  12.6 percent, batay sa la­test survey ng Social Weather Stations (SWS).

Ang naturang percentage ng involuntary hunger rate noong Dis­yembre  ay mas mataas sa 9.8 percent noong September 2023.

Sa nakalipas na tatlong buwan, iniulat ng SWS na ang insidente ng pagkagutom ay umakyat ng 5.3 puntos sa Mindanao, 4.0 puntos sa Balance Luzon, at 2.6 puntos sa Visayas samantalang 4.6 puntos sa Metro Manila.

Sa layuning kagyat na matugunan ang pagkagutom, inatasan ang task force na tiyakin ang patuloy at epektibong implementasyon ng EPAHP Program, at magsagawa ng hakbang sa pakikipagtulungan sa mga kinauukulang ahensiya ng pamahalaan.

Kabilang sa mga hakbang na ito ay ang palakasin ang “institutional feeding programs ng partner agencies; palawigin ang credit assistance para suportahan ang food production, processing, at distribution sa partnership kasama ang government financial intuitions; at link participating CBOs sa mga prospective markets.”

May mandato naman ang task force na paigtingin ang probisyon ng farm production technologies at ekstensyon ng serbisyo sa government-assisted family farms at rural based-organizations; at palakasin ang pagpapanatili sa EPAHP Program sa pamamagitan ng implementasyon ng mga polisiya na makauugnay sa pribadong sektor at i-institutionalize ang mean ismo sa LGUs.

Inatasan din ito na i-adopt ang Community Participation Procurement para hikayatin ang CBOs na magpartisipa sa EPAHP program; at magtatagk, magkumpuni at ayusin ang ‘irrigation facilities at appurtenant structures’ sa irrigable areas sa bansa. (Daris Jose)

SINABI ng Bureau of Immigration (BI) na ang mga dayuhang estudyante  na may hawak na student visa ay  sasailalim parin  sa government intelligence investigation kung may ginagawang illegal activities.

Ayon kay BI Commissioner Norman Tansingco na ayon sa batas, ang isang dayuhan na nakakuha ng student visa  ay maari pa ring sumailalim sa pagsusuri ng National Intelligence Coordinating Agency (NICA) at  National Bureau of Investigation (NBI) sa kanilang mga aktibidades “which appear to be inimical to the security of the State”.

Sinabi ni Tansingo na ayon sa Executive Order No. 285, s. 2000, na nakapaloob sa batas ng inter-agency committee on foreign students  na ang BI ay bahagi ng inter -agency na pinamumunuan ng Commission on Higher Education (CHED), kasama ang NBI, NICA, Department of Foreign Affairs (DFA), at  Department of Education (DepEd).

Sa naturang batas, klinaro ni Tansingco na ang BI ay maaari lamang makapag-isyu ng student visa sa isang dayuhan kung iniendorso ito ng isang lehitimong eskuwelahan at ng CHED.

Dagdag pa nito na ang isang eskuwelahan na tumatanggap ng isang dayuhang estudyante ay inoobliga na magsumite ng regulan na ulat sa BI na siyang mag-monitor ng kanilang visa compliance , habang ang CHED ang nagsiguro sa pagpapatupad ng education -related policies at ang NICA ang magsasagawa ng imbestigasyon sa kanilang kaduda-dudang aktibidades.

Ayon kay Tansingco na sa taon 2023, may kabuuang 1,516 na mga Chinese national ang nabigyan ng student visa sa Cagayan na lahat ay inendorso ng isang unibersidad, Gayunman, tinatayang 400 na mga Chinese national ang nakikita on-site kung saan ang eskwelahan ay nag iimplement ng distance learning.

Naniniwala si Tansingco na posibleng ang pagtaas ng bilang mga mga estudyante ay dahil sa post pandemic at marketing strategies ng mga eskuwelahan at pagpapalakas ng turismo.

“The national government has actively promoted the country as an education hub in Asia,” ayon kay  Tansingco.

“We hope that these concerns do not scare away legitimate students whose stay in the country could greatly help re-boost our economy,”  dagdag pa nito. GENE ADSUARA