SABAY-SABAY na nagsagawa ng tree planting activity ang PNP Maritime Group noong April 12, 2024 bilang bahagi ng pagdiriwang nito ng ika-33rd Founding Anniversary na may temang “Sa Serbisyong May Pagkakaisa, Hatid ng Kapulisan Para sa Bayan, Kapayapaan ay Makakamtan, Sa Lupa Man o Karagatan”.

Ang sabay-sabay na pagtatanim ng mga puno ay nilahukan ng lahat ng Regional Maritime Units at Special Operations Units ng Maritime Group.

Isa sa mga nakiisa sa naturang aktibidad ay ang Regional Maritime Unit NCR sa pangunguna ni PCPT Michael Martinez, kaagapay ang mga tauhan ng Headquarters Maritime Group sa pangunguna ni PCPT Maria Melanie Anigalan, mga tauhan ng Navotas City Police Station, at kinatawan mula sa Department of Environment and Natural Resources.

Ang nasabing aktibidad ay naganap sa pakikapagtulungan sa Bakawan Warriors, Shipyard Members, Metro Shipbuilders and Ship Repairers Association Inc., at Batasan Masonic Lodge No. 381.

Ang mga propagules ng bakawan ay itinanim sa swampy at mayaman sa sustansiyang bahagi ng lupa ng Isla Pulo, Barangay Tanza Uno, Navotas City, kung saan ang mga kalahok ay nagtanim ng kabuuang 150 propagules ng bakawan.

Ang pinakamahusay na kasanayan na ito ng PNP Maritime Group sa pagtatanim ng mga bakawan ay mahalaga sa pagpapanumbalik ng konserbasyon ng biodiversity, na maaaring tahanan ng maraming species, at maaari ring makatulong sa pagpapayaman ng marine ecosystem at aquatic biomes sa paligid ng Navotas City. (Richard Mesa)

IPINAG-UTOS ni Pangulong Ferdinand Marcos Jr. ang regulasyon o alituntunin ng pagpapalabas ng protocol license plates sa mga opisyal ng gobyerno dahil sa tumataas na reklamo sa “unauthorized usage.”

Nauna rito, nagpalabas ang Pangulo ng Executive Order (EO) No. 56, inamiyendahan ang EO No. 400 (s. 2005), na pinahihintulutan ang pagtatalaga at pagpapalabas ng low-numbered protocol license plates sa mga sasakyan na ginagamit ng mga opisyal ng pamahalaan.

Tinapyasan din ng Pangulo ang bilang o numero sa 14 mula sa dating listahan na 16 na opisyal ang ‘entitled’ na gumamit ng protocol license plates.

Bahagi ng listahan ay ang Pangulo na may number one designation; Vice President, dalawa; Senate President, tatlo; Speaker of the House of Representatives, apat; Chief Justice of the Supreme Court, lima; Cabinet Secretaries, anim; Senators, pito; at mga miyembro ng Kongreso, walo; at Associate Justices of the Supreme Court, siyam.

Ang Presiding Justice of the Court of Appeals (CA), Court of Tax Appeals (CTA), Sandiganbayan, at Solicitors General ay Binigyang ng number 10 designation; Chairperson ng Constitutional Commission at Ombudsman, 11; at ang Chief of Staff ng Armed Forces of the Philippines at Hepe ng Philippine National Police, 14.

Nakasaad sa EO n ang paggamit ng protocol license plates ng mga awtorisadong opisyal ay bunsod ng rekumendasyon ng Land Transportation Office (LTO), ang approval ng Kalihim ng Department of Transportation (DOTr), at base sa listahan ng lahat ng mga opisyal na may “equivalent rank as the above authorized officials of the Department of Budget and Management (DBM).”

Sinasabi pa rin na bagama’t ang Associate Justices ng CA, CTA at Sandiganbayan ay pinapayagan na gumamit ng protocol license plates dahil na rin sa rekumendasyon ng LTO at approval naman ng Kalihim ng departamento ng transportasyon, ito ay hindi dapat “construed to authorize all other officials with equivalent rank as the Associate Justices of the CA, CTA and Sandiganbayan and below to use protocol license plates.”

Sinasabi pa rin sa EO na ang protocol license plates na ipinalabas sa mga awtorisadong opisyal ay balido lamang sa panahon ng kanilang panunungkulan at maaaring gamitin sa motor vehicles na duly registered sa kanilang pangalan o opisyal na nakatalaga sa kanila.

Idagdag pa rito, ang plates ay dapat na isuko o ibalik sa LTO sa oras na mag-retiro, magbitiw sa puwesto, humiwalay mula sa tanggapan o end of term o tour of duty.

“All previously-issued protocol license plates issued pursuant to EO No. 400, as amended, except those issued to incumbent authorized officials under Section 1 hereof, are deemed expired. The LTO in coordination with concerned agencies, is hereby directed to revoke and/or confiscate all expired protocol license plates, subject to existing laws, rules and regulations,” ang nakasaad sa EO.

Ang mga authorized officials naman ay papayagan lamang sa “maximum of two pairs” ng protocol license plates habang ang Pangulo, Bise-Presidente, Senate President, Speaker of the House of Representatives, at Chief Justice ng Supreme Court sa maximum na three pairs.

Ang assignment o pagtatalaga o paglilipat ng protocol license plates sa mga hindi awtorisadong tao o motor vehicles ay mahigpit na ipinagbabawal.

“It shall be subjected to revocation of the granted authority, confiscation of issued protocol license plates, imposed with appropriate penalty, including administrative sanction, pursuant to existing laws, rules and regulations,” ayon sa ulat. (Daris Jose)

MAS PINALAKAS pa ni Pangulong Ferdinand R. Marcos Jr. ang partnership ng Pilipinas at World Food Programme (WFP) bilang bahagi ng pagsisikap ng administrasyon na labanan ang malnutrisyon at pagkagutom sa Pilipinas.

Sa naging talumpati ng Pangulo, sinabi nito na palaging bukas ang pamahalaan na magpartisipa sa anumang pagsisikap ng WFP na makatulong na pagaanin ang pagkagutom at malnutrisyon sa bansa.

“The strategies that you’ve brought to us are really quite – they’re very insightful,” ang sinabi ni Pangulong Marcos kay WFP Executive Director Cindy McCain sa courtesy visit ng huli sa Palasyo ng Malakanyang, araw ng Lunes.

Ayon sa Chief Executive, ang mga insidente ng pagkagutom at malnutrisyon sa Pilipinas ay bumuti na sa mga nakalipas taon at masasabing ang bansa ay mas mabuti na ngayon.

Winika pa ng Pangulo na lumipat na ang gobyerno ng Pilipinas mula sa pagbibigay ng food supply sa aktuwal na nutrisyon sa pamamagitan ng “Walang Gutom 2027: FoodStamp Program,” isang flagship program para tugunan ang malnutrisyon at pagkagutom.

“Food supply is for the most part, I would say sufficient. But what we’ve learned over the years is how to take care of ourselves. And again, especially for the kids,” ayon sa Pangulo.

Pinuri naman ni McCain si Pangulong Marcos at ang administrasyon nito sa pagbibigay importansiya at iprayoridad ang nutrisyon at kapakanan ng mga kabataang Filipino sa pamamagitan ng iba’t ibang inisyatiba, kabilang na ang feeding programs.

“I think it’s very important that your foresight in implementing our school, feeding programs and become self-sufficient in the long run,” ang sinabi ni McCain kay Pangulong Marcos, sabay sabing “So we love that program.”

Samantala, pinasalamatan naman ni Pangulong Marcos si McCain para sa naging pagbisita nito at concern o mga alalahanin sa food program ng bansa, at ang pagtiyak ng Pangulo na ipagpapatuloy ng gobyerno ng Pilipinas na isulong ang nutrisyon ng mga kabataan. (Daris Jose)

TINULIGSA ni ACT Teachers Partylist Rep. France Castro si Kingdom of Jesus Christ leader Pastor Apollo Quiboloy kasunod na rin sa kanyang mga demands bago sumuko.

Ayon sa mambabatas, dapat harapin nito ang kaso dito sa Pilipinas at sa Estados Unidos upang patunayan ang kanyang sarili laban sa mga alegasyong ibinabato sa kanya.

“Quiboloy should just face the charges against him here and in the US to prove if he is indeed innocent. He should also attend the hearings in Congress and the Senate instead of just being a fugitive. Sa pagtatago nya lalo lang lumalakas ang argumento na mukhang guilty talaga siya,” pagdidiin ni Castro.

Ilan sa mga hinihingi ni Quiboloy ay written guarantee na hindi makikialam ang US sa kaso niya dito sa Pilipinas at hindi rin makikialam ang Federal Bureau of Investigation (FBI), Central Intelligence Agency (CIA) at US embassy.

Nais din ni Quiboloy na maglabas ng written guarantee mula kina Presidente Marcos, Department of Justice Secretary Jesus Crispin Remulla, Philippine National Police (PNP) chief Gen. Rommel Francisco Marbil at National Bureau of Investigation (NBI) director Medardo de Lemos na hindi makikialam ang US government.

“Feelingero talaga hanggang ngayon,” ani Castro sa mga demand ni Quiboloy.

Una nang naglabas ang isang Davao City court ng warrants of arrest laban kay Quiboloy at sa lima nitong f ollowers dahil sa paglabag sa Republic Act 7610 oSpecial Protection of Children Against Abuse, Exploitation and Discrimination Act. (Vina de Guzman)

BINAGO at pinalitan ng Development Budget Coordination Committee (DBCC) ang growth target para sa taong 2024.

Sa katunayan, ginawa na lamang itong 6% hanggang 7% range, malinaw na bumaba mula sa nakalipas na target na 6.5% hanggang 7.5%.

Ito ang inanunsyo ni National Economic Development Authority (NEDA) Secretary Arsenio Balisacan sa sa press briefing sa Malakanyang matapos ang 16th full Cabinet meeting kasama si Pangulong Ferdinand Marcos Jr.

Ang DBCC, isang interagency body na binubuo ng mga hepe ng budget and management, finance, at socioeconomic planning, ay may atas na suriin mabuti at aprubahan ang macroeconomic targets, revenue projects, borrowing levels, at budget and expenditure ceilings.

Nauna rito, sinabi ni Finance Secretary Ralph Recto malaki ang posibilidad na tapyasan ng mga economic managers ng administrasyong Marcos ang kanilang economic growth targets para ngayong taon ng 2024 hanggang 2028. (Daris Jose)

SINAMPAHAN ng Pamahalaang Lungsod ng Valenzuela ang ilang kawani ng isang pribadong ospital, kabilang ang staff ng credit and collection at security guards ng magkahiwalay na mga kasong serious illegal detention at slight illegal detention sa City Prosecutor’s Office.

Personal na sinamahan ni Mayor WES Gatchalian, kasama ang libreng serbisyo ng legal team ng LAMP-SINAG ni Konsehal Atty. Bimbo Dela Cruz, at City police chief Col. Salvador Destura Jr. ang mga biktimang sina Richel Mae Alvaro, 26. at Lovery Magtangob, 28, nang maghain ng magkahiwalay na kaso noong Marso 5 at Abril 1 makaraan umano silang pigilang makalabas ng Ace Medical Center sa Brgy. Malanday hangga’t walang papalit sa kanilang kaanak para humanap ng salaping pambayad sa kani-kanilang bill.

Ayon kay Mayor Wes, dinala ni Alvaro sa naturang pagamutan ang asawa dahil ng matinding karamdaman subalit binawian ng buhay noong Pebrero 14 sanhi ng mga komplikasyon at umabot sa P518,519.37 ang bill na kanyang babayaran.

Gayunman, hindi siya makakalap ng pambayad dahil pinigilan siyang makaalis at binawalan ding bumili ng pagkain hangga’t wala siyang kapalit na kaanak. Hindi rin umano ibinigay ang death certificate ng kanyang asawa hangga’t hindi nababayaran ang halaga.

Nagawa lang makalabas ng pagamutan si Alvaro makaraang makatakas sa pamamagitan ng pagdaan sa gate sa likurang bahagi ng ospital noong Pebrero 17, saka nagpasayang humingi na siya ng tulong kay Mayor Wes.

Ganito rin ang nangyari sa magkapatid na Lovery at John Christopher matapos mabigong mabayaran ang halagang P777,378,00 na bill sa ospital makaraang mamatay ang asawa ng lalaki.

Pinayagan lamang umanong makalabas si John Christopher kung papalit sa kanya ang kapatid kaya’t ipinasiya niyang magsumbong sa pulisya at kay Mayor Wes.

“Hindi po dapat tina-trato ang ating mga kababayan ng ganito. Imbes na tulungan sila ng ospital lalu pa silang binibigyan ng pabigat at tinatrato ng masamam” ani Mayor Wes.

“Nanggaling na sa kanila ang “palit-ulo” statement natin, sila mismo ang nagsabi sa mga biktima na kung gusto nilang kumain, umuwi sa bahay, kailangan may dadalhin silang kamag-anak kapalit nila. Hindi  tsutsupepeng ospital ito pero may sistema na sila sa loob at ito ang gusto kong i-crackdown at gusto kong ipaglaban na buwagin ang sistema nilang illegal detention,” dagdag ng alkalde.

Nilinaw naman ni Konsehal Dela Cruz na hindi kasama sa kinasuhan ang pamunuan ng naturang pagamutan dahil ang direkta lamang sangkot sa usapin na nakuhanan pa ng CCTV ay ilang kawani ang security officers. (Richard Mesa)

PATULOY na ipinatutupad ng administrasyon ni Pangulong Ferdinand R. Marcos Jr. ang El Niño mitigation measures bilang paghahanda sa epekto ng La Niña phenomenon, inaasahan na made-develop sa darating na buwan ng Hunyo ngayong taon.

“Government agencies will continue to implement the El Niño action plans and of course, later on, transition into preparing for La Niña,” ayon kay Department of Science and Technology (DOST) Secretary Renato Solidum Jr.

Ipinahayag ito ni Solidum matapos ang sectoral meeting kasama si Pangulong Marcos at iba pang ahensiya ng gobyerno, kung saan tinalakay ang mga hakbang ng pamahalaan at pagsisikap na tugunan ang epekto ng El Niño at La Niña phenomena.

Sinabi pa niya na patuloy na humihina ang El Niño sa tropical Pacific subalit nagpapatuloy naman eng epekto nito kung saan ang transisyon nito ay nagiging neutral pagdating ng Abril hanggang Hunyo ngayong taon habang tumataas naman ang posibilidad ng La Niña ng 62% sa Hunyo hanggang Agosto ngayong taon.

Gayunman, nilinaw ni Solidum na ayon sa kasaysayan, ang pre-developing La Niña ay inilalarawan bilang “below normal rainfall” nangangahulugan na ang posibilidad ng bahagyang pagkaantala sa pagpasok ng panahon ng tag-ulan ay malamang at ang epekto nito ay sasama sa epekto ng nagpapatuloy na El Niño phenomenon.

“Hence, if we look at the impacts of the ongoing El Niño starting October, we have seen some provinces to have dry spell but up to March, we have seen the increasing number of provinces affected by dry spell and drought,” ayon kay Solidum.

Sa kabilang dako, nakapagtala aniya ang DOST ng 37 lalawigan na patuloy na nakararanas ng matinding tag-tuyot “meteorological drought,” 17 ang nakararanas ng ‘dry spell’, at 13 naman ang ‘dry conditions.’

Sinabi pa rin nito na ang rainfall forecast ay nagpapakita na sa darating na Abril ngayong taon, marami pa ring mga lugar ang maaapektuhan ng “way below normal rainfall” o mahigit sa 60% at below normal din “and rains will come by March, but there will still be other areas that will still have less rainfall.”

“So, the forecast for the ongoing effects of El Niño would continue for April – we have 48 provinces to be affected by drought; 24 dry spell; but by May it will be 54 provinces to be affected by drought and 10 dry spell,” ang pahayag ni Solidum.

“So, almost the same if you combine both the drought and dry spell but the drought-affected provinces will continue to persist based on DOST-PAGASA’s outlook – 25 by June, 23 by July and 10 by August,” dagdag na wika ni Solidum.

Samantala, habang may mga lalawigan sa bansa na maaapektuhan ng pinagsamang epekto ng El Niño at La Niña phenomena, tinuran ni Solidum na ipagpapatuloy ng gobyerno ang ginagawa nitong El Niño operations, subalit isinasaisip ang paghahanda para sa La Niña phenomenon. (Daris Jose)

APRUBADO sa Northern Police District (NPD) ang mga hakbang sa seguridad at kaligtasan ng publiko na ginagawa ng mga shopping mall sa mga lungsod ng Caloocan, Valenzuela at Malabon.

Personal na pinangasiwaan at ininspeksyon ni NPD Director P/BGen. Rizalito Gapas ang security forces ng SM Malls sa Grand Central at Sangandaan sa Caloocan, gayundin ang SM Valenzuela at SM Savemore Market ng Malabon sa general assembly at joint tactical inspection na ginanap sa parking lot ng Grand Central.

“Pinupuri namin ang inisyatiba ng pamunuan ng SM Malls sa pagsasagawa ng kanilang regular assessment sa kanilang security and safety measures na mahalaga para sa interes ng publiko lalo na ang mga mall-goers,” aniya.

Ang aktibidad ay naglalayon sa assessing the security manpower skills upang subukan ang kahusayan sa pagsasanay ng mga frontline staff ng mall sa pagresponde nang ligtas, responsable, at epektibo sa mga emergency na sitwasyon, sabi ng pinuno ng Security Affairs ng SM na si Almus Alabe.

Sa ginanap na event, ipinakita ng mga Emergency Response Team (SMERTs) ng SM ang kanilang kahandaan at paghahanda sa sakuna para sa mga potensyal na panganib na maaaring makaapekto sa kaligtasan ng customer at pagpapanatili ng negosyo.

Pinuri at ginawaran naman ang mga empleyado at guwardiya na nagpakita ng huwarang pag-uugali sa pamamagitan ng pagsasauli ng pera at iba pang mahahalagang bagay sa mga parokyano ng mall.

“The General Assembly and Joint Tactical Inspection is part of the annual exercise conducted by SM to assess personnel compliance with the company’s security standards and policies and this exercise is observed across all SM Supermalls nationwide,” ani SM’s Senior Vice President for Special Projects Bien Mateod.

Hinikayat din ni Gapas ang iba pang mga shopping mall at supermarket sa kanyang teritoryo na magsagawa ng katulad na mga hakbangin dahil mahalaga aniya mapanatili ang epektibong mga hakbang sa seguridad at kaligtasan ng publiko at kanilang mga manggagawa at mall-goers.

Dumalo rin para siyasatin ang performance ng security force ng malls sina Vice President for Mall Operations Junias Eusebio, Senior Assistant Vice President for Mall Operations Johanna Melissa Rupisan at Senior Assistant Vice President for Customer Relations Services Charleston Tan. (Richard Mesa)

IKINALUGOD ni Speaker Martin Ferdinand Martin Romualdez ang positibong pagtaya ng World Economic Forum (WEF) na ang Pilipinas ay posibleng maging $2-trillion economy sa susunod na dekada.

Ang inaasahang paglago ng ekonomiya ay maihahanay sa bansang Canada, Italy, at Brazil.

Sinabi ni Speaker Romualdez na ang projection ni World Economic Forum, President Børge Brende ay sumasalamin sa isang makabuluhang milestone sa paglalakbay ng ating bansa tungo sa paglago sa ekonomiya ng Pilipinas.

Ang paglago ay hindi lamang isang istatistika ito ay kumakatawan sa pagbabago sa buhay ng ating mga mamamayan.

Maiuugnay aniya ito sa strategic investments sa edukasyon, imprastraktura at workforce development na nagpapalakas sa kapakanan at oportunidad para sa mga Pilipino.

Kumpiyansa rin ang House leader na base sa purchasing power at kung magtutuluy-tuloy ang sustainable growth na 7 hanggang 8 percent kada taon ay maaabot ng bansa ang trillion-dollar mark.

Pinuri naman ni Romualdez ang matatag na ekonomiya at fiscal strategy ng gobyerno na nagpaangat sa Pilipinas bilang nakaeengganyong destinasyon para sa foreign investments.

Dagdag pa ng Speaker, mahalaga ang papel ng legislative action partikular ang pag-amiyenda sa restrictive economic provisions ng 1987 Constitution na naglalayong alisin ang balakid sa foreign investment na lumilikha ng trabaho at nagpapabuti sa public services. (Daris Jose)