MALAMIG si National Security Adviser Hermogenes Esperon Jr. sa isang panukalang batas na inihain ni Senate Minority Leader Franklin Drilon  na magbibigay depinisyon o pakahulugan sa ‘red-tagging’ at magtatakda dito bilang isang criminal activity.

Ani Esperon, kailangan muna niyang makita ang kopya ng Senate Bill No. 2121 o “Act Defining and Penalizing Red-Tagging” ,

Subalit binigyang-diin niya na sa halip na isulong ni Drilon ang panukalang batas ay mas makabubuti aniya na kondenahin nito si Jose Ma. Sison,” founder ng Communist Party of the Philippines (CPP).

“I have yet to see the bill. Condemn Jose Ma. Sison. He recited in a video his partners in his violent and terroristic grab for state power,” ang pahayag ni Esperon.

“Condemn the terrorists, not the victims and law enforcers,” dagdag na pahayag nito.

Samantala, nag-alok naman ang Armed Forces of the Philippines (AFP) ng neutral stance o walang kinikilingan na paninindigan nang matanong sa isyu sabay sabing nasa kapangyarihan ni Drilon ang gumawa ng batas.

“Legislation is an inherent function of solons and we, in the AFP, recognize that. The good Senator Drilon is well within his mandate to draft bills to be enacted into law,” ang pahayag ni Maj. Gen. Edgard Arevalo, AFP spokesperson.

Sa ulat, naghain si Senador Drilon ng isang panukalang batas, na magbibigay definition sa ‘red-tagging’ at magtatakda dito bilang isang criminal activity.

Sa ilalim ng Senate Bill 2121 ng minority leader, layong i-criminalize ang red-tagging at magtakda ng parusa para dito, upang maayos ang legal gaps at matugunan ang impunity, at magkaroon ng accountability sa bansa.

Sa ilalim ng naturang panukala, pinapakahulugan ang red-tagging bilang ang pag-label, paninirang-puri, pag-aakusa, pag-uusig, stereotyping, pangha-harass o caricaturing ng mga indibidwal, grupo o organisasyon bilang mga kalaban ng pamahalaan, makakaliwa, subersibo, komunista o terorista bilang bahagi ng anti insurgency o anti terrorism strategy.

Sino mang mapapatunayang guilty sa red-tagging, ay papatawan ng parusang pagkakakulong ng hanggang sampung taon, at posibleng hindi na payagang makahawak pa ng ano mang posisyon sa gobyerno.

Paliwanag ni Drilon, hindi sapat ang kasong libel o grave threat para sa red-tagging lalo at isang state agent ang gumagawa nito, kaya naman nagreresulta ito sa seryosong paglabag sa karapatang pantao gaya ng harrassment, arbitrary arrests, detention at enforced disappearances.

May ilang pagkakataon rin aniyang nagreresulta ito sa pagkamatay.

Umaasa ang senator, na sa tulong ng pagpapasa ng panukalang ito ay matitigil na ang tumataas na bilang ng human rights violations sa bansa, at ang mga pag atake sa mga miyembro ng legal profession sa Pilipinas.

Magsisilbi rin aniya itong paalala sa pamahalaan, tungkol sa pangunahing tungkulin ng gobyerno sa ilalim ng konstitusyon na pagsilbihan at protektahan ang mga mamamayan. (Daris Jose)

Pumanaw na ang alkalde ng bayan ng Famy, Laguna Mayor Edwin Pangilinan matapos dapuan ng COVID-19.

Kinumpirma ito ng kampo mismo ng 53-anyos na alkalde.

Ayon sa Public Affairs Office ng Laguna, dinala pa sa pagamutan ang alkalde noong Marso 15 dahi sa hirap itong huminga at noong araw din yun ay nagpositibo COVID-19.

Kasabay din na pumanaw ang ina ng alkalde na si Lucena dahil sa hirap sa paghinga sa edad na 76.

Tiniyak ni Defense Secretary Delfin Lorenzana sa publiko na nakahanda ang ang gobyerno na protektahan at depensahan ang national sovereignty ng Pilipinas partikular sa may Julian Felipe Reef.

Kaugnay pa rin ito sa pagsalakay ng mga Chinese maritime militia vessels sa lugar na sakop ng exclusive economic zone (EEZ) ng Pilipinas.

Siniguro rin ng kalihim sa sambayahan na mayroon nang hakbang ang pamahalaan para lutasin ang isyu.

“I assure our people that we are addressing the situation. We stand by our position calling for the immediate withdrawal of Chinese vessels in the Julian Felipe Reef, which was communicated to the Chinese Ambassador. We are ready to defend our national sovereignty and protect the marine resources of the Philippines,” pahayag ni Lorenzana.

Ayon sa kalihim, may mga barko na ng Philippine Navy at Philippine Coast Guard ang ipinadala sa lugar.

Asahan na rin ang mas maraming barko ng Philippine Navy at Philippine Coast Guard na magsasagawa ng sovereignty patrols para protektahan ang mga mangingisda sa West Philippine Sea.

Sa ngayon, nakikipag-ugnayan na rin ang Department of National Defense (DND) sa iba pang ahensiya ng pamahalaan gaya ng Coast Guard at Bureau of Aquatic and Fisheries Resources para magsanib pwersa hinggil sa kanilang pagpapatrolya sa West Philippine Sea at ang Kalayaan Island Group (municipality of Pag-asa).

Sa kabilang dako, kinumpirma ni Armed Forces of the Philippines (AFP) chief Lieutenant General Cirilito Sobejana na nasa 183 Chinese vessels ang namataan sa Julian Felipe Reef batay sa isinagawang maritime patrol ng Philippine Air Force aircraft sa lugar.

Binigyang-diin ni Sobejana na hindi nila papayagan na masakop ng China ang Julian Felipe Reef gaya ng ginawa nila sa Scarborough Shoal.

Aniya, magkatuwang ang AFP, DND at Department of Foreign Affairs para maresolba ang isyu sa Julian Felipe Reef.

Ayon sa AFP chief, ayaw nila humantong sa military action kaya ginagawa nila ang lahat sa pamamagitan ng diplomatic approach.