PINANINDIGAN pa rin ni Jessy Mendiola na hindi totoong lilipat siya sa GMA Network, pero dahil freelancer siya, ay pwede naman siyang mag-guest kahit saang network. 

Katulad last Wednesday, July 7, nag-guest siya sa Shopee 7.7 TV special at dalawa sila ng kapwa niya dating Kapamilya, si Xian Lim, sa pagho-host ng show.

Si Xian ay Viva Artist na ngayon at pwede rin siyang lumabas at gumawa ng project sa Kapuso Network kaya may gagawin siyang teleserye, very soon, sa GMA na makakatambal niya si Jennylyn Mercado.

***

HABANG naghihintay pa si Ultimate Star Jennylyn Mercado sa pagsisimula ng lock-in taping nila ni Xian Lim, busy muna siyang naggi-guest sa mga GMA shows.

Matapos niyang mag-guest sa real-life drama episode na Magpakailanman ni Ms. Mel Tiangco, ngayon naman ay gaganap siya sa isang pakilig at funny magical story na “Last People on Earth” sa all-new episode ng award-winning weekly magical anthology on TV, ang Daig Kayo Ng Lola Ko. Makakatambal ni Jennylyn ang versatile actor na si Paolo Contis.

“Excited ako dahil matagal-tagal na rin akong hindi nakakagawa ng comedy at ngayon, makakatambal ko pa si Paolo na kilala nating mahusay na actor at comedian,” sabi ni Jennylyn.

“Huwag ninyo kaming i-miss sa Sunday, July 18, pagkatapos ng ‘24 Oras Weekend’ sa GMA-7.”

***

MARAMING netizens ang pumuri sa ginawa ng GMA Entertainment Group na simulan ang story ng The World Between Us nang bata pa sina Louie (Alden Richards), Lia (Jasmin Curtis-Smith) at Brian (Tom Rodriguez), kaya malalaman na kung saan nagsimula ang bawat character nila, kung ano ang pinaghuhugutan nila, na napapanood sa mga teasers ng serye bago pa ang kanilang world premiere noong July 5.

Ngayon ay masasagot na kung bakit kayang unahin ni Louie ang pag-aaral at kalimutan muna ang love niya kay Lia; sino ang susundin ni Lia, ang puso niya o ang kanyang pamilya, at si Brian, inggit ba ang dahilan kaya tutol siya kay Louie?

Simula ngayong Friday, July 9, mapapanood na sina Alden, Jasmine at Tom, at simula na ang labanan sa acting nilang tatlo.  Pinuri rin ng mga netizens ang mga gumanap sa role nila noong bata pa dahil pare-parehong mahuhusay sina Izzy Canillo, Shanelle Agustin at Will Ashley, respectively.

Kasama pa rin sina Ms. Dina Bonnevie, Ms. Jaclyn Jose, Sid Lucero, Kelly Day, Alyana Asistio, napapanood ang The World Between Us gabi-gabi pagkatapos ng 24 Oras sa GMA-7.

***

MULI nang napapanood sa GMA-7, ang teaser ng Legal Wives dahil natapos na finally ang kanilang lock-in taping at sa Monday, July 26 na ang world premiere ng family drama sa GMA Telebabad.

Ang serye na dinirek ni Zig Dulay (na siya ring nag-direk ng Sahaya ni Bianca Umali), ay magpapakita ng iba’t ibang mukha ng pag-aasawa.

Gagampanan ni Kapuso Dramatic Actor Dennis Trillo ang role ng isang Mranaw, si Ismael, na may tatlong babaeng pakakasalan niya nang dahil sa magkakaibang dahilan.

Challenging para kay Andrea Torres as Diane, ang nag-iisang Christian sa tatlong asawa.  New perspective naman kay Bianca Umali as Farrah, ang role niya at para kay Alice Dixson as Amirah, sa pamamagitan daw ng serye ay mas marami tayong matututunan sa kultura ng mga kapatid nating Muslim.

(NORA V. CALDERON)

DREAM come true para kay Mavy Legaspi ang makapareha si Kyline Alcantara sa very first Kapuso teleserye niya na I Left My Heart In Sorsogon.

     “Nabanggit ko nga in my past interviews na si Kyline talaga ‘yung gusto kong makasama sa isang serye, sa first serye ko ever ’cause of the relationship that we have, the friendship that we have that already exists.                                    

“So I’m just very happy and excited na siya ‘yung magiging partner ko rito sa show,” sey ni Mavy sa story conference ng teleserye na pagbibidan nina Heart Evangelista at Richard Yap.

     Tulad ni Mavy, happy and excited din si Kyline na makatrabaho ang friend niyang si Mavy.

     “Ako, I’m very, very happy kasi siyempre, kumbaga may foundation na kami, we’re friends na talaga ever since. So sabi ko nga doon sa past interviews ko, there’s no need for ice breaker kasi wala ng ice kasi sobrang comfortable na namin sa isa’t isa.                                  “Sa sobrang close namin, there was this one time that I became really vulnerable with him, as in to the highest level. So I’m just excited and I’m excited to see din naman his progress with his craft, and kung paano niya i-e-execute ‘yung pinakita sa story con.”

     Bukod sa sisimulang teleserye, host si Mavy sa comedy-gag-variety show ng GTV na FLEX kunsaan kasama niya sina Lexi Gonzales, Joaquin Domagoso, at Althea Ablan.

     ***

NAPAG-USAPAN sa paglabas ni Bea Alonzo sa Kapuso Mo, Jessica Soho ay ang kanyang ama na iniwan sila ng kanyang ina noong 4-years old pa lang siya.

Phylbert Angellie Ranollo Fagestrom ang tunay na pangalan ni Bea at British ang kanyang biological father.
Nakilala ang show ni Jessica Soho sa paghanap ng mga family members na nawalay sa isa’t isa.

Tinanong si Bea kung nais ba niyang mahanap ang kanyang biological father?

Natawang sagot ni Bea: “Naku ‘wag na po nating hanapin ang tatay ko kawawa naman yung nanay ko. It was a very painful past. Growing up, hindi ko na-feel na meron pagkukulang kasi my mom is both my dad and my mom.”

     Maganda naman daw ang lagay ng kanyang ina sa piling ng kanyang stepfather. 17 years na raw silang magkasama. Tinuturing na isang blessing daw sa buhay nilang mag-ina ang pagdating ng kanyang stepfather.

Ayon kay Bea: “Siya yung parang naging glue, naging dahilan kung bakit kami naging ganitong ka-close. Sometimes gusto mo parang ’yun bang traditional family, ’di ba? But sometimes, there are also blended families and sometimes, it just works. You just have to be happy about it.”

Binalikan din ni Bea ang struggling years niya noong nagsimula siyang mag-artista tulad nang paghiram niya ng damit sa kanilang kapitbahay para may magamit siya sa taping.

Naranasan din daw ni Bea ang makisabay sa sasakyan ng ibang tao dahil wala siyang sariling kotse at wala raw siyang kasama noon kaya nasanay siyang bitbitin ang mga gamit niya tuwing may taping at shooting siya.

***

SA wakas ay kinasal na sina Gwen Stefani at Blake Shelton.

Naganap ang intimate wedding ng The Voice coaches noong nakaraang Fourth of July holiday sa estate ni Blake sa Tishomingo, Oklahoma.

Bago ang wedding, nagpagawa si Blake ng maliit na church noong nakaraang taon sa kanyang ranch at doon niya pakakasalan si Gwen.

Suot ni Gwen ay isang strapless custom-made lily white wedding gown na gawa ng designer na si Vera Wang. May chapel-length veil ito na may hand-embroidered names na “Gwen” and “Blake” kasama ang pangalan ng mga anak ni Gwen na sina Kingston (15), Zuma (12) and Apollo (7).

May higit na 40 guest sa wedding ng dalawa at ang The Voice host na si Carson Daly ang naging wedding officiant nila.

Unang nag-meet sa The Voice noong 2015 sina Gwen at Blake. Kaka-divorce lang ni Gwen noon sa husband niya of 13 years na si Gavin Rossdale at divorced din that time si Blake sa country singer wife na si Miranda Lambert.

      Nag-date exclusively ang dalawa for five years hanggang sa nag-propose si Blake kay Gwen noong October 2020.

(RUEL J. MENDOZA)