Maituturing si national weightlifter Hidilyn Diaz na isang buhay na bayani matapos ibigay sa Pilipinas ang kauna-unahang Olympic gold medal sa kanyang tagumpay sa women’s 55-kilogram division ng Tokyo Games.

Dahil sa kanyang kabayanihan ay ibibigay ng Philippine Sports Commission (PSC) sa 30-anyos na si Diaz ang Gold Medal of Valor sa nakatakda niyang pag-uwi ngayon.

Tinapos ni Diaz ang 97 taon na paghihintay ng Pilipinas, unang sumali sa quadrennial event noong 1924 sa Paris, France, para sa isang Olympic gold.

Isang malakihang Hero’s welcome ang inaasahang ibibigay sa tubong Zamboanga City sa paglapag ng kanyang eroplano sa airport.

Ngunit didiretso siya sa isang seven-day quarantine bilang pagsunod sa protocols ng IATF

Bumuhat si Diaz, ang 2016 Rio de Janeiro Olympics silver medalist ng total lift na 224 kilograms mula sa 97kg sa snatch at 127kg sa clean and jerk para ungusan si world champion at record holder Liao Qiuyun ng China sa isang faceoff.

Nagtala si Liao ng 97kg sa snatch at 126kg sa clean and jerk para sa total lift na 223kg at makuntento sa silver medal habang kinuha ni Zulfiya Chinshanlo ng Kazakhs­tan ang bronze sa kanyang 90kg snatch at 123kg sa clean and jerk para sa total lift na 213kg.

Base sa Republic Act 10699 o ang  Expanded Incentives Act ay tatanggap si Diaz ng cash incentive na P10 milyon para sa Olympic gold bukod pa ang parehong bonus mula kina Manny V. Pangilinan ng MVP Sports Foundation at Ramon S.  Ang ng San Miguel Corporation.

Magbibigay din si Rep. Mikee Romero ng dagdag na P3 milyon habang P2.5 milyon ang ipinangako ng Zamboanga City.

Isang magarang house and lot naman sa Tagaytay City ang ireregalo ni Philippine Olympic Committee (POC) president Abraham “Bambol” Tolentino para kay Diaz habang isang condominium unit na nagkakahalaga ng P14 milyon ang ibibigay ng property firm na Megaworld.

Tatanggap din si Diaz ng P5 milyon at lifetime supply ng free fuel, ayon kay Siklab Atleta Pilipinas Sports Foundation, Inc. chief at Phoenix Petroleum Philippines, Inc. chairman Dennis Uy.

Ayon kay Diaz, hindi natatapos sa Tokyo Olympics ang kanyang pagbibigay ng karangalan para sa bansa.

“Hindi pa ako mag-stop, kaya ko pa. May ibibigay pa ako sa Pilipinas,” ani Diaz. “With the help of the Philippine Olympic Committee and the Philippine Sports Commission, hindi ako susuko. I will continue to inspire the youth to dream and pursue that dream.”

Sasalang si Diaz sa 31st Southeast Asian Games sa Hanoi, Vietnam na ipinagpaliban ngayong taon bunga ng coronavirus disease (COVID-19) pandemic.

Gusto rin niyang sumali sa Asian Championships at kung posible ay sa kanyang pang-limang sunod na Olympics sa Paris, France sa 2024.

“Kung ang lakas ko nandoon pa, tuluy-tuloy pa ako,” ani Diaz.

Inaasa­hang magiging inspirasyon kay featherweight Nesthy Petecio ang pagbuhat ni weightlifter Hidilyn Diaz sa kauna-unahang Olympic Games gold medal ng Pilipinas.

Nakatakdang labanan ngayong araw ni Petecio si Yeni Marcela Arias Castaneda ng Colombia sa quarterfinals ng women’s 54-57 kilogram division sa Olympic boxing competitions sa Kokugikan Arena.

Makikipagbasagan ng mukha si Petecio, nagreyna noong 2019 World Bo­xing Championships, kay Castaneda para sa bronze medal sa ganap na alas-10 ng umaga (Manila time).

Sakaling talunin ni Petecio si Castaneda, ang bronze medalist noong 2019 Pan American Games, ay dalawang panalo pa ang kailangan niya para makamit ang ikalawang Olympic gold ng bansa.

“We will look at the vi­deos of her fights here,” sabi ni Don Abnett, ang Australian coach ni Petecio, sa Colombian pug. “We know her next opponent will be tough, but we’re very confident.”

Umiskor si Petecio ng 3-2 panalo laban kay top seed at World No. 1 Lin Yu-Ting ng Chinese Taipei para umabante sa quarterfinals.

Isang 5-0 pagdomina muna kay Marcelat Sakobi Matshu ng Congo ang inilista ng tubong Santa Cruz, Davao del Norte sa round-of-32.

Hindi na pinatagal ni Eumir Marcial ang laban at agad na tinapos sa pamamagitan ng technical knockout o referee-stopped-contest (RSC) sa unang round pa lamang sa nagpapatuloy na Tokyo Olympics.

Sa pagsisimula pa lamang ng laban sa loob ng isang minuto ay pinabagsak ni Marcial si Younes Nemouchi ng Algeria dahilan para bilangan ito ng refereee ng eight count.

Ang sumunod na pangyayari ay pumagitna ang referee nang magkaroon ng accidental headbutt ang dalawa at dumugo ang taas ng kanang mata ng Algerian.

Sa huli itinigil ng referee ang laban sa oras na 2:41 minuto sa opening round.

Kung maalala bago pa man umakyat ng ring ay marami na ang humuhula kay Marcial na aabot ito ng finals lalo na at sumabak na rin ito sa professional fight noong buwan ng Disyembre sa ilalim sa Hall of Famer trainer na si coach Freddie Roach doon sa Los Angeles, California.

Bunsod ng panalo ni Eumir, uusad na siya sa quarterfinals at makakaharap ang Armenian star na si Arman Darchinyan sa August 1 sa 69-75 kg division.

Kung sakaling manalo pa si Marcial ay sigurado na ang bronze medal upang sundan din ang yapak ni Nesthy Petecio na tiyak na rin ang bronze medal.

Kung maalala si Petecio ay lalaban na sa Sabado sa semifinals.

Sinasabing ang kalaban ni Marcial ay pamangking lalaki ng dating world champion na si Vic Darchinyan.

Mas lalong patataasin ni Hall of Famer Freddie Roach ang lebel sa training camp ni eight-division world champion Manny Pacquiao sa Wild Card Gym sa Hollywood, California.

Kabilang sa estratehiya nito ang paghamon sa lahat ng sparring mates na isasabak nito kay Pacquiao kung saan bibigyan ng mahusay na trainer ng pabuya ang sinumang makaka-knockout sa Pinoy pug.

Nangako si Roach ng $1,000 premyo sa sparring partner ni Pacquiao na makakagawa nito.

Walang alam si Pacquiao sa naturang plano ni Roach.

“Manny doesn’t know that! I’ve always kept it a secret but every sparring partner I hire, I say, ‘You knock him down, I give you a thousand bucks’. And I’ve kept a thousand in my pocket,” ani Roach sa panayam ng The Sun.

Ginawa ito ni Roach upang mas maging matindi ang sparring sessions ni Pacquiao dahil nais nitong maihanda ng lubos ang kanyang bata para sa laban.

Nakatakdang harapin ni Pacquiao si reigning World Boxing Council (WBC) at International Boxing Fe­deration (IBF) welterweight champion Errol Spence Jr. sa Agosto 21 (Agosto 22 sa Maynila) sa T-Mobile Arena sa Las Vegas, Nevada.

“I am just so damn proud of Manny for picking Errol Spence for this fight. It’s a real fight and what a great example to set. You want respect? You want to establish a legacy? Look at what Manny and Spence will be doing on August 21. It’s the type of fight that returns boxing to the front page,” ani Roach.

Alam ni Pacquiao na hindi biro ang labang haharapin nito.

Itinuturing nitong bakbakan ng pinakamahuhusay sa mundo ang Pacquiao-Spence fight.

“My fight with Errol Spence is not just a battle between the two best welterweights but between two of the best fighters. There is no ‘B-side’ in this fight. I have just as much to prove in this fight as Errol does,” ani Pacquiao.

Kaya naman nangako si Pacquiao na asahan na ang matinding bakbakan sa oras na magkrus ang kanilang landas.

“We are going to bring out the best in each other. It is the type of fight that makes boxing so great,” ani Pacquiao.