NAMAHAGI ang pamahalaang lokal ng Quezon City ng P500 fuel subsidy voucher para sa lahat ng tricycle driver na pumapasada sa siyudad.

Ito ay para alalayan ang mga tsuper na lubos na naaapektuhan ng pagtaas ng presyo ng produktong petrolyo.

Mismong si Mayor Joy Belmonte ang nagbigay ng tulong sa halos 4,000 registered tricycle drivers.

Ang iba pang TODA drivers ay mabibigyan naman sa susunod na mga araw.

Maliban sa P500, magbibigay pa ang lokal na pamahalaan ng P1,000 fuel subsidy ayon sa Ordinance SP3100, S-2022 na naipasa ng Sangguniang Panglunsod na inakda ni Majority Leader Franz Pumaren.

Ang mga nabanggit na fuel subsidy program ng QC ay iba pa sa nakatakdang ibigay ng national government.

SINABI ni Vaccine czar Carlito Galvez Jr. na bumababa na ang vaccination numbers sa bansa.

Sa katunayan, 5 hanggang 6 na milyon na COVID-19 vaccine doses na lamang ang ituturok ngayong Marso.

Iniulat ni Galvez sa Chief Executive ang patuloy na pagbaba ng vaccination rate simula pa noong Nobyembre 2021.

“Nakita po natin noong unang mga panahon meron po tayong mga supply issue, sa ngayon naman po nakita po natin nagsisimula tayong magkaroon ng demand issue dahil gumaganda na po ang kalagayan ng Pilipinas meaning nagiging complacent yung mga kasamahan natin sa pagpapabakuna,”ayon kay Galvez.

“Nakita natin since February our output decreased by more than 50% and this month we might only achieve five to six million doses administered,” dagdag na pahayag nito.

Aniya, mayroong patuloy na pagbaba ng daily vaccination output bunsod ng mababang turn-out sa pagtuturok ng booster shots sa kabila ng mataas na porsiyento ng vaccine willingness na 80%.

“We have to highly encourage our government workers and economic frontliners to get boosted. Second, mag-provide po tayo ng possible incentives for people with boosters. Lastly, maybe ang nire-recommend po ng ating mga business sector that boosters may be a requirement for travel and entering establishments,” dagdag na pahayag nito.

Sinabi pa ng National Task Force (NTF) Against COVID-19 chief implementer na ang kabuuang 139.06 million COVID-19 vaccine doses ay naiturok na habang 64,660,228 Filipino ang fully vaccinated.

Mayroon namang good turn-out ang pediatric vaccination na mayroong 8,766,899 fully vaccinated para sa mga may edad na 12 hanggang 17 taong gulang at 1,233,017 first dose ang naiturok para sa 5 hanggang 11 taong gulang.

Samantala, nabigo naman ang pamahalaan na mapagtagumpayan ang target nito mabakunahan ang 1.8 milyon pang mga Filipino sa panahon ng fourth wave ng “Bayanihan, Bakunahan” national vaccination drive.

“At least 1,400,889 COVID-19 vaccine doses were administered which 75% of the 1.8 million target in the fourth wave of the national vaccination drive,” ayon kay Galvez.

MALAKI ang posibilidad na magkaroon ng price rollback sa mga produktong petrolyo sa susunod na linggo.

Sinabi ni Energy Secretary Alfonso Cusi na bunga di umano ng mga pinakabagong pangyayari sa Ukraine, Russia, at China.

Sinabi ni Cusi na bababa ang presyo ng mga produktong petrolyo kung patuloy din na bababa ang presyo ng krudo sa world market.

“Next week po, inaasahan nating bumaba ang presyo ng petrolyo kung tuloy-tuloy ang pagbaba ng presyo sa merkado,” ayon kay Cusi.

“Dalawang bagay ang nakapagpababa. Ang isa po is the lockdown in China because of COVID and ang projection ng lower demand for oil by China. Itong dalawang araw na tuloy-tuloy na pag-uusap between Russia and Ukraine, medyo na-temper din po ‘yung demand for oil,” dagdag na pahayag nito.

Aniya, sa nangyayaring pagtaas ng presyo ng krudo sa pandaigdigang merkado, umabot na sa P90.39 kada litro ang gasolina; P84.76 sa diesel, at P84.17 sa kerosene.

Matatandaang, noong nakaraang linggo, pumalo na sa $150 per barrel ang krudo sa world market. Subalit, ngayong linggo, naglalaro ito sa $100 level.

Sinabi pa ng Kalihim, sa kanyang pagtataya ay posibleng P5 per liter ang matapyas sa presyo ng gasolina at P12 sa diesel sa susunod na linggo.

Sa kabilang dako, siniguro naman ni Cusi na sapat ang suplay ng krudo sa Pilipinas sa kabila ng nangyayaring krisis sa Ukraine at Russia.

“Sinigurado natin ang supply. Nakipag-usap tayo sa lahat ng mga industry players ng assurance sa supply. Tayo naman sa ngayon, meron pong sufficient supply,” ayon kay Cusi.

Binanggit din ni Cusi ang iba pang posibleng maging daan para bumaba ang presyo ng krudo sa world market.

“Bababa lang po ang presyo ng langis kung magkakaroon ng increase ng supply sa pamamagitan ng pag-alis ng sanction sa Venezuela, Iran, at Syria,” ani Cusi.

“Nakakapagbigay po ito ng mahigit isang milyong barrel a day kung maaalis maaalis ‘yung sanction. Then kung bababa ‘yung decrease ng demand at kung magkakaroon ng ceasefire sa Russia,” ayon kay Cusi.

At para matapyasan aniya ang epekto ng mataas na presyo ng mga produktong petrolyo, iminungkahi ni Cusi ang short-term solution ng DOE gaya ng pagpapatupad ng P1 hanggang P4 promotional discounts sa oil companies, paglalaan ng P1.1 billion fuel discounts sa mga magsasaka at mangingisda, at pagpapatupad ng Pantawid Pasada program.

Samantala, ang magiging long-term solution naman umano ang pag-amyenda ng Kongreso sa Oil Deregulation law at TRAIN law. (Daris Jose)