2022 April 23 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for April 23rd, 2022

GAB iimbestigahan ang Casimero isyu

Posted on: April 23rd, 2022 by @peoplesbalita No Comments

PINAIIMBESTIGAHAN na ng Games and Amusements Board (GAB) ang kasalukuyang sitwasyon ni World Boxing Organization (WBO) bantamweight champion John Riel Casimero matapos itong patawan ng parusa ng British Boxing Board of Control (BBBC).

Matapos malaman ang balita, agad na ipinag-utos ni GAB chairman Baham Mitra na simulan ang independent investigation upang makita kung tama ang desisyon ng BBBC.

Hindi na matutuloy ang laban ni Casimero kay Paul Butler matapos matuklasan ng BBBC na may nilabag na ‘medical guidelines’ ang Pinoy champion.

Ipinagbabawal ng BBBC na gumamit ng sauna ang sinumang boksingero bago ang official weigh in ng laban.

Isa ang sauna sa may malaking tulong para magbawas ng timbang.

“As the country’s pro boxing regulatory agency, we strongly condemn and discourage the commission of any illegal acts or violation of boxing rules. We will surely look into this and summon Mr. Casimero and his team to shed light on the issue,” ani Mitra.

Tanggal na si Casimero sa laban.

Sa halip, ipinalit si Jonas Sultan para harapin si Butler kung saan paglalabanan ng dalawa ang interim WBO bantamweight title.

Wala pang inilalabas na statement ang kampo ni Casimero.

Binigyan ito ng BBBC ng dalawang araw upang ipaliwanag ang kanyang panig.

Naghihintay din ang lahat sa magiging desisyon ng WBO kung tuluyan nang huhubaran ng korona si Casimero.

PNP may sinusunod na ‘formula’ sa pagtala ng crowd estimate sa mga campaign rally

Posted on: April 23rd, 2022 by @peoplesbalita No Comments

AMINADO ang Philippine National Police (PNP) na hindi nagtutugma ang kanilang crowd estimate sa mga organizer ng campaign rally.

Ayon kay PNP Chief Police General Dionardo Carlos, may ginagamit na ibang guidelines o formula ang PNP sa bilang ng mga tao sa mga venue.

Paliwanag ni Carlos, 2 persons per square meter ang kanilang ginagamit na basehan sa pagbibigay ng crowd estimate at ito ang kanilang nilalagay sa mga report.

Kasunod nito, muling iginiit ni Carlos na walang kinikilingan o pinapanigan ang mga pulis sa halalan.

Mahigpit ang bilin nito sa mga kapulisan na manatiling neutral sa lahat ng panahon.

Hindi rin umano sila makikisawsaw sa anumang isyu dahil ang mandato nila ay ang pagbibigay ng seguridad at pagpaputupad ng kaayusan. (Daris Jose)

Be professional, don’t act beyond bounds

Posted on: April 23rd, 2022 by @peoplesbalita No Comments

HINIKAYAT ni Pangulong Rodrigo Roa Duterte ang mga graduates o nagsipagtapos ng Philippine National Police Academy (PNPA) Class 2022 na panatilihin ang kanilang propesyonalismo sa pamamagitan ng pagganap sa kanilang gampanin ng walang pagmamalabis sa kanilang legal parameters.

“You must maintain professionalism for you will soon take over its leadership and will be the role models of future Filipino law enforcers,”ayon kay Pangulong Duterte sa isinagawang graduation rites ng PNPA “Alab-Kalis” Class of 2022 sa Silang, Cavite.

Ang panawagan na ito ng Pangulo ay kasabay ng pagbibigay puri sa mga kapulisan bilang “forefront” sa laban sa ilegal na droga at terorismo sa ilalim ng kanyang liderato.

Umaasa naman ang Chief Executive na mapananatili ng mga graduates ang “same level of courage, determination and passion” sa kanilang pagsama sa Philippine National Police (PNP), Bureau of Fire and Protection (BFP), at Bureau of Jail Management and Penology (BJMP).

Sinabi rin ng Pangulo sa mga ito na iwasan na umakto na lagpas sa kanilang legal parameters, pinaalalahanan niya ang mga ito na ang kanilang mandato ay magsilbi at protektahan ang mga mamamayang Filipino.

“Although our war with lawless forces is far from over, I am proud to say that we have made great strides in improving the crime situation in the country,” ayon sa Punong Ehekutibo sabay sabing “Always be reminded that the core of your profession is and will always be the welfare of our people.”

Bilang abogado, sinabi ni Pangulong Duterte, na handa siyang magbigay ng legal assistance sa mga pulis kahit pa matapos ang kanyang termino sa Hunyo 2022, hangga’t ginagampanan ng mga ito ang kanilang tungkulin alinsunod sa batas.

Muli namang inulit nito ang kanyang pagmamahal sa kapulisan na tumulong na panatilihin ang batas at kapayapaan sa ilalim ng kanyang liderato.

“Maski retired na ako , if you want my help, lalo na ‘yung masabit kayo in a legitimate operation, nandiyan ako. And maybe I will appear in court for you,” ayon sa Pangulo.

Sinabi rin ni Pangulong Duterte sa mga graduates na umiwas na lumagpas o lumabas sa kanilang legal parameters.

“Kung ano lang ang tama, ‘yun ang sundin niyo. Do not go out of your legal parameters, ‘yung tama lang na trabaho ng pulis pati alam niya ang obligasyon sa taumbayan,” aniya pa rin.

Sa kabilang dako, matapos ang kanyang keynote speech, nagpalabas naman ng kautusan ang Pangulo na bigyan ng pardon o kapatawaran ang mga PNPA cadets na mayroong outstanding punishments at demerits.Inanunsyo rin ng Pangulo na makatatanggap ng “bahay at lupa” mula sa gobyerno si PNPA Alab-Kalis Class’ graduating valedictorian, Cadet Ernie Alarba Padernilla mula Passi City, Iloilo.

“Your valedictorian, I am talking on behalf of the government, may house and lot ‘yan,” aniya pa rin.

Nakatanggap din si Padernilla ng Presidential Kampilan, Chief PNP Kapilan, Best in Forensic Science Award, at Best in Thesis Award.

Ang PNPA Alab-Kalis Class ay may kabuuang 229 cadets.

Tinatayang 206 graduating cadets ang makakasama sa PNP, 12 ang mapupunta sa BJMP, habang 11 naman ang makakasama ng taga- BJMP. (Daris Jose)

Celtics naka-2-0 lead na kontra sa Nets

Posted on: April 23rd, 2022 by @peoplesbalita No Comments

NAGTALA nang come-from-behind win ang Boston Celtics para muling itumba sa ikalawang pagkakataon ang brooklyn nets, 114-107.

Mula sa 17 points na kalamangan ng Brooklyn, hinabol ito ng Boston para iposte ang 2-0 lead sa kanilang serye.

Nagbuhos ng 19 points si Jayson Tatum para sa Celtics habang si Jaylen Brown ay may 22 points.

Nabokya aman ang NBA superstar ng Brooklyn na si Kevin Durant na walang puntos na naipasok sa second half dahil sa matinding depensa na inilatag ng karibal na team.

Bagama’t sa kabuuan ay nakalusot ang 27 puntos ni Durant.

Bulacan, kaisa ng bansa sa obserbasyon ng Earth Day 2022

Posted on: April 23rd, 2022 by @peoplesbalita No Comments

BILANG pagpapakita ng suporta para mapangalagaan ang ating planeta, magsasagawa ang Pamahalaang Panlalawigan ng Bulacan sa pamamagitan ng Bulacan Environment and Natural Resources Office (BENRO) ng clean-up drive sa Brgy. Sto. Rosario, Paombong at tree planting at growing activity sa Paombong Eco Park, San Isidro II, Paombong, Bulacan bukas, alas-7:00 ng umaga.

Sasamahan ang mga kawani ng BENRO ng mga kawani mula sa Paombong MENRO upang makatuwang sa clean-up drive kung saan may kabuuang 100 namumungang mga puno ang itatanim sa loob ng eco park.

Samantala, hinihikayat naman ni Gobernador Daniel R. Fernando ang mga Bulakenyo na gamitin ang 4Rs ng waste management at inihayag ang kanyang kagustuhang magpatupad ng mga programang makatutulong sa pangangalaga at konserbasyon ng mga likas na yaman para sa mga susunod na henerasyon.

“Sa hinaharap na problema ng mundo ngayon laban sa global warming at climate change, hinihikayat ko kayong lahat na gawin at sundin ang 4Rs; ang reduce, reuse, recycle at recover dahil sa maliit na paraan na ito, kapag lahat tayo ay nagkaisa, malaki ang magiging tulong nito sa ating kalikasan. Sinisigurado ko rin na ang kalikasan ay isa sa ating pagtutuunan ng pansin dahil hindi lamang ito para sa atin kundi maging sa mga susunod pang henerasyon,” anang gobernador.

Ang Earth Day ay taunang obserbasyon na ginaganap tuwing April 22 upang magpakita ng suporta sa pangangalaga sa kapaligiran na kinikilala bilang ang pinakamalaking sekular na pagdiriwang sa buong mundo. (BISHOP JESUS “JEMBA” M. BASCO)

Ads April 23, 2022

Posted on: April 23rd, 2022 by @peoplesbalita No Comments

Pelicans naitabla ang serye vs Suns, matapos magtamo ng injury si Booker

Posted on: April 23rd, 2022 by @peoplesbalita No Comments

NASILAT ng New Orleans Pelicans ang top team na Phoenix Suns sa iskor na 125-114, kaugnay sa nagpapatuloy na first round ng NBA playoffs sa Western Conference.

Dahil dito tabla na ang best-of-seven series sa tig-isang panalo.

Naging daan sa panalo ng Pelicans ang all-around performance ni Brandon Ingram na may 37 points, 11 rebounds at nine assists.

Nag-ambag naman si CJ McCollum ng 23 points.

Sinasabing ito ang kanilang first postseason victory mula pa noong taong 2018.

Sinamantala ng Pelicans ang pagkawala ng Suns All-Star guard at top scorer na si Devin Booker na dumanas ng right hamstring tightness sa third quarter.

Pagsapit kasi ng fourth quarter ay hindi na nakabalik pa ito sa game.

Four years din na ‘di nakagawa ng movie: THERESE, pam-Best Actress na naman ang performance sa ‘Broken Blooms’

Posted on: April 23rd, 2022 by @peoplesbalita No Comments

FOUR years din palang hindi gumawa ng pelikula ang award-winning actress na si Therese Malvar.

Kaya noong inalok sa kanya ang Broken Blooms, tinanggap niya ito agad dahil na-miss daw niyang gumawa ng pelikula.

Nataon naman na nakabilang ang Broken Blooms sa Oporto International Film Festival sa Portugal noong nakaraang April 5. Kasama ni Therese sa movie sina Jeric Gonzales, Royce Cabrera, Norman “Boobay” Balbuena, Lou Veloso, Mimi Juareza, at Ms. Jaclyn Jose.

Gaganap na mag-asawa sina Therese at Jeric at ang hirap na pinagdaanan nila noong magkaroon ng pandemic.

“It was a very serious topic and serious din ‘yung pag-atake namin. We tackled the problems during quarantine lalo na as a young couple and bagong kasal lang. Very mature, very seryoso ‘yung atake namin do’n,” sey ni Therese.

Kung susuwertehin ay baka manalo si Therese ng kanyang second international best actress award dahil sa Broken Blooms. Unang nanalo si Therese sa Moscow International Film Festival noong 2016 para sa Hamog.

“It’s not what I’m always aiming for since I always like to give my 100 percent in each project that I do. But if ever I receive an award, it’s a blessing as well since talagang tumulong lahat ng cast, staff, and crew ng ‘Broken Blooms’ para maitawid po namin ‘yung mga eksena namin and sobrang magagaling talaga lahat ng cast. And even if I won’t win an award but if they win an award, I would still be as proud as I am pa rin.”

***

MASUWERTE ang 19-year old na si Anjay Anson dahil bukod sa pagkakasama niya bilang isa sa fresh faces ng Sparkle GMA Artist Center, nagkaroon agad siya ng pagkakataon na makipagsabayan sa pag-arte sa top-rating crimeserye ng GMA na Widows’ Web.

“I was discovered through TikTok. Nag-trend po siya nun, parang glow-up video ko po nun from nung picture ko from before. Doon po ako na-discover. Nag-audition din po ako sa GMA, and thankfully natanggap naman po ako. “Sobrang blessed ako na napasama ako sa Sparkada, kasi nakita ko talaga ‘yung barkada talaga na feeling, nandon lahat. Talagang lahat kami good vibes, nag-e-enjoy. Kung may problema ang isa, parang nagiging problema na ng lahat, ganyan. Kaya sobrang barkadang-barkada talaga, at sobrang thankful ako napasama ako sa Sparkada,” sey ni Anjay.

Happy si Anjay dahil very supportive ang kanyang parents, lalo na raw ang kanyang Indian father na si Anand Mandhyani na may blessing sa kanyang pagpasok sa showbiz.

“Sobrang supportive ang parents ko sa akin. ‘Go, sige! What time ba ‘yan?’ Actually sila pa nga ‘yung pumili ng suot ko. Sabi nila, ‘O eto, mas bagay sa ‘yo ‘yan.’ Super supportive sila na kasama ako sa ganito ngayon.”

Kaya promise ni Anjay na gagawin niya ang lahat para masuklian ang sacrifices at suporta ng kanyang parents sa pamamagitan ng pagbubuti sa kanyang trabaho.

***

SA Tiktok video ng misis ni Justin Bieber na si Hailey Bieber, pinakiusapan niya ang mga bashers, haters at trolls to leave her alone.

Masyado na raw nase-stress si Hailey sa mga patutsada sa kanya ng ilang haters sa social media, kaya wala siyang choice kundi ang labanan na ang mga ito.

“Leave me alone at this point. I’m minding my business. I don’t do anything. I don’t say anything. Leave me alone, please. Enough time has gone by where it’s valid to leave me alone. I beg of you, truly.

“That’s my only request. Leave me alone. Be miserable somewhere else, please. This is for you guys in my comments every single time I post,” caption pa ni Hailey.

Ayon sa isang close kay Hailey, hina-harass pa rin daw siya ng mga fan ni Selena Gomez, ang ex-girlfriend ng mister niyang si Justin. Naghiwalay ang dalawa noong 2015. Kinasal naman si Hailey kay Justin noong 2018.

Noong 2019, nag-release ng song si Selena titled “Lose You To Love Me.” Pero wala siyang sinabi kung para kanino ang song na ito.

Nakiusap din noon si Selena na tigilan na ng kanyang mga followers ang pangha-harass kay Hailey.

(RUEL MENDOZA)

Sinagot at ‘di pinalampas ang comment ng basher: KIM, naiyak at kinilabutan sa ginawang pagbati sa kanya ni VP LENI

Posted on: April 23rd, 2022 by @peoplesbalita No Comments

NAKATATANGGAP ng mga pamba–bash at kung ano-anong negatibong comments ang ipinost ng Kapamilya star na si Kim Chiu na video greetings sa kanya ni Vice President Leni Robredo.

Sa kabila nang pag-amin ni Kim na na-overwhelm siya at naiyak sa hindi inaasahang personal video greetings sa kanya noong kanyang kaarawan, todo naman ang naging pamumuna ng ilang netizens, particular na ang mga BBM supporters sa pahayag ng isa sa tumatakbo sa pagka-Presidente na “You’re in a good place now.”

Para sa ilang netizens, ang phrase na ito ay ginagamit lang daw kapag namatay na ang isang tao. Kaya sa mga comments sa Instagram at Twitter ni Kim, may nagre-R.I.P. sa kanya at may nagsasabing “kawawa ka naman, pinatay ka na.”

Hindi naman ito pinalampas ni Kim na mula nang maging vocal sa sinusuportahan niyang kandidato, kasama na ngayon sa Cebu rally kunsaan, hometown niya mismo.

Sinagot ni Kim ang isa sa mga nam-bash sa content ng video greetings sa kanya. Sabi ni Kim sa kanyang reply sa nagsabing kinilabutan daw ito sa ginawang pagbati sa kanya ni VP.

“Wag ka nga! ‘Di naman ikaw yung binati eh. Ako di ba? Ako yung nag birthday. Nakikinood ka na nga lang ganyan ka pa. Ako kasi naintindihan ko, para sakin naman yung message. Ikaw ba? Nabati ka na ng taong tinitingala mo sa birthday mo?. Bawas nega. Para angat buhay lahat. Smile!”

***

MAY dahilan kung bakit ang isa sa Prima Donnas star na si Sofia Pablo ay halatang pinu-push talaga ng GMA-7.

Bukod sa very promising naman talaga ang 16 years old Kapuso star, ang lakas din talaga ng following niya sa social media.

Sa kanyang Tiktok account na lang ay meron na siyang 8 million followers. Hindi ito madaling ma-achieve at kahit maraming maituturing pa sigurong mas sikat na artista sa kanya, hirap na maka-1 million man lamang.

Kaya naman tuwang-tuwa si Sofia nang hingan namin ng reaction tungkol dito.

Sey nga niya, “Sobra, sobra, sobra po akong nagpapasalamat. At ‘yung Tiktok po, isa po talaga siya sa ang dami po talagang nakatutok.” At dahil nga 8 million ang followers niya, aminado si Sofia na very careful at concious daw siya sa mga ipino-post niya.

“Opo, very careful po talaga ‘ko. Kasi po, alam ko naman po na marami rin pong mga teenagers na nagpa-follow po sa akin. Kaya nga po minsan, magpo-post na po ako, idi-delete ko pa po kasi, baka hindi po positive ang maging dating ng post ko,” sey niya.

Sa isang banda, ang dating one episode lang na Raya Sirena ay mapapanood na simula sa Linggo, April 24 ng pitong episodes. Napi-pressure raw si Sofia na gumaganap bilang isang sirena, along with Saviour Ramos at Allen Ansay.

Pero sa kabila nito, nagpapasalamat si Sofia na sa kanya ipinagkatiwala ng network ang role, since alam daw niya na ang daming female stars na dream talagang gumanap na sirena.

(ROSE GARCIA)

Kelot pinagbabaril sa Navotas, sugatan

Posted on: April 23rd, 2022 by @peoplesbalita No Comments

SUGATAN ang isang 26-anyos na lalaki matapos pagbabrilin ng dalawang salarin habang naglalakad ang biktima pauwi sa Navotas City, kahapon ng madaling araw.

Isinugod sa Tondo Hospital para magamot ang tinamong tama ng bala ng baril sa kaliwang hita ang biktimang si Jeffrey Antonio, 26 ng 269 Roldan St., Brgy. Tangos Navotas South.

Sa report ni PSSg Karl Benzon Dela Cruz kay Navotas police chief Col. Dexter Ollaging, habang naglalakad ang biktima sa kahanaan ng Roldan Street pauwi dakong alas-3:30 ng madaling araw nang bigla na lamang sumulpot ang mga suspek na kilala lang bilang sina “Patrick” at “Tonyo”.

Agad naglabas ng baril si Patrick at pinaputukan ang biktima na sa kabila ng tinamong tama ng bala sa kaliwang hita ay nagawang makatakbo ni Antonio subalit, hinabol pa rin siya ng mga suspek saka muling pinaputukan.

Nagawang makarating ng biktima sa Barangay Hall ng Brgy. Tangos at humingi ng tulong sa mga tauhan ng barangay na naging dahilan upang agad siyang itinakbo sa naturang pagamutan.

Patuloy naman ang follow up operation ng pulisya para sa posibleng pagkakaaresto sa mga suspek habang inaalam pa ang motibo sa pamamaril. (Richard Mesa)