- July 3, 2024
-
Search in People's Balita
Ang Diyaryong Pinagkakatiwalaan
Archive for August 20th, 2022
23,000 pulis ikakalat sa pagbubukas ng klase sa Lunes
AABOT sa 23,000 tauhan ng Philippine National Police (PNP) ang kanilang ikakalat sa buong bansa para sa pagbibigay seguridad sa pagbubukas ng klase sa Lunes, Agosto 22.
Ayon kay PNP spokesperson Col. Jean Fajardo, karamihan sa mga pulis ay itatalaga bilang police assistance desk malapit sa mga school campus sa iba’t ibang panig ng bansa.
Sinabi naman ni PNP chief Gen. Rodolfo Azurin, Jr., na inatasan na niya ang lahat ng police units sa buong bansa na simulan na ang pagpapatupad ng security measures upang matiyak ang seguridad ng mga guro at estudyante sa face-to- face classes sa Lunes.
Nagpalabas na rin sila ng memorandum para sa isasagawang strategic deployment ng kanilang mga pulis sa iba’t ibang paaralan, unibersidad at transportation terminals.
Sa naturang bilang 9,500 dito ang ikakalat ng National Capital Regional Police Office (NCRPO).
Ayon kay NCRPO chief Police Brigadier General Jonnel Estomo, makikipagpulong siya sa mga unit commanders upang maisaayos ang sistema ng pagbibigay ng seguridad at peace and order sa pagsisimula ng klase sa Lunes, Agosto 22.
Aniya, magkakaroon ng augmentation ng mga pulis sa mga paaralan at unibersidad upang mabigyan ng sapat na seguridad ang mga estudyante laban sa pagkidnap, snatching at holdap.
Dagdag pa ni Estomo paiigtingin din niya ang random checkpoints at police visibility sa Kalakhang Maynila.
Malaking tulong ang police visibility sa pagbaba ng krimen.
Umaasa siyang susuportahan ng mga local government units ang kanilang isinasagawang security measures sa Metro Manila. (Daris Jose)
Customs ni-raid ‘hoarders’ ng libu-libong sako ng asukal sa Pampanga
LIBU-LIBONG sako ng hinihinalang hino-hoard na asukal ang nasabat sa isang warehouse sa San Fernando City, Pampanga sa gitna ng reklamo ng mga konsumer ng nagtataasang presyo nito sa merkado.
Huwebes nang salakayin ng mga ahente ng Bureau of Customs ang Lison Building, kung saan naroon ang New Public Market, sa barangay Del Pilar sa utos ni Executive Secretary Victor Rodriguez mula sa direktiba ni Pangulong Ferdinand Marcos Jr.
Una nang sinabi ni Marcos Jr. na kailangang gamitin ng Customs ang visitorial powers nito sa lahat ng customs bonded warehouses para masilip ang imbentaryo ng mga imported agricultural products sa layuning malaman kung merong nag-iimbak ng asukal.
“The BoC’s Pampanga sugar warehouse raid may very well serve as a warning to unscrupulous traders who are currently hoarding their stocks of sugar in order to profit from the current artificial sugar shortage situation,” ani Rodriguez.
Ang hinihinalang hoarded na sako ng bigas ay sinasabing nagmula sa Thailand. Nasabat din ng BOC agents ang daan-daang sako ng bigas na siyang nakita sa loob ng ilang delivery vans.
Kung mapatunayang smuggled ang mga sako ng asukal mula Thailand, haharap sa kaso kaugnay ng Customs Modernization Act ang mga may ari ng warehouse.
Nangyayari ito ngayong sumirit na sa P100 kada kilo ang presyo ng refined sugar, ayon sa price monitoring ng Department of Agriculture kahapon. P75 kada kilo naman ang “washed” sugar habang P70 naman ito para sa brown sugar.
Isang Chinese-Filipino warehouse keeper na nagngangalang Jimmy Ng ang nakatanggap ng letter of authority at mission order mula sa Customs agents, na siyang nakakita rin ng ilang imported items gaya ng corn starch mula Tsina, ilang sako ng imported na harina, plastic products, langis mula sa plastic barrels, piyesa ng mororsiklo at gulong ng ilang brands, helmets, LED television sets at pintura.
Una nang sinabi ni Rodriguez na iniimbestigahan nila ang ulat na ang importasyon ng 300,000 metric tons ng asukal ay “itinutulak nang husto” ng mga traders para magamit na palusot sa paglalabas nito. Hindi pa raw ito mailabas dahil sa mapapababa nito ang presyo ng asukal sa merkado.
Ilan sa mga ulat na nakarating kay Rodriguez ang nagsasabing magreresulta sa “windfall profits” para sa mga trader ng halos P300 milyon ang malaking importasyon ng askukal, ang bahay nito’y diumano’y lobby money.
Huwebes lang nang makiusap si Sen. Risa Hontiveros kay Bongbong na tugunan ang malalang problema ng DA at magtalaga na ng panibagong kalihim sa gitna ng kaguluhan sa importasyon ng asukal.
Kasalukuyang si Marcos Jr. kasi ang namumuno sa DA ngayon habang wala pang secretary ang kagawaran. (Daris Jose)
Hindi pa bakunadong mga guro, pwede na rin magturo sa darating na pasukan – DepEd
PAHIHINTULUTAN na ng Department of Education (DepEd) na muling makapagturo sa darating na pasukan ang mga hindi pa bakunadong mga guro sa bansa.
Ayon kay DepEd Usec. Revsee Escobedo sa isang pahayag na papayagan na ng kagawaran na magturo ang lahat ng guro sa bansa bakunado man o hindi.
Basta’t pananatilihin lamang ng mga ito ang palagiang pagsunod sa ipinapatupad na minimum public health protocols tulad ng pagsusuot ng facemask at gayundin ang maayos na ventilation sa mga silid-aralan.
Sa datos ng DepEd, sa ngayon ay nasa 37,000 na mga guro na lamang ang hindi pa nababakunahan laban sa COVID-19.
Nasa 20,000 sa kanila ay nakapagpatala na para magpabakuna habang nasa 17,000 naman ang bilang ng mga guro ang hindi pa talaga rehistrado para makatanggap ng nasabing proteksyon laban sa coronavirus disease.
Samantala, batay naman sa pinakahuling datos ng kagawaran.. as of 7:00am ngayong araw ay umabot na 21,272,820 ang bilang ng mga nagparehistro na mga mag-aaral mula noong July 25.
Karamihan dito ay mula sa Region IV-A na umabot na sa 3,070,451 ang bilang ng mga mag-aaral na nag-enroll, na sinundan naman ng Region III na mayroong 2,366,003 , at National Capital Region na mayroong 2,295,245.
Magpapatuloy naman hanggang sa Lunes, August 22 ang nasabing enrollment para sa school year 2022-2023.
COA kinuwestyon ang kakulangan ng ayuda ng DA sa mga magsasaka
TINUKOY ng Commission on Audit (COA) ang ilang kuwestyunableng pamamahagi sana ng Department of Agriculture (DA) ng mga fertilizers, livestock, feeds at ilang agricultural products bilang ayuda sa mga magsasaka sa panahon ng pananalasa ng COVID-19.
Ang report ng COA ay bilang bahagi ng pagsasailaim nila sa annual audit noong nakarang taon sa programa ng DA na Expanded Livestock and Poultry Production and Rice Resiliency Projects.
Ayon sa COA nakitaan umano nila ng deficiency ang DA, dahil sa kawalan ng submission ng mga patunay na nakatanggap nga ng mga alagang hayop ang mga farmer benefiaries.
Hinahanapan daw ng ahensiya ang DA ng acknowlegement forms at masterlist sana ng mga magsasaka.
Duda rin naman ang COA sa layunin ng limang mga tanggapan ng DA na siyang namahala sa distribusyon ng mga agricultural products na pinondohan ng P94.729 million.
Inilatag din naman ng COA ang mga patakaran at mga regulasyon na sinunod sana ng DA sa pamamahagi ng mga fertilizer, livestock, feeds at iba pang mga agricultural products.
Partikular namang tinukoy ng COA ang Bureau of Animal Industry (BAI) at Regional Field Offices (RFOs) nito sa Cordillera adminsitrative region, Region IV-A gayundin sa Region 11.
Kaugnay nito, inatasan ng COA ang Department of agriculture na magsumite ng mga documentary requirement tulad ng Acknowledgment Receipt, Property Transfer Report upang patunayan na merong napuntahan ang mga proyekto.
EDSA bus rides tuloy hanggang December
NAGLABAS ang Department of Budget and Management (DBM) ng P1.4 billion upang gamitin sa pinahabang libreng sakay sa EDSA Carousel hanggang December tamang-tama sa pagbubukas ng face-to-face na klase sa mga paraaralan
Inaprobahan ni Budget chief Amenah Pangandaman ang pag release ng pondo para sa programa ng Department of Transportation (DOTr) at Land Transportation Franchising and Regulatory Board (LTFRB) na nakalaan para sa libreng sakay.
“The allocation would support the implementation of the government’s service contracting program, which provides free rides for commuters along the Edsa busway,” wika ni Pangandaman.
Sa unang araw pa lamang ni President Marcos sa kanyang panunungkulan ay binigyan niya ng authorization na palawakin ang programa sa libreng sakay hanggang katapusan ng 2022 na dapat sana ay natapos noong nakaraang July 2022.
Sinabi ni Pangandaman na ang programa sa libreng sakay ay malaki ang maitutulong para sa mobility ng mga mag-aaral at mga commuting labor force sa bansa.
Inaasahan na may 27 million na mga mag-aaral ang babalik sa mga paaralan ngayon pagbubukas ng face-to-face na klase. Samantalang, inaasahan naman na mabibigyan ng benipisyo ang mahigit sa kumulang na 50 million na pasahero mula Sept.1 hanggang Dec.31.
Matutulungan din ng programa ang may mahigit na 600 bus drivers at operators na may operasyon sa EDSA Carousel route.
“This will be a big help for bus drivers who until now are still recovering from the pandemic and are affected by the surging cost of fuel products,” dagdag ni Pangandaman.
Ang programa sa service contracting ay isang paraan kung saan magbibigay ito ng financial support sa mga bus drivers at operators sa pamamagitan ng performance-based payouts.
Natuwa naman ang LTFRB sa pangunguna ni chairman Cheloy Garafil sa ginawang pagbibigay ng karagdagang pondo ng DBM para sa programang libreng sakay na pamahalaan.
Ayon kay Garafil, ang LTFRB ay may dalawang linggo lamang na arrears sa kanilang bayad para sa nasabing programa. Sinabi rin ni Garafil na kanilang nabigyan na ng karampatang kasagutan ang mga concerns at issues ng mga bus consortium sa late payments para sa kanilang serbisyo.
May humigit ng P400 million na ang naibayad ng LTFRB sa mga bus operators hanggang noong mga unang araw ng August.
“We are just two weeks delay in our payments. We cannot pay on time because of the documentary requirements and verification prior to the payment,” saad ni Garafil.
Dagdag pa ni Garafil na ang pamahalaan ay may dalawang buwan pa na arrears sa ES Transport Consortium at Mega Manila Consortium. May plano ang pamahalaan na dagdagan pa ang operator sa EDSA Carousel upang madagdagan ang mga buses na magbibigay ng libreng sakay sa panahon ng pagbubukas ng face-to-face na klase. LASACMAR
Bina-bash pa rin dahil ‘di raw bagay gumanap na ‘Darna’: JANE, aminadong napi-pressure at ‘di ini-expect na papalit sa action-serye ni COCO
AMINADO naman si Jane de Leon na napi-pressure siya dahil ang ‘Darna’ ang pumalit sa time slot ng ‘FPJ’s Ang Probinsyano’ na tumagal ng seven years.
Hindi raw niya kasi ini-expect na ang show niya ang mapipiling pumalit sa slot ng teleserye ni Coco Martin.
Nakaka-pressure raw sa sinumang artista ang magkaroon ng show. Siyempre nakasalalay sa kanyang mga balikat ang tagumpay ng anumang palabas.
Hindi pa raw sila nagkakausap ni Coco kaya hindi niya alam ang reaction nito na ang ‘Darna’ ang pumalit sa slot nila. Pero malaki ang pasasalamat niya sa ABS-CBN sa break na ibinigay sa kanya to play Darna.
Kahit na-delay ang lipad ng ‘Darna’ at nawalan pa ng franchise ang ABS-CBN, hindi naman daw siya umiyak pero nanghinayang siya dahil akala niya ay hindi na ito matutuloy. Sayang naman daw ang paghihirap nilang lahat sa production kung ‘di makalilipad si Darna.
Kasisimula pa lang ng ‘Darna’ pero ang dami na agad bashers ni Jane na nagsasabing hindi siya bagay na gumanap na Darna.
Sa halip na suportahan si Jane, mas pinili pa ng mga bashers na siraan si Jane. Kahit na anong paninira nila kay Jane, wala na silang magagawa dahil naipasa na sa kanya ang bato.
Saka sobrang aga pa para husgahan ng mga bashers niya na hindi siya bagay to portray the role of the female superhero. Nasa pilot week pa lang ang ‘Darna’, kayrami nang kumukuda nang hindi maganda.
***
IPINAGDIRIWANG ni Jay Altarejos ang kanyang ika-15 taon bilang director at ipagdiriwang niya ito by screening ang tatlo sa kanyang pelikula sa Mowelfund New Manila ngayong araw na ito simula 12 noon.
The event is titled ALT-R Heroes – 15 Years of Altarejos Cinema. Ang tatlong pelikula at oras ng screening ay ‘Ang Lalake sa Parola’ (12 nn), ‘Jino to Mari’ (3 pm), ‘Walang Kasarian ang Digmang Bayan’ (5:30 pm) plus glimpses of his latest works namely ‘Finding Daddy Blake’, ‘Pamilya sa Dilim’ and ‘The Longest Night’.
Magkakaroon ng 30 minute-talk after every screening. To cap the event ay magkakaroon ng special screening ng “Memories of a Love Story’.
How does it feel celebrating 15 years of Altarejos cinema?
“I appreciate filmmaking more, how it makes me not only as a better artist but especially a better person and a better Filipino,” wika ni Direk Jay.
Wala raw siyang paborito sa mga pelikulang nagawa niya.
“All of them are equal. I fall in love with every film I make now. Mas marami akong natutunan in the process, lalo na ngayon na ako ang nagpoprodyus, sumusulat, nagdidirek at nag-eedit sa mga pelikula ko.”
(RICKY CALDERON)
May mga panibagong cases pa na nai-file sa kanya: MAGGIE, tuloy ang laban kahit apektado na ang mental at emotional na kalagayan
NAPAPA-‘SANA ALL’ at “goals” ang mga comment ng netizens bukod sa sagad ang kilig, lalo na ng mga fans ng mga Kapuso Primetime King & Queen na sina Dingdong Dantes at Marian Rivera sa halos ipagsigawan na ka-sweetan ni Dingdong sa kanyang misis.
Daig pa ni Marian ang debutante sa nakaraang birthday celebration, with Dingdong as his escort of course.
Parang mga bagong kasal lang din kaya naman si Dingdong, wagas ang pagpapakilig sa kanyang socmed account. Nag-post ito ng picture niya habang pinapanood si Marian na bumababa sa hagdan na napapaligiran ng mga bulaklak.
Napa-reminisce ang host ng GMA-7’s “Family Feud” sa mismong araw na ikinasal raw sila at lumalakad si Marian sa simbahan.
Sey ni Dingdong, “Me looking at her walking down those stairs reminds me of how she marched on that majestic aisle 8 years ago.”
***
MULING nag-post ang beauty queen/actress na si Maggie Wilson sa kanyang Instagram.
Nag-share ito ng Instagram stories kunsaan, pinasasalamatan ang lahat daw ng mga nagpapadala ng messages sa kanya at support.
Siyempre, kaugnay pa rin ito ng pinaglalaban niyang adultery case na isinampa ng kanyang estranged husband, si Victor Consunji.
Sa post ni Maggie, malinaw na tuloy ang laban niya kahit na aminado itong naaapektuhan na rin ang kanyang mental at emotional na kalagayan. May mga panibagong cases pa raw na nai-file sa kanya.
Ayon kay Maggie, “Hey everyone. I wanted to extend my sincerest gratitude to all of you who have sent me messages of love and support.
“It’s been an extremely exhausting six weeks on my emotional and mental well-being as further legal cases have been filed against me over the weekend while he was busy #livinghisbestlife that again have no grounds.
“Still, I am fighting and will continue to do so with everything I’ve got for myself and, more importantly, Filipino women and children.
“Until I am in the ground, six feet under, I will make it my personal mission to pursue these causes for a country I hold so dear to my heart.”
***
FEEL namin, maingat na sumagot ang mga Kapuso stars na sina Miguel Tanfelix at Ysabel Ortega kapag tinatanong sila sa real score sa pagitan nila.
Pero sey ni Miguel, na kay Ysabel daw talaga ang mga katangian na hinahanap niyang talaga sa isang babae.
Kung ang mga nakararating sa amin ang paniniwalaan, nandiyang nanliligaw or baka nga past the stage of ligawan na sila, considering din ang sweetness at closeness nila sa isa’t-isa.
Ang balita kasi namin, medyo gwardiyado pa si Ysabel ng Mommy niya, si Michelle Ortega na mag-boyfriend. Pero slightly, itinanggi ito ni Ysabel at hindi naman daw siya pinagbabawalan na mag- “Yes” so meaning, may sagutin na manliligaw, but it’s her choice na rin, especially with Miguel na enjoy muna nila ang friendship o closeness nila.
Obviously, sina Miguel at Ysabel ang isa sa mga pinu-push na loveteam ngayon ng GMA Network. Sa gitna ng taping nila ng “Voltes V: Legacy”, heto’t sila ang mga bida sa first collaboration ng GMA at Quantum Films ni Attorney Joji Alonzo, ang “What We Could Be,” bagong GMA Telebabad simula sa August 29, papalit sa “Bolera.”
Ang director din nila ay no less but Jeffrey Jeturian.
(ROSE GARCIA)
Panukalang P5.3-T budget gagamitin para pabilisin ang e-governance- DBM
GAGAMITIN ang panukalang P5.268-trillion national budget para sa 2023 para sa transformation at digitalization ng government processes, records, at databases sa pamamagitan ng e-governance.
Sinabi ni Budget Secretary Amenah Pangandaman na kabilang ang mga Ito sa “top priorities” sa ilalim ng administrasyong Marcos.
“Through digital transformation, our bureaucracy can improve the ease of doing business, limit human discretion, and enhance transparency in government transactions,” ayon sa Kalihim sa isang video message sa isinagawang economic forum na hinost (host) ng Economic Journalists Association of the Philippines at San Miguel Corp.
Ang panukalang 2023 national budget ay makatutulong sa departamento upang “build on past gains such as Executive No. 170 (s.2022) which was signed during the Duterte administration.”
Ang Executive Order 170 na nilagdaan ni dating Pangulong Rodrigo Roa Duterte noong Mayo 12, 2022, nakasaad na nakita ang mga benepisyo ng digital payment services sa iba’t ibang sektor sa kasagsagan ng COVID-19.
Nakasaad pa rin sa EO na naging mabilis, convenient, secure at transparent ang paggamit ng digital payment services.
Sa ilalim ng EO, lahat ng departmento, ahensiya, at instrumentalities ng gobyerno kabilang ang mga state universities at colleges, government-owned-or-controlled corporations, at maging ang mga local government units (LGUs) ay inaatasan na gamitin ang digital payments para sa kanilang disbursements at collections.
Lahat ng mga ahensiya na sakop sa EO ay dapat ipatupad ang ligtas at maayos na digital disbursement sa pagbabayad ng goods, services, at iba pang disbursements, kabilang ang pamamahagi ng pinansiyal na tulong, suweldo, allowances at iba pang bayarin sa mga empleyado.
Para sa koleksiyon ng gobyerno, lahat ng kinauukulang ahensiya ay dapat mag alok ng digital mode para sa pagbabayad ng buwis, fees, tolls st iba pang dapat kolektahin.
“With its effective implementation and through further digitalization as well as the proposed national government rightsizing program and cash-budgeting system, we aim to enhance bureaucratic efficiency to ensure quick and responsive public service delivery to the Filipino people,” ayon pa kay Pangandaman.
Aniya pa, gagamitin ng departamento ang panukalang budget para paghusayin pa ang umiiral na Government Integrated Financial Management Information Systems (GIFMIS).
“GIFMIS will significantly improve the cash management of our country’s treasury, allow greater financial management, improve data governance, and enhance oversight control,” ang pahayag ni Pangandaman.
Sinabi pa niya na “an integral part of the GIFMIS is the Budget and Treasury Management System (BTMS), a web-based, fully-automated, and centralized database that will facilitate the generation of vital information on all aspects of government financial transactions and serve as an online ledger where transactions are mapped in real-time from purchase to payment.”
“The implementation of the BTMS is a crucial digitization initiative. It has already been introduced and pilot-tested in different government agencies and is presently being reviewed for improvement,” anito. (Daris Jose)
Bukod sa pagkikita ng pamilya Hidalgo sa action-serye: SHARON, sinabihan si COCO na gumawa ng special episode dahil bitin ang loveteam nila ni JULIA
THIS week, dalawang magkasunod na malungkot na post ni Megastar Sharon Cuneta sa IG account niya, na kung saan humihingi siya ng prayers para sa malapit na kaibigan at pamangkin na parehong may malubhang sakit, dahil hindi na kakayanin ng puso niya kung may susunod na mawawala uli.
Kaya masaya naman ang pinost niya, ito ay ang sweet photos nila ni Julia Montes na itinuturing na niya na ikaapat na daughter.
Caption ni Mega, “Gusto ko naman magpost ng masaya kasi ayoko kayo malungkot…These were taken last Sunday, August 14 at our #fpjsangprobinsyano party with our bosses and all of us the cast at @manila_house.
“I was so sad before this day, and even after…but I was so very happy to be reunited with my family, my “happy,” again – especially with my baby girl, my “Mara/Maria Isabel” whom I really, really love so much! ❤️😘🥰😊🤗 I love and cherish you, my Julia. Thank you for loving me and being my daughter.❤️❤️❤️”
Ni-repost din niya ito, @montesjulia08 “just so thankful for the love and thoughtfulness of my Mommy Sharon…..@reallysharoncuneta
because of FPJAP gained a mommy … love you ❤️😘”
Sumunod na masayang post ni Sharon… ang photo ng Hidalgo family…
Sabi ng premyadong aktres, “Tinext ko ang anak kong boss namin na si @cocomartin_ph kahapon.
Sabi ko gawa kami special episode kasi bitin loveteam nila ni
Mara at pagkikita ng pamilya nila Oscar, Aurora at Mara!
“Natawa lang anak ko at miss na daw nila ako 😂😂😂Eh kasi sabi ko dami nabitin lalo na ako! ❤️🥰”P.S. Coco anak, basahin mo comments sabi sayo bitin sila eh!🤗”
Oh well, wait na lang natin ang magiging sagot ni Coco at ng ABS-CBN kung posible nga bang magkatotoo ang wish ni Mega.
***
ISA na namang kakaibang weekend ang mararanasan sa pagbisita ni Sen. Imee Marcos sa Cebu City at sa isang Chinese temple sa Maynila para sa dalawang espesyal na vlog entries na tiyak na
kagigiliwan ng mga travel aficionados at ng kanyang mga taga-suporta.
Noong Biyernes, Agosto 19, sa Cebu ang unang pitstop ng walang pagod na Senadora kung saan ipinagpatuloy niya ang kanyang Pasasalamat tour para sa mga sumuporta kay President Bongbong Marcos nuong nakaraang eleksyon.
Binisita din ni Imee checked ang mga sikat na food parks ng Cebu gaya ng Sugbo Mercado sa IT Park, Ayala Food Park, at Carbon Market kung saan sinalubong siya ng mga Cebuano ng buong pagmamahal habang sumayaw siya kasama ang mga lokal na deboto habang hawak niya ang mahal na imahen ng Sto. Niño de Cebu.
Ipapakita din sa vlog ang mga highlights ng Pasasalamat tour sa Marikina, Davao, at Ilocos.
At ngayong Sabado, Agosto 20, ipakikita ni Sen. Imee ang highlights ng kanyang pagbisita sa Tzu Chi Foundation sa Santa Mesa, Manila kung saan sinilip niya ang templo, na nagsisilbi ding tahanan ng founder nito; at pati na rin ang isang kakaibang café kung saan hinainan siya ng sobrang-sarap na vegan dishes.
Ipakikita rin sa vlog ang ilang snippets ng pagpupulong ni Sen. Imee kasama ang Tzu Chi founder kung saan inupuan nila kung paano tutugunan ang mga natural calamities at pati na rin ang mga karagdagang plano na makakatulong sa gobyerno sa pagharap nito sa mga sakuna at upang masolusyunan ang epekto nito sa buhay ng mga Pilipino.
Samahan natin si Sen. Imee sa kanyang Cebu and Manila adventures at nag-subscribe sa https://www.youtube.com/c/ImeeMarcosOfficial/featured.
(ROHN ROMULO)