TINIYAK ng Bureau of Fisheries and Aquatic Resources (BFAR) na sapat ang suplay ng isda sa panahon ng Semana Santa.

Ayon kay BFAR spokesperson Nazario Briguera, kumpiyansa ang kanilang hanay na sapat ang suplay ng isda dahil binuksan na ang periodic closure sa pangi­ngisda sa ilang lugar.

“Dahil nasa peak season tayo ngayon sa fishing activity. We expect na kaya nating punan ‘yung supply kahit tumaas ang demand sa Mahal na Araw,” pahayag ni Briguera.

Gayunman, sinabi ni Briquera, maaring maapektuhan pa rin ang suplay ng isda sa bansa dahil sa ilang balakid tulad ng nangyaring oil spill sa Oriental Mindoro.

Problema rin aniya ng mga mangingisda ngayon ang mataas na presyo sa produktong petrolyo at post-harvest losses.

Una nang sinabi ni Pangulong Ferdinand Marcos Jr. na magpapatayo siya ng 11 cold storage facility para hindi masira ang mga huling isda. (BISHOP JESUS “JEMBA” M. BASCO)

ISANG internal memorandum ang ginawa ng Department of Transportation (DOTr) kung saan kanilang minumungkahi na babaan ang pamasahe sa mga public utility vehicles (PUJs) sa buong bansa.

Kinumpirma naman ni DOTr undersecretary Mark Steven Pastor na ang nasabing memorandum ay may katotohanan subalit hindi pa ito final at hindi pa official na dapat ay ilalabas sa publiko lalo na sa media.

Ayon sa isang report na nilabas ng GMA News ang nasabing memorandum ay pinaguutusan ang Land Transportation Franchising and Regulatory Board (LTFRB) na ibaba ang pamasahe sa mga traditional at modern jeepneys, buses at UV Express.

Iminumungkahi na magkaron ng P3 rollback sa mga traditional jeepney at maging P9 na lamang mula sa dating P12 at P11 naman sa mga modern jeepney mula sa dating P14. Habang ang buses ay magkakaron ng rollback na P3 hanggang P4.

Hindi naman nakalagay ang fare cut figures sa UV Express. Sinabi rin ng LTFRB na dahil wala ng programa ng Libreng Sakay ngayon taon, kanilang minumungkahi na magkaron at bigyan ng discount ang mga pasahero.

Dagdag pa ng report na ang mababang pamasahe ay temporary lamang hanggang ang P2.16 billion na programa sa service contracting ng LTFRB ay hindi pa nauubos.

Sa kabilang dako naman, nagkaron ng resolusyon ang Supreme Court (SC) na kinukumpirma ang iba’t ibang halaga ng multa sa mga traffic violations kung saan ang mga drivers, transport operators at grupo sa transportasyon ay nagsabing ang mga multa ay hindi makatarungan at unconstitutional.

Isang consolidated na petisyon ang inihain ng iba’t ibang operators, drivers at grupo sa transportasyon kung saan hinahamon nila ang constitutionality ng Department Order 2008-39 at ang amendments version ng Joint Administrative Order (JAO) 2014-01 na ginawa ng at ipanatutupad ng Department of Transportation at Land Transportation Office (LTO).

Sa ginawang 69-page na desisyon ng SC na sinulat ni Associate Justice Jhosep Lopez, ang high court ay nagsabing ang pagpapataw ng mas mataas na multa ay kailangan upang maitaguyod ang public safety at welfare. LASACMAR