2023 September 04 Archive - People's Balita

December 24, 2024
Search in People's Balita
Ang Diyaryong Pinagkakatiwalaan

Archive for September 4th, 2023

PNR: Bukas na ang rutang Naga-Ligao sa Bicol

Posted on: September 4th, 2023 by @peoplesbalita No Comments

BINUKSAN kailan lamang ang operasyon ng Philippine National Railways (PNR) na biyaheng Naga papuntang Ligao sa probinsiya ng Camarines Sur at Albay.

Sinuspinde ang operasyon ng Naga-Ligao dahil sa kakulangan ng rolling stock na nagdudugtong sa southern Luzon papuntang probinsiya ng Camarines Sur at Albay.

Magkakaroon ng dalawang (2) trips araw-araw ang Naga-Ligao na ruta na may habang 67 kilometro. Ito ay bahagi ng Bicol Commuter Service subalit ang ibang bahagi ng ruta ay suspendido at walang ng operasyon sa ngayon. Sa ngayon ang may operasyon lamang ay ang Naga-Sipocot na ruta sa nasabing commuter service.

Ang unang trip mula Ligao City papuntang Naga ay nagsisimula ng 5:30 ng umaga at ang ikalawang trip ay 5:30 sa hapon mula Naga hanggang Ligao.

“There would be more trips in the said line should the passengers increase,” wika ng PNR.

Ang travel time sa nasabing ruta ay tatagal ng dalawang (2) oras at 11 minuto gamit ang Diesel Hydraulic Locomotive (DHL) na may limang (5) passenger coaches na makapagsasakay ng hanggang 1,300 na pasahero.

Ito ay binubuo ng siyam (9) na estasyon na magsisilbi sa mga pasahero sa parte ng Albay at Camarines Sur kasama ang Naga, Pili, Baao, Iriga, Bato, Matacon, Polangui, Oas at Ligao.

Ang pasahe ay magsisimula sa P15 pagkatapos ng unang estasyon. Kung end-to-end, ang pasahe ay aabot ng P105. Bawal ang kumain at uminom sa loob ng mga bagon habang ang pagsusuot ng face mask ay optional na lamang.

Samantala, kamakailan lamang ay binanalita ni Department of Transportation (DOTr) Secretary Jaime Bautista na bubuhayin ang PNR North Long Haul at Panay Railway kasama rin ang North Mindanao Railway at San Mateo Railway na siyang magdudugtong sa LRT 2 papuntang bayan ng San Mateo at Rodriguez sa probinsiya ng Rizal. LASACMAR

Price ceiling sa bigas, desperadong hakbang para tugunan ang pagkakadismaya ng publiko

Posted on: September 4th, 2023 by @peoplesbalita No Comments

NANINIWALA ang Gabriela Women’s Party na ang ipinalabas na Executive Order No. 39 ni Pangulong Marcos para sa pagtatalaga ng price ceilings sa bigas ay isa umanong desperadong hakbang para tugunan ang pagkakadismaya ng publiko sa kabiguang maipatupad nito ang pangako noong kampanya na gawing P20 ang kada kilo ng bigas.

Ayon sa Gabriela, pangunahing tatamaan nito ang maliliit na retailers – na siyang nasa dulo ng suplay chain – sa mataas na farmgate palay prices dulot ng magastos ng production inputs.

Dagdag pa ang kakulangan ng hakbang para kurbahan ang hoarding at price manipulation ng ilang rice importers at sindikato.

Sa halip na magpatupad ng artipisyal na price controls, dapat na suspindihin agad ni Presidente Marcos ang suspensyon ng Rice Liberalization Law at magbigay ng subsidiya sa mga apektadong magsasaka dulot ng rice imports at bagyo.

“Higit na kailangan ng interbensyon sa kartel ng bigas sa bansa na pangunahing nakikinabang sa importasyon at mataas na presyo ng bigas. Dapat na matigil ang pagsandig ng bansa sa imported na bigas – lalo’t papatataas ang tunguhin ng presyo ng bigas sa pandaigdigang antas at nanalasa ang isang global food crisis.” (Ara Romero)

Warehouse raid, pinaigting pa ng BOC

Posted on: September 4th, 2023 by @peoplesbalita No Comments

KASUNOD ng marching order mula kay Pangulong Ferdinand Marcos Jr. na paigtingin pa ng Bureau of Customs (BOC) ang operasyon laban sa rice smugglers at hoarders.

Ito ay matapos ang kanilang pagkakasabat sa tinatayang P519 milyon halaga ng hinihinalang puslit na bigas sa ilang bodega sa lalawigan ng Bulacan.

Ayon kay Customs Commissioner Bien Rubio, nasa 154,000 sako ng imported rice grains at 60,000 sako ng palay ang nadiskubre sa ininspeksyong na apat na warehouse sa lalawigan.

Bukod kay Rubio, ang inspection team ay binubuo rin nina Intelligence Group Deputy Commissioner Juvymax Uy, Customs Intelligence and Investigation Service (CIIS) Director Verne Enciso, mga elemento ng CIIS sa Manila International Container Port (MICP) at Philippine Coast Guard (PCG) Task Force Aduana kasama sina House Speaker Martin Romualdez at Reps. Erwin Tulfo, Wilfrido Mark Enverga, at Ambrosio Cruz Jr.

Mismong si Commissioner Rubio ang lumagda at nag-otorisa ng inspeksiyon sa mga bodega sa Bulacan, na isinagawa isang linggo lamang matapos ang inspeksiyon sa isa pang batch ng mga bodega sa naturang lalawigan, kasama rin ang House Speaker at mga mambabatas.

Sinabi ni Uy na nakatanggap sila ng derogatory information hinggil sa mga bodega kaya’t mabilis na umaksiyon para beripikahin ito para sa kaukulang paglalabas ng LOAs.

Para naman kay Enciso, ang kahanga-hangang resulta ng mga naturang operasyon ay higit pang magpapasigla sa ahensiya upang tuluyan nang matuldukan ang rice smuggling sa bansa.

Emosyonal na ibinahagi ang huling pag-uusap: BOY, dream na ma-interview si MIKE pero ‘di natuloy

Posted on: September 4th, 2023 by @peoplesbalita No Comments

EMOSYONAL na ibinahagi ni Boy Abunda ang ilan sa mga naging huling pag-uusap nila ng yumaong kaibigan na si Mike Enriquez sa isang espesyal na episode ng ‘Fast Talk with Boy Abunda’.

Sa nasabing episode, madamdaming ikinuwento ng host ng programa ang huling pag-uusap nila ng batikang broadcaster noon bago siya magbalik sa GMA Network.

Ayon kay Boy, magkasama sila noon ni Mike sa GMA at hindi lang bilang magkatrabaho kundi bilang magkaibigan.

Kuwento ni Boy, “Nagkasama po kami ni Mike noong early ’90s dito sa GMA-7. Kami’y magkaibigan at nanatiling magkaibigan nang maraming maraming taon.”

Paglalahad pa ng batikang TV host, tinawagan niya si Mike noon bago siya bumalik sa GMA nito lamang Enero 2023.

Aniya, “Naalala ko po noong ako’y babalik na dito sa GMA-7, I remember calling Mike and I said, ‘I have to tell you that I’m coming back to GMA-7, and what a shame it would be if I don’t let you know.’

“Sabi po sa akin ni Mike, ‘I would not have forgiven you, had you not called me.’”

Pagbabahagi pa ni Boy, hindi rin tumanggi si Mike nang alukin niya ito noon na maging guest sa kanyang talk show.

“Sabi ko, ‘Mike, sana kapag nagsimula na ang Fast Talk, makabisita ka sa amin.’

“It was a dream to interview Mike Enriquez. Alam ko hindi natuloy, but he said, ‘Yes,’” ani Boy.

Dagdag pa ni Boy, “He said, ‘Yes,’ he would come to the show. Pero alam ko po na hindi na matutuloy but he will always be in my heart and he will always be my Mike.”

Bukod dito, inalala rin ni Boy si Mike bilang isang mabuting tao at kaibigan.

“He was a lovely man. He was a wonderful wonderful friend,” paglalarawan ni Boy kay Mike.

“Salamat at paalam, Mike Enriquez,” huling sinabi ni Boy.

****

ITINUTURING na Bad Boy ng Dancefloor si Mark Herras kaya naman marami ang umiidolo sa kanya pagdating sa sayawan.

Isa na rito ang dating miyembro ng boy group na Hashtags na si Bugoy Carino.

At kamakailan ay natupad na ang pangarap ni Bugoy na makasayaw at makatrabaho ang kaniyang idolong si Mark.

Sa kanyang Tiktok, ay pinost ni Bugoy ang dance challenge nila ni Mark kasama ang iba pang celebrities na sina Zeus Collins at Kid Yambao na mga kasamahan rin ni Bugoy sa Hashtags.

Bukod dito, isa pang pangarap ni Bugoy ang natupad at ito ay ang makasama niya si Mark sa pag-arte dahil kasama sila ni Mark sa pagbibidahang pelikula ni Bugoy na “Huling Sayaw.”

“Hindi ko nga po akalain na makakasama ko si Kuya Mark kasi dati sobrang idol ko siya.

“Isa sa mga idol ko nakasama ko sa movie tsaka nakasama ko pang sumayaw, so sobrang, grabe, wala akong masabi,” sabi ni Bugoy.

Mula sa Camerrol Entertainment Productions, ang “Huling Sayaw” ay sa direksyon ni Errol Ropero (na isa rin sa mga producer) at mula sa mga executive producers na sina Ronald Allan Guinto, Michael Endaya, Hon. Melvin Vergara Vidal, at Hon. Amado Carlos Bolilia IV.

Ipapalabas sa September 13, kasama nina Bugoy, Zeus at Mark sa movie sina Ramon Christopher, Christian Vasquez, Emilio Garcia, Jeffrey Santos, Jao Mapa, Rob Sy, at Mickey Ferriols.

(ROMMEL L. GONZALES)