MAKALIPAS ang labinlimang taon, maayos na ang sitwasyon sa pagitan nina Yasser Marta at ama niyang Portuguese.

Ayon sa kuwento mismo sa amin ni Yasser…

“Sa totoo lang, galit ako sa tatay ko e, kasi nung bata kami parang iniwan niya kami, ganun.

“Pero after almost fifteen years, umuwi siya last week dito sa ‘Pinas.

“So halu-halong emosyon, pero happy naman at nagkasama na ulit yung pamilya.”

Last week ng Hulyo nagtungo sa Pilipinas ang tatay ni Yasser, at second week ng Agosto bumalik sa abroad.

Pagpapatuloy pa ni Yasser, “So, medyo madaming emosyon e, hindi pa nagsi-sink in sa akin, pero happy at least nagkita na, nakapag-usap na yung pamilya.”

Thirteen years old si Yasser noong nagkahiwalay sila ng ama niya.

Sa Riyadh, Saudi Arabia nagtrabaho ang ama niya na nagkaroon raw ng problema sa trabaho kaya nito lamang nakauwi.

“Na-bankrupt yung company, hindi na siya naka-support din,” dagdag na kuwento pa ni Yasser, “ngayon pa lang ulit nakabangon.”

Hindi na siya galit sa ama niya?

“Siyempre masaya nung una ko siyang nakita, pero ang dami ding ano e, parang ang daming… parang sinabi ko din sa kanya nung pagdating niya na, after 15 years eto na pala yun, parang hindi pa din siya po nag-aano sa akin e, parang hindi pa pumapasok sa loob ko, e.

“Pero yun, naging… para na din sa nanay ko, para maging masaya na lang din yung nanay ko, ayun, parang binuo ko na lang po yung samahan namin, nung family.”

Nakauwi raw sa Pilipinas ang ama niya matapos itong mabayaran ng naturang kumpanya, umuwi ito para puntahan at makita si Yasser.

“Sobrang mixed emotions, nakakatuwa pero sobrang happy dahil buo na ulit ang pamilya.”

Malamang raw bumalik sa Pilipinas sa Disyembre ang ama ni Yasser.

Samantala, dapat ay kasama si Yasser sa ‘Fatherland’ movie ng Heaven’s Best Entertainment ni Harlene Bautista at BenTria Productions ni Engineer Benjie Austria.

Kaya lamang, dahil sa conflict sa schedule ay hindi na matutuloy si Yasser sa pelikula.

Mga artista sa Fatherland sina Allen Dizon, Cherrie Pie Picache, Richard Yap, Ara Mina, Bo Bautista, Jeric Gonzales, Mercedes Cabral, Abed Green, Max Eigenmann, Rico Barrera, Ara Davao, Jim Pebanco at Angel Aquino, sa direksyon ni Joel Lamangan at panulat ni Roy Iglesias with executive producer Dennis Evangelista.

(ROMMEL L. GONZALES)

SA panahon ngayon, tuwing may mediacon at may young actor na kasali, tiyak na matatanong tungkol sa kontrobersyal na isyu ngayon, ang sexual harassment, partikular sa mga lalaking artista.

Bunga ito ng eskandalong kinasasangkutan ngayon nina Sandro Muhlach at Gerald Santos na usap-usapan sa buong Pilipinas.

Kaya sa presscon ng Vivamax movie na ‘Butas’ natanong si Albie Casiño tungkol dito.

“I always speak for myself but I don’t want to speak and maybe invalidate other people. So, yun ang unang-una kong sasabihin,” paglilinaw muna ni Albie.

“Everything I can say right now is only based on my sole experience.

“I can’t talk about anyone else’s experience other than my own because everybody has the right to live their own experience.

“But this is, like I’ve said, my experience.”

Pagpapatuloy pa ni Albie, hindi naman raw niya naranasan na ma-sexually harass. “Never naman may nangyari where I felt taken advantage of. Never!

“I’ve worked with multiple directors and I’ve had to wear plaster multiple times, and I’ve never felt violated.

“Thank God na rin that it never happened to me. But like I said, I don’t wanna be invalidating anyone else’s experience.”

Nadadawit sa usapin ng paglalagay ng plaster sa private part na konektado sa sexual harassment si direk Joel Lamangan na nag-ugat sa social media post ng male star na si Ahron Villena.

Hindi binanggit ni Ahron ang pangalan ng multi-awarded director na may kinalaman sa paglalagay ng plaster sa kanya kung saan nakaramdam raw si Ahron ng pang-aabuso pero mahihinuhang si direk Joel ang tinutukoy ni Ahron.

Sa pagpapatuloy na pahayag naman ni Albie, hindi rin niya deretsahang binanggit ang pangalan ni direk Joel sa salaysay niya na hindi siya nagkaroon kailanman ng bad experience sa naturang direktor na ilang beses na niyang nakatrabaho tulad ng Rainbow’s Sunset, Isa Pang Bahaghari, Moonlight Butterfly, at sa Biyak ng Vivamax.

“I’ve never had anything bad… I want to say something kasi I feel like this director I’ve worked with before is kinda under fire,” lahad ni Albie.

“But like I said, I’ve worked with him and nothing bad ever happened.”

Samantala, kasama ni Albie sa ‘Butas’ sina Angela Morena at JD Aguas, sa direksyon ni Dado Lumibao, available now for streaming.

(ROMMEL L. GONZALES)

AS of August 28, 2024, Wednesday, umabot na sa PHP320M ang gross sales ng Un/Happy For You.

Third week na sa mga sinehan ang reunion movie nina Joshua Garcia at Julia Barretto at tiyak na lalaki pa ang kinita nito dahil bukod sa domestic gross ay madagdag pa international screenings nito.

Na nagsimula noong Agosto 22, Huwebes, napanood na ang Un/Happy For You sa Australia, New Zealand, United Arab Emirates (UAE), at Kingdom of Saudi Arabia (KSA).

Agosto 23, Biyernes, pinalabas na ito sa USA, Canada, Guam, at Saipan.

Ngayong Huwebes, Agosto 29, showing na ito sa Qatar. Coming soon na ito sa Oman, Bahrain, Italy (Rome, Milan), Malta, Hong Kong, Malaysia, at Singapore. At may playdate na ito sa Cambodia, September 27.

At dahil nga sa tagumpay ng kanilang pelikula, magkakaroon ng ‘Happy For You: Thanksgiving Tour’ sina Joshua at Julia, kasama sina Aljon Mendoza, Bong Gonzales, at Bianca de Vera ngayong Sabado, Agosto 31 sa KCC Gensan Convention Center at KCC Koronadal.

At kahapon, nagkaroon ng special surprise ticket selling sina Joshua at Julia sa SM North EDSA na kung saan dinumog sila ng mga madlang pipol.

Ni-repost din ni Julia ang post ng Star Cinema at nagpapasalamat niya sa lahat ng sumuporta sa movie nila ni Joshua.

Ang ‘Un/Happy For You’ na ang biggest Star Cinema movie na after pandemic at pinalabas sa regular playdate.

Samantala, kahapon din, tatlong pelikulang Pinoy ang nag-open sa local cinemas.

Ito ay ang Pagtatag! The Documentary ng SB19, Love Child nina RK Bagatsing at Jane Oineza, at Real Life Fiction nina Piolo Pascual at Jasmine Curtis-Smith.

At dahil nga box-office hit ang JoshLia movie na Un/Happy For You, aabangan naman kung anong pelikula ang susunod na makalalampas sa P100 million mark.

***

ANG GMA Kapuso Foundation (GMAKF), ang sociocivic arm ng GMA Network, ay nakatanggap kamakailan ng fourmillion pesos na donasyon mula sa Armed Forces of the Philippines (AFP).

Ang donasyon ay pormal na iniabot ni AFP Chief of Staff Gen. Romeo Brawner, Jr. kay GMAKF Executive Vice President & Chief Operating Officer Rikki Escudero Catibog sa isinagawang “Sagip Dugtong Buhay” bloodletting event noong Agosto 17 sa Ever Gotesco Mall, Commonwealth Avenue, Quezon City.

Ang donasyong ito ay naging posible sa pamamagitan ng boluntaryong kontribusyon ng mga sundalo ng AFP, na naglaan ng Php 50 mula sa kanilang pang-araw-araw na subsistence allowance na Php 150—katumbas ng isang pagkain—para dito. Ang AFP donation drive ay nakalikom ng sapat na pondo – kalahati ay napunta sa pagbibigay ng tulong sa mga sundalo ng AFP na direktang naapektuhan ng Super Typhoon Carina, habang ang kalahati naman ay naibigay sa GMA Kapuso Foundation para sa iba pang mga Carina survivors.

Ididirekta ang donasyon ng AFP patungo sa post ng GMAKF na mga proyektong rehabilitasyon ng Super Typhoon Carina, partikular na ang pagtatayo ng mga silid-aralan sa mga lugar na may problema sa ekonomiya at mahirap.

Ang proyekto ay nagtataguyod ng pagboboluntaryo sa pamamagitan ng donasyon ng dugo, sa huli ay nakakatulong upang iligtas at pahabain ang mga buhay.

Para sa karagdagang detalye kung paano mag-donate sa GMAKF, bisitahin ang www.gmanetwork.com/kapusfoundation/donate.

(ROHN ROMULO)