SA nakatakdang major television debut ngayong Lunes, September 9, ipinabatid ng Bilyonaryo News Channel ang kanilang lineup para sa anchor desk ng primetime newscast na ‘AGENDA’.

Ang programa ay pangungunahan ng mga de-kalibreng broadcast news anchors ng bansa, ang Agenda Setters na sina Korina Sanchez-Roxas at Pinky Webb.

Naunang inihayag ang makasaysayang pagbabalik sa news anchoring ng award-winning journalist na si Korina, na ang huling naging newscast ay halos may isang dekada na.

Taglay ang mukha at pangalan na kasing kahulugan na ng Philippine media sa loob ng nagdaang limang dekadang pagiging anchor ng mga pangunahing news programs at lifestyle shows, si Korina ay isa na sa mga haligi ng broadcast journalism sa bansa. Ang ‘Agenda’ ay patuloy na sasandig sa kanyang diretsong estilo ng pagtatanong sa mga stakeholders tungkol sa iba-ibang isyu na nakakaapekto sa bansa bilang pangunahing agenda ng programa.

Makakasama sa newsdesk ng ‘Agenda’ ang isa pang kinikilalang broadcast journalist. Si Pinky ay may tatlong dekadang karanasan sa industriya ng pagiging anchor sa iba’t ibang programa para sa major news channel. Ang kanyang banayad na estilong panlabas ay bumabalanse sa kanyang masidhi at walang humpay na pamamahayag.

Si Pinky ay kilalang mapapagkatiwalaan at may kalmadong pagbabalita na hahatak sa mga manonood para dalhin ang kanilang atensyon sa mga pangunahing isyu at balita.

Bahagi rin ng Agenda si Jam Alindogan, na isang internationally-acclaimed correspondent at co-founder ng aid organization na Sinagtala. Si Jam ang magiging Foreign Affairs Editor ng channel na responsable sa lingguhang special report tungkol sa mga mahahalagang isyu sa iba’t ibang panig ng mundo.

Isa pang beterano na makakasama sa pagbabalita ang walang takot na mamamahayag na si Nancy Carvajal. Si Nancy ay makakasama ng ‘Agenda Setters’ dalawang beses sa isang linggo para sa mga special reports.

Ang ‘Agenda’ ay araw-araw matutunghayan sa primetime newscast mula 6PM hanggang 7PM. Ang headline grabbing program na ito ang magiging pangunahing plataporma ng Bilyonaryo News Channel laban sa propaganda ng mga taong nasa kapangyarihan at panlaban sa mga nagkakalat ng fake news.

Ang ‘Agenda’ ang tatalakay sa mga pinakamalalaking isyu kada araw na may malaking epekto sa bansa at sa buhay ng sambayanan. Tatalakayin dito ang bawat anggulo at aspeto sa pamamagitan ng in-depth reporting, no-nonsense, hard-hitting interviews sa mga principal at major stakeholders.

Ang Bilyonaryo News Channel ay available sa free-to-watch television channel na BEAM TV 31 (sa pamamagitan ng mga digital TV boxes sa Metro Manila, Cebu, Davao, Iloilo, Baguio, Zamboanga, at Naga), gayundin sa pangunahing cable TV provider na Cignal Channel 24.

(ROHN ROMULO)

UNANG beses na napanood ni Teejay Marquez ang pelikula nilang “Mamay: A Journey to Greatness (The Marcos Mamay Story)” sa special screening nito noong Agosto 27 sa Cinema 1 ng SM Megamall.

Ang una naming itinanong kay Teejay ay kung ano ang naramdaman niya matapos mapanood ang pelikula.

Lahad niya, “Siyempre nakatutuwa and marami akong natutunan nung napanood ko na yung pelikula. Siyempre nung una inasahan ko muna yung acting ko, kung paano ko ginampanan.

“Pero in the end, marami akong natutunan sa buhay ni mayor, sa mga paghihirap niya, so… nakaka-inspire,” bulalas ni Teejay.

“Pero iyon, I mean lahat ginalingan lahat, na na-project nila yung buhay ni Mayor at tsaka nung ibang mga ginampanan na ibang characters so masaya ako na napanood ko ito.

“And feeling ko maraming matututunan yung mga makakapanood nito.”

Ang pelikula ay tungkol sa kuwento ng buhay ni Mayor Marcos Mamay na alkalde ng Nunungan, Lanao del Norte. Gumaganap sa pelikula si Teejay bilang teenager na Marcos Mamay.

Si Teejay, ano ang natutunan niya sa pagiging bahagi ng pelikula?

“Iyong hirap ng buhay na pinagdaanan ni Mayor, lalung-lalo na yung nagpunta kami sa Lanao na doon ko na-experience, siyempre nag-shoot kami sa eskuwelahan.

“So totoong galing pa sila sa malayong lugar lalakarin nila para lang makapasok sa school.

“Dun ko nakita na andami sa atin na ayaw pumasok, andaming spoiled, naglalakwatsa lang, de-kotse, binibigay lahat pero ayaw mag-aral,” pahayag ni Teejay.

Si Mayor Mamay noong estudyante pa lamang, na si Teejay nga ang gumanap, ay naglalakad ng malayo mula sa bahay nila para makapasok sa eskuwelahan, at dahil salat sa buhay ay naka-tsinelas lamang dahil walang pambili ng sapatos.

“Noon wala silang means, walling resources, naka-tsinelas,” bulalas ni Teejay.

“Challenging pero masarap yung experience, mapi-feel mo na minsan kahit simple yung buhay kung may gusto ka talaga maa-achieve mo.”

Ano naman ang pinakamahirap niyang dinanas sa buhay?

“Well for me pinakamahirap yung feeling ko na hindi pa ako pinapansin kasi hindi pa ako accepted, may mga bagay na nasasabi sa iyo dahil baguhan ka pa.

“Siguro, nilunok ko lahat iyon because sabi ko naman parte lang ito, darating ang panahon may mga tao ring makakakita ng halaga ko, may reward din ito.

“Siguro in life naman, nahirapan lang ako na mag-aral kasi yung resources ng family ko, yung means hindi kaya para pag-aralin ako.

“So dumating yung point na pinasok ko yung pagko-commercial para makapag-aral. Buti na lang nag-e-enjoy ako sa pagko-commercial pero na-realize ko, pinagtrabahuhan ko pala.

“So, kumayod pala talaga ako para sa pangarap ko.”

At dahil gumanap siya bilang Young Mamay Marcos na naging mayor, pumasok ba sa isip ni Teejay na balang-araw ay nais rin niyang pasukin ang pulitika?

Ani Teejay, “Wala pa pong pumapasok na ganyan sa isip ko pero inspired ako sa mga taong pumapasok sa pulitika para tumulong dahil laki rin sila sa hirap.

“Ako naman siguro kung dumating sa punto na magkaroon ako ng ekstra, siguro ise-share ko na lang pero hindi po pumapasok sa isip ko na tatakbo ako.

“Kung sumobra man yung maging resources ko itutulong ko na lang.

“Hindi ko pa naiisip na pumasok [sa pulitika], pero tingnan natin, for me basta makatulong ako masaya na ako.”

Mula sa Mamay Production, nasa pelikula rin sina Jeric Raval as Marcos Mamay, Ara Mina, Victor Neri, Polo Ravales, Julio Diaz, Devon Seron, Ron Angeles, Ali Forbes, Jethro Ramirez, Sheila Delgado, sa panulat at direksyon ni Neal “Buboy” Tan.

(ROMMEL L. GONZALES)

BUNTIS muli si Iya Villania na ika-limang anak nila ni Drew Arellano.

Sa kanilang Instagram Reel, nag-post ng video at larawan ang pamilya Arellano na sumasayaw sa tugtuging “Mambo No. 5” ni Lou Bega.

Isa-isang nagpakita ang mga anak nina Drew at Iya, na sina Primo, Leon, Alana, at Astro, at sa huli, ipinakita naman ang larawan ng ultrasound ng bago nilang baby.

Naglagay si Iya sa caption ng waving hand emoji.

Dinagsa naman ng pagbati ang mag-asawa mula sa kanilang followers at maging sa mga kapuwa nila celebrities.

Nitong nakaraang Enero, biniro nina Iya at Drew ang netizens sa pagkakaroon ng ika-limang anak.

Taong 2014 nang ikasal ang mag-asawa.

Taong 2022 naman nang isilang ni Iya ang bunso nilang anak na si Astro.

***

TATLONG award-winning actresses ang makakasama ni Dennis Trillo sa kanyang gagawin na series na ‘Severino: The First Serial Killer’.

Ito ay sina Dolly de Leon, Chai Fonacier at Meryll Soriano.

Si Yam Laranas ang magdidirek ng series. Kilala si Direk Yam sa mga pelikula niyang Sigaw, The Echo, Hibla, The Road, Aurora, Balahibong Pusa, Radyo, Patient X at Ikaw Lamang Hanggang Ngayon.

Sa Instagram account ni Dennis, pinost niya ang photos kasama niya sina Meryll, Chai, Dolly, and Direk Yam.

“#SEVERINO #yamlaranas,” caption pa niya.

Ang Severino ay kuwento ni Juan Severino Mallari, isang pari na nakilala bilang “first serial killer in the Philippines.”

Severino is from producer-distributor CreaZion Studios with a script written by Dodo Dayao (‘Cattleya Killer’), Rona Co (‘Hello, Love, Goodbye’), and Rody Vera (‘Die Beautiful’).

***

NAGING red carpet official ang couple na sina Brad Pitt at Ines de Ramon nung sabay silang maglakad sa red carpet ng Venice Film Festival.

Ito ang first time na makita ang dalawa sa isang international film festival. Suot ni Ines ay draped, asymmetric Entire Studios gown and bedazzled box clutch. Si Brad ay suot ang black suit featuring a blazer with satin lapels by Louis Vuitton.

Kasama ng gorgeous couple ang mag-asawang George and Amal Clooney. Co-stars sina Brad at George sa pelikulang ‘Wolfs’ na pinalabas sa naturang festival.

(RUEL J. MENDOZA)