MARIING binatikos ni Sen. Raffy Tulfo ang Department of Social Welfare and Development (DSWD) dahil sa libu-­libong social workers na hindi pa rin nare-regular kahit pa halos isang dekada nang nagtatrabaho sa ahensiya.

Sa pagdinig ng panukalang 2025 budget ng DSWD, sinabi ni Sen. Tulfo na maraming kawani ng ahensiya ang magreretiro pero hindi pa rin nagiging regular.

Ayon kay Tulfo, bago utusan ng gobyerno ang mga pribadong institusyon na sumunod sa batas ay dapat mauna muna ito.

“Bago tayo magmando sa private institutions na sumunod sa pagbabawal sa mga contractual, mauna muna tayo sa gobyerno! Nakakahiya, DSWD! By the thousands pa rin ang kontraktuwal (employees)!” ani Tulfo.

Sinabi ni Tulfo na sa kasalukuyan, tinatayang nasa 6,038 contractual at job order employees ng DSWD na karamihan sa kanila ay lampas 10-15 taon nang nagpapaka-alila pero wala pa ring natatanggap na mga benepisyo.

Ayon pa kay Tulfo, noong nakaraang taon pa niya isinangguni ang isyung ito sa DSWD ngunit hanggang ngayon ay wala pa ring malinaw na aksyon.

Isinulong ni Tulfo na ipatawag na rin sa susunod na pagdinig si DBM Sec. Amenah Pangandaman dahil itinuturo ni Sec. Rex Gatchalian ang DBM. Ito ay para maliwanagan ang komite kung makapaglalagay nga ba talaga ng regular plantilla positions sa naturang ahensya kahit na gradual ang implementasyon nito.
(Daris Jose)

NAGBABALA si Speaker Ferdinand Martin Romualdez sa mga opisyal ng gobyerno na hindi kukunsintihin ng kamara ang maling paggamit ng pondo ng bayan.

Sa kanyang talumpati sa pagbubukas ng deliberasyon ng plenaryo sa panukalang P6.352 trilyong national budget nitong Lunes, iginiit ni Speaker Romualdez na hindi palalagpasin ng Kamara ang pagmamaliit sa trabaho nitong bantayan ang badyet ng gobyerno upang matakasan ang kanilang pananagutan sa maling paggamit ng pondo.

Sinabi ni Speaker Romualdez na sa mahabang panahon ay sinusuri ng Kamara ang panukalang badyet upang matiyak na nakalinya ito sa prayoridad ng national government at para sa kapakanan ng mga Pilipino at hindi para sa pansariling kapakinabangan.

Tiniyak ng Speaker sa publiko na mananatiling walang kompromiso ang Kamara sa pagtatanggol nito sa mabuting pamamahala, pananagutan sa pananalapi, at pagbibigay proteksyon sa pera ng mga nagbabayad ng buwis. Nilinaw niya na walang indibidwal o espesyal na interes ang bibigyan ng hindi nararapat na pabor o konsiderasyon.

Kinilala rin ni Romualdez ang kanyang mga kapwa mambabatas sa pagbabantay sa pondo ng bayan at sinabihan ng mga ito na ang kanilang prayoridad ay ang sambayanang Pilipino at ang matiyak na tamang paglalaan ng pondo at matiyak na hindi ito naaabuso.

Iginiit ni Speaker na ang polisiya sa pagba-badyet ay para maabot ang fscal discipline nang natutugunan ang pangangailangan ng mga tao.
Sa pagbubukas ng debate sa plenaryo ng panukalang 2025 badyet, hinamon ni Speaker Romualdez ang mga miyembro ng Kamara na magtrabaho ng mayroong kumpiyansa at may pagmamadali upang maipasa ito sa tamang oras. (Vina de Guzman)

INANUNSIYO ng Commission on Elections (Comelec) na mas pinalawig pa ang online filing ng aplikasyon para sa reactivation.

Ayon sa Comelec , napagpasyahan ng Comelec en banc na palawigin ito hanggang Setyembre 25, limang araw bago ang itinakda namang deadline ng voter registration para sa 2025 midterm elections.

Ang orihinal na deadline ng filing ng application for reactivation ay noong Setyembre 7,2024 ngunit dahil sa nakabulihang bilang ng mga Filipino voters na hindi pa nag-a-apply ng reactivation , ang Comelec en banc ay nagpasya na ito ay palawigin upang bigyang pagkakataon ang mga botante na makapag-reactivate ng kanilang voter registration rekord nang hindi nahihirapan pang magtungo sa Comelec offices.

Sa inilabas na abiso ng komisyon, kung ang isang indibidwal ay dati nang rehistradong botante ngunit deactivated ang registration status ,maaring mag-file online ng aplikasyon upang magpa-reactivate.

Kung ikaw naman ay senior citizens o person’s with disability (PWD) ,maaring mag-file ng aplikasyon online para sa “reactivation with updating of records”.

Gayundin ang mga botante na nais mag-apply ng ‘ reactivation with transfer of registration within OR with corrections of entries”.

Maaari din mag-file online ang mga botante para sa ‘reactivation with transfer of registration within AND with corrections of entries.

Ang online filing reactivation ay dapat sa pamamagitan ng email address ng Office of the Election Officers (OEOs) sa buong bansa na available sa opisyal na website ng Comelec sa www.comelec.gov.ph

Hinimok ng Comelec ang lahat ng deactivated na botante na samantalahin ang pagkakataon at i-reactivate ang kanilang voter registration online. GENE ADSUARA

PINANGUNAHAN ni Pangulong Ferdinand R. Marcos Jr. ang pagtitipon ng Partido Federal ng Pilipinas (PFP) sa kanilang General Assembly and National Convention sa Diamond Hotel Manila, araw ng Lunes, bahagi ito ng pag-buwelo at paghahanda ng political party para sa mid-term election sa susunod na taon.

“I’m very glad that we can see that there is progress that is happening as we move on in preparation for … well, filing (of candidacy) is our next big event. And, we have now within the PFP organized ourselves properly,” ayon kay Pangulong Marcos sa nasabing event.

“Although we (PFP) are the lead party, kasama tayo sa Alyansa at nakasama ang iba’t ibang partido. Lahat ng malalaking partido sa Pilipinas ay kasama ngayon natin. Kaya’t we have to do all of this in conjunction with them,” ang Winika pa rin ng Pangulo.

Nasaksihan naman ng Pangulo sa mga nakalipas na buwan ang ‘alliance signing ceremonies’ sa pagitan ng PFP at iba pang national political parties, patunay ng mga ibinahaging pangako na magtulungan tungo sa ‘national transformation’ para makamit ang progreso at itaas ang kondisyon ng pamumuhay ng mga Filipino.

Nabuo noong 2018, ang PFP ay isang national political party sa Pilipinas, si Pangulong Marcos ang tumatayong chairman ng Partido. Pormal itong akreditado ng Commission on Elections (COMELEC) noong Oktubre 2018. Itinutulak naman ng Partido ang pederalismo sa bansa.

Sa panahon ng tumatakbo ang 2022 national election, binuo ng PFP ang UniTeam Alliance, Lakas-CMD, Hugpong ng Pagbabago (HNP), at Partido ng Masang Pilipino (PMP), na mayroong ‘guest candidates’ mula sa ibang partido.

Matatandaang nanalo si Marcos sa landslide sa general election. (Daris Jose)