NILAPASTANGAN ni Vice President Sara Duterte ang yumaong si dating Pangulong Ferdinand Marcos Sr. upang mailinis ang atensyon ng publiko sa kinukuwestyong paggamit nito ng daang milyong confidential fund ng Office of the Vice President (OVP) at Department of Education (DepEd).

Ito ang sinabi ng isang miyembro ng Young Guns bloc sa Kamara de Representantes bilang tugon sinabi ni Duterte na “Kung ‘di kayo tumigil, huhukayin ko yang tatay ninyo, itatapon ko siya sa West Philippine Sea.”

Ang pagbabanta ay nakatuon kay Pangulong Ferdinand “Bongbong” R. Marcos Jr. at sa kaniyang pamilya.

Sa isang press conference noong Biyernes, sinabi ni Duterte na sinabihan nito si Sen. Imee Marcos na kanyang itatapon ang labi ngyumanong Pangulo sa West Philippine Sea sa isang group chat.

Nagawa itong sabihin ni Duterte kay Sen. Marcos kahit na ilang beses niyang sinabi na sila ay magkaibigan at sa kabila ng pagtatanggol ng senador sa Ikalawang Pangulo.

“Using and disrespecting the dead runs counter to our culture. For us Filipinos, that is a no-no,” ani House Assistant Majority Leader at Taguig City Rep. Pammy Zamora.

Sa halip na gumamit ng ganitong taktika, hinimok ni Zamora si Duterte na harapin na lamang ang mga alegasyon laban sa kanya kaugnay ng kinukuwestyong paggamit ng confidential funds at pondo ng DepEd noong siya pa ang kalihim nito. (Vina de Guzman)

PATAY ang isang 29-anyos na Chinese national nang barilin ng pinaniniwalaang high profile gunman na Chinese looking din, sa Makati City noong Huwebes, sa isang hotpot restaurant sa Makati City.

Dead on arrival sa Makati Medical Center ang biktimang si alyas “Liu”.

Sa ulat Palanan Sub-station, dakong alas- 2:20 ng madaling araw Oktubre 17 nang maganap ang pamamaril sa biktimang gunman na may kasamang lalaking bodyguard sa loob ng VIP Room ng Kungfu Chili Group Incorporated, sa Buendia Avenue, Barangay San Antonio, Makati City.

Sa kuha ng CCTV, makikita na natumba pa sa kalasingan ang biktima habang nag-uusap-usap sila ng suspek sa VIP room, habang nakikinig lamang ang babaeng kasama ng biktima, at isang bodyguard ng suspek.

Maya-maya ay iniabot ng bodyguard sa suspek ang isang baril, nagpaputok sa ere at nasundan na ng pagbaril mismo sa biktima ng apat na beses na tinamaan sa dibdib, sa kaliwang palad, at braso.
Kaswal na umalis lang ang suspek at bodyguard, na bago tuluyang lumabas ay sinampal-sampal pa ng mahina ang manager ng restaurant.

Makikita sa hiwalay na CCTV footage na isinara na ng guwardiya ang gate ng establisim­yento subalit binunggo lamang ito ng sasakyang itim ng suspek.

Patuloy pa ang manhunt operation laban sa gunman at kasama nito.

Nakipag-ugnayan na rin sa Land Transportation Office ang pulisya subalit malabo pang matukoy ang pagkilanlan ng suspek dahil makailang beses nang nailipat ang rehistro sa magkakaibang pangalan. Hindi rin umano kilala ang suspek ng Chinese community kaya nakikipag-ugnayan pa ang Makati Police ang sa China Embassy. (Richard Mesa)

NAGKASUNDO ang Metropolitan Manila Development Authority (MMDA) at mall operators sa National Capital Region (NCR) na ipatupad ang adjusted mall hours simula sa Nobyembre 18 hanggang Disyembre 25, 2024.

Sinabi ni MMDA Chairman Don Artes na iurong sa alas 11:00 ng umaga ang pagbubukas ng mall sa halip na normal operating hours, habang depende na rin sa pamunuan ng mga mall kung hanggang anong oras sila magsasara.

Ani Artes, mas mabuting ma-extend ang oras ng pagsasara upang mabigyan ng pagkakataon ang publiko na makapag-stay pa sa mga mall, makapag-grocery o last minute shopping habang nagpapalipas ng oras na lumuwag ang kalsada.

Suportado rin ng mall operators ang pakiusap ng MMDA na huwag magsagawa ng mallwide sale sa loob ng Nov. 18-Dis. 25, na inaasahang ilang araw pagkatapos ng All Saints Day at All Souls Day na lamang idaos, na nakagawian na sa mga nakalipas na taon. Hindi naman saklaw nito ang store sale o paisa-isang pagsasagawa ng sale sa loob ng malls.

Layunin sa isinagawang consultative meeting nitong Miyerkules (Okt. 16) sa MMDA Head Office, sa Pasig City, na maibsan ang inaasahang mas matin­ding pagsisikip ng trapiko sa panahon ng Kapaskuhan.

May moratorium o pagsuspinde sa lahat ng road right-of-way excavation activities sa Metro Manila simula hatinggabi ng Nobyembre 18 hanggang ha­tinggabi ng Disyembre 25 na kinabibilangan ng road reblocking works, pipe-laying, road upgrading at iba pang excavation works. Exempted sa moratorium ang flagship projects ng gobyerno, DPWH bridge repair and construction, flood interceptor catchment projects, emergency leak repair, at iba pa.

Mayroong 131 malls sa National Capital Region at 29 dito ay matatagpuan sa kahabaan ng EDSA.

Ang mga delivery sa mall ay papayagan lamang sa gabi mula alas-11:00 hanggang alas-5:00 ng umaga, maliban sa perishable na pagkain at yelo.

Dagdag pa, sinabi ni Artes na hihilingin ng MMDA sa Department of Transportation na pahabain ang oras ng operasyon ng public transport system, lalo na ang EDSA Bus Carousel, LRT at MRT, para ma-accommodate ang mga late-night commuters at mall employees. (Daris Jose)

MARIING itinanggi ni da­ting pangulong Rodrigo Duterte na may reward system na ipinatupad ang kanyang administrasyon kontra sa ilegal na droga.

Sa pahayag ni Duterte, sinabi nito na tanging pabuya lang na pagkain at pagbati ang ibinibigay niya sa mga pulis na matagumpay na natapos ang kanilang misyon.

Matatandaan na ibinunyag sa pagdinig ng House Quad Committee ng malapit kay Duterte na si dating retired police Col. Royina Garma na mayroong cash reward na binabayaran sa bawat pagpatay sa war on drugs ng administrasyong Duterte na mula P20,000 hanggang P1 milyon.

Base sa rekord ng pulisya, umabot sa 6,000 ang drug personalities sa war on drugs ng nakaraang administrasyon. (Daris Jose)

NAGHAHANDA na ang pamunuan ng Parañaque Integrated Terminal Exchange (PITX) sa inaasahang higit sa 2.4 milyong pasahero na dadagsa sa terminal simula sa Oktubre 21 hanggang Nobyembre 5, kaugnay sa paggunita sa All Saints Day at All Souls Day.

Pinakamaraming pasahero ang inaasahan sa mga petsang Oktubre 30 at 31 sa aabot sa humigit-kumulang sa 159,000 hanggang 175,000 o katumbas ng pagtaas ng mga biyahero sa 20%.

Nakikipag-ugnayan na ang PITX sa Department of Transportation (DOTr), Land Transportation Franchising and Regulatory Board (LTFRB), Land Transportation Office (LTO), Metropolitan Manila Development Authority (MMDA), at Philippine National Police (PNP) para sa tiyak na maayos at ligtas na pagbibiyahe.

Kabilang sa mga hakbang ang pag-isyu ng LTFRB ng mga special permit para sa mga bus, inspeksyon ng LTO sa mga PUVs para sa kaligtasan ng mga ito, at pagde-deploy ng MMDA ng mga ambulansya at enforcer para sa trapiko.

Pinayuhan naman ang mga pasahero na magtungo ng maaga sa iskedyul na biyahe upang hindi maabala. (Gene Adsuara)