SA kulungan humantong ang pagra-ride ng dalawang estudyante nang mabisto ang dala nilang shabu makaraang masita sa Oplan Sita dahil walang suot na mga helmet sa Malabon City.

Kinilala ang mga naarestong suspek na sina alyas “Bulol”, 23, at alyas “Negro”, 21, kapwa Grade-12 student at parehong residente ng lungsod.

Sa ulat ni PMSg Kenneth Geronimo kay Malabon police chief P/Col. Jay Baybayan, habang nagsasagawa ng Oplan Sita ang mga tauhan ng TMRU sa kahabaan ng Gov. Pascual Avenue, Brgy. Potrero nang parahin nila ang mga suspek na magkaangkas sa isang motorsiklo dahil walang suot na mga helmet dakong alas-5:50 ng umaga.

Nang hingan ng driver’s license at kaukulang papeles ng motorsiklo ang nagmamaneho na si ‘Negro’ ay wala itong naipakita at nang ipatanggal sa kanya ang suot na cap para sa beripikasyon ay nadiskubre sa loob nito ang isang plastic sachet ng hinihinalang shabu.

Nang ipalabas naman sa kanyang back rider na si ‘Bulol’ ang laman ng bulsa nito ay nakuha din sa kanya ang isang plastic sachet ng umano’y shabu na nagresulta sa pagkakaaresto sa kanila.

Nagkakahalaga ng P11,084 ang droga na nakumpiska sa mga suspek na kapwa mahaharap sa kasong paglabag sa R.A. 9165 o ang Comprehensive Dengerous Drug Act of 2002, RA 4136, at RA 10054. (Richard Mesa)

BINISITA ni Malabon City Mayor Jeannie Sandoval ang mga paaralan na nagsilbing evacuation centers upang mamahagi ng tulong na pagkain at food packs sa mga pamilya na naapektuhan ng pananalasa ng Severe Tropical Storm (STS) Kristine.

“Mayroon na naman po kinakaharap na bagyo hindi lang ang mga lungsod sa Metro Manila, kasama ang Malabon. Kahit na malakas ang ulan dito sa lungsod ay handa tayo na tumulong sa mga Malabueño, lalo na ang mga mangangailangang lumikas mula sa kanilang mga bahay. Handa tayo hindi lang habang may bagyo, kundi maging pagkatapos nito. Bukas ang ating tanggapan anumang oras. Sabay-sabay tayong aahon mula sa epekto ng kahit anong kalamidad,” ani Mayor Jeannie.

Ayon sa Malabon Disaster Risk Reduction and Management Office (MDRRMO), may kabuuang 405 indiviuals o 101 pamilya ang pansamantalang sumisilong sa 10 evacuation centers.

Nauna rito, nagsagawa ang Malabon Emergency Response Team na binubuo ng iba’t ibang departamento ng Pre-disaster Risk Assessment meeting para paghandaan ang posibleng pagbaha dahil sa malakas na pag-ulan na dala ng STS Kristine.

Patuloy ding nagmomonitor ang Command and Communication Center ng MDRRMO sa iba’t ibang kalsada at mga ilog at nagdeploy din ng Libreng Sakay para tulungan ang stranded na mga commuter.

Tiniyak ng alkalde sa mga residenteng naapektuhan ng STS Kristine na ang pamahalaang lungsod ay patuloy na magbibigay ng tulong.

“Ang palagi po naming paalala ay ang ibayong pag-iingat ng lahat tuwing may kalamidad. Makipag-ugnayan sa ating lokal na pamahalaan kung kinakailangan at siguradong may tulong na darating lalong madaling panahon,” aniya. (Richard Mesa)