MAHIGIT P.1 milyong halaga ng iligal na droga ang nasamsam sa dalawang drug suspects matapos maaresto ng pulisya sa ikinasang buy bust operation sa Caloocan City.

Kinilala ni District Drug Enforcement Uni (DDEU) chief P/Major Jeraldson Rivera ang naarestong mga suspek na sina alyas “Fred”, 43, at alyas “John”, 19, kapwa residente ng lungsod.

Sa kanyang ulat kay Northern Police District (NPD) OIC Director P/Col. Josefino Ligan, sinabi ni Major Rivera na ikinasa nila ang buy bust operation, katuwang ang Caloocan Police Sub-Station (SS2) kontra sa mga suspek matapos ang natanggap na impormasyon hinggil sa umano’y ilegal drug activities ng mga ito.

Kaagad dinamba ng mga operatiba ng DDEU ang mga suspek matapos umanong bintahan ng shabu ang isang pulis na nagpanggap na buyer dakong alas-10:50 ng umaga sa loob ng isang bahay sa Galino St., 9th Avenue, Brgy. 102.

Ayon kay P/Capt. Regie Pobadora na nanguna sa operation, nakuha nila sa mga suspek ang humigi’t kumulang 15 grams ng hinihinalang shabu na nagkakahalaga ng P 102,000.00, 7 grams ng umano’y pinatuyong dahon ng marijuana na nasa P840.00 ang halaga at buy bust money

Mahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)

NAGTAPUAN ang bangkay ng isang hindi pa kilalang dalagita na lumulutang sa tabi ng isang pumping station sa Navotas City.

Ayon kay Navotas City Police Chief P/Col. Mario Cortes, wala pa ring mga kaanak na kumikilala sa bangkay na tinatayang nasa edad na 15 hanggang 20-taong gulang, may taas na 5” hanggang 5’2 at nakasuot ng itim na Levi’s t-shirt at checkered na shorts kaya nanawagan sila sa sinumang nakakilala sa biktima.

Sa ulat, papalaot na sana upang mangisda sina Jonathan Rendon, 31, Nelson Santos, 62, at kapatid na si Jonjon 40, nang makita nila ang nakadapa at lumulutang na katawan ng biktima sa tabi ng pumping station sa Pescador St. Brgy Bangkulasi noong Oktubre 24 ng pasado alas-4 ng hapon kaya ipinabatid nila ito sa Navotas Police Sub-Station 3.

Mga tauhan naman ng Navotas Disaster Risk Reduction and Management Office (NDRRMO) ang nag-ahon sa biktima at bago ilagay sa cadaver bag, sinuri muna ng mga operatiba ng Scene of the Crime Operatives (SOCO) ang bangkay at lumabas na wala silang nakitang sugat sa katawan na isang palatandaan na walang nangyaring karahasan.

Gayunman, nilinaw ni Col. Cortes na hindi pa nila isinasara ang imbestigasyon at kanila itong ipagpapatuloy sa oras na makilala na ang bangkay ng biktima. (Richard Mesa)

Pangangalaga at pagprotekta sa kulturang pamana: ‘Devil Statue’ binalik na ng Malabon LGU sa Tugatog Cemetery.

SA isang pangako na pangalagaan at protektahan ang mga likhang sining at ari-arian na may makabuluhang halaga sa kasaysayan at kultura, pinabilis ng Pamahalaang Lungsod ng Malabon sa ilalim ng pamumuno ni Mayor Jeannie Sandoval ang pagbabalik ng “The Devil and St. Michael the Archangel” estatwa sa Tugatog Public Cemetery (TPC), sa oras ng Undas 2024.

“Ating pinapahalagahan ang mga gawang sining, imprastraktura, lugar, at iba pang mga likha na bahagi ng ating kasaysayan, kultura, at tradisyon. Kaya sinisikap natin na mapangalagaan at maprotektahan ang mga ito. Ang ‘The Devil and St. Michael, the Archangel’ statue ay siyang nagpatanyag sa pampublikong sementeryo na kasalukuyang sumasailalim sa pagsasaayos. Ngayong Undas ay sinikap nating maibalik ito kasabay ng muling pagbubukas ng ilang bahagi ng sementeryo,” ani Dr. Alexander Rosete, Malabon City Administrator.

Ang estatwa iconic na ito na nasa entrance ng TPC ay naglalarawan ng devil na nagtatagumpay kay St. Michael sa isang tunggalian.

Ito ay inalis noong 2021 bilang bahagi ng proyektong muling pagpapaunlad ngunit maingat na ibinalik sa pamilya na orihinal nitong may-ari na si Don Simeon Bernardo para sa pangangalaga. Orihinal itong nakaposisyon sa ibabaw ng puntod ni Don Simeon upang magsilbing paalala ng kanyang pananaw sa moral challenges ng mundo.

Ayon sa kanyang apo sa tuhod na si Attorney Martin Pison, ang estatwa ay nilikha bilang simbolo ng malupit na realidad na sa kanyang nakita, kadalasang nananaig ang kasamaan kaysa sa kabutihan.

Si Don Simeon, isang freemason, ay inakushan ng mga revolutionary activities noong 1892 sa ng Spanish colonization, at nahuli, pinahirapan, at kalaunan ay ipinatapon sa Yap Island sa Carolines.

“Nakapagisip-isip siya ngayon kung bakit ganon ‘no, kung sino pa raw ang sinasabing alagad sila ng Diyos, sila pang nagpapahirap sa mga tao at tila yata ang kasamaan ang naghahari sa mundo. Ginusto niyang gawan ng simbulo iyon. Kaya noong mga 1926, pinagawa niya yang statue. Simbulo siya na naghahari ang kadiliman dito sa mundo at hindi ang kabutihan,” ani Atty. Pison.

“Kaya niya pinagawa ‘yan para ipaalala sa mga tao na hindi dapat ganon,” dagdag niya.

Isang kasunduan ang nilagdaan sa pagitan ni Mayor Jeannie at ng pamilya Bernardo upang matiyak ang patuloy na pangangalaga ng estatwa sa TPC.

Nagpasa din ang Malabon City Council ng isang ordinansa na nagdedeklara sa “The Devil and St. Michael the Archangel” statue bilang isang local cultural property na tinitiyak ang kahalagahan nito sa makasaysayang tanawin ng lungsod. (Richard Mesa)

NAKATAKDANG tumanggap ang Pilipinas ng multi-bIlyong halaga ng international aid mula sa European Union (EU), United Arab Emirates, at Taiwan bilang tugon sa pagkawasak na iniwan ng Severe Tropical Storm Kristine (international name Trami).

Sinabi ng EU na inaprubahan nito 1.5 million euros (P94 million) na humanitarian aid para tulungan ang pinaka-apektadong populasyon lalo na ang mga rehiyon ng Bicol at Calabarzon.

“I am sad to see that only a few days after my visit to Manila, the Philippines was, once more this year, severely struck by a disaster. As I reiterated during my stay, the EU stands ready to help populations that are on the frontline of climate-related disasters,” ang sinabi ni Commissioner for Crisis Management Janez Lenarčič.

Ang nasabing emergency funding ay idaragdag sa 4.5 million euros na inilaan sa Pilipinas ngayong taon bilang humanitarian aid.

Tinatayang 2 million euros ang nauna nang ipinalabas kasunod ng pagbaha at tropical cyclones sa Mindanao at iba pang bahagi ng bansa noong Pebrero, Hulyo at Setyembre 2024.

Inanunsyo rin ng Taipei Economic and Cultural Office (TECO) ang donasyon nito na USD150,000 (P8.7 million) sa gobyerno ng Pilipinas bilang “gesture of Taiwan’s compassion and solidarity for Philippine individuals, families and communities” na apektado ng bagyo.

Ang tulong ay tinanggap ni Manila Economic and Cultural Office (MECO) chairperson Cheloy Velicaria-Garafil sa isang seremonya sa TECO office sa Makati City.

Tinuran pa ni Velicaria-Garafil na ang donasyon ay ibinigay sa panahon na hinagupit ni Kong-rey, (locally named Leon) ang Taiwan.

“This act shows the magnanimity of the people of Taiwan for extending help and assistance to Filipinos in the midst of their own personal battles and challenges,” ayon kay Velicaria-Garafil

“Let me express our deepest hope and prayer for the safety and well-being of the people of Taiwan, as well as our around 200,000 Filipino compatriots who are working and living in Taiwan,” aniya pa rin.

Ang bagong tulong ay bukod sa 500 metric tons ng bigas na dinonate (donate) ng Taiwan para sa mga biktima ng kalamidad noong Oct. 29.

Tinuran naman ni TECO Representative Wallace Minn Chow na ang Taiwan ay “committed to being a true friend and reliable partner to the Philippines.”

“Disasters like this remind us all of our shared humanity and the importance of standing together in times of trial,” aniya pa rin sabay sabing “Together, let us stand united in our efforts to support the affected families in the regions as they rebuild their lives and communities.”

Samantala, naghahanda naman ang UAE government na mag-donate ng 33,000 kahon ng family food packs na idaragdag sa ‘local relief efforts.’

Pangungunahan naman ng UAE Embassy sa Maynila ang deployment ng relief supplies at iprayoridad ang paghahatid ng food packs at inuming tubig sa rehiyon na dumanas ng matinding bigat ng bagyong Kristine lalo na sa Bicol.

Ang transportasyon at distribusyon ng relief goods ay pangungunahan ng Department of Social Welfare and Development (DSWD) at mga regional office nito. ( Daris Jose)

NAKA-HIGH ALERT ang mga kinauukulang national at local government units kasunod ng direktiba ni Pangulong Ferdinand Marcos Jr. na maghanda para sa posibleng epekto ng Super Typhoon Leon.

Sinabi ng Presidential Communication Office (PCO), araw ng Huwebes na kinumpirma na ni Batanes Governor Marilou Cayco na isinasagawa na ang ‘evacuation efforts’ para sa mga residente na apektado ng bagyong Leon. Idagdag pa rito na naipamahagi na ang food packs para sa susunod na tatlong araw.

Sinabi pa rin ni Cayco na naka-deploy na ang mga healthcare at social welfare personnel sa mga evacuation centers.

Samantala, sinabi naman ni Department of Social Welfare and Development (DSWD) Undersecretary for Disaster Response Management Group (DMRG) Diana Rose Cajipe na naka-preposition na ang 2,000 family food packs para sa mga apektadong residente ng Batanes.

Winika ni Cajipe na ang karagdagang 5,500 family food packs ay dadalhin ng Philippine Coast Guard (PCG) vessel mula Pangasinan patungong Batanes ‘as soon as the weather permits.’

“We will coordinate with the Office of the Civil Defense (OCD) kasi kapag nag-clear mas mabilis po tayo makapagpalipad through C130, definitely magdadala na tayo kaagad sa Batanes,” ang sinabi ni Cajipe.

Samantala, sinabi ng PAGASA na tinatahak na ng bagyong Leon ang direksyon patungong Taiwan. Ang sentro ng bagyong Leon ay matatagpuan sa 110 kilometers north northeast ng Itbayat, Batanes at kumikilos patungong northwestward na may 20 kilometers per hour (kph).

Napanatili naman ng bagyong Leon ang malakas na hangin na 195 kph malapit sa sentro at pagbugso ng hanggang 240 kph.
( Daris Jose)

IBINALIK na ng Malakanyang si Monalisa Dimalanta bilang chairperson ng Energy Regulatory Commission (ERC).

Sinabi ni Presidential Communications Office (PCO) Secretary Cesar Chavez na ayon sa tanggapan ni Executive Secretary Lucas Bersamin, ibinalik si Dimalanta sa kanyang posisyon dahil binawi na ng Office of the Ombudsman ang preventive suspension na ipinalabas laban sa kanya.

“Pursuant to the 22 October 2024 Order of the Office of the Ombudsman (OMB) in OMB-C-A-JUL-24-0066, entitled “National Association of Electricity Consumers for Reforms, Inc. (NASECORE). vs. Monalisa C. Dimalanta”, lifting the 20 August 2024 order of preventive suspension issued against respondent Monalisa C. Dimalanta, the latter is hereby reinstated as Chairperson and Chief Executive Officer of the Energy Regulatory Commission immediately upon receipt hereof,” ang sinabi ni Bersamin sa isang memorandum na may petsang October 30.

Para naman sa ERC, ang pagbabalik ni Dimalanta sa komisyon ay makapagpapatatag na sa regulatory agency.

“The ERC welcomes the decision of the Ombudsman to lift the Order of the preventive suspension, as it would ensure the stability within the agency and the energy industry as a whole. The Commission also extends its gratitude to Officer-in-Charge Jesse Hermogenes T. Andres whose brief stint helped steer the agency through a critical period,” ayon sa ERC.

‘With Chairperson Dimalanta’s return, the ERC continues its commitment to fulfilling its mandate as the country’s energy regulator,” dagdag na wika ng ERC.

Idagdag pa rito, sinabi ng ERC na nakasaad sa naging desisyon ng Ombudsman na bawiin ang suspensyon laban kay Dimalanta na may petsang Oct. 22 na “after a thorough evaluation of the present case records, this Office finds that the ground which justifies the continued imposition of preventive suspension no longer exists. Therefore, the preventive suspension is no longer necessary.”

Samantala, tiniyak naman ng ERC sa publiko na “all operations of the Commission will remain unhampered and will continue to function to the extent possible and as required by the exigencies of service.”

Sa ulat, pinatawan ng preventive suspension na anim na buwan ng Office of the Ombudsman si Energy Regulatory Commission (ERC) Chairperson Monalisa Dimalanta.

Sa kautusan ni Ombudsman Samuel Martires, na may petsang ika-29 ng Agosto, binanggit na matibay ang ebidensiya laban kay Dimalanta sa mga reklamo sa kanya na grave misconduct, grave abuse of authority, gross neglect of duty at conduct prejudicial to the best interest of the service.

Ang mga reklamo kay Dimalanta ay inihain ng National Association of Electricity Consumers for Reforms Inc. (Nasecore).

Ayon sa Nasecore, pinayagan ni Dimalanta ang Manila Electric Co. (Meralco) na bumili ng kuryente sa Wholesale Electricity Spot Market (WESM) at ipasa sa mga konsyumer ang gastusin, na paglabag sa Electric Power Industry Reform Act (EPIRA) Law.

Sinabi pa ni Martires na maaring matanggal si Dimalanta sa puwesto dahil sa mga reklamo sa kanya.

Ipinaliwanag ni Martires na maaring maapektuhan ang pagsasagawa ng mas malalim na imbestigasyon kung mananatili sa puwesto si Dimalanta kayat dapat itong suspindihin.

IPINAG-UTOS ng Energy Regulatory Commission (ERC) sa electric industry stakeholders sa mga lugar na nasa ilalim ng state of calamity kasunod ng pananalasa ng Severe Tropical Storm Kristine na suspendihin ang disconnections at magpatupad ng flexible bills payment schemes hanggang Disyembre.

Layon nito na pagaanin ang pasanin ng mga apektadong consumers.

Sa ipinalabas na advisory ng regulated entities nito, sinabi ng ERC na ang kautusan ay bilang pagtalima sa naging direktiba ni Pangulong Ferdinand Marcos Jr., na pag-aralang mabuti ang implementasyon ng moratorium sa electricity line disconnections at payment collections matapos ang malawakang pagkawasak ng bagyong Kristine.

Inatasan ng power industry regulator ang lahat ng distribution utilities (DUs) sa mga lugar na nasa ilalim ng state of calamity na “suspend electricity line disconnections of residential and non-residential consumers in [their] captive market with a monthly electricity consumption not exceeding 200 kilowatt-hours (kWh), for non-payment of electricity bills for the billing period of October 2024 until December 2024.”

Idagdag pa rito, sinabi ng ERC na ang DUs sa mga apektadong lugar ay inatasan na “to provide flexible payment options to help ease the financial burden on consumers as they work toward recovery from the effects of STS Kristine.”

Winika pa ng ERC na ang DUs ay dapat na magpatupad ng payment scheme kung saan ang itinuturing na ‘captive consumers’, na ang monthly consumption na hindi lalagpas sa 200 kWh sa panahon ng billing periods ng October hanggang December 2024, “shall be allowed to pay these monthly bills on a staggered basis for a period of at least six months from issuance of the Statement of Account for each bill.”

Tinuran pa ng ERC na ang DUs ay maaaring mag-alok ng alternative payment terms na ‘mutually agreeable’ sa DU at sa mga consumers na ang nakokonsumo ay hindi lalagpas sa 200 kWh.

“Consumers are encouraged to contact their respective DUs to inquire about the available alternative payment options or to request special terms to settle outstanding bills,” ang sinabi ng ERC.

Tinatayang may 158 lugar ang deklaradong nasa ilalim ng state of calamity matapos ang pananalasa ng bagyong Kristine, ang Bicol Region ang mayroong pinakamaraming lungsod at munisipalidad na inilagay sa ilalim ng state of calamity, mayroon itong 78 na bilang.

Pangalawa ang Calabarzon na may 63 lungsod at munisipalidad na nasa ilalim ng state of calamity.

Sa Eastern Visayas, 13 lugar ang inilagay sa ilalim ng state of calamity, habang isa naman sa Ilocos Region, Gayundin sa SOCCSKCARGEN, Cordillera Administrative Region, at National Capital Region na inilagay sa ilalim ng state of calamity.

Tinuran pa ng ERC na ang power generators, Power Sector Assets and Liabilities Management Corporation (PSALM), National Power Corporation (NPC), National Transmission Corporation (TransCo), National Grid Corporation of the Philippines (NGCP), Independent Power Producers (IPPs), Independent Power Producer Administrators (IPPAs) at Market Operator (MO) “shall extend the same payment scheme to the affected DUs only insofar as the latter’s collections from the affected consumers.”

“Thus, the concerned DUs shall segregate payments from the affected consumers to determine the amounts to be paid on a similar staggered basis to their respective Generators, PSALM, NPC, TRANSCO, NGCP, IPPs, IPPAs and MO. Availment of Prompt Payment Discount (PPD) will still be in accordance with the parties’ approved supply contract,” ang sinabi ng ERC. (Daris Jose)