LAGLAG sa selda ang dalawang hinihinalang sangkot drug personalities matapos makuhanan ng baril at mahigit P.2 milyong halaga ng ilegal na droga sa isinagawang buy bust operation ng pulisya sa Valenzuela City, Martes ng madaling araw.

Sa kanyang ulat kay Northern Police District (NPD) OIC Director P/Col. Josefino Ligan, kinilala ni District Drug Enforcement Unit (DDEU) Deputy Chief P/Capt. Regie Pobadora ang naarestong mga suspek na sina alyas “Jepoy”, 45, ng Bagong Barrio, Caloocan at alyas “John”, 39, Lazada motorcycle rider ng Brgy. Marulas, Valenzuela City.

Ayon kay Capt. Pobadora, unang nakatanggap sila ng impormasyon hinggil sa umano’y pagbibenta ni alyas Jepoy ng ilegal na droga kaya isinailalim nila ito sa validation.

Nang positibo ang ulat, ikinasa ng DDEU sa pangunguna ni Capt. Pobadora, katuwang ang Valenzuela Police Sub-Station (SS3) sa ilalim ng pangangasiwa ni P/Capt. Robin Santos ang buy bust operation na nagresulta sa pagkakaaresto sa mga suspek matapos umanong magsabwatan na bintahan ng P1,000 halaga ng shabu ang isang pulis na nagpanggap na buyer sa Elysian St., Brgy. Marulas dakong alas-3:20 ng madaling araw.

Nakumpiska sa mga suspek ang nasa 22.18 grams ng hinihinalang shabu na nagkakahalaga ng P150,824, pitong pirasong disposable vape na naglalaman ng hinihinalang marijuana oil na nagkakahalaga ng P49,000, nasa 6.8 grams ng umano’y kush hybrid marijuana na nagkakahalaga ng P9,420, at buy bust money habang ang isang cal. 38 revolver na kargado ng tatlong bala ay nakuha kay ‘Jepoy’.

Mahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002 habang karagdagan na kasong paglabag sa RA 10591 o ang Comprehensive law on Firearms and Ammunation ang kakaharapin pa ni alyas Jepoy.

Pinapurihan naman ni Col. Ligan ang DDEU sa kanilang matagumpay na operation kontra ilegal na droga na nagresulta sa pagkakadakip sa mga suspek habang inaalam pa ng pulisya kung sino ang pinagkukunan ng mga ito ng naturang ilegal ba droga. (Richard Mesa)

PATULOY ang pamamahagi ng Quezon City LGU ng earthquake at landslide search and rescue boxes (Elsaroc) sa lungsod katuwang ang Quezon City Disaster Risk Reduction Office ng lokal na pamahalaan.

Sa patnubay ni QC Mayor Joy Belmonte, sinabi ni QC District 1 Councilor Charm Ferrer na patuloy ang kanilang pamamahagi ng ELSAROC boxes sa iba’t ibang barangay sa lungsod bilang paghahanda sa ka­lamidad at emergency.

Pinakahuling nakatanggap ng ELSAROC boxes ang Barangay Masambong, San Jose at Balingasa.

Sinabi ni Ferrer na ang laman ng bawat ELSAROC boxes ay gamit sa pagsagip at pag-rescue sa panahon ng lindol at landslide.

Sa pamamagitan aniya ng mga ito, pinalalakas ang kahandaan ng mga barangay sa mga hindi inaasahang kalamidad na tatama sa QC.

NAGTAAS ng toll fee ang NLEX Connector matapos payagan ng Toll Regulatory Board (TRB) ang petisyon sa pangungolekta ng updated toll rates sa nasabing elevated expressway.

Sa ilalim ng updated toll matrix, ang motorista na gagamit ng Class 1 na sasakyan o ang mga regular na sasakyan kasama ang SUVs ay magbabayad ng P119 mula sa dating toll na P86.

Ang Class 2 o ang buses at small trucks kasama ang Class 3 na sasakyan o ang large trucks ay kailangan magbayad ng P299 at P418 flat rates, respectively sa mga sumusunod na klaseng sasakyan mula sa dating rates na P215 at P302.

“The toll adjustment is part of the program to collect the opening toll for the NLEX Connector on a staggered basis to cushion the impact to expressway users,” wika ng NLEX.

Noong 2023 ipanatupad ang initial rates, matapos ang apat na buwan ng pagbubukas ng Caloocan-Espana Section noong March.

Sa pagbubukas ng Section mula Espana hanggang Magsaysay Boulevard noong October 2023, sinabi ng kumpanya na ang NLEX Connector ay nanatili sa dating discounted rate kung saan ang mga motorista ay nagkaroon ng mahabang panahon sa loob ng isang taon na walang toll adjustment.

“Full rates will be implemented once NLEX Connector Project is completed. The connector has significantly improved the travel experience of motorists heading to Manila from the north and vice versa by reducing travel between C3 in Caloocan and Magsaysay Boulevard in Manila to just seven minutes,” saad ng NLEX.

Ayon sa kumpanya, ang NLEX Connector ay siyang kauna-unahang expressway sa Philippines na gumagwa ng barrierless system at gumagamit ng 100 porsientong RFID upang magkaron ng mas mabilis na transaksyon sa mga toll plazas. LASACMAR

SAGOT na ng Philippine Health Insurance Corporation (PhilHealth) ang pabalik-balik na pagpapagamot at pagpapaospital dulot ng kaparehong sakit sa loob ng 90 araw.

Ito naman ang magandang balita ng PhilHealth kung saan nagsimula na ito noong Oktubre 1, 2024 matapos na alisin ang Single Period of Confinement o SPC rule.

Nabatid na ipinatupad ang SPC noong panahon ng Medicare, kung saan limitado lamang sa isang beses ang bayad para sa mga pasyenteng paulit-ulit na nao-ospital dahil sa parehong sakit o operasyon sa loob ng 90 araw.

Dahil sa polisiyang ito, ang mga miyembro ng PhilHealth ay napi­pilitang magbayad ng buo sa kanilang hospital bills o kaya ay hindi nababayaran ang mga hospital claims.

Ayon kay PhilHealth Chief Emmanuel R. Ledesma, Jr., matapos ang masusing pag-aaral, inalis na nila ang naturang polisiya upang lalong matiyak na tuloy-tuloy ang benepisyo para sa mga pasyenteng may pabalik-balik na sakit.

“Ang hakbang na ito ay pagtupad sa aming pangako na lubusin ang mga benepisyo para sa miyembro na kailangan nila sa kanilang pagga­ling,” aniya.

Ayon kay Ma. Celia Buñag, Supervising Administrative Officer ng Quezon City General Hospital, malaking tulong ang pagtatanggal ng SPC dahil karamihan sa mga pasyente ay may recurring illness tulad ng pneumonia o chronic obstructive pulmonary disease.

Samantala, ipinaalala naman ng PhilHealth sa mga miyembro na maaaring magamit ang anumang benepisyo sa loob ng 45 araw sa buong taon, maliban sa hemodialysis benefits package dahil mayroong nakalaang hiwalay na 156 sessions sa bawat taon para dito.