SA December 24 na raw makakasama ni Sylvia Sanchez ang kanyang apo kay Ria Atayde at Zanjoe Marudo.

Dahil aligaga si Sylvia sa promo at advance screening ng 2024 MMFF official entry ng Nathan Studios na ‘Topakk’ kaya hanggang Facetime lang daw muna sila ng kanyang apo.

“May sariling bahay kasi sina Ria at Zanjoe kaya puro facetime muna kami ng apo ko. Hindi ko sila mabisita ngayon dahil sa schedules ng Topakk.

“Pero for sure sa Noche Buena, makakasama ko na ang apo ko. Pahinga ako sa pagluto dahil mag-Noche Buena kami sa bahay ng father-in-law ko. Yun na ang free time ko with my apo,” sey ni Sylvia.

Pagpasok ng 2025, may nakahanda na raw na bagong film project ang Nathan Studios na ipapasok din nila sa MMFF.

***

MAY dalawang bagong Kapuso singers agad ang GMA-7 dahil sa back-to-back finals ng ‘The Clash’ at ‘The Voice Kids PH’ noong nakaraang weekend.

Ang Soulful Gen Z ng Las Piñas na si Naya Ambi anh hinirang na grand champion ng ‘The Clash 2024’. Naging winning song niya ay “I’ll Be There” ni Mariah Carey. Kinabog niya sa finale si Chloe Redondo ng Laguna.

Si Nevin Adam Garceniego ng Quezon City ang magwagi sa ‘The Voice Kids’. Si Nevin ay galing sa team ni SB19 Pablo na Tropa Ni Pablo.

Naging winning song ni Nevin ay “May Bukas Pa” ni Rico J. Puno. Tinalo niya ang mga kalaban na sina Mark Anthony “Makmak” Punay, Jan Hebron Ecal, at Wincess Jem Yana.

Bilang champions, nakatanggap sina Nami at Nevin ng tig-one million pesos in cash, recording and management contract at brand new house and lot from Vistaland.

***

MULING naghakot ng awards sa katatapos lamang na 2024 Billboard Music Awards (BBMAs) si Taylor Swift.

Nauwi ni Taylor ang 10 BBMAs including Top Artist, Top Female Artist, at Top Billboard 200 Album for The Tortured Poets Department.

Si Taylor na ang most awarded artist ng BBMAs with a total of 49 trophies. Tinalo na niya ang dating may hawak ng record na si Drake.

Perfect birthday gift daw ito for Taylor who turned 35 last December 13.

“This is like the nicest, early birthday present you could have given me so thank you very much. Thank you to the fans, because Billboard is counting your stuff. They’re counting what you’re listening to, the albums that you’re passionate about. So I count these as fan voted awards, because you guys are the ones who care about our albums and come see us in concert,” sey ni Taylor sa kanyang video message.

(RUEL J. MENDOZA)

MAHIRAP ang obligasyon ng isa sa pinakabago sa ‘Unang Hirit’, ang guwapong weather reporter na si Anjo Pertierra.

Inatang sa kanyan na maghatid ng lagay ng panahon sa publiko na siyang pinagbabasehan ng karamihan sa mga aktibidades ng bawat isa sa atin.

Kaya tinanong namin si Anjo kung paano niya nagagawang mas madali o mas simpleng maintindihan ng mga tao ang kanyang weather report?

“Dati nung nanonood ako ng weather, idol ko po si Man Tani talaga,” pagtukoy ni Anjo sa dating resident weather reporter ng GMA, ang meteorologist na si Nathaniel Cruz.

Pagpapatuloy niya, “Pero ang napansin ko kasi dati, yung may mga words na malalim e, mga matalinhaga.

“So ngayon ang atake ho namin ngayon yung maiintindihan ng lahat.

“So parang… in layman’s term. So mga simpleng salita pero direct to the point. At iyon po yung nilalaman ng reports ng PAGASA, nire-relay lang po namin para po updated yung mga Kapuso natin all these times mas lalo na sa mga pagkakataong kunyari may bagyo…

“Kasi hindi po simpleng uulan lang o maaraw ba, iba-iba po iyong epekto ng klima depende po sa lugar dito sa ating bansa.

“Kasi sa atin, maaari dito sa Metro Manila ulan lang pero sa ibang bahagi ng bansa, mas lalo na po sa extreme Northern Luzon e binabaha na po sila nang sobra.

“Kaya iyon po, ang ginagawa namin in layman’s term, direct to the point para po madaling ma-adapt or maintindihan ng tao.”

Speaking of bagyo, isa si Anjo sa mga nasalanta ng nagdaang bagyong Carina; lumubog sa tubig-baha ang buong kuwarto niya na nasa basement.

Kumusta na ang kuwarto niya?

“Lumipat na po ako kasi na-trauma po ako,” bulalas ni Anjo.

“Ang nangyari dun napuno yung kuwarto ko po pa-basement so pababa.

“So imagine-in niyo po napuno siya hanggang ceiling. So nandun lahat ng damit ko, pampasok, lahat, sapatos, gamit, lahat kasi nandun, kama.”

Pero sa kabila noon, kinabukasan ay pumasok pa rin daw siya sa ‘Unang Hirit.’

“Binigyan ako ng damit ni Sir Ivan, binigyan ako ng assistance ni mommy Su, ni Igan, ng production pong Unang Hirit, binigyan po ako ng pambili ng brief ni Shaira tsaka ni EA.

“As in lahat po [nagbigay].

“Doon ko po naramdaman na sobrang mahal po nila ako kasi sa simpleng mga bagay naramdaman ko po na may kasama po ako at may katuwang po ako sa hirap at ginhawa ng buhay.”

(ROMMEL L. GONZALES)

ANG “Jose Rizal,” ang makasaysayang pelikula noong 1998 na ginawa ng GMA Pictures, ay digitally restored and remastered para sa isang bagong henerasyon ng mga manonood.

Mapapanood na ang cinematic masterpiece sa Netflix Philippines simula sa Rizal Day, December 30.

Ang klasikong pelikula noong 1998, na pinamunuan ng yumaong direktor na si Marilou Diaz-Abaya at isinulat nina Ricky Lee, Jun Lana at Peter Ong Lim, ay isang tatlong oras na epiko na sumasalamin sa buhay at pakikibaka ng pambansang bayani na si Jose Rizal. Ginagampanan ni Cesar Montano ang title role.

Ang “Jose Rizal” ay ang pinaka-pinarangalang pelikula noong 1998 Metro Manila Film Festival (MMFF), na nanalo ng 17 sa 18 parangal noong taong iyon, kabilang ang Best Picture, Best Screenplay, Best Cinematography, Best Actor, at Best Director.

Dalawampu’t anim na taon mula noong una itong pinalabas sa mga screen ng pelikula, ang digitally remastered version ng “Jose Rizal” ay muling nakaakit sa mga manonood nang ito ay mag-premiere sa 2024 Cinemalaya Independent Film Festival.

Ang restoration ng “Jose Rizal” ay ginawa ng Central Digital Lab at GMA Post Production na bahagi ng pagpupugay ng GMA Pictures sa Philippine cinema.

Sa pagdadala rin ng pelikula sa Netflix Philippines, mas maraming manonood ang makakapanood at makaka-access sa cinematic masterpiece sa pamamagitan ng sikat na streaming platform.

Panoorin ang “Jose Rizal” at maging inspirasyon sa pamana ng pambansang bayani ng Pilipinas. Available na ito sa Netflix Philippines sa Rizal Day, December 30.

***
SIYAM na pelikula—mula sa maaksyon hanggang sa nakakaantig-ng-pusong mga istorya—ang binigyan ng angkop na klasipikasyon ng Movie and Television Review and Classification Board (MTRCB) para sa linggong ito.

Ang epic, “The Lord of the Rings: The War of the Rohirrim,” isang prequel sa mga nangyari sa trilogy na “The Lord of the Rings,” ay rated PG (Patnubay at Gabay ng Magulang).

Rated PG din ang mga animated movies na “Bocchi The Rock! Recap Part 2” at “Daft Punk & Leiji Matsumoto: Interstella 5555.”

Kaparehong PG din ang horror-comedy na “Betting With Ghost,” mula Vietnam; “Christmas with The Chosen Holy Night,” at ang mga concert films mula South Korea na “Seventeen Right Here World Tour” at “NCT Dream Mystery Lab: Dream Scape.”

Sa PG, kailangang kasama ng edad 12 at pababa ang mga magulang o nakakatanda sa sinehan.

Ang “Kraven The Hunter” at “Dirty Angels” ay parehong rated R-16–mga edad 16 at pataas ang puwede lamang makapanood.

Binigyang-diin ni MTRCB Chairperson and CEO Lala Sotto-Antonio ang mahalagang tungkulin ng mga magulang sa paggabay sa mga bata habang nanonood.

“Habang mahigpit na tinitiyak ng MTRCB na ang lahat ng pelikula ay may angkop na klasipikasyon, esensyal din na maging aktibo ang bawat magulang at guardian sa paggabay sa mga bata pagdating sa pagpili ng angkop na palabas,” sabi ni Sotto-Antonio.

(ROHN ROMULO)