MULING hinikayat ng Catholic Bishops’ Conference of the Philippines-Episcopal Commission on Health Care ang publiko na panatilihin ang kalinisan ng kapaligiran ngayong tag-ulan.

Ayon kay CBCP-ECHC executive secretary, Camillian Fr. Rodolfo Vicente “Dan” Cancino, na ngayong tag-ulan ay inaasahan na rin ang unti-unting pagpasok ng La Niña Phenomenon kung saan higit na mararanasan ang labis na antas ng pag-uulan.

Paliwanag ni Fr. Cancino na kaakibat ng panahong ito ang paglaganap ng iba’t ibang nakahahawang karamdaman, lalo na ang mapanganib na epekto ng dengue at leptospirosis.

“Kaya tayo po ay maging mapagmatyag lalong lalo na kapag tayo ay lalabas ng bahay. Meron pa rin tayong mga hamon sa buhay…Ang paglilinis ang importante sa kapaligiran. Huwag lamang tayo umasa sa paglilinis ng barangay. Tayo ‘yung barangay, tayo ‘yung kapitbahayan, at tayo ‘yung komunidad. Pag minsan umaasa lang tayo, ‘ay trabaho mo ‘yan’. Wala pa ring maitutulad kapag tayo ay naglilinis ng kapaligiran natin,” ayon kay Fr. Cancino sa panayam ng Radio Veritas.

Ang dengue ay nakukuha mula sa infected na lamok o aedes aegypti na nangingitlog sa mga lugar na mayroong nakaimbak na tubig, at karaniwang tinatamaan ay mga bata at sanggol.

Habang ang leptospirosis naman ay sakit na naipapasa mula sa mga kontaminadong tubig tulad ng baha na mayroong ihi ng daga, at lubhang mapanganib sa mga taong mayroong sugat sa bahagi ng binti hanggang paa.

Mayroong pagkakatulad sa mga karaniwang sintomas ang dengue at leptospirosis tulad ng pagkakaroon ng lagnat na may kasamang pananakit ng ulo at kalamnan, pagsusuka, at skin rashes.

Paalala naman ni Fr. Cancino sa publiko na huwag balewalain sakaling magkaroon ng anuman sa mga nabanggit na sintomas at sa halip ay agad na magpakonsulta upang malapatan ng karampatang lunas.

“Kung tayo ay nakakaranas ng mga sintomas ng dengue at leptospirosis na tumataas ang kaso ngayon ay tayo ay pumunta kaagad sa ating doktor, magpakonsulta, pumunta sa pampublikong clinic, humingi ng tulong sa barangay o sa ating mga health center…Maagap na pumunta sa ospital o klinika upang maibsan at magkaroon ng tamang lunas dito sa mga sakit na tumataas tuwing tag-ulan,” paalala ni Fr. Cancino.

Batay sa huling ulat ng Department of Health na mula unang araw ng Enero hanggang Hunyo 15 ngayong taon ay tumaas ng halos 78-libo ang kaso ng dengue sa bansa, kabilang ang 205 nasawi.

Sa nasabing bilang, mas mataas ito ng 15-porsyento kumpara sa higit 67-libong kaso sa kaparehong panahon noong 2023.

Samantala, tumaas naman sa halos 900 ang kaso ng leptospirosis, kung saan 84 dito ang naitalang nasawi.

IPINAG-UTOS ni Pangulong Ferdinand Marcos Jr., ang masusing pag-aaral para sa posibleng pagkakaloob ng “nomad” visas para makahikayat ng long-stay tourists sa Pilipinas at makatulong na mapalakas ang sektor ng turismo.

Ang pahayag na ito ng Pangulo ay matapos na makipagpulong sa Private Sector Advisory Council for Tourism (PSAC-Tourism) sa Palasyo ng Malakanyang, araw ng Miyerkules, Hulyo 3.

Sa nasabing pagpupulong, tinukoy ni PSAC-Tourism member LT Group president at CEO Lucio Tan III ang pangangailangan para sa Pilipinas na sumunod sa Southeast Asian neighbors at magpalabas ng nomad visas o kahalintulad na remote work visas para makahikayat ng long-term foreign visitors, partikular na ang mga freelancers.

Pinapayagan ng Nomad visas ang mga indibiduwal na tumira at magtrabaho sa labas ng kanilang ‘home country’ habang nagtatrabaho doon.

“We need to issue nomad visas quickly to attract long-stay tourists. Other countries like Thailand, Malaysia, and Indonesia are already benefiting from this approach,” ayon kay Tan.

Inirekomenda ng PSAC-Tourism na magpalabas si Pangulong Marcos ng isang Executive Order (EO) para agad na ipatupad ang nomad visas ng walang tax incentives, na maaari namang idagdag sa oras na maipasa na ang batas.

Bilang tugon, nagpahayag naman ng kanyang pagsuporta si Pangulong Marcos sa naturang interim solution at inatasan ang Office of the Executive Secretary na agad na mag- draft ng EO at pumili ng pilot country para sa inisyatiba.

Ang Ilan sa Asian countries na nagkakaloob na ng digital nomad visas o kahalintulad na remote work visas para sa kwalipikadong Filipino ay ang:

Malaysia (tatlo hanggang 12 buwan, renewable para sa karagdagang taon)

South Korea (isang taon)

Taiwan (pinapayagan naman ang Gold Card ang digital nomads na pumasok at lumabas ng Taiwan para sa isa hanggang tatlong taon)

Thailand (limang taon na may 180-day stay period)

United Arab Emirates (isang taon)

Samantala, tinukoy naman ni Pangulong Marcos ang papel ng pribadong sektor para palakasin ang sektor ng turismo ng Pilipinas lalo na sa pamamagitan ng pabilisin ang industry-specific training programs ng mga indibiduwal na may kasanayan para sa agarang trabaho sa tourism-related jobs.

Sa naturang pulong pa rin, tinukoy ni Filinvest Development Corporation President at CEO Joji Gotianun Yap ang pangangailangan na magtatag ng malaking bilang ng tourism workers na may Technical Education And Skills Development Authority (TESDA) certifications.

“Eighty percent of our tourism workforce holds TESDA certifications. We should build on this by further increasing these certifications, with the private sector identifying the specific skills required,” ayon pa rin kay Yap.

Para naman kay Pangulong Marcos, binigyang -diin nito ang papel ng industriya sa paghubog sa mga pagsisikap sa pagsasanay.

“The private sector should guide us on the exact skills needed,” ang sinabi pa rin ni Yap.

Dinetalye naman ni Chairman Popoy de Vera ng Commission on Higher Education (CHED) ang strategic approach sa turismo at hospitality education.

“We have numerous institutions offering four-year degrees in Tourism and Hospitality Management. By allowing top schools to run these programs, we ensure quality and meet current needs,” ayon kay de Vera.

“TESDA certifications can now be credited towards these degrees, providing students with a flexible pathway,” ang sinabi pa ni De Vera.

Sa kabilang dako, binigyang-diin naman ni Pangulong Marcos ang kahalagahan ng short-term courses, sabay sabing ito’y “enable people to get jobs quickly.”

“Well-trained individuals are rapidly employed,” aniya pa rin.

Samantala, kumpiyansa naman ang PSAC-Tourism na ang mga nabanggit na inisyatiba ang magpo-posisyon sa Pilipinas bilang “prime destination for tourists, enhance the quality of its tourism workforce, at drive economic growth.” (Daris Jose)

 MAGLULUNSAD ang De­partment of Social Welfare­ and Development (DSWD) ng isang self-service regis­tration at data authentication ng mga po­tential bene­ficiaries sa pa­mamagitan ng “I-Registro”.

Ang “I-Registro” ay isang dynamic social registry (DSR) na naglalayong pa­lakasin at mapabilis ang pag-encode ng mga detalye ng bawat benepisyaryo.

“The I-Registro aims to enhance the exchange of updated demographic and migration data, crucial for targeting and supporting vulnerable households,” sabi ni DSWD National Household Targeting Office (NHTO) Director Jimmy Francis Schuck II.

Ang I-Registro ay isa sa digital transformation­ efforts ng ahensya na nakadisenyo upang mas ma­pabilis ang delivery ng social protection services ng gobyerno.

Sa initial phase, naka-focus ito sa self-service registration at information authentication para sa mga buntis at breastfeed Mom mula sa mga muni­sipalidad ng Pateros sa Metro Manila, Cordova Cebu, at Floridablanca Pam­panga, na nauna kini­lalang pilot sites ng prog­rama.

PINURI ng Pilipinas ang resolusyon ng United Nations Security Council na sumusuporta sa three-phase ceasefire plan sa Gaza strip.

Sinabi ng Department of Foreign Affairs na muling pinagtibay ng UN Resolution S/RES/2735 ang commitment ng UN sa kapayapaan at katatagan at ang bansa ay committed na magbigay ng kinakailangang pagsisikap para tumulong na makamit ang isang “peaceful resolution” sa Gaza.

“The prompt implementation of the measures is imperative to alleviate the suffering of innocent civilians caught in the crossfire… The country stands ready to contribute to initiatives that foster stability, security, and peace in the region,” ang nakasaad sa kalatas.

Ang UN S/RES/2735, in-adopt noong Hunyo 10, hinikayat ang ganap na pagpapatupad ng isang three-phase ceasefire deal para wakasan ang giyera sa pagitan ng Hamas at Israel sa Gaza.

Kabilang sa kasunduan ay ang ligtas na pagpapalaya sa mga hostages at bilanggo, withdrawal ng forces, pagbabalik ng mga namatay na nananatiling nasa Gaza Strip, epektibong distribusyon ng humanitarian assistance, at multi-year reconstruction plan” para sa Gaza.

Ang resolusyon ay in-adopt matapos ang 14 boto na pabor sa loob ng UN Security Council, habang nag-abstain naman ang Russian Federation. (Daris Jose)

MAHIGIT sa 4,000 da­ting monitored children ng Pantawid Pamil­yang Pilipino Program (4Ps) ng Department of Social Welfare and Development (DSWD) ay mga licensed professional teachers (LPT) na nga­yon.

Ayon kay DSWD spokesperson Irene Dumlao, patunay ito na epektibo ang 4Ps sa pag-aaral ng mga anak ng mga benepisyaryo.

Base sa talaan ni Director Gemma Gabuya ng 4Ps’ National Program Management Office (NPMO), 1,225 Elementary-level at 3,129 Secondary-level education graduates ang nakapasa sa Licensure Examination for Teachers (LET).

“In the recent LET given last March with the results released in May, we also have reported former 4Ps monitored children who topped the said exam,” pahayag ni Dumlao.

Ilan sa mga 4Ps monitored children ang naging topnotchers sa March 2024 LET. Ito ay sina Khane Jevie Rose S. Cervantes (Top 1) mula sa Davao Region Jennifer G. Manrique (Top 9) mula sa MIMAROPA Region para sa Elementary Level.

Para sa Secondary Level, naging topnot­chers sina Christian Albert B. Paskil at Clarence Joy D. Salmorin na parehong galing sa MIMAROPA (Top 5); Jellian H. Calipes (Top 6) mula Davao Region, at Joanne E. Cagata (Top 8 ng Caraga Region.

Nagpasalamat sa DSWD si Clarence Joy Delos Santos Salmorin na nagtapos ng Magna Cum Laude sa Secon­dary Education, Major in Science sa Mindoro State University (Bongabong Campus) dahil sa tulong sa kanyang pag-aaral ng cash grants na natanggap mula sa DSWD bilang dating benepisyaryo ng 4Ps.

LUNGSOD NG MALOLOS– Tumanggap ng tulong pinansyal na nagkakahalaga ng P5,000, food packs, at fertilizer ang 1,069 na magsasaka at mangingisda mula sa mga bayan ng San Miguel, Obando, at San Rafael bilang bahagi ng Distribution of Rehab Assistance to Farmers Affected by El Niño na ginanap sa The Pavilion, Hiyas ng Bulacan Convention Center sa lungsod na ito noong Martes.

Isinagawa ang programa ng Pamahalaang Panlalawigan ng Bulacan sa pamamagitan ng Provincial Agriculture Office, upang magbigay ng tulong sa mga magsasaka sa San Miguel at San Rafael na naapektuhan ang pananim dahil sa El Niño, at mga mangingisda sa Obando na nakaranas ng mga insidente ng fish kill.

“Nararapat lamang na kayo ay alagaan, suportahan, at bigyang pansin sapagkat, unang-una, kayo ang naglalatag at nagbibigay ng pagkain sa hapag-kainan ng mga Pilipino at ng mga Bulakenyo. Salamat po sa inyong pagsusumikap, pagpupursigi,” ani Gob. Daniel R. Fernando.

Siniguro naman ni Bise Gob. Alexis C. Castro sa mga benepisyaryo na hindi pababayaan ng Pamahalaang Panlalawigan ang sektor ng agrikultura.

Ayon kay Jimmy Bernandino, magsasaka mula sa bayan ng San Miguel, malaking epekto ang naidulot ng El Niño sa kanilang buhay dahil tuluyang lumiit ang kanilang kinikita na sapat lamang sa pang-araw-araw nilang gastos kaya naman malaking tulong ang nakuhang tulong pinansyal na magagamit niya bilang panimula muli sa pagsasaka.

Samantala, upang tiyakin ang kahandaan ng mga Bulakenyo sa pagharap sa mga sakuna tulad ng El Niño at La Niña, nagpaalala ang mga kawani ng Provincial Disaster Risk Reduction and Management Office patungkol sa kahalagahan ng pagkakaroon ng sapat na mga suplay at kagamitan para sa tag-ulan na dala ng La Niña.

Payo nila, palagiang maghanda ng emergency kit na naglalaman ng pagkain, tubig, gamot, at iba pang mahahalagang bagay upang maging handa sa lahat ng uri ng sakuna.

INAASAHANG pagsapit ng kalagitnaan ng Hulyo ay maaaring maitaas na ang minimum wage ng mga manggagawa sa National Capital Region (NCR).

Ito’y kasunod na rin nang nakatakda nang pagdaraos ngayong Huwebes, Hunyo 20, ng Regional Tripartite Wages and Productivity Board (RTWPB) ng public hearing hinggil sa petisyong umento sa sahod ng mga manggagawa sa Metro Manila.

Sa kanyang pagdalo sa Kapihan sa Manila Bay media forum, sinabi ni Department of Labor and Employment (DOLE) Secretary Bienvenido Laguesma na maaaring mailabas ang bagong kautusan, bago ang anibersaryo ng pinakahu­ling wage order sa Hulyo.

Ayon kay Laguesma, base sa kasaysayan, ina­aprubahan ng RTWPB ang umento sa sahod matapos ang deliberasyon.

Pagtiyak pa niya, “Ang lahat ng naging deliberation ng wage board magkaroon ng dagdag.”

“Although, sinasabi siyempre na maliit at hindi sapat, pero ang bottom line meron dagdag,” pahayag pa ng kalihim.

Aniya pa, pinasimulan ng RTWPB sa NCR ang proseso noong Mayo kasunod na rin ng direktiba ni Pang. Marcos, kahit wala pang petisyon para sa wage hike.

Gayunman, kamakailan ay isang pormal na petisyon na rin ang inihain ng mga labor groups na humihingi ng P500 na umento sa daily wage ng mga manggagawa sa NCR.

Nabatid na ang kasalukuyang daily minimum wage rate sa NCR ay P610.

ISANG opisyal ng Light Rail Manila Corporation (LRMC), ang operator ng Light Rail Transit Line 1, ang nagsabing sa taong 2031 pa matatapos ang Transit Line 1 (LRT1) Cavite Extension.

“For Phase 2 and 3, we are having meeting with the Department of Transportation (DOTr) to be able to commence the construction. We have to clarify few points before we proceed. In terms of length of construction and pre-activities prior to construction such as financial closure, all the other pre-requisites for the construction, we hope that by 2031, ROWs 2 and 3 would be completed. There are preliminary works already started as far as right of way acquisition is concerned,” wika ni LRMC general manger Enrico Benipayo.

Ang nasabing proyekto ay may halagang PHP 65.915 billion at ito ay binibigyan ng pondo mula sa hybrid model na may PHP 17.80 billion mula sa official development assistance (ODA) na galing sa Japan International Cooperation Agency (JICA).

May pribadong sektor din ang nagbigay ng pondo tulad ng LRMC na nagkakahalaga ng PHP39.57 billion habang ang pamahalaan ay nagbigay ng pondong PHP7.55 billion.

Ito ay may tatlong bahagi at inaasahang makapagdadagdag ng 300,000 pasahero sa araw-araw na ridership ng LRT 1 na magkakaron ng kabuohang 800,000 na pasahero sa unang taon ng full operation ng LRT 1 Cavite Extension sa taong 2031.

Ang proyektong nasabi ay siyang magdudugtong sa Manila at Cavite na mababawasan ang travel time mula Baclaran sa Pasay papuntang Niog, Cavite na magiging 25 minuto train-ride na lamang mula sa dating 1 oras at 10 minuto pagbibiyahe sa lansangan.

Sa Phase 1, ang completion rate ay tinatayang 98.2 na porsiento na hanggang noong katapusan ng April 2024 kung saan ang pagtatayo ay on time naman. Magkakaroon ng karagdagang 6.2 kilometro mula sa existing na LRT 1 mula sa istasyon ng Baclaran sa lungsod ng Pasay hanggang istasyon ng Dr. Santos sa lungsod ng Paranaque.

Ang Phase 1 ay inaasahang magiging operasyonal bago matapos ang taon kung saan ito ay makapagsasakay ng 600,000 na pasahero kada araw.

May limang (5) istasyon ang ang Phase 1 na may kanya-kanyang stages ng completion ng construction ngayon. Ang estasyon ng Redemptorist ay may 97.4 porsiento; Manila International Airport ay 97.2 porsiento; Asia World ay 90.4 porsiento; Ninoy Aquino ay 93.5 porsiento at ang huling estasyon sa Dr. Santos ay may 97.7 porsiento.

“LRT 1 Dr. Santos Station, the end terminal for Phase 1, will serve as a major transit hub. Passengers will have seamless access to various modes of transportation through intermodal facility. The intermodal facility is located with access to and from Dr. A. Santos Avenue and C5 Road Extension and will have designated bays for public buses, jeepneys, taxis, private cars, motorcycles, as well as dedicated parking slots for PWDs,” wika ni Benipayo.

Ayon naman kay DOTr Secretary Jaime Bautista na ang intermodal transport hub ay magbibigay ng iba’t ibang choices ng mode ng transportasyon sa mga pasahero na baba ng LRT 1 Extension.

“The LRT 1 Cavite Extension will contribute to easing the traffic. With the operations of the project, there would be plenty of connectivity to PITX. I think, it will help many passengers, as well as to the airport. With this, it will improve accessibility and comfort to the riding public,” dagdag ni Bautista.

Ang pamasahe naman ay magkakaron  rin ng PHP 13.29 boarding fare at para naman sa distance fare ay PHP 1.21 naman na katulad din ng  LRT 1 at LRT 2. LASACMAR