INATASAN na ng House of Representatives ang Philippine National Police (PNP) na arestuhin si Kingdom of Jesus Christ Pastor Apollo Quiboloy matapos i-cite-for-contempt ang embattled religious leader dahil sa hindi pa rin pagsipot nito sa imbitasyon ng Committee on Legislative Franchises.

Unanimous ang naging boto ng mga miyembro ng House Committee on Legislative Franchises na icite-for-contempt si Kingdom of Jesus Christ Pastor Apollo Quiboloy dahil sa hindi nito pagsipot sa pangatlong pagkakataon na inimbitahan ng Komite.

Si Vice Chairperson at Surigao del Rep. Johnny Pimentel ang naghain ng mosyon para icite-for-contempt ang embattled religious leader na sinigenduhan ni Deputy Speaker Jay-Jay Suarez.

Noong Pebrero naglabas ng subpoena ang kamara na pirmado ni Speaker Martin Romualdez at House Secretary General Reginald Velasco laban kay Quiboloy.

Bago ito, iginiit ni Topacio na mayroon silang “legal justification” na nakasaad sa liham na ipinadala sa House panel na apat na taon nang walang kinalaman sa operasyon ng Sonshine Media Network International o SMNI si Quiboloy.

Hindi rin umano sila umiiwas sa subpoena dahil sa katunayan ay nagpadala pa si Quiboloy ng tatlong indibidwal na makasasagot sa lahat ng tanong ng mga kongresista sa pangunguna ng Executive Pastor na si Marlon Acobo. (Daris Jose)

HINIKAYAT  ni Pang. Ferdinand R. Marcos Jr. ang mga American companies makiisa sa proyekto ng administration ang “Build, Better, More” program na kinabibilangan ng 198 high-impact priority infrastructure flagship projects (IFPs), na nagkakahalaga ng US$148 billion o nasa mahigit P8 trillion.

Ginawa ng Pangulo ang imbitasyon ng humarap ito sa mga opisyal ng US government at sa Presidential Trade and Investment Mission (PTIM) delegation sa Malacanang.

Sinabi ng Pangulo ang mga pangunahing proyektong ito ay sumasaklaw sa iba’t ibang mga sub-sektor, kabilang ang pisikal na koneksyon, mapagkukunan ng tubig, agrikultura, kalusugan, digital connectivity (telekomunikasyon), at enerhiya.

Ilalatag din ng gobyerno ang batayan para sa adhikain ng bansa na maging susunod na logistic hub ang Pilipinas sa Asya.

Ang pamumuhunan sa bansa ay nagtatanghal ng maraming pakinabang para sa mga mamumuhunan na nagnanais na lumago at lumawak.

Ayon kay Pang. Marcos ang Pilipinas na nasa gitna ng Timog-silangang Asya ay nag-aalok ng isang strategic na lokasyon para sa mga negosyo upang magtagumpay.

Bukod sa mga proyektong ito, hinihikayat din ang mga mamumuhunang Amerikano na ilagay ang kanilang pera sa pagpapaunlad ng sektor ng enerhiya ng bansa at paggalugad at pagproseso ng mga kritikal na metal, bukod sa iba pang mga lugar.

Ang pagdating ng US mission sa bansa ay katuparan ng pangako ni US President Joe Biden kay Pangulong Marcos sa kanyang pagbisita sa Washington, D.C. noong Mayo 2023.

Nangako si Biden na magpadala ng mataas na antas na delegasyon sa Pilipinas para pahusayin ang relasyon sa pamumuhunan at kalakalan sa pagitan ng dalawang bansa. (Daris Jose)

IBINASURA ng Korte Suprema ang isang petisyong humihiling na ipawalang-bisa ang Public Utility Vehicle Modernization Program (PUVMP) na isinusulong ng Department of Transportation (DOTr).

Sa desisyon ng Supreme Court (SC) en banc, na iniakda ni Associate Justice Maria Filomena D. Singh, ibinasura nito ang petition for certiorari and prohibition na inihain ng mga petitioners na Bayyo Association. Inc. (Bayyo) at ng pangulo nito na si Anselmo D. Perweg.

Hinahamon ng Bayyo, na nagpapakilala bilang isang samahan na binubuo ng 430 jeepney operators at drivers na rehistrado sa Securities and Exchange Commission (SEC) at nag-o-operate sa iba’t ibang ruta sa Metro Manila, ang validity ng DOTr Department Order (DO) No. 2017-011, na may kinalaman sa implementasyon ng PUVMP.

Ikinatwiran ng mga petitioners na ang DO No. 2017-011 ay isang invalid delegation ng mga legislative power at ang paragraph 5.2 nito ay ‘unconstitutional’ dahil sa paglabag sa due process at equal protection clauses ng Konstitusyon.

Anila pa, kaakibat ng naturang probisyon ang phaseout at pagpapalit ng mga lumang PUVs ng mga brand new at environment-friendly units.

Gayunman, sinabi ng SC na dapat lamang na ibasura ang petisyon dahil sa kakulangan ng legal standing ng petitioners at paglabag sa principle of hierarchy of courts.

Bagama’t nagprisinta ang Bayyo ng Certificate of Registration mula sa SEC na ito ay rehistrado bilang asosasyon ay bigo itong patunayan na ang kanilang mga miyembro ay tunay ngang mga PUJ operators at drivers.

Bigo rin umano ang Bayyo na ipakita kung sino ang kanilang mga miyembro at patunayan na sila ay duly authorized ng mga ito upang ihain ang naturang petisyon.

Nalabag din ang principle of hierarchy of courts, na nagsasaad na ang petisyon ay dapat na idulog muna sa pinakamababang hukuman na siyang may hurisdiksiyon dito, hanggang sa makarating ito sa Korte Suprema. (Daris Jose)

IPO-PROTESTA mapanganib na pagmamaniobra” ng Pilipinas ang kamakailan lamang na probokasyon ng Tsina matapos na magsagawa ng “pangha-harassed, pagharang, paggamit ng water cannons, at pagsasagawa ng ang China Coast Guard (CCG) at Chinese Maritime Militia (CMM) vessels para illegal na hadlangan ang routine ng Philippine resupply at rotation mission sa BRP Sierra Madre sa Ayungin Shoal.

      Sinabi ng Pangulo na ang kamakailan lamang na aksyon ng Tsina ay hindi naman dahilan para kagyat na ipanawagan ang Mutual Defense Treaty (MDT) sa Estados Unidos.

      “However, we continue to view with great alarm this continuing dangerous maneuvers and dangerous actions that are being done against our seamen, our Coast Guard. And this time, they damaged the cargo ship and caused some injury to some of our seamen and I think that we cannot view this in any way but in the most serious way,” ayon sa Pangulo.

      “Once again, we will make our objections known and hope that we can continue to communicate to find a way so that such actions are no longer seen in the West Philippine Sea,” dagdag na wika nito.

Sa ulat, apat na tauhan ng Pilipinas ang nasugatan kasunod ng harassment at mapanganib na aksyon ng Tsina laban sa mga barko ng Pilipinas na naghahatid ng suplay sa mga tropang Filipino na nakapuwesto sa Ayungin Shoal.

      At nang hingan naman ng reaksyon ukol sa napaulat na namataang Chinese research vessels sa Benham Rise, winika ng Pangulo na malinaw na pagpasok ito sa Philippine maritime territory nang walang pahintulot at ito’y “of great concern.”

      Ang presensiya aniya ng Chinese ships sa lugar ay hindi kailangan dahil kung totoo na ito’y research vessel, ang magkabilang panig ay magkakaroon ng simpleng kasunduan para sa research vessels na lumayag sa Philippine waters at magsagawa ng pagsasaliksik.

      “However, there is a suspicion that they are not only research vessels so, again, this is a bit of an escalation of the tension that is present in the West Philippines Sea,”diing pahayag nito. (Daris Jose)

APAT katao ang sugatan nang bombahin ng tubig ng dalawang barko ng China Coast Guard (CCG) ang bangka ng Pilipinas habang nagsasagawa ng resupply mission sa BRP Sierra Madre sa Ayungin Shoal, kamakalawa ng umaga.

Ayon sa National Task Force for the West Philippine Sea (NTF-WPS), nabasag ang windshield ng Unaizah May 4 dahil sa ginawang pagbomba dito ng mga barko ng CCG, na nagresulta sa pagkasugat ng apat na tripulanteng sakay nito.

Ang mga hindi pinangalanang tripulanteng Pinoy ay kaagad namang nalapatan ng lunas ng mga tripulanteng sakay ng BRP Sinda­ngan ng Philippine Coast Guard (PCG).

Kaugnay nito, binatikos ng NTF-WPS ang anila’y “unprovoked acts of coercion and dangerous maneuvers” ng CCG laban sa mga barko ng Pilipinas na naglagay anila sa panganib sa buhay ng mga Pinoy na sakay nito.

“The systematic and consistent manner in which the People’s Republic of China carries out these illegal and irresponsible actions puts into question the sincerity of its calls for peaceful dialogue and lessening of tensions,” ayon sa kalatas.

Ayon naman kay PCG spokesperson for the West Philippine Sea Commodore Jay Tarriela, ang insidente ay naganap kahapon ng umaga habang nagsasagawa ng rotation at reprovisioning operation (Rore) ang Armed Forces of the Philippines (AFP) sa WPS.

Unang naglayag ang dalawang civilian contrac­ted vessels na ­Unaizah May 1 at ­Unaizah May 4 upang magsagawa ng Rore sa BRP Sierra Madre sa WPS. Ang mga ito ay sinamahan at sinuportahan naman ng BRP Cabra at BRP Sinda­ngan.

Pagsapit umano ng alas-6:32 ng umaga ay nagsagawa na umano ng dangerous blocking maneuvers ang CCG vessel 21555 laban sa BRP Sindangan, na nagresulta sa minor collision at pagtatamo ng naturang barko ng “superficial structural damage.”

Dakong alas-8:15 ng umaga ay isa pang barko ng CCG ang nagsagawa rin ng dangerous blocking maneuver laban sa Unaizah May 4, na nag­resulta rin sa minor collision.

Magkasunod rin umanong binomba ng tubig ng mga CCG vessels 21555 at 21551 ang Unaizah May 4, na siyang nagresulta sa pinsala sa barko at pagkasugat sa mga tripulante nito.

Dahil dito, napilitang umikot at bumalik na sa mainland Palawan ang Unaizah May 4, na ines­kortan naman ng BRP Sindangan.

Matagumpay naman umanong nakarating at nakapaghatid ng suplay sa BRP Sierra Madre ang isa pang resupply boat na Unaizah May 1 dakong alas-9:30 umaga. Nakumpleto nito ang kanilang misyon dakong alas-10:45 ng umaga.

Pagtiyak naman ng NTF-WPS, “The Philippines, for its part, conti­nues to act peacefully and responsibly, consistent with international law, particularly UNCLOS and the legally binding 2016 Arbitral Award. Peace and stability cannot be achieved without due regard for the legitimate, well-established, and legally settled rights of others.” (Daris Jose)

NAKAKUHA si Pangulong Ferdinand R. Marcos Jr. ng US$1.53 bilyon, o P86 bilyong puhunan mula sa 14 business deals na nilagdaan sa Philippine Business Forum sa sideline ng ASEAN-Australia Special Summit sa Melbourne nitong Lunes.

Sinabi ni Trade and Industry Secretary Alferdo Pascual, na ang mga business deal ay nakahanda upang himukin ang mga relasyon sa pamumuhunan sa pagitan ng Pilipinas at Australia, at mag-ambag sa paglago ng ekonomiya ng Pilipinas.

Ang naturang kasunduan ay bilang pagpapakita ng commitment at mabungang partnership sa ibat-ibang sector tulad ng renewable energy, waste to energy technology, organic recycling technology, countryside housing initiatives,  establishment of data centres, manufacturing of health technology solutions at digital health services, ayon kay Pascual.

Paliwanag pa ni Pascual, ang nasabing mga sektor ay nagpapakita sa hinaharap ng “Philippine-Australia business engagements”.

Nagsisilbi rin itong solidong pundasyon para mapa­natili ang paglago at benepisyo para sa ugnayan ng dalawang bansa sa hinaharap.

Nagpasalamat naman si Pascual sa mga kum­panya at business leader na nagbigay ng effort para masusing gumawa ng nasabing kasunduan at tiniyak na magkakaroon ng matagumpay at mabungang implementasyon sa naturang mga proyekto.

Ang 14 business deals ay binubuo ng memoranda of understanding (MOUs) sa pagitan ng Filipino at Australian business leaders at dalawang letters of intent (LOIs) mula sa Australian business leaders na nagnanais na mamuhunan sa Pilipinas.

Kabilang sa mga MOU ang pagtatayo at pagpopondo ng isang Tier-3 Data Center na may kapasidad na 30MW-40MW sa Poro Point Freeport Zone na may lawak ng lupa na 16 ektarya; at pagpapalawak ng Next-Generation Battery Manufacturing sa Pilipinas.

Nilagdaan din ang MOU para sa deployment ng mga solusyon sa renewable energy upang mabawasan ang mga gastos sa enerhiya, umasa sa grid power, mapabuti ang sustainability at makamit ang progreso sa decarbonization. (Daris Jose)

DUMATING na si Pangulong Ferdinand R. Marcos Jr. sa Melbourne, Australia para sa ASEAN-Australia Special Summit.

Mainit na sinalubong ng mga Australian government officials si Pangulong Marcos kasama si First Lady Liza Araneta-Marcos at ang Philippine delegates.

Lumapag ang PR 001 na sinakyan ng Pangulo at ng kanyang entourage sa Melbourne Airport ng alas-7:15 ng gabi (Australia time) o 4:15 ng hapon sa Pilipinas.

Sa ASEAN-Australia Special Summit, uulitin ng Pangulo ang posisyon ng Pilipinas sa regional at international issues at pasasalamatan ang Australian government para sa patuloy na suporta sa rule of law.

Inaasahan namang magkakaroon ng bilateral meeting si Pangulong Marcos kasama sina Prime Ministers Samdech Hun Manet ng Cambodia at Christopher Mark Luxon ng New Zealand; makakapulong din niya ang Filipino community sa Melbourne at ipo-promote ang negosyo sa pamamagitan ng Philippine Business Forum ng Department of Trade and Industry; at magbibigay ito ng talumpati sa Lowy Institute kung saan ay bibigyang-diin ang papel ng Pilipinas bilang ‘active participant’ sa world affairs at contributor sa rules-based regional security architecture.

Ang bilateral ties sa pagitan ng Pilipinas at Australia ay itinatag noong Hulyo 4, 1946.

Matatandaang, kapwa tinintahan nina Pangulong Marcos at Australian Prime Minister Anthony Albanese ang isang kasunduan noong Setyembre ng nakaraang taon, itinaas ang bilateral relationship ng Pilipinas at Australia mula komprehensibo sa strategic partnership.

Patuloy namang sinusuportahan ng Australia ang Pilipinas bilang pang-11 na pinakamalaking pinanggagalingan ng Official Development Assistance na may ‘grant commitments’ na nagkakahalaga ng USD180.4 million.

Nagsisilbi namang tahanan ng 408,000 Filipino at Australians na may lahing Filipino ang Australia.

Samantala, maliban kay Pangulong Marcos, ang mga opisyal na bisita ng Australian government ay sina Prime Ministers Anwar Ibrahim ng Malaysia, Sonexay Siphandone ng Laos, at Pham Minh Chính ng Vietnam.

“Australia is proud to be ASEAN’s first Dialogue Partner, sharing 50 years of mutual respect and cooperation with our friends in Southeast Asia,” ayon kay Albanese sa isang kalatas. (Daris Jose)

PINAG-AARALAN ng Department of Social Welfare and Development (DSWD) ang posibilidad na maitaas ang halaga ng tulong pinansiyal na naipagkakaloob sa mga benepisyaryo ng Pantawid Pamilyang Pilipino Program (4Ps) dahil sa mataas na halaga ng ­bilihin.

Ayon sa DSWD, simula nang maging batas ang 4Ps noong taong 2019 ay hindi na nabago ang halagang naipagkakaloob na cash aid sa mga benepisyaryo ng programa.

Sinabi ni DSWD spokesperson Assistant Secretary Romel Lopez na batay sa kautusan ni Pangulong Ferdinand Marcos Jr, kailangang pag-aralan ng DSWD, NEDA at PSA ang tamang formula na gagamitin para maitaas ang tulong na naipagkakaloob ng pamahalaan para sa mahihirap na mamamayan ng bansa.

Gayunman, sinabi ni Lopez na hindi madali na maisagawa ang pagtataas sa cash grant sa mga benepisyaryo ng programa dahil nangangailangan pa ito ng pag-amyenda ng Kongreso sa umiiral na batas tungkol sa 4Ps. (Daris Jose)

SINABI ni Pangulong Ferdinand R. Marcos Jr. na tatlong kasunduan na naglalayong palakasin ang relasyon ng Pilipinas at Australia ang nakatakdang tintahan sa kanyang pagbisita sa Australian capital Canberra.

“I anticipate an enhancement of the mutual understanding between the Philippines and Australia as we share a common vision not just for our bilateral relations, but for the peace and security of the region as well,” ayon kay Pangulong Marcos sa kanyang pre-departure speech na inihayag sa Villamor Air Base in Pasay City.

“I will also have the opportunity to expand our wide-ranging cooperation with Australia through the formalization and signing of three agreements,” dagdag na pahayag ng Pangulo, gayunman, hindi naman dinetalye ng Pangulo ang kasunduan na nakatakdang lagdaan.

Ang Pangulo ay papunta na ngayon sa Canberra bilang “guest of government” dahil na rin sa imbitasyon ni Australian Governor-General David Hurley.

      Nakatakda ring magsalita ang Pangulo sa Australian Parliament para talakayin ang strategic partnership sa pagitan ng dalawang bansa.

Binigyang diin din ni Pangulong Marcos na ang strategic partnership sa pagitan ng Pilipinas at Australia “provides greater energy and optimism for closer cooperation that is mutually beneficial to both Filipinos and Australians”.

“Our engagement in the Parliament will also feature conversations with Australia’s legislative leadership who are vital partners in ensuring a favorable and enabling policy to our relations to continue its upward trajectory,” ang wika ng Pangulo.

Binigyang-diin din ni Pangulong Marcos ang “improved defense and security tie” ng dalawang bansa, tinukoy ang tagumpay ng Exercise Alon at Maritime Cooperative Activity noong nakaraang taon.

Binigyang diin din niya ang pangangailangan na talakayin ang pagpapalwak sa kolaborasyon o pakikipagtulungan sa Australia sa kalakalan at pamumuhunan sa mga darating na taon.

“After all, economic security is a vital component of national security,” ayon kay Pangulong Marcos sabay sabing “I hope to bring home with me a more robust, warmer, and closer Philippine-Australian relations.”

Nauna nang sinabi ng Malakanyang na inaasahan na magdaraos ng hiwalay na pakikipagpulong ang Pangulo sa mga Australian senior officials upang magkaroon ng “constructive discussions on defense and security, trade, investments, people-to-people exchanges, multilateral cooperation, at regional issues,”

Nakatakdang ipagdiwang ng Pilipinas at Australia ang ika- 78 taong anibersaryo ng diplomatic relations sa Nobyembre ngayong taon.

Ang Australia ang itinuturing na “Philippines’ second largest partner in defense and security” at isa sa dalawang bilateral partners na may status ng Visiting Forces Agreement, maliban sa Estados Unidos.

“As of 2022”, tinatayang 408,000 Filipino at Australians na may Filipinong angkan ang itinuturing at tinatawag na kanilang tahanan ang Australia, dahilan para maging fifth-largest migrant community ito sa bansa. (Daris Jose)

TINIYAK ni Speaker Ferdinand Martin  Romualdez sa mga lokal na opisyal partikular sa League of Municipal Mayors  na suportado ng Kamara ang panawagan ni Pang. Ferdinand Marcos Jr na taasan ang share o pondo ng mga LGUs sa taunang national budget.

Ayon kay Romualdez ini-utos ng Pangulo na gawin ang lahat ng nararapat at kailangan ng sa gayon makinabang ang mga komunidad sa pag-unlad ng buong bansa.

Inihayag ni Romualdez na ang Kamara ay maglalaan ng dagdag na pondo sa mga LGUs bilang tugon sa Mandanas ruling ng Supreme Court na siyang nagdadagdag sa share ng  local governments mula sa national taxes.

Sa Mandanas ruling ng Supreme Court,ito ay nagsasaad na ang mga LGUs ay makakatanggap ng 40 percent sa lahat ng mga government tax collections hindi lamang sa internal revenue.

Naniniwala si Speaker na ang dagdag na pondo sa mga LGUs ay marami ang magagawa lalo na sa mga ipinapatupad na programa at mga proyeko na mapapakinabangan ng publiko.

Binigyang-diin ni Romualdez na ramdam  ng national government ang pangangailangan ng mga LGUs para mai-angat ang kabuhayan ng ating mga kababayan.

Sinabi ni Speaker ang commitment ng national government na makipagtulungan sa LGUs para sa epektibong ma-integrate ang local health systems sa pagpapatupad ng Universal Health Care.

Aminado kasi si Speaker na  nangangamba ang mga LGUs  sa epekto ng Mandanas ruling sa isyu ng devolution of health services.

Dahil dito pinawi ni Romualdez ang pangamba ng mga alkalde dahil laging nakahanda ang national government na umalalay sa mga ito.

Pinasalamatan din ni Speaker ang mga municipal mayors at iba pang mga opisyal sa pagtutok sa Sustainable Develop Goals sa kanilang  2024 generally assembly. (Daris Jose)