BILANG  bahagi ng pagsisikap ng pamahalaan  na makapagbigay ng sapat na suplay ng bigas sa bawat filipino, pinangunahan ni Pangulong Ferdinand Marcos Jr., ang pamamahagi ng parte  ng nakumpiskang  smuggled rice sa 1,000 residente sa San Andres, Manila, araw ng Martes.

“Bilang patunay na ang pamahalaan ay seryoso sa pagsugpo ng smuggling – ang mga bitbit po naming mga bigas ngayon ay mula sa mga nakumpiskang supply sa Zamboanga Port, na napatunayang hindi dumaan sa legal na proseso ng importasyon,”  ayon kay Pangulong Marcos sa kanyang talumpati.

Ang bawat  benepisaryo ay nakatanggap ng 25 kilo ng bigas, bahagi ng 42,180 sako ng smuggled rice na nasamsam ng Bureau of Customs (BOC) mula sa isang bodega sa  Brgy. Baliwasan, Zamboanga City  na sa kalaunan ay dinonate (donate) sa Department of Social Welfare and Development (DSWD).

Winika ng Pangulo na mas mabuti na ipamahagi ang bigas sa halip na masayang ito.

Tiniyak naman ni Pangulong Marcos sa mga benepisaryo na ang nasabat na bigas ay dumaan sa legal proceedings bago pa ito ipinamahagi sa kanila.

Sa kabilang dako, muli namang inulit ng Pangulo na may sapat na suplay ng bigas sa Pilipinas.

“Sapat ang supply ng bigas dito sa Pilipinas. Ang kailangan lamang po ay ang maayos na pamamahala ng produksyon at bentahan nito,” anito.

Inihalintulad naman ng Pangulo ang smugglers, hoarders, at price manipulation bilang  “bukbok” (grain weevil) na sumisira sa balanseng suplay ng bigas at presyo sa merkado.

“Ang bukbok na lubos na sumisira sa balanse ng supply at presyo ng bigas sa merkado [ay] ang hoarding at saka ang smuggling, at price manipulation na ginagawa ng mapagsamantalang mga negosyante,”  aniya pa rin.

Giit ng Chief Executive, ang mga ito ay hindi katanggap-tanggap at walang puwang sa lipunan at bansa.

“Sa Bagong Pilipinas, hindi na po ito puwede… Inaatasan ko ang lahat ng mga opisyal, otoridad, at mga ahensya na higpitan nang husto ang pagpapatupad ng polisiya at batas hinggil sa isyu ng bigas,” dagdag na pahayag ng Pangulo.

“Sa Bagong Pilipinas, bawal ang smuggler, bawal ang hoarder, at bawal din ang mga mapang-abuso [at] mapagsamantala sa ating bayan,” diing pahayag ni Pangulong Marcos sabay sabing “These recent operations of collection and distribution are expected to serve as a warning to all the smugglers and hoarders of rice in the Philippines.”

Samantala, pinangunahan ni Pangulong Marcos ang pamamahagi ng  bigas sa  San Andres Sports Complex sa Lungsod ng Maynila.

Nauna rito, namahagi rin ng bigas ang Pangulo sa  mga benepisaryo ng 4Ps sa Tungawan, Zamboanga Sibugay; Iriga City, Camarines Sur; at General Trias, Cavite.  (Daris Jose)

LUMAGDA ang Lungsod ng Valenzuela at ang Department of Transportation (DOTr) sa isang Memorandum of Agreement on the Academic Partnership sa pagitan ng DOTr – Philippine Railways Institute (PRI) at Valenzuela Technological College (ValTech), kasunod ng ceremonial signing ay ang pag-unveil ng Metro Manila Subway (MMS) at ng North-South Commuter Railways (NSCR) scale model exhibit na nakalagay sa gitna ng Valenzuela City Hall.

Pinangunahan ang MOA signing nina Mayor Wes Gatchalian, Secretary Jaime J. Bautista, Usec. Cesar Chavez, PRI Usec. Annelie Lontoc, Asec. Jorjette Aquino, LRTA Administrator Atty. Hernand Cabrera, Atty. Celeste Laute na kumakatawan sa PNR, ValTech Trustee G. Ramon Lopez, ValTech President Dr. Yolanda Gadon, at Vice Mayor Lorie Natividad-Borja.

Kasunod nito ay ang pag-unveil ng mga scale models ng MMS at NSCR exhibit sa gitna ng Valenzuela City Hall kung saan nagpapakita ang mga modelo ng subway depot at isang electric-powered na modelo ng tunnel boring machine na ginamit para sa subway project.

Sa pagsisikap na palakasin ang mga oportunidad sa pag-aaral ng mga mag-aaral ng ValTech, ang lokal na pamahalaan, sa pamumuno ni Mayor Wes Gatchalian, ay gumawa ng akademikong partnership sa DOTr at PRI sa pamamagitan ng paglagda sa isang memorandum of agreement. Layon nito na palawakin ang kurikulum at mga kasanayan para sa mga kurso sa engineering sa ValTech, sa pamamagitan ng suporta at kadalubhasaan ng PRI.

“In furtherance of its vision to offer advanced programs in the field of  Engineering, which will meet the demands of a knowledge-based and technology-driven economy.” nakasaad sa memorandum ng kasunduan.

Dagdag pa rito, itinutuloy din ng lungsod ang pag-aalok ng mga kursong bokasyonal na may kaugnayan sa riles ng mga Valenzuelano sa pamamagitan ng pakikipagtulungan sa DOTr, bilang isang paraan ng pagpapahusay ng kwalipikasyon ng mga estudyante para sa trabaho sa industriya.

Kasama sa saklaw ng mga larangan ng pagtutulungan ang Academe-Industry linkage, Students Internship Program o On-the-Job Training, Faculty/Student training at seminar, at Skill certification sa pamamagitan ng DOTr PRI.

Ang MMS at NSCR ay hindi lamang magbibigay ng kaginhawahan sa karanasan sa pag-commute ng mga Valenzuelano para mabawasan ang oras ng paglalakbay, ngunit ito ay magkakaroon din ng mas maraming trabaho at mga oportunidad sa negosyo para sa mga nasasakupan na nakapalibot sa mga proyektong ito ng riles na higit na magpapalakas sa lokal na ekonomiya sa mahabang panahon. (Richard Mesa)

MULING inimbitahan ni French President Emmanuel Macron si Pangulong Ferdinand R. Marcos Jr. na magsimula ng kanyang state visit sa France.

Ang imbitasyon ni Marcos ay ipinaabot ni newly-designated French Ambassador to the Philippines Marie Fontanel nang mag-prisenta  ang huli ng kanyang credentials kay Pangulong Marcos sa isang seremonya sa Reception Hall ng Palasyo ng Malakanyang, araw ng Miyerkules.

Makikita ito sa  Facebook post ng state-run Radio Television Malacañang (RTVM).

Matatandaang, buwan ng Enero ngayong taon, sinabi ng  French Embassy sa Maynila  na inaasahan nilang bibisita si Pangulong Marcos  sa France sa Hunyo subalit hindi naman natuloy ang naturang plano.

Buwan ng Hunyo nang muling imbitahan ni Macron  ang Pangulo na magsagawa ng  state visit sa France,  subalit hindi nakapagbigay ang gobyerno ng Pilipinas ng update ukol sa posibleng byahe.

Sa nasabing presentasyon ng kanyang credentials sa Pangulo, ipinaabot ni Fontanel  ang congratulatory message ni Macron kay Pangulong Marcos, “for successfully strengthening the Philippines’s economic growth in his first year in office,” base sa  statement na naka-post sa official Facebook page ng RTVM.

“She likewise mentions the French leader’s growing concern about the increasing tensions in the Indo-Pacific region and expresses support for the supremacy of international law,” ang nakasaad pa rin sa kalatas.

Sa kabilang dako, si Fontanel ay itinalaga rin bilang  non-resident ambassador to Palau,  Federated States of Micronesia at Marshall Islands.

Samantala, mainit na tinanggap din ng Pangulo si  bagong  Swiss Ambassador to the Philippines Nicolas Brühl na nag-presenta rin ng kanyang credentials sa hiwalay na seremonya sa Palasyo ng Malakanyang.

Binigyang diin ni Brühl, ang lumalalim na  bilateral relations sa pagitan ng Switzerland at Pilipinas, tinukoy ang kamakailan lamang na ipinatupad na  Free Trade Agreement (FTA) sa pagitan ng dalawang bansa at ang papel ng Switzerland bilang “largest investor” mula Europa sa Pilipinas.

Binigyang diin din nito ang kontribusyon ng Switzerland sa “sustainable peace and stability” sa Pilipinas.

Aniya, nagsisilbi ito bilang  “tangible proof of long-term collaboration based on trust and friendship between the two countries.”

Binigyang-diin din ni Brühl  ang lumalalim na  cultural exchanges sa pagitan ng  Switzerland at Pilipinas, binaggit ang presensiya ng  3,600 Swiss nationals  na nakatira sa bansa.

“He expresses his commitment to further strengthen relationships between the two countries and its peoples,” ayon sa hiwalay na Facebook post ng RTVM.

Samantala, si Brühl ay itinalaga rin bilang non-resident ambassador to the Federated States of Micronesia, Republic of Palau at Republic of the Marshall Islands.

Bago pa siya italaga sa bago niyang posisyon, nagsilbi muna si Brühl bilang Ambassador of Switzerland to South Africa, Botswana, Eswatini, Lesotho, Mauritius at Namibia.  (Daris Jose)

BILANG bahagi ng seleberasyon ng 2023 International Coastal Cleanup (ICC) Day, nagsagawa ang Pamahalaang Lungsod ng Navotas ng simultaneous coastal cleanup drives sa lahat ng 18 barangays sa lungsod.

Nasa 700 na individuals ang lumahok sa event, kabilang ng mga empleyado ng pamahalaang lungsod, national government agencies, barangay officials and staff, students, teachers, non-government organizations, at mga representatives mula sa private institutions.

“Navotas is a coastal city, and a large portion of our population depends on fishing for their income. Keeping the sea and other bodies of water clean is imperative in helping our kababayans maintain their livelihood. Let us make cleanliness a part of our lifestyle,” ani Mayor John Rey Tiangco.

“Our city is the extension of our homes. Just like how we keep our homes in order, let us do our part in maintaining the cleanliness of our communities,” dagdag niya.

Ang City Environment and Natural Resources Office (CENRO) ay nagsagawa din ng ICC campaign sa lahat ng barangays upang itaas ang kamalayan tungkol sa wastong pamamahala ng solid waste segregation-at-source.

Ang ICC Day ay isang pandaigigang kaganapan na nagbubuklod sa mga bansa at mga tao na may iisang layunin na lutasin ang lumalaking problema sa marine debris sa pamamagitan ng pagpapanatili ng kalinisan ng mga baybayin, ilog, lawa at daluyan ng tubig, gayundin ang pangangalap ng data sa uri at dami ng basurang nakolekta. Ito ay na-institutionalize ng Presidential Proclamation No. 470 noong September 15, 2003.

Ang mga volunteers ay kinakailangang magsumite ng kopya ng boluntaryong pormularyo ng data ng basura sa karagatan upang maitala ang mga labi at basurang bagay na kanilang natipon sa panahon ng kaganapan. (Richard Mesa)

HINDI dadalo si Pangulong  Ferdinand Marcos Jr. sa 78th session ng  United Nations General Assembly (UNGA) mula Setyembre 18 hanggang Setyembre 26 sa New York City. 

Gayunman, tiniyak ni  Department of Foreign Affairs (DFA) Secretary Enrique Manalo  na  magpapartisipa ang Pilipinas sa  UNGA 78 kung saan ay pangungunahan niya ang  Filipino delegation  na dadalo sa  nasabing  high-level dialogues.

“On behalf of President Ferdinand Marcos Jr., I will deliver the Philippine National Statement during the UNGA General Debate,” ani Manalo.

“Guided by the President’s national development and foreign policy agenda, I will articulate the Philippines’ advocacies for respect for the rule of law and ambitious climate action, as well as our achievements and aspirations as a middle-income economy with an important voice in global affairs,” dagdag na wika nito.

Kabilang sa mga Filipino delegation sina Environment Secretary Maria Antonia Yulo Loyzaga, Health Secretary Teddy Herbosa, at National Economic Development Authority Undersecretary Rosemarie Edillon.

Makakasama rin ng DFA ang  Department of Finance, local executives mula sa  League of Cities of the Philippines, at Special Envoy of the President to UNICEF Monica Louise Prieto-Teodoro.

Maliban sa iba’t ibang pagpupulong ukol sa international issues, sinabi ni Manalo na nag-organisa ang Pilipinas ng side events kabilang na ang “ministerial roundtable on migration, environment, at climate change” sa Asia-Pacific region na nakatakda sa Setyembre sa  21.

Inaasahan naman na lalagda ng isang bagong kasunduan si Manalo sa ilalim ng “1982 UNCLOS on the conservation and sustainable use of marine biological diversity in areas beyond national jurisdiction” o “High Seas Treaty” sa Setyembre 20.

“I look forward to bilateral meetings with foreign ministers from a number of countries and with key UN officials. I will sign a number of MoUs [memorandum of understanding] establishing political consultation mechanisms with a number of bilateral partners, and discuss a broad range of matters of mutual interest at these meetings,” ayon kay  Manalo.

“I also look forward to an enriching discussion on Philippine foreign policy with friends in the Asia Society,” anito.

Taong 2022, binanggit ni Pangulong Marcos ang iba’t ibang uspain kabilang na ang climate change, peace and stability, at food security sa kanyang naging talumpati sa UNGA. (Daris Jose)

PINAYAGAN ng Commission on Elections (COMELEC) ang Department of Labor and Employement (DOLE) na ituloy ang kanilang cash for work program kahit na umiiral ang election ban.

Sinabi ni Commission on Elections (Comelec) Chairperson George Erwin Garcia na mahalaga ang nasabing programa ng gobyerno at hindi ito puwedeng ipagpaliban ang ganitong programa ng national government para sa mga nawalan ng trabaho.

Mahigpit naman na pinaalalahanan ang mga kandidato ng Barangay elections na bawal silang makisawsaw.

Tanging mga kawani ng DOLE ang mamamahala sa programa at hindi maari ang mga kandidato. (Ara Romero)

TININTAHAN ni Pangulong Ferdinand Marcos Jr., araw ng Martes ang  implementing rules and regulations (IRR)  ng Agrarian Emancipation Act.

Layon nito na tanggalin  ang pasanin sa pagkakautang ng mga agrarian reform beneficiaries na nagkakahalaga ng P57.57-B.

Malinaw na mabubura na ang lahat ng mga hindi nabayaran na amortization ng principal loan kasama na ang interest at multang kailangang bayaran ng nasa  610,054 agrarian reform beneficiaries (ARBs).

Para sa  Chief Executive, marapat lamang na bigyan ng pansin ang hinaing ng mga magsasaka lalo na’t malaki ang kanilang ambag sa bansa.

Gagawin naman ng Pangulo ang lahat ng kanyang makakaya para tugunan ang mga pangangailangan ng mga magsasaka.

Magagawa lamang ani Pangulong Marcos ang bagay na ito kung papayagan ang gobyerno na gampanan ang responsibilidad nito na sa kalaunan ay makatutulong sa  sektor na tupdin ang kanilang papel sa publiko at ekonomiya.

At matapos mabuo ang IRR, tiwala ang Pangulo na mas magkakaroon ng ngipin ang batas at mapapabilis nito ang tulong sa mga benepisaryo.

Sinasabing papalo sa P57.56 bilyon ang pinagsama-samang unpaid amortizations mula sa principal debt ng mga nabanggit na siyang nagpapayabong sa 1.17 milyong ektaryang lupain sa bansa.

Matatandaang, buwan ng Hulyo nang lagdaan  ni Pangulong Marcos ang Republic Act No. 11953 o New Agrarian Emancipation Act.

Sa naging talumpati ng Pangulo, pinuri nito ang mga magsasaka at  agrarian reform beneficiaries sa pagtiyak na mananatiling  accessible ang agricultural commodities sa mga Filipino.

“It is only fitting that we recognize as pillars of this crucial sector whose impact creates positive ripples of transformation within our communities that reverberates not only for us in the present but across future generations,” aniya pa rin.

“I call on everyone to support and take part in the implementation of this landmark legislation,” ayon sa Pangulo sabay sabing  “The need for a whole of nation approach is vital to achieve its goals and secure food production in the future.”

Hanggang sa ngayon ay wala pa ring available na  kopya ng IRR sa  website ng Philippine Gazette.

Sa naging talumpati pa rin ng Pangulo, sinabi nito na pinalawig niya ang  Executive Order No. 4  ng dalawa pang taon  para tulungan ang mga benepisaryo  na hindi sakop ng IRR at maging ng moratorium sa orihinal na  EO.

Ang ekstensyon ay  hanggang Setyembre 13, 2025.

Ang paliwanag ng EO 4, ang Pangulo,  “provides for the moratorium of the principal obligation and interest on amortization payable by the ARB, to include even those who are not covered by the new emancipation law.”

Ang IRR ng EO 4  ay bubuuin sa loob ng 15 araw ng effectivity nito. (Daris Jose)

MAKALIPAS ang mahigit anim na taong pagtatago sa batas, naaresto na ng mga awtoridad sa ikinasang manhunt operation sa Caloocan City ang isang kelot na wanted sa kaso ng tangkang panggagahasa sa Eastern Samar.

Kinilala ni District Special Operation Unit (DSOU) chief P?lt. Col. Robert Sales ang naarestong akusado bilang si Nelson Alidon, 22, tubong Hernani, Eastern Samar at residente ng San Rafael, Guagua, Pampanga.

Sa kanyang report kay Northern Police District (NPD) Director P/BGen. Rizalito Gapas, sinabi ni Lt. Col. Sales na nakatanggap sila ng impormasyon na naispatan ang presensiya ng akusado sa Brgy, 8, Caloocan City.

Kaagad nakipag-ugnayan ang DSOU sa 2nd Coy ESPMFC, Hernani MPS Eastern Samar, PIU- ESPPO at DID- NPD saka nagsagawa ng joint manhunt operation sa pangunguna ni PLt. Armando Pandeagua Jr, kasama ang NDIT-RIU NCR na nagresulta sa pagkakaaresto sa akusado dakong alas-3:30 ng hapon sa Salmon St., Brgy. 8.

Ani Lt. Col. Sales, si Alidon na nasa top 2 most wanted ng Hernani Municipal Police Station (MPS) ay dinakip ng kanyang mga tauhan sa warrant of arrest was na inisyu ni Presiding Judge Nathaniel E. Baldono ng Regioanl Trial Court (RTC) Branch 2, Borongan City, Eastern Samar noong August 2, 2017, para sa kasong Attempted Rape.

Pinuri naman ni BGen. Gapas ang DSOU sa kanilang pagsisikap para tugisin ang mga taong wanted na pinaghahanap ng batas na nagresulta sa pagkakadakip sa akusado. (Richard Mesa)

KALABOSO ang 27-anyos na lalaki nang makuhanan ng shabu at panggigilang dakmain ang puwitan ng 16-anyos na dalagitang estudyante sa Valenzuela City.

Nahaharap sa kasong paglabag sa R.A. 11313 o ang Anti-Bastos Law at paglabag sa RA 9165 o Comprehensive Dangerous Drug Act ang suspek na si Jethro Dionson, ng16 Lemon St. Brgy. CAA BF. Homes, Las Piñas City.

Sa tinanggap na ulat ni Northern Police District (NPD) Director P/BGen. Rizalito Gapas mula kay P/Capt. Richie Garcia, Commander ng Valenzuela Police Sub-Station 9, nagtungo ang biktima, kasama ang mga kaibigan sa isang convenience Store sa Maysan Road, Brgy. Maysan upang bumili ng ice cream dakong alas-8:30 ng gabi.

Habang nakatayo ang biktima malapit sa pintuan ng establisimiento, nang biglang lumapit si Dionson at dinakma ang puwitan ng dalagita na napasigaw dahil sa pagbigla, sabay itinulak ang suspek.

Tumakbo ang suspek palabas at nagtago sa kalapit na terminal ng sasakyan habang isang rider naman na nakasaksi sa pangyayari ang humingi ng tulong sa nagpapatrulyang mga tauhan ng SS-9 na nagresulta sa pagkakadakip sa suspek.

Dinala ang suspek sa presinto at nang atasan siya na ilabas ang laman ng kanyang bulsa ay natuklasan ang isang plastic sachet na naglalaman ng .05 gramo ng shabu na nagkakahalaga ng P340.00. (Richard Mesa)

TAHASANG  sinabi ni House Speaker Ferdinand Romualdez na bahagyang naapektuhan ang presyo ng bigas sa world market matapos pirmahan noong biyernes ni pangulong Marcos ang Executive Order 39 na nagtatakda sa presyo ng bigas sa bansa.

Batay sa US-based company na Markets Insider, bumaba ng 21% ang presyo ng bigas sa pandaigdigang kalakalan mula $384 per metric ton noong Hulyo at ngayon ay nasa $332.4 sa bawat metrikong tonelada na lang.

Ayon kay Romualdez, “timing at effective” ang EO ni Pangulong Marcos dahil nakaapekto ito sa mataas na presyo ng bigas ngayon sa world market.

Ani Romualdez, posibleng kinansela ng mga Filipino importers at traders ang pag-angkat ng bigas mula sa ibang bansa dahil nagmura na ang presyo nito sa lokal na merkado.

“Siguro nung kinansel na nila (mga importers at traders) ang mga orders, biglang dumami tuloy ang stock sa abroad ng bigas”, ani Romualdez.

Sinabi pa ni Romualdez na halata na artificial ang pagsirit ng presyo ng bigas sa mga palengke dahil sa pagtatago ng mga bigas sa bodega nang isagawa ang inspeksiyon.

Dagdag pa ng mambabatas mula Leyte na ang rice price cap ang tanging susi pala para pigilan ang price manipulation at hoarding ng bigas sa bansa na naging senyales naman sa world market.