PINABULAANAN ni dating Pangulong Rodrigo Duterte na nagtatago sa kaniyang bahay si Pastor Apollo Quiboloy.

Ito ay matapos ang bigong paghahanap ng mga otoridad sa Pastor noong suyurin ang kinaroroonan nito sa lungsod ng Davao.

Dagdag pa ng dating pangulo na maraming mga bahay sa Davao si Quiboloy kaya marapat na magtiyaga ang mga otoridad sa paghahanap dito.

Magugunitang isa ang dating pangulo na itinuturing na kalapit ni Quiboloy lalo na noong kaniyang administrasyon. (Daris Jose)

LAGLAG sa selda ang apat na hinihinalang drug personalities matapos makuhanan ng mahigit P.2 milyong halaga ng droga nang maaresto ng pulisya sa isinagawang buy bust operation sa Valenzuela City, kamakalawa ng gabi.

Sa report ni District Drug Enforcement Unit (DDEU) chief P/Major Jeraldson Rivera kay Northern Police District (NPD) Director P/BGen. Rizalito Gapas, nakatanggap sila ng impormasyon hinggil sa umano’y illegal drug activities ng tricycle driver na si alyas “Merlan”, 34, kaya isinailalim nila ito sa validation.

Nang positibo ang ulat, bumuo ng team si Major Rivera sa pangunguna ni P/Capt. Regie Pobadora saka ikinasa nila ang buy bust operation na nagresulta sa pagkakaaresto sa suspek dakong alas-9:05 ng gabi sa loob mismo ng kanyang bahay sa Bacani St., Brgy. Marulas matapos bintahan ng P7,500 halaga ng shabu ang isang pulis na nagpanggap na buyer.

Kasama ring dinakip ng mga operatiba sina alyas “Vicente”, 33, alyas “Wet”, 34, at alyas “Kongkong”. 19, tricycle driver, pawang residente ng Brgy. Marulas matapos maaktuhan ng mga pulis sa loob ng naturang bahay na magkakaharap sa isang maliit na mesa habang gumagamit umano ng droga.

Ayon kay Capt. Pobadora, nakumpiska sa mga suspek ang humigi’t kumulang 30 grams ng hinihinalang shabu na may katumbas na halagang P204,000, buy bust money na isang P500 bill, kasama ang pitong P1,000 boodle money, cellphone, weighing scale at ilang drug paraphernalias.

Pinuri naman ni Gen. Gapas si Major Rivera at ang kanyang mga tauhan sa kanilang pagsisikap na tugisin ang mga taong sangkot sa pagpapakalat ng droga na nagresulta sa pagkakadakip sa mga suspek na mahaharap sa kasong paglabag sa RA 9165 o Comprehensive Dangerous Drug Act of 2002. (Richard Mesa)

NAILIPAT na sa bagong Quezon City Jail sa Barangay Payatas ang nasa 364 Persons Deprived of Liberty (PDLs) na mga senior citizens at may karamdaman.

Ang paglilipat sa mga PDLs ay personal na isinagawa ni QC Jail Warden, JSupt. Warren Geronimo at mga opisyal ng Bureau of Jail Ma­nagement and Penology (BJMP).

Nabatid na ang bagong pasilidad ay may lawak na 2.4 na ektarya at may kakayahan para ma-accommodate ang higit 3,000 PDLs pa sa lumang jail facility.

Nauna nang itinurn-over ng Quezon City government sa BJMP ang bagong pasilidad upang mas mabigyan ng maayos na piitan ang mga preso.

Inayos na rin ang mga perimeter fence na makakapagtiyak sa seguridad ng pasilidad.

Dahil dito, nagpasalamat ang pamunuan ng QCJMD kay Quezon City Mayor Joy Belmonte dahil sa malaking ka­ginhawaan para sa mga PDL ang bagong pasilidad lalo na sa problema ng pagsisikip sa lumang QC Jail.

Tiniyak din ni Geronimo na patuloy pa rin ang kanilang decongestion program sa city jail. (Ara Romero)

WALANG mamamayang Filipino ng napaulat na nasaktan o kabilang sa nasawi kasunod ng malakas na lindol na tumama sa Taiwan, Miyerkules ng umaga.

Sinabi ng Manila Economic and Cultural Office (MECO) na ang lahat ng mga Filipino at overseas Filipino workers sa isla ay “all accounted for and safe”.

“We are thankful that we have not received reports of any of our kababayans being hurt or badly affected by the powerful earthquake that hit Taiwan this morning,” ayon kay MECO Chairperson Silvestre Bello III.

“Based on our monitoring in Taipei and the reports from our field offices in Taichung and Kaohsiung, and the reports coming from our Filipino communities in Taiwan, there are no Filipino casualties or injuries in the aftermath of the earthquake and the aftershocks,” dagdag na wika nito.

Tinatayang may mahigit na 60,000 Filipino ang nagtatrabaho sa Taiwan, base sa pinakabagong data mula sa Department of Migrant Workers (DMW).

Nauna rito, iniulat ng Department of Foreign Affairs at Department of Migrant Workers na walang napaulat sa ngayon na mga Pilipino na nasugatan sa tumamang malakas na lindol sa Taiwan base sa isinagawang initial assessment.

Sa kabila nito mayroon ng inilatag na preemptive protocols para masiguro ang kaligtasan ng lahat ng mga Pilipinong nasa Taiwan.

Ayon kay Foreign Affairs USec. Eduardo de Vega, ipinaalam sa kaniya ni Department of Migrant Workers (DMW) Officer in Charge Hans Cacdac na mayroong isang gusali sa Hualien ang matinding napinsala at mayroong reports din na maraming nasira na mga istruktura matapos ang tumamang malakas na lindol.

Base sa report mula kay Cacdac at labor attaché ng PH sa Taiwan, walang naiulat ang Filipino community sa Hualien na nasugatan sa ngayon.

Patuloy namang kinokontak ng mga opisyal ang mga Filipino community sa lugar para matiyak na sila ay nasa ligtas na kalagayan.

Una na ring sinabi ng DMW na aktibo itong nakabantay sa sitwasyon ng OFWs sa Taiwan matapos ang lindol na tumama sa island state. (Daris Jose)

TINIYAK ni Pangulong Ferdinand R. Marcos Jr. sa mga manggagawang Filipino sa Taiwan na handa ang gobyerno ng Pilipinas na tulungan at suportahan ang mga ito ngayong “difficult times” kasunod ng malakas na lindol na tumama at yumanig sa isla, araw ng Miyerkules.

“We stand ready to assist and support our fellow Filipinos in Taiwan in any way possible during this difficult period,” ayon kay Pangulong Marcos sa isang kalatas matapos ang malakas na lindol na yumanig sa Taiwan.

Idinagdag pa ni Pangulong Marcos na masigasig ang Department of Migrant Workers (DMW) na tiyakin ang kaligtasan ng 159,480 overseas Filipino workers (OFWs) na kasalukuyan ngayong nakatira sa Taiwan.

“Our hearts are with the people of Taiwan as they endure the aftermath of today’s powerful earthquake,” ayon sa Pangulo.

Sa ulat, apat na ang naitalang nasawi at mahigit 50 iba pa ang sugatan matapos tumama ang 7.2 magnitude earthquake sa Taiwan nitong Miyerkules, ang pinakamalakas na lindol na naranasan ng isla sa nakalipas na 25 taon.

Sa ulat ng Reuters, sinabi umano ng pamahalaan ng Taiwan na mga residente sa kabundukan ang mga nasawi sa bahagi ng Hualien, na epicenter ng lindol.

Sa tinatayang 26 na gusali na gumuho, mahigit kalahati sa mga ito ang nasa Hualien, at may 20 katao ang pinapangambahang nakulong sa mga guho.

Sa footage ng Taiwan television stations, makikita rin ang mga gusali na nakatagilid bunga ng pagtama ng lindol dakong 8:00 am, habang papunta sa kanilang mga trabaho ang mga tao, at papasok sa paaralan ang mga estudyante.

“It was very strong. It felt as if the house was going to topple,” ayon sa 60-anyos na si Chang Yu-Lin, hospital worker sa Taipei.

Ayon sa weather agency ng Japan, may ilang maliliit na tsunami waves ang nakarating sa bahagi ng southern prefecture ng Okinawa.

Naglabas din ng tsunami warning ang Seismology Agency ng Pilipinas na inalis din pagkaraan ng ilang oras.

Naramdaman ang mga aftershock sa Taipei, na umabot na sa mahigit 25, ayon sa central weather administration ng Taiwan.

Iniulat din ng Chinese state media na naramdaman ang lindol sa kanilang Fujian province, at sinabi rin ng ilang saksi na naramdaman din ang pagyanig sa Shanghai.

Ayon sa official central news agency ng Taiwan, ang naturang lindol ang pinakamalakas na tumama sa isla mula noong 1999 nang mangyari ang 7.6 magnitude na lindol na kumitil sa buhay ng 2,400 tao, at nagpatumba sa 50,000 gusali. (Daris Jose)

IPINAGMALAKI ni Department of Trade and Industry (DTI) Secretary Alfredo Pascual na sa unang pagkakataon, ang mga export ng Pilipinas ay lumampas sa USD 100 bilyon noong 2023.

Ayon kay Director Bianca Sykimte ng DTI- Export Marketing Bureau (EMB) na ang kabuuang taon na pag-export ng parehong mga produkto at serbisyo ay umabot sa USD 103.6 bilyon, na nagmarka ng 4.8% pagtaas mula sa nakaraang taon.

Aniya, malaki ang ambag sa paglago sa sektor ng information technology at business process management (IT-BPM) at ang mga kita sa turismo.

Aktibo ring nagsusumikap ang DTI upang mapakinabangan ang lakas ng sektor ng serbisyo at tugunan ang mga hamon sa pagluluwas ng paninda.

Kasama sa mga pagsisikap na ito ang pagpapalawak sa service industry sa pamamagitan ng pagpasok ng mga bagong merkado at pagpapalakas gaya ng nakabalangkas sa Philippine Export Development Plan (PEDP) 2023-2028.

Inihayag din ni Sec. Pascual na kanilang kinikilala ang patuloy na mga hamon sa domestic at global trading environment.

Kaya umaasa silang matugunan ang mga umiiral na hadlang sa pagiging mapagkumpitensya sa pag-export ng Pilipinas habang patuloy ipinapatupad ang PEDP para sa 2023 hanggang 2028. (Daris Jose)

ITINALAGA ni Pangulong Ferdinand Marcos Jr. si Lt. Gen. Emmanuel Peralta bilang officer-in-charge (OIC) ng Philippine National Police (PNP) kasunod ng pagreretiro ni Gen. Benjamin Acorda Jr.

“In the exigency of the service, and to ensure the continuous and effective delivery of service, please be informed that Police Lieutenant General Emmanuel Baloloy Peralta is designated as concurrent Officer-in-Charge, Office of the Chief, PNP, effective 31 March 2024, until a replacement is appointed or until otherwise directed by this office,” ang nakasaad sa memorandum na nilagdaan ni Executive Secretary Lucas Bersamin.

Ang naturang memorandum, may petsang Marso 27, ay naka- addressed kay Department of the Interior and Local Government (DILG) Secretary Benjamin Abalos Jr.

Ang PNP ay isang attached agency ng DILG.

Si Peralta ay miyembro ng Philippine Military Academy “Sambisig” Class of 1991 kung saan bago ito mapili bilang PNP OIC Chief ay nagsilbi siya bilang deputy chief for administration.

Samantala, nagpapasalamat ang buong hanay ng Pambansang Pulisya kay Pangulong Marcos at Abalos dahil sa tiwala at suporta kay Gen. Peralta.

Ayon kay PNP PIO Chief PCol. Jean Fajardo maituturing na crucial ang pagkakatalaga kay Peralta bilang OIC chief ng PNP kung kaya’t sinabi nitong committed ang buong hanay ng pulisya sa mga programa ng kasalukuyang administrasyon na layong itaguyod ang kaayusan at kapayapaan sa bansa.

Sa ilalim aniya ng panunungkulan ni Gen. Peralta ipagpapatuloy ang mga magagandang programa ng mga nakalipas na pinuno ng PNP tulad ng iiwang legasiya na “KASIMBAYANAN” ni outgoing PNP Chief Gen. Benjamin Acorda Jr. (Daris Jose)

SINAMPAHAN ng  National Bureau of Investigation-Organized and Transnational Crime Division (NBI-OTCD) ang dalawang indibidwal na responsible sa pagpapalit ng mga buhay na mga manok na nagresulta sa pagkakalugi ng mahigit P200K ng isang poultry company.

Kasong Qualified Theft sa ilalim ng Article 308 in Relation to Article 310 of the Revised Penal Code  ang isinampang kaso laban kina Ruel Torres Barredo at Wilfredo Cruz habang kina Ryan Santos at Reynante Dechosa, truck driver at helper sa truck na ginamit na decoy na pinaghahanap pa sa kasalukuyan ay  nahaharap din sa kahalintulad na kaso.

Ang pagsasampa ng reklamo laban sa mga suspek ay bunsod sa reklamo ng Foster Foods Inc (FFI) , isang kumpanya ng poultry products  at may iba’t-ibang farm at planta sa Luzon kung  saan napansin nila ang pagkakaiba ng timbang ng mga buhay na manok  mula sa kanilang farms at timbang ng buhay na manok na natatanggap nila sa kanilang mga planta

Modus operandi ng mga suspek ay pagpapalitin ang mga premium sized na manok na galing sa kumpanya sa mas mabababang timbang ng manok  na kinukuha sa Hermosa, Bataan.

Inireport ng kumpanya sa NBI dahilan upang magsagawa ng entrapment operation.

Una ay, nagpadala ng escort ang Riverview Farm upang mag-monitor sa biyahe ng kanilang dalawang trucks na may laman na buhay na manok gayunman, hindi umano nila nasundan ang isa nilang truck.

Pero iniulat na nagsabay   din ang dalawang truck sa tulay malapit sa Pulilan exit bago bumalik sa FFI.kaya humingi sila ng magsusupevise para sa unloading ng mga manok

Lumalabas na mayroong pakikialam sa truck GPS safety seal at padlock nito gayundin ang pakikialam sa GPS report.

Mayroon din pagbabago  sa timbang ng mga buhay na manok. Lumalabas na sa mga ikinakarga sa truck ay tumitimbang ng 4,191.23 kilograms pero sa truck scale ticket ang timabang ng manok ay 3,460 kilograms kaya lumalabas na mayroon pagkakaiba na 731.23 kilograms o kabuuan na damage loss na P167,451.67

Nang kinompronta ang driver at helper na si Barredo at Vicente, inamin nila na ipinalit nila ang 520 na mga premium -sized na manok sa maliliit sa isang lugar sa Hermosa.   Bataan kung saan tumanggap sila ng halagang P26,000 sa nasabing transaksiyon habang sina Marvin at Ian ang nag-tamper ng padlock. GENE ADSUARA

SINUSPINDE na ng Department of Trade and Industry ang pagbebenta, manufacture, importation, at distribution ng isang brand ng vape sa local market.

Ito ay matapos ang inilibas na preliminary order ng DTI noong Marso 15, 2024 na nag-uutos sa pagpapatigil sa pagbebenta ng mga vape products na gawa ng kumpanyang Flava Corp. nang dahil sa naging mga paglabag nito sa Republic Act No. 11900 o ang Vape Law.

Ayon sa ahensya ito ay dahil sa hindi pagsunod ng naturang kumpanya sa product communication restrictions, kabilang na ang paggamit ng flavor descriptors at mga artista para sa pag-advertise ng mga produkto nito.

Sabi ni DTI Secretary Alfredo Pascual, ang kautusan na Ito ay nagsisilbing babala sa lahat ng mga manufacturers, importers, distributors, at retailers na huwag gagawa ng anumang uri ng mga illegal particular na sa illegal trading ng mga illicit vapes at iba pang violative products.

Samantala, bukod dito ay ipinunto rin ng kalihim ang Section 12 ng Vape Law na nagbabawal sa pagbebenta ng mga vape products sa mga menor de edad, kabilang na ang paggawa ng mga flavored vapes para makapang-akit pa ng mga kabataan sa pagtangkilik dito.

Kung maaalala, kamakailan lang ay tinatayang aabot sa Php4.6-billion na halaga ng smuggled electronic cigarettes o vapes ang nasabat ng mga tauhan ng Bureau of Customs sa isang warehouses sa Metro Manila. (Daris Jose)