BINITBIT sa selda ang isang tambay matapos mahuli sa aktong nagbebenta ng granada sa Valenzuela City, kamakalawa ng umaga.

Kinilala ni PSMS Roberto Santillan ang naarestong suspek na si Marlon Dela Cruz, 29 at residente ng Doque St., Brgy., Malanday ng lungsod.

Sa report nina PSSg Julius Congson at PCpl Raquel Anguluan kay Valenzuela police chief P/Col. Salvador Destura Jr., nakatanggap ng impormasyon mula sa isang concerned citizen ang Malinta Police Sub-Station 4 sa ilalim ng pangangasiwa ni P/Cpt. Doddie Aguirre hinggil sa isang lalaki na nagbebenta umano ng granada sa Makisig St., Area 1, Pinalagad, Brgy. Malinta.

Kaagad namang rumesponde sa lugar ang mga tauhan ng SS4 sa pangunguna ni PSMS Santillan kung saan nakita nila ang suspek na may kausap na isang lalaki habang may hawak na granada dakong alas-10:30 ng umaga.

Nilapitan siya ni PSMS Santillan saka inaresto at nakumpiska sa kanya ang hawak na isang Grenade Hand Fragmentation MK2 HE bago humingi sila ng tulong sa Station Explosive and Canine Unit (SECU) para ligtas at maayos na maturn-over ang nasabing pampasabog.

Ipinadala ni Col. Destura sa Regional Explosive Canine Unit ng National Capital Region Police Office (RECU-NCRPO) upang masuri kung aktibo at sasabog pa ang granada.

Ani PSMS Santillan, kasong paglabag sa RA 9516 (Illegal/Unlawful Possession of Explosive) ang isasama nila laban sa suspek sa Valenzuela City Prosecutor’s Office. (Richard Mesa)

NAPASOK  ng hackers ang Facebook page ng Philippine Coast Guard.

Sinabi ni PCG spokesperson Coast Guard Rear Admiral Armand Balilo, naganap ang hacking nitong gabi ng Lunes.

Napansin nila ito ng may dalawang malisyosong video ang naipost sa kaniang Facebook page.

Sinubukang tanggalin ng kanilang Coast Guard Public Affairs Service subalit hindi nila ito ma-access.

Hindi rin nag-iwan ng digital trace sa official email address at mobile phone ang hackers para malaman ang security key bilang bahagi ng online security protection. (Daris Jose)

ISINUSULONG ng isang mambabatas ang paglalaan ng taunang cash assistance na P1,000 sa pre-elementary, P2,000 sa elementary, P3,000 sa junior high school, P4,000 sa senior high school at P5,000 sa mga college students.

Nakapaloob ito sa House Bill 6908 na inihain ni Batangas Rep. Gerville “Jinky Bitrics” Luistro.

Ayon sa mambabatas, ipinasa noong 1988 ang batas para sa Free Public Secondary o High School Education.

Matapos ang halos 30 taon noong 2016 ay isinabatas naman ang Universal Access to Quality Tertiary Education o ang Free College Education Program Law.

“Napapanahon na upang atin pang dadagdagan ang access sa edukasyon ng lahat ng ating mga kabataan at mamamayan. Patotohanan din natin ang pagbibigay ng pinakamataas na prayoridad ng budgetary allocation sa edukasyon na syang utos ng ating Saligang Batas. Let’s institutionalize a universal educational assistance program,” anang bagitong mambabatas.

Sakop ng cash assistance sa ilalim ng panukala ang lahat ng estudyante sa public o private schools.

Wala umanong magiging requirement sa economic condition ng student beneficiary o kanyang pamilya para makakuha ng tulong o assistance. Gayundin walang limitasyon aniya sa bilang ng beneficiaries kada amilya.

Ngunit, para magatuloy ang ibinibigay na assistance ay kailangang naka-enroll at dumadalo ng klase o 80% attendance ang student beneficiary.

Magkakaroon rin ng assessment sa halaga ng cash assistance upang maikunsidera ang inflation at iba ang economic indicators na makakaapekto dito. Ang cash ay ipamamahagi sa pamamagitan ngelectronic cash transfer.

“Alam natin na kailangan nating dagdagan at ayusin ang ating mga school buildings. Kailangan din mag upgrade ng ating mga school facilities, laboratories at mga computers. Ang ating mga guro ay nararapat na mabigyan ng sapat at kaukulang mga trainings at skills upgrading.Subalit, ang ating mga mag aaral ang una dapat sa lahat. Ang cash assistance sa House Bill 6908 ay maliit na baon lamang, subalit malayo ang mararating nito upang ang ating mga estudyante ay makapasok araw-araw at tuluyang makatapos ng pag aaral,” pagtatapos ni Luistro .  (Ara Romero)

MAS pinalakas pa ng Navotas City Hospital (NCH) ang kapasidad nitong magbigay ng libreng dialysis treatment, kasunod ng basbas ng walong bagong hemodialysis machine.

Pinangunahan ni Mayor John Rey Tiangco, kasama si Vice Mayor Tito Sanchez at ang mga konsehal ng lungsod ang pagbabasbas ng mga dialysis unit sa NCH.

Mula sa 15, ang city hospital ay maaari na ngayong tumanggap ng 21 session bawat araw para sa mga non-infectious na pasyente. Ang isang makina o tatlong sesyon ay inilaan para sa mga may mga nakakahawang sakit.

“We seek to provide the best possible medical services that’s why we also strive to keep our equipment and facilities in top shape,” ani Mayor Tiangco.

“However, more than giving them these services, we want Navoteños to take good care of their health to avoid contracting lifestyle diseases and undergoing treatments,” dagdag niya.

Ang mga miyembro ng Philhealth ay maaaring maka-avail ng hanggang 156 na libreng hemodialysis session bawat taon. Bago maabot ang limitasyong ito, ang mga pasyenteng Navoteño ay nakatala sa pambansa at lokal na mga programa sa tulong medikal upang makatulong na mabayaran ang P2,600 na halaga bawat sesyon.

Ang mga pasyente ay gumagamit ng dalawa hanggang tatlong dialysis treatment kada linggo.

Upang maisama sa listahan ng mga benepisyaryo, ang mga pasyente ay dapat masuri ng isang nephrologist o internal medicine na doktor na naka-duty at bigyan ng kaalaman tungkol sa dialysis treatment protocols, policies, treatment schedules, at iba pa.

Unang binuksan sa publiko ang hemodialysis unit ng NCH noong 2017. (Richard Mesa)

PUMASOK ang Pamahalaang Lungsod ng Navotas sa isang Memorandum of Agreement para sa pagtatag ng isang Public Employment Service Office (PESO) Help Desk sa Navotas Polytechnic College (NPC) at lahat ng senior high school sa Navotas.

Pinirmahan ni Mayor John Rey Tiangco ang MOA kasama si Dr. Meliton Zurbano, Schools Division Superintendent; Dr. Joel M. Chavez, Pangulo ng NPC; at Rey Sanglay, Supervising Labor and Employment Officer ng Department of Labor and Employment-CAMANAVA.

Layunin ng programa na palakasin ang paghahatid ng mga employment services sa mga estudyanteng Navoteño at mga bagong graduate.

Kasama sa mga serbisyo ang Special Program for the Employment of Students (SPES), impormasyon sa job market, referral at placement, career guidance at employment coaching, at Labor Education for Graduating Students (LEGS), bukod sa iba pa.

“Through the PESO Desks, Navoteño youth will be more guided, prepared, and equipped for the career they wish to pursue,” ani Tiangco.

“But more than being career-ready, we hope young Navoteños will develop discipline, critical and creative thinking, emotional stability, adaptability, and other skills and values that will help become successful in life,” dagdag niya.

Dumalo rin sa seremonya sina Estelita Aguilar, PESO Navotas Action Officer; Dr. Marco Meduranda, SDO Navotas Curriculum Implementation Division Chief; at Editha Peregrino, Public School District Supervisor.

Sinusuportahan ng pamahalaang lungsod ang mga naghahanap ng trabaho sa pamamagitan ng lingguhang mga in-house job interview at mega job fair. Nagbibigay din ito ng tulong at kinikilala ang mga posibleng kasosyo para sa student work immersion. (Richard Mesa)

UMABOT sa mahigit P2.4 milyong halaga ng illegal na droga ang nasamsam sa isang drug suspect na itinuturing bilang High Value Individual (HVI) matapos matimbog ng pulisya sa isinagawang buy bust operation sa Valenzuela City, Huwebes ng umaga.

Kinilala ni Valenzuela police chief P/Col. Salvador Destura Jr. ang naarestong suspek na si alyas “ Reymond Hudas”, 33 ng Block 4, Lot 5, Phase 2A, Northville 1, Brgy., Bignay.

Sa kanyang report kay Northern Police District (NPD) Director P/BGen. Rizalito Gapas, sinabi ni Col. Destura na nakatanggap ng impormasyon ang mga operatiba ng Station Drug Enforcement Unit (SDEU) hinggil sa pagputok ng pangalan ni “Hudas” sa pagbebenta umano ng droga sa kanilang lugar at kalapit na mga barangay.

Isinailalim ng SDEU sa validation ang suspek at nang positibo ang ulat ay agad nagkasa ang mga ito ng buy bust operation sa pangunguna ni P/Cpt. Ronald Sanchez at PEMS Restie Mables kung saan isang pulis na nagpanggap na buyer ang nagawang makipagtransaksyon kay “Hudas” ng P8,500 halaga ng droga.

Nang matanggap ang pre-arranged signal mula sa kanyang kasama na hudyat na nakabili na ito ng droga sa kanilang target ay agad lumapit ang back-up na operatiba saka dinamba si “Hudas” sa harap mismo ng kanyang bahay dakong alas-7:40 ng umaga.

Ayon kay Cpt. Sanchez, nakumpiska sa suspek ang humigi’t kumulang 365 grams ng hinihinalang shabu na nagkakahalaga ng P2,482,000, buy bust money na isang tunay na P500 bill, kasama ang 8-pirasong P1,000 boodle money, hard case, cellphone at digital weighing scale.

Ani PSSg Carlos Erasquin Jr, kasong paglabag sa Sections 5 at 11 under Article II of RA 9165 (Comrehensive Dangerous Drug Act of 2002) ang isasampa nilang kaso laban sa suspek sa Valenzuela City Prosecutors Office.

Pinuri naman ni Gen. Gapas si Col. Destura at kanyang mga tauhan sa kanilang pagtugon sa inilatag na agenda ng PNP Chief na “Aggressive & Honest Law Enforcement Operations” na nagresulta sa pagkakaaresto sa suspek. (Richard Mesa)

OUT na si Mylah R. Roque bilang miyembro ng ng Board of Trustees ng Home Development Fund / Pag-IBIG Fund.

Sa katunayan, itinalaga ni Pangulong Ferdinand Marcos Jr., si Maria Lourdes D. Doria-Velarde bilang kapalit ni Roque, asawa ni dating presidential spokesperson Harry Roque.

Si Doria-Velarde ang magiging kinatawan ng pribadong sektor sa Pag-IBIG.

Tinuran pa ng Malakanyang, si Doria-Velarde ay dating deputy general manager for administration ng Duty Free Philippines, at miyembro ng Board of Trustees ng Nayong Pilipino Foundation at Intercontinental Broadcasting Corp.

“She is also a content creator and culinary arts expert,” ayon pa rin sa Malakanyang.

Samantala, sinasabing di umano’y ang dahilan ng pagpapalitan at pagkakatalaga ay matapos magbatuhan ng akusasyon ukol sa paggamit ng droga sina Pangulong Ferdinand Marcos Jr. at dating Pangulong Rodrigo Roa Duterte. (Daris Jose)

BINIGYANG -DIIN ng Presidential Task Force on Media Security (PTFoMS) na mayroong itong malakas at maaasahan na partnership sa mga makabuluhang ahensiya ng pamahalaan na may atas na i-promote at protektahan ang buhay, kalayaan at seguridad ng mga miyembro ng mga mamamahayag.

Tinukoy ang 100% na case resolution ng karahasan laban sa mga mamamahayag sa ilalim ng administrasyong Marcos.

“While we always recognize that there will always be room for improvement and the task ahead of us always proved challenging, it would be unfair to downgrade the current inter-agency effort to address violence against the media headed by the PTFoMS as lacking ‘institutional capacity, proper systems or a clear policy framework on the protection and safety and prevention of attacks on journalist,’ as mentioned in the preliminary observations by UNSR Irene Khan,” ayon kay PTFoMS Executive Director Usec. Paul M. Gutierrez.

Ang PTFoMS at Iba pang kaugnay na ahensiya ng pamahalaan ay mayroong kasunduan kay Khan sa naging pagbisita nito sa bansa mula Enero 22 hanggang Pebrero 2, 2024, natanggap ang kopya ng kanilang preliminary observations matapos ang kanilang departure.

Sa katunayan, sa apat na kaso ng media killings sa ilalim ng administrasyon na tinukoy ni Ms. Khan, ang mga ito ay ang Renato Blanco (September 18, 2022), Percival Mabasa (October 3, 2022), Cris Bundoquin (May 29, 2023) at Juan ‘DJ Johnny Walker’ Jumalon (November 5, 2023), sinasabing nabigyan ng maling impormasyon si Khan na tanging isang kaso lamang ang nausig at may isa pang nasa proseso ng imbestigasyon.

“This conclusion is erroneous as the facts of these incidents showed that all the suspects have already been identified, some of them already in detention and already undergoing trial, with the exception of the Jumalon case where the complaint for murder and theft against the 3 identified suspects are presently under evaluation by the provincial prosecutor of Misamis Occidental,” ayon kay Gutierrez.

“All these positive developments, needless to say, are products of the close coordination between the PTFoMS and our law enforcement agencies,” diing pahayag nito.

Pinasalamatan naman ni Gutierrez ang Commission on Human Rights (CHR) at si chair, Atty. Richard Palpal-latoc, para sa “strong partnership” ng kanilang ahensiya para pagtibayin ang press freedom at human rights, sinasabing ang CHR ay bahagi rin ng PTFoMS.

Aniya pa, nakatakdang lagdaan ng magkabilang panig ang memorandum of understanding para mas palakasin pa ang kanilang pakikipag-ugnayan at partnership.

“We always view our partnership with the CHR in a positive light as we are on the same page when it comes to the promotion and strengthening of human rights in general and the right to freedom of opinion and expression in particular. Thus, we welcome any suggestion or constructive criticism coming from it,” ayon pa rin kay Gutierrez.

Idinagdag pa nito na sa ngayon ay naghahanda na ang PTFoMS ng kanilang pormal na pagtugon sa preliminary observations ni Khan na inaasahang maghahain ng kanyang initial report sa High Commissioner for Human Rights ng United Nations sa kalagitnaan ng taon.

“Moving forward, we intend to clarify any wrong impression or conclusion that Ms. Khan formed during her visit while seriously studying her recommendations to further strengthen our effort towards creating a media environment that is safe and free from fear as directed by Pres. Ferdinand Marcos Jr.,” ayon kay Gutierrez. (Daris Jose)

SA ospital ang bagsak ng isang pulis at kasamang sibilyan matapos pagtulungan kuyugin ng walong kalalakihan, kabilang ang dalawang kagawad ng barangay at executive officer (Ex-O) makaraang dakpin ang isang lalaking sangkot sa ilegal na droga sa Caloocan City.

Ginagamot sa hindi tinukoy na pagamutan sina P/Cpl. Roger Lagarto, nakatalaga sa Caloocan Police Station Drug Enforcement Unit (SDEU) at sibilyang si Adrian Villagomez, 37, ng Libis Espina, Brgy. 18, makaraang magtamo ng seryosong mga sugat sa ulo, mukha at buong katawan, batay sa inilabas na medico-legal certificate ng kanilang attending physician.

Kinilala naman ni Caloocan police chief P/Col. Ruben Lacuesta ang mga naarestong suspek na sina Kagawad Jimmy Marinda, 53, at Ex-O Ferdinand Basmayor, 43, ng Brgy. 36, na kapuwa positibo sa alcohol nang isailalim sa medical examination, habang tinutugis pa ang isa pang Kagawad na si Renato Rivera, alyas “Tisoy” at lima pang kalalakihan.

Sa kanyang ulat kay Northern Police District (NPD) Director P/BGen. Rizalito Gapas, sinabi ni Col. Lacuesta na nagsasagawa ng paniniktik at pagmo-monitor ang mga tauhan ng SDEU sa pangunguna ni P/SSg. Jason Taguba sa Barangay 36, dakong alas-11 ng gabi nang arestuhin ni Cpl. Lagarto at kasamang sibilyan si alyas “Joshua” na siyang target ng kanilang operasyon matapos mamataan sa kahabaan ng Marulas B St. Brgy, 36.

Nang dadalhin na nila sa Barangay Hall ang suspek upang isailalim sa imbentaryo ang nakuha sa kanyang ilegal na droga, ay hinarang sila at pinagtulungang gulpihin ng mga kalalakihan, kabilang ang dalawang Barangay Kagawad at Ex-O, kahit nagpakilala na si Lagarto na isang pulis.

Kaagad namang sumaklulo ang mga kasamahan ni Lagarto na nagresulta sa pagkakaaresto sa mga suspek, habang nagawang makatakas ng iba pa.

Ayon kay Col. Lacuesta, sasampahan nila ng patong-patong na kasong obstruction of justice, direct assault, at serious physical injuries ang mga barangay official at kanilang mga kasama sa Caloocan City Prosecutor’s Office. (Richard Mesa)

INAPRUBAHAN  ng House Committee on Labor and Employment ang draft substitute bill sa House Bill (HB) 7043, na naglalayong palakasin ang karapatan ng mga manggagawa na magwelga.

Ipinaliwanag ni Deputy Speaker at TUCP Party-list Rep. Democrito Mendoza (Partylist, TUCP), may-akda ng panukala na, “The right to strike and to engage in concerted peaceful activity is a constitutional right,” at idinagdag niya na ang 1987 Konstitusyon ay isa lamang sa kakaunting konstitusyon na naggagawad ng naturang karapatan.

Sa ilalim ng panukala, ang pagpapatalsik sa manggagawa ay tatanggalin bilang ‘immediate disciplinary action for non-compliance of orders of the Secretary of Labor and Employment; ang mga manggagawa na nakagawa ng mga iligal na aksyon lamang ay hindi matatanggal sa trabaho, at ang paglahok nito sa welga ay hindi maaaring maging dahilan para ipataw ang disciplinary action; ang parusang pagkabilanggo sa mga paglabag ay hindi na kasama rito, at iba pa.

Binigyang diin ni Trade Union Congress of the Philippines (TUCP) vice chairman Luis Manuel Corral na ang mga panukalang reporma ay may implikasyon sa pandaigdigang merkado ng negosyo at pagtatrabaho.

Ayon sa kanya, ang US global labor policy ay workers-centered, na siyang batayan sa mga negosasyon sa Indo-Pacific economic framework trade map. Aniya, ikokonsidera ng US Congress ang mga polisiya ng workers-centeredness kapag muli nitong pinahintulutan ang generalized system of preferences (USGSP).

Magpapairal din ang European Union na kanilang generalized system of preferences (EUGSP) sa kanilang bahagi.

Nagpahayag naman ng suporta ang mga kinatawan ng National Conciliation and Mediation Board (NCMB) at ang National Anti-Poverty Commission (NAPC) sa 7043.

Sumang-ayon rin ang komite na pagsama-samahin ang mga HBs 839, 1678, 2291, 2547, 3242, 4191 at 6273, na inihain nina Reps. Christian Tell Yap, Patrick Michael Vargas, Eduardo ‘Bro. Eddie’ Villanueva, Keith Micah ‘Atty. Mike’ Tan, Yedda Marie Romualdez, Eric Go Yap, at Teodorico Haresco Jr. ayon sa pagkakasunod, na lahat ay naglalayong isainstitusyon ang Tulong Panghanapbuhay sa Ating Disadvantaged/ Displaced workers (TUPAD) Program ng Department of Labor and Employment.

Pagsasama-samahin din ang mga HBs 2600, 3387 at 4757, o ang panukala na mag-aamyenda sa RA 8759, o ang Public Employment Service Office (PESO) Act of 1999, na inamyendahan, na isasama ang entrepreneurship sa ilalim ng sakop ng batas. (ARA ROMERO)