IPINAABOT ng Pilipinas ang imbitasyon nito sa Japan na magpartisipa sa Balikatan military exercises sa susunod na taon sa pagitan ng mga military ng Pilipinas at Estados Unidos.

Sinabi ni Col Michael Logico, tagapagsalita para sa 2024 Balikatan Exercises, na nagpahayag ng interest ang Japan na sumali sa annual joint exercises mula pa noong Oktubre 2023.

“So we sent an invitation. However, October was really too late for them to commit to any participation aside from sending observers,” ayon kay Logico.

Subalit dahil sa kakapusan ng oras para sa paghahanda, sa halip ay magpapadala na lamang ang Japanese Self Defense Force ng mga observers o mga tagapagmasid para sa Balikatan Exercises ngayong taon na magsisimula sa Abril 22, araw ng Lunes.

“So tama po, mayroong mga observers coming from JSDF, iyong Japanese Self Defense Force. But, I will say as early as now, we are already extending the invitation for Japan to take part in the next Balikatan exercise,” ayon kay Logico.

“So as early as the concept development po, kasama na po iyong representatives from Japan so that we can firm up a wider participation from the armed forces po ng Japan,” aniya pa rin.

Nauna rito, ipinahayag ni Pangulong Ferdinand Marcos Jr. na wala siyang pagtutol na isama ang Japan sa taunang Balikatan exercises o military exercises.

Idinagdag pa ng Pangulo na ang partisipasyon ng Japan ay makatutulong na mapanatili ang kapayapaan at katatagan, freedom of navigation at pagsunod sa “totally and completely, and constantly to the rule of international law” partikular na sa United Nations Convention on the Law of the Sea (UNCLOS).

Samantala, sinabi ni Logico na inaasahan na ang 2024 Balikatan exercises ay magiging “largest ever” na mayroong 11,000 sundalong amerikano at mahigit sa 5,000 sundalong Filipino ang inaasahan na magpapartisipa.

“Mayroon din tayong mga participants from the Australian Defense Force (ADF), more or less, mga 150. And we are expecting the participation po ng Marine Nationale, iyong French Navy. They will be sending a frigate to take part in the multilateral maritime exercises off the coast of Palawan, western portion,” ayon kay Logico.

Kasama rin sa Balikatan Exercises ang iba pang ahensiya ng Pilipinas gaya ng Philippine National Police at e Philippine Coast Guard.

“In the earlier Balikatan which I have been involved din, nag-umpisa po tayo sa mga tactical level exercises, small units focusing on tactics. Ngayon po, when we are already progressing, we are elevating Balikatan to evolve into more at the operational level and also involve other agencies,” ayon kay Logico.

“So, we can categorize this as an inter-agency effort ‘no. So we are—tama po iyon, we are involving also the Philippine National Police, the Philippine Coast Guard because these are also stakeholders when it comes to security, these are all security practitioners. So, aside from coast guard ay mayroon pa diyan – iyong Office of Civil Defense, from the Department of National Defense, some representatives of Department of Foreign Affairs and the DICT,” litaniya nito. (Daris Jose)

INIHAYAG ni House Majority Leader Manuel Jose Dalipe na aaksyunan ng Kamara ang kahilingan ni Assistant Majority Leader Jay Khonghun na imbestigahan ang alegasyon na nagkaroon ng gentleman’s agreement sa pagitan nina dating Presidente Rodrigo Roa Duterte at Tsina kaugnay sa West Philippine Sea.

Ayon kay Dalipe, chairman ng House Committee on Rules, posibleng umpisahan ang imbestigasyon sa pagbabalik ng regular sessions ng Kongreso.

“The inquiry is aimed at guaranteeing transparency and protecting the national interests. The House of Representatives is committed to conducting a comprehensive and fair inquiry to clarify this critical national issue,” ani Dalipe

Nakatakdang magbalik ng sesyon ang kamara sa Abril 29. Vina de Guzman

PINALAGAN ni Pangulong Ferdinand Marcos Jr., ang pagkukumpara sa pagitan ng kanyang anti-wang-wang policy at kay dating Pangulong Benigno Aquino III, nagpatupad ng kahalintulad na kautusan noong panahon ng kanyang termino.

Nilinaw ni Pangulong Marcos na ang kamakailan lamang na nilagdaan niyang Executive Order No. 56 ay hindi lamang para sa pagbabawal ng paggamit ng wang-wang.

“It’s about really the number of [low-numbered o protocol license] plates na binawasan namin ,” ayon kay Pangulong Marcos.

Inaasahan ng EO 56 na mapipigilan ang pag-aabuso at mapapahusay naman ang transparency sa pamamagitan ng pinahigpit na regulasyonn sa pagpapalabas ng special plates na ibinigay sa mga opisyal ng pamahalaan.

Ipinalabas ang EO sa gitna ng tumataas na public concern sa paglaganap ng protocol plates, nagkakaloob ng special privileges sa mga sasakyan sa lansangan kabilang na ang exemption mula sa number coding scheme.

“This executive order aims to promote a more transparent and accountable system for the issuance of protocol license plates,” ang nakasaad sa kautusan sabay sabing “It ensures these privileges are used appropriately by a designated group of officials for legitimate purposes.”

“So that’s what really, that’s what it is about. So this is not about the wangwang, that’s a very small part of it. What it really is, is to impose discipline,” ang pahayag ng Pangulo.

Ipinalabas din ng Pangulo ang Administrative Order No. 18, nilagdaan ni Executive Secretary Lucas Bersamin noong Marso 25.

“All government officials and personnel are prohibited from utilizing sirens, blinkers and other similar gadgets that produce exceptionally loud or startling sound, including dome lights, blinkers, or other similar signaling or flashing devices,” ang mababasa sa kautusan.

Dahil sa kautusan, exempted ang opisyal na sasakyan ng Armed Forces of the Philippines (AFP), National Bureau of Investigation (NBI) at Philippine National Police (PNP) at maging ang mga track ng bumbero, hospital ambulances at iba pang emergency vehicles.

Matatandaang, inanunsyo ni dating Pangulong Benigno Aquino III sa kanyang presidential inaugural address noong 2010 ang polisiya laban sa paggamit ng wang-wang, sinasabing pagpapakita kasi ito ng “entitlement at the expense of ordinary Filipinos.”

Nagpatupad din noon ang kanyang ama na si dating Pangulong Ferdinand Marcos Sr., ng kahalintulad na pagbabawal noong martial law years. (Daris Jose)

KULANG  ang P610 kada araw na minimum wage sa Metro Manila para mabuhay nang “disente” ang pamilyang may limang miyembro sa rehiyon nitong Marso, ayon sa panibagong pag-aaral ng isang economic think tank.

Ito ang lumabas matapos ibahagi ng IBON Foundation, Miyerkules, ang kanilang estima sa “family living wage” sa National Capital Region (NCR) para sa buwan ng Marso 2024.

“A family of five in NCR should receieve a wage of Php 1,197/day or Php 26,033/month in order to live decently,” wika ng IBON sa isang pahayag.

“The low wages and incomes of many Filipinos aren’t enough to keep up with the rising costs of basic goods and services.”

Ibinase ng grupo ang kanilang computations mula sa datos ng National Wages and Productivity Commission (NPWPC), Philippine Statistics Authority 2018 Family Income and Expenditures Survey at nakaraang March 2024 Inflation Report.

Ang P610/araw na minimum wage, na siyang naging epektibo noon pang ika-16 ng Hulyo, 2023, ang pinakamataas na sa buong Pilipinas. Ibig sabihin, mas mababa ito sa nalalabing bahagi ng Pilipinas.

Kung eestimahin ang layo ng NCR minimum na sahod sa NCR family living wage, lalabas na 49% ang wage gap. Ibig sabihin, P587 ang kulang para maabot ang family living wage sa Metro Manila.

Gayunpaman, sinasabing pinakamalayo ito sa Bangsamoro Autonomous Region in Muslim Mindanao (BARMM) sa wage gap na 82%. Sinasabing kinakailangan ng paa ng P1,692 para maabot ang P2,053/araw na family living wage doon.

Nananatiling nasa P361/araw ang minimum na pasahod sa nasabing rehiyon sa Mindanao.

Matagal nang nananawagan ang mga progresibong grupo’t Makabayan Bloc na madagdagan ng P720 ang arawang minimum na sahod sa buong bansa para maisara ang naturang wage gap.

Una nang nakalusot sa pagdinig ng Senado ang Senate Bill 2534 para maipasa ang isang P100 wage hike. Sa kabila nito, patuloy na tinututulan ng economic managers at business groups dahil sa banta ng “wage distortion” at diumano’y epekto nito sa inflation.

Ilang araw pa lang ang nakalilipas nang maiulat na lumobo sa 3.7% ang inflation rate sa bansa nitong Marso, primarya dahil sa mabilis na pagtaas ng presyo ng pagkain at gastusin sa transportasyon. (Daris Jose)

INANUNSYO ni Pangulong Ferdinand Marcos Jr. na wala ng ekstensyon sa aplikasyon para sa consolidation ng indibidwal na public utility vehicle (PUV) operators na bumuo o sumali sa transportation cooperatives.

Matapos ang ilang ekstensyon, nito lamang huling bahagi ng Enero ay itinakda ni Pangulong Marcos ang bagong deadline para sa consolidation sa Abril 30, 2024.

”Sa kahuli-hulihan, wala na pong extension ‘yung (consolidation). Kailangan na kailangan na natin ‘yan,” ayon kay Pangulong Marcos sa idinaos na open forum ng Bagong Pilipinas Town Hall Meeting on Traffic Concerns.

“Ang tinitiyak lang namin, hindi na mapabigat pa ang babayaran at iuutang ng driver-operator kaya ginagawa nating maayos at well-organized ‘yung sistema na ‘yan,” dagdag na pahayag ng Chief Executive.

Sa ulat, pinalawig ng pamahalaan ang deadline ng consolidation para sa P.U.V. Modernization Program.

Ayon sa Presidential Communications Office, inaprubahan ni Pangulong Marcos ang rekomendasyon ni Transportation Secretary Jaime Bautista na palawigin pa ng 3 buwan hanggang April 30, 2024 ang consolidation ng mga tradisyunal na jeep.

Ito’y upang bigyan ng pagkakataon ang mga jeepney operator at drivers na hindi umabot sa cut off na makapag-consolidate.

Matatandaang natapos noong December 31, 2023 ang deadline para sa P.U.V. Consolidation. (Daris Jose)

INIMBITAHAN ni Pangulong Ferdinand R. Marcos Jr. ang publiko na makilahok sa nalalapit na traffic summit at sumali sa talakayan sa paghahanda ng paraan para mapabuti ang sitwasyon sa trapiko.

Sa kanyang YouTube vlog, sinabi ni Pangulong Marcos na habang ang long-term infrastructure projects ay isinasagawa, patuloy pa ring naghahanap ang gobyerno ng paraan para mabigyan ang mga mananakay at motorista ng agarang lunas mula sa traffic congestion.

“Concerned government agencies and local government units will discuss in detail the steps to be taken that would address the perennial traffic woes,” ayon sa Pangulo.

“Makilahok din kayo kahit sa comments section para malaman namin ang iba niyong mga idea at mga naiisip ninyo,” aniya pa rin.

Ang townhall meeting-style summit ay gagawin sa FilOil EcoOil Centre sa San Juan City, araw ng Miyerkules.

Sa kanyang six-minute vlog, sinabi ng Pangulo na ang pag-develop at pagpapabuti sa mobility sa kalapit-lalawigan ng Kalakhang Maynila gaya ng Bulacan, Pampanga, Laguna, at Cavite ay prayoridad para tugunan ang matinding problema sa trapiko.

Gayunman, humingi naman ng pang-unawa si Pangulong Marcos dahil matatagalan pa para makumpleto ang large-scale infrastructure projects.

Umapela rin ang Punong Ehekutibo sa mga mananakay at motorista na maging disiplinado at sumunod sa batas-trapiko.

“Ang higit nating kakulangang mga Pilipino sa daan ay ang disiplina. Dapat susunod tayo sa traffic rules. Para tayong mauubusan lagi ng kalye. Bago man ang kalye, kung luma pa rin ang ugali natin, eh wala rin,” ayon sa Pangulo.

“Ang pagbibigayan sa daan ay kailangan pa nating ipaalala sa bawat isa at sa ating mga sarili. Ang Bagong Pilipino ay disiplinado, sumusunod sa batas trapiko, nagbibigay sa kapwa at higit sa lahat hindi naghahari-harian sa daan,” dagdag na wika ng Chief Executive.

Gayundin, kinilala naman ng Pangulo ang benepisyo at pagiging epektibo ng flexible work arrangements na ginagamit ng pribadong sektor dito sa Pilipinas at sa ibang bansa sa kasagsagan ng Covid-19 pandemic.

Binanggit din nito na ang paggamit ng work-from-home setup at four-day workweek scheme, ay maaaring makatulong para tugunan ang traffic situation sa bansa. (Daris Jose)

TININTAHAN ni Pangulong Ferdinand R. Marcos Jr. ang dalawang proklamasyon na naglalayong lumikha ng special economic zones sa Pasig City at Tanza, Cavite.

Nilagdaan ng Pangulo ang Proclamations 512 at 513, noong Abril 1 na isinapubliko naman, araw ng Miyerkules.

Sa ilalim ng Proclamation 512, pinili ni Pangulong Marcos ang ilang sukat ng lupain na may kabuuang 123,837 square meters sa Ugong, Pasig City bilang information technology (IT) park, matatagpuan sa E. Rodriguez Jr. Avenue, at kikilalanin bilang Arcovia City.

Nagpalabas din ang Pangulo ng Proclamation 513, lilikha sa MetroCas Industrial Estates-Special Economic Zone sa Tanza, Cavite.

Sakop ng Proclamation 513 ang 404,141 square meters ng lupain sa Calibuyo village sa Tanza, Cavite.

Sa kabilang dako, ipinalabas naman ni Pangulong Marcos ang dalawang proklamasyon sa ilalim ng Republic Act (RA) 7916 o Special Economic Zone Act of 1995, inamiyendahan ng RA 8748, at bunsod na rin ng rekumendasyon ng Board of Directors ng Philippine Economic Zone Authority (PEZA).

Ang RA 7916, nilagdaan upang maging ganap na batas noong Pebrero 24, 1995, naglalayong hikayatin ang economic growth sa pamamagitan ng development ng special economic zones na tinawag na “ecozones.”

Ang Special economic zones ay tinutukoy sa batas bilang “selected areas with highly developed or which have the potential to be developed into agro-industrial, Industrial tourist/recreational, commercial banking, investment and financial centers.”

Kabilang sa ecozone ay industrial estates, export processing zones, free trade zones, at tourist/recreational centers.

Ang IT parks ay hubs o sentro na ‘entitled’ sa lahat ng benepisyo na ipinagkakaloob sa special economic zones upang gawin itong mas “attractive” sa foreign investors na nais na magtayo ng kanilang business process outsourcing offices. (Daris Jose)

INATASAN ni Pangulong Ferdinand Marcos Jr. ang bagong hinirang na Philippine National Police (PNP) chief Major General Rommel Francisco Marbil na tulungan ang gobyerno na tugunan ang mga sumusulpot na banta sa kapayapaan at kaayusan sa bansa.

Sa isang seremonya para sa PNP change of command na idinaos sa Camp Crame, Quezon City, sinabi ni Pangulong Marcos kay Marbil na “You have my full confidence and my full support, as you begin to champion a police that is pro-God, pro-country, pro-people, pro-environment. Let us work closely with you in addressing emerging threats, such as cybercrime, terrorism, and transnational crimes.”

Sinabi pa ng Chief Executive na kailangang tiyakin ng PNP ang “highest standards of professionalism” at magbigay ng pinakamahusay na serbisyo sa mga mamamayan.

“Let us now ensure that the PNP will be agents of progressive transformation in the lives of our people by ensuring the safety and well-being of every community in the land,” dagdag na wika nito.

Nasungkit ni Marbil ang pinakamataas na posisyon sa PNP matapos na opisyal ang pagreretiro sa serbisyo si General Benjamin Acorda, ngayong araw ng Lunes, Abril 1, tatlong buwan matapos na I-extend ni Pangulong Marcos ang kanyang termino.

Bago pa itinalaga si Marbil bilang hepe ng PNP, itinalaga muna ito bilang officer-in-charge ng Directorate for Comptrollership ng institusyon.

Nagsilbi rin si Marbil bilang police director of Eastern Visayas.

Araw ng Linggo, inanunsyo ng Malakanyang na itinalaga si Lieutenant General Emmanuel Baloloy Peralta bilang PNP officer-in-charge habang nakabinbin ang pag-exit ni Acorda subalit hindi naman nagtagal ay kaagad naman siyang pinalitan ni Marbil, kung saan ang designasyon ay inihayag sa seremonya sa PNP headquarters sa Camp Crame at pagkatapos ay nanumpa sa tungkulin sa kaparehong event.

Si Marbil ay pang-30 hepe ng PNP.