SA kulungan ang bagsak ng dalawa sa tatlong holdaper na nambiktima at sumaksak sa 50-anyos na mister matapos masakote ng pulisya sa manhunt operation sa Malabon City.

Kinilala ang mga naarestong suspek na sina alyas “Jessie”, 27, ng Kasarinlan St. Brgy. Muzon at alyas “Edison”, 20, ng Manapat St. Brgy., Tañong habang tinutugis pa ng pulisya ang isa nilang kasama.

Sa imbestigasyon nina P/SSg. Bengie Nalogoc at P/SSg. Michel Oben, habang naglalakad pauwi ang biktimang si alyas “Romel” ng Brgy. 8, Caloocan City dakong alas-2:30 ng madaling araw nang huminto sa kanyang harapan ang motorsiklong sinasakyan ng mga suspek sa Dagat-Dagatan Avenue corner P. Aquino St., Brgy. Longos saka tinutukan siya ng patalim sabay nagdeklara ng holdap.

Tinangka namang pumalag ng biktima na naging dahilan upang tarakan siya sa mukha ni ‘Jessie’ gamit ang isang barbecue stick, sabay hablot naman ng isa pang suspek sa dala niyang sling bag na naglalaman ng P3,200 cash.

Matapos nito, mabilis na tumakas ang mga suspek patungo sa Pinagsabugan Street habang humingi naman ng tulong ng biktima sa pulisya na agad nagsagawa ng follow-up operation na nagresulta sa pagkakadakip sa dalawang holdaper. (Richard Mesa)

HINIKAYAT ni Agriculture Secretary Francisco Tiu Laurel Jr. ang mga opisyal ng National Food Authority (NFA) na iniimbestigahan sa di umano’y hindi tamang pagbebenta ng NFA buffer stock rice sa subsidized price na boluntaryong mag- leave of absence (LOA).

Sinabi ni Laurel sa mga kinauukulang opisyal na pahintulutan ang investigating panel ng Department of Agriculture’s (DA) na rebisahin at i-assess mabuti ang bagay na ito ng “without hindrance.”

“The best thing is, and I strongly advise them, to take a leave of absence… at least the heads, the accused, and the accuser,” ayon sa Kalihim.

Gayunman, tiniyak ni Laurel na ang sinuman ay ipinapalagay na inosente, kinokonsidera ang pagpapalitan ng alegasyon sa loob ng NFA.

“Until proven guilty, everyone is innocent. But this internal investigation is very important so let’s give it time,” ang tinuran ni Laurel.

Sinabi pa nito na ang imbestigasyon ay unang hakbang lamang at ang mga susunod na aksyon ng departameno ay ikakasa lamang sa oras na lumabas na ang resulta ng imbestigasyon.

Hindi naman nagbigay ng deadline si Laurel, gayunman, inaasahan ng Kalihim ang mabilis at tamang assessment result.

Nauna rito, sinabi ni NFA Assistant Administrator for Operations Lemuel Pagayunan na mayroon di umanong bentahan ng 75,000 bags ng NFA rice na hindi dumaan sa public bidding.

May kinalaman di umano ito sa mahigit na P93.7 milyong halaga ng NFA rice, ipinagbili sa mga piling millers at traders sa presyo ng P25 per kg.

Samantala, sinabi ng DA na iginigiit ng mga opisyal ng NFA na ang pagbebenta ay sumunod sa tamang pamamaraan at hayagang itinanggi ang anumang iregularidad. (Daris Jose)

HINAMON ni Pangulong Ferdinand R. Marcos Jr. si Kingdom of Jesus Christ (KOJC) founder Pastor Apollo Quiboloy na lumantad at harapin ang imbestigasyon laban sa kanya ng Kongreso na may kinalaman sa criminal allegations laban sa kanya.

“I would just advise him that, just, kung mayroon naman siyang sasabihin, if … he has an opportunity in the hearings both in the House (of Representatives) and the Senate to say his side of the story. Kaya po sinasabi niya, hindi totoo lahat ‘yan, hindi totoo, walang nangyayaring ganiyan, ‘di sabihin niya,” ayon kay Pangulong Marcos.

“The best way to defuse that situation for him is to testify before the committees in the House and in the Senate,” dagdag na pahayag nito.

Sinabi ito ng Pangulo ilang oras bago siya lumipad patungong Australia.

Tinanong kasi ang Pangulo sa naging pahayag ni Quiboloy na siya at si Unang Ginang Louise “Liza” Araneta-Marcos ay nakikipagsabawatan sa US government para ipatumba siya.

Giit ni Pangulong Marcos na hindi pa siya Pangulo ng bansa nang isampa ang kaso laban kay Quiboloy sa Estados Unidos.

Aniya, pinalalala lamang ni Quiboloy ang mga bagay-bagay na may kinalaman sa kaso na isinampa laban sa kanya lalo pa’t mas pinili niyang manatiling nagtatago.

Pinanindigan naman ng Pangulo na walang sinuman ang nais na ipatumba si Quiboloy.

“At pagkaganito, ano nangyayari diyan, hindi siya sisipot. ‘Pag hindi siya sumipot baka ma-contempt siya, tapos tuloy-tuloy. Ay naku, mas malaking gulo. Kung makapunta siya, sagutin niya lahat ng tanong, ‘di tapos na,” aniya pa rin.

“That’s why my advice for him is to just face the questioning in the House and in the Senate. Marinig natin ang kaniyang side para malaman natin kung ano ba talagang nangyayari dito. We’re trying to be fair here and allowing him an opportunity and fora to make his case. So, I think he should take advantage of that,” dagdag na pahayag ng Chief Executive sabay sabing “Walang may gustong mag-assassinate sa kaniya. Bakit siya i-assassinate, wala namang— why would anyone want him dead? Hindi ko naiintindihan ‘yung sinasabi niya. Bakit siya i-assassinate.”

Samantala, lumabas ng bansa si Pangulong Marcos at nagpunta ng Australia para magsalita sa Parliament of Australia dahil na rin sa imbitasyon ni Governor-General David Hurley at mas palakasin ang bilateral ties sa pagitan ng dalawang bansa.

Sa ulat, hinamon ng Kongreso si Quiboloy na harapin ang imbestigasyon laban sa kanya ng Kongreso.

Ipinaalala ni House Senior Deputy Speaker at Pampanga Rep. Aurelio Gonzales Jr. kay Quiboloy na “no one is above the law.

“Magkita-kita po tayo Pastor Quiboloy sa March 12,” sabi pa ni Gonzales.

Sa naturang petsa magpapatuloy ang pagdinig ng House committee on legislative franchises kaugnay sa panukala na bawiin ang prangkisa ng Sonshine Media Network International (SMNI) dahil sa mga paglabag umano nito.

Nagpalabas na ang Kamara ng subpoena laban kay Quiboloy matapos itong ilang ulit na hindi dumalo sa imbitasyon ng komite. Si Quiboloy ang pinaniniwalaang beneficial owner ng SMNI.

Subalit sa halip na tumugon sa subpoena, naglabas ng audio clip si Quiboloy kung saan inakusahan nito sina Pangulong Ferdinand Marcos Jr., First Lady Liza Marcos, at Speaker Ferdinand Martin Romualdez na nakikipagsabwatan sa Estados Unidos upang ipadukot o ipatumba siya.

Ang hakbang na ito ni Quiboloy, ayon kay Gonzales ay isang pagtatangka na ilihis ang atensyon ng publiko sa mga totoong isyu at ilatag ang kanyang magiging dahilan kung bakit hindi sumunod sa subpoena.

Samantala, natanggap na ng kampo ni Quiboloy ang subpoena ng Senado kung saan inobliga siyang dumalo sa susunod na pagdinig sa Marso 5, 2024. (Daris Jose)

NANAWAGAN si Pangulong Ferdinand Marcos Jr. sa Home Development Mutual Fund o Pag-IBIG Fund na gawing mas accessible sa mga Filipino ang kanilang home mortgage financing upang matugunan ang housing backlog sa bansa.

Sa Pag-IBIG Fund Chairman’s Report for Year 2023 sa Pasay City, binati ng Pangulo ang Pag-IBIG Fund para sa record-high performance nito noong nakaraang taon.

Gayunman, tinuran ng Punong Ehekutibo na “We are far from declaring ‘mission accomplished’… we have inherited a huge housing backlog that must be reduced.”

“And so with the same spirit, I urge the Pag-IBIG Fund to make its home mortgage financing even more accessible and to balance this with sustainability. This is to inspire Filipinos today, and the generations to come, to work hard to reach their goal of a house that they can call their own,” aniya pa rin.

“With millions of our countrymen denied the right to decent shelter, the stakes could not be higher. So, our task is clear: To build the most number of housing units by any administration,” dagdag na wika nito.

Sa kabilang dako, sa ulat naman ni Secretary Jose Rizalino Acuzar, pinuno ng Department of Human Settlements and Urban Development (DHSUD) at chairman ng 11-member Pag-IBIG Fund Board of Trustees, sinabi nito na sama-samang nakaipon ang mga miyembro ng P89.26 billion noong 2023, itinuturing na “new record-high” para sa laki ng membership savings sa kasaysayan ng ahensiya.

Para naman sa Modified Pag-IBIG 2 (MP2) savings, ang mga miyembro ay sama-samang nakaipon ng P46.54 billion.

Ani Acuzar, ipinalabas naman ng Pag-IBIG Fund ang pinakamataas na housing loan na P126.04 billion, layon na tulungan na tustusan ang mahigit sa 96,000 housing units.

Kaya sinabi ni Pangulong Marcos na “the challenge, including those in the Pag-IBIG, the housing sector, and the local government units, is to translate the recent gains into actual homes people can move into.”

Sa kabilang dako, ipinatutupad naman na ng administrasyong Marcos ang Pambansang Pabahay Para sa Pilipino Housing (4PH) Program naglalayong tugunan ang pangangailangan para sa disenteng pabahay at gusali para sa maaaring maging epekto sa isang matatag na sektor sa lumalagong ekonomiya.

Mayroon itong ambisyosong adhikain na magtayo ng isang milyong low-cost housing units kada taon hanggang sa pagtatapos ng termino ni Pangulong Marcos.

Samantala, sinabi ni Acuzar na mayroong P20.17 billion approved loans ang inaprubahan para sa 4PH program, layon na tulungan na pondohan ang 17,791 housing units.

Nangako naman si Acuzar ng P250 billion hanggang 2028 para sa 4PH program. (Daris Jose)

LUMIPAD kahapon Feb 28, Miyerkoles si Pangulong Ferdinand R. Marcos Jr. tungo ng Canberra para palakasin ang umiiral na “bonds of cooperation” at talakayin ang mga bagong paraan ng pakikipagtulungan sa Australia.

Sa press briefing sa Malakanyang, sinabi ni Department of Foreign Affairs (DFA) Spokesperson Ma. Teresita Daza na magsasagawa ang Pangulo ng Guest of Government visit sa Australia mula Pebrero 28-29, bilang tugon na rin sa naging imbitasyon sa kanya ni Governor General David Hurley.

“The visit is envisioned to further cement the strategic partnership that reaffirmed the two countries’ shared interest in regional prosperity and peace,” aniya pa rin.

“The President’s visit and official activities in Canberra shall further strengthen existing bonds of cooperation and shall enable discussions for new avenues of collaboration, as both the Philippines and Australia look forward to celebrating the 78th anniversary of diplomatic relations later this year,” ayon kay Daza.

Sa nasabing pagbisita ng Pangulo, inaasahan na magsasalita ang Pangulo sa parliament of Australia kung saan tatalakayin niya ang pananaw at ang hinaharap sa ilalim ng Philippines-Australia strategic partnership.

Si Pangulong Marcos ang unang Pangulo ng bansa na magsasalita sa Australian Parliament.

Magkakaroon din ang Pangulo ng pormal na pagpapalitan ng pananaw at kabatiran sa iba’t ibang larangan ng pagtutulungan at regional issues kasama ang mga Australian senior officials kabilang na sina Governor General Hurley, Prime Minister Anthony Albanese, at iba ang Australian Parliamentary leaders.

Setyembre ng nakaraang taon, kapwa nagkasundo ang Pilipinas at Australia na paigtingin ang kanilang relasyon mula sa komprehensibo ay maging strategic partnership para pahintulutan ang dalawang bansa na palawakin ang kanilang pagtutulungan sa iba’t ibang larangan.

Sa kabilang dako, ang pagbisita sa Canberra ay ang ‘first leg’ ng pagbisita ni Pangulong Marcos sa Australia.

Inaasahan din na magpapartisipa ang Pangulo sa ASEAN-Australia Special Summit sa March 4-6, 2024, sa imbitasyon naman ni Prime Minister Albanese.

Ang Australia ay itinuring na ASEAN’s oldest dialogue partner. Ito rin ang isa sa “most active, dynamic in all fronts” kabilang na ang political security, economic, at social cultural pillars. (Daris Jose)

REHAS na bakal ang kinasadlakan ng dalawang lalaki matapos maaktuhan ng pulisya na naglalaro ng ilegal na sugal at makuhanan pa ng shabu sa Valenzuela City, kamakalawa ng hapon.

Sa report ni PCpl Glenn De Chavez kay Valenzuela police chief P/Col. Salvador DesturaJr., habang nagpapatrolya ang mga tauhan ng Dalandanan Sub-Station 6 sa Brgy. Dalandanan nang ireport sa kanila ng isang concerned citizen ang hinggil sa dalawang lalaki na naglalaro ng ‘cara y cruz’ sa Overland St., Sumilang Subd., sa naturang barangay.

Kaagad pinuntahan ng mga pulis ang lugar kung saan naaktuhan nila ang dalawang suspek na sina alyas “Matunan”, 21, at alyas “Marcelo”, 37, na naglalaro ng cara y cruz dakong alas-5:20 ng hapon.

Nang sitahin, nagtangkang pumalag si “Marcelo” subalit naaresto din siya at kanyang kasama ng mga pulis kung saan nakuha sa kanila ang dalawang plastic sachets ng hinihinalang shabu na nagkakahalaga ng P20,400, P195 bet money at tatlong peson coin na gamit bilang ‘pangara’.

Mahaharap ang mga suspek sa kasong paglabag sa PD 1602 (Anti-Illegal Gambling Law/Cara y Cruz), Art 151 of RPC (Resistance and disobedience to a person in authority or the agents of such person) at RA 9165 (Comprehensive Dangerous Drug Act of 2002). (Richard Mesa)

NAUDLOT ang paglagda sana sa panulakang Magna Carta of Filipino Seafarers, araw ng Lunes dahil sinabi ng Malakanyang na kailangan pa itong rebisahing mabuti.

Hangad ng Magna Carta of Filipino Seafarers na ayusin ang karapatan at responsibilidad ng mga seafarers o madaragat at magtatag ng mekanismo para sa proteksyon ng karapatan ng mga seafarer at paano sila hihingi ng tulong at lunas mula sa mga ahensiya ng pamahalaan.

Nauna rito, sa isang liham mula sa Presidential Legislative Liaison Office (PLLO) para sa Mababang Kapulungan ng Kongreso, nakasaad dito na nakatakdang lagdaan ng Pangulo ang Magna Carta of Filipino Seafarers sa isang ceremonial signing sa Palasyo ng Malakanyang, ngayong araw ng Lunes, Pebrero 26.

Tanging ang Republic Act 11981, o Tatak Pinoy Act, at Republic Act 11982, nagkakaloob ng benepisyo sa mga Octogenarians and Nonagenarians ang dalawang batas na nilagdaan ng Pangulo.

“Under further review,” ang sinabi naman ni PCO Secretary Cheloy Garafil nang tanungin kung bakit hindi nakasama ang Magna Carta of Filipino Seafarers sa mga nilagdaang batas ng Pangulo.

Matatandaang sinertipikahan ng Pangulo ang batas na ito bilang urgent noong Setyembre ng nakaraang taon, naglalayon ito na tiyakin na ang mga Filipino seafarers ay patuloy na magkakaroon ng kalamangan mula sa kanilang foreign counterparts sa pamamagitan ng pagsasanay at akreditasyon.

Sakop nito ang mga Filipino seafarers “who are employed or engaged or work in any capacity onboard foreign-registered ships and Philippine-registered ships operating internationally.”

Hangad ng batas na tugunan ang kakulangan sa domestic laws vis-a-vis sa pagsunod ng bansa sa international maritime standards at rights and welfare ng mga seafarers.

“This is to address recurring deficiencies in the domestic laws pertaining to the training and accreditation of thousands of Filipino seafarers, which endanger their employment in the European market in particular, and the global maritime arena, in general,” ayon sa PCO. (Daris Jose)

MAAARING magsampa ng kaso ang Pilipinas laban sa China at Vietnam sa gitna ng alegasyon ng cyanide fishing sa Bajo de Masinloc.

Sinabi ni National Task Force West Philippine Sea (NTF WPS) spokesperson Jonathan Malaya na sisimulan na ng pamahalaan na imbestigahan ang ulat ng paggamit ng cyanide.

Ang resulta ng imbestigasyon ay ipadadala Department of Justice (DOJ) at Office of the Solicitor General (OSG) para sa posibleng paghahain ng kaso sa korte.

“We will investigate this report and if validated puwede natin itong i-forward sa DOJ at OSG because sila po ngayon ang gumagawa ng mga hakbang para mapalakas iyong pinaplano nating pagsasampa ng kaso kung saan mang tribunal for environmental degradation,” ayon kay Malaya sa panayam ng Bagong Pilipinas Ngayon.

Sa ulat, ibinunyag ng Bureau of Fisheries and Aquatic Resources (BFAR) na ginamitan ng cyanide ng Chinese fishermen ang Bajo de Masinloc upang maitaboy sa lugar ang mga mangingisdang Pinoy.

Maging ang Vietnamese fishermen ay gumagamit din ng cyanide sa Bajo de Masinloc o Scarborough Shoal.

“At sinasabi, according to Filipino fishermen, ‘yung mga Chinese fishermen, if I am not mistaken, ay gumagamit ng cyanide as well ang mga Vietnamese fishers,” ayon kay BFAR spokesperson Nazario Briguera.

Nakumpirma rin nila ang pagkasira ng mga coral reefs mula sa kanilang  ground personnel dahil sa

Samantala, sinabi ni Malaya na ang National Security Council (NSC) kung saan ay nagsisilbi rin siya bilang assistant director general, ay naalarma sa ulat ng paggamit ng cyanide sa Bajo de Masinloc.

“But, we have to be careful also. So we have to validate and investigate,” paliwanag nito.

“So ang sabi namin sa BFAR, ‘Complete the documentation that you have taken, iyong mga ebidensiya at mga affidavits na makukuha natin. Submit your post-mission report to the NTF WPS.’”aniya pa rin.

Para naman kay Chinese Foreign Ministry spokesperson Mao Ning na ang alegasyon na gumagamit ng cyanide ang mga mangingisdang intsik ay malinaw na kathang-isip lamang.

Bagama’t iginigiit ng China na mayroong itong soberanya sa “Huangyan Dao” at katabing-katubigan, sinabi ni Chinese Foreign Ministry spokesperson Mao Ning na “Chinese government attaches great importance to the protection of eco-environment and conservation of fishing resource and resolutely fights against fishing activities that violate laws and regulations.”

Gaya na rin ng inihayag ng Chinese Embassy in the Philippines na ang alegasyon laban sa mga mangingisdang intsik ay walang basehan.

“Such continuous disinformation has led up to nothing but exacerbation of the maritime tensions and destabilization of bilateral relations,” ayon sa embahada.

“We urge the relevant Philippine agencies to handle maritime issues with all seriousness and meet the Chinese side halfway in safeguarding bilateral relations as well as peace and stability in the South China Sea.” anito pa rin. (Daris Jose)

NASAMSAM ng pulisya ang mahigit P.4 milyong halaga ng droga at isang baril sa apat drug suspects, kabilang ang isang itinuturing na high value individual (HVI) matapos matimbog sa magkahiwalay na buy bust buy bust operation sa Caloocan City.

Ani District Drug Enforcement Unit (DEU) ng Northern Police District (NPD) chief P/Major Jeraldson Rivera, ikinasa nila ang buy bust operation kontra kay “Bong”, 48, HVI matapos magpositibo sa kanilang isinagawang validation ang natanggap nilang impormasyon hinggil sa umano’y pagbebenta nito ng shabu sa kanilang lugar.

Nang tanggapin ni “Bong” ang buy bust money mula sa isang pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba, kasama sina alyas “Daniel”, 40 at “Domingo”, 52, sa Blk 7, Villa Enrico Phase 5, Brgy. 171 dakong alas-2:15 ng hapon.

Ayon kay Major Rivera, nakumpiska sa mga suspek ang humigi’t kumulang 53 grams ng hinihinalang shabu na may standard drug price value na P360,400, buy bust money at isang caliber 38 na may apat na bala.

Nauna rito, nadakma naman ng mga operatiba ng Station Drug Enforcement Unit (SDEU) ng Caloocan police sina alyas “Jepoy” at “Jerome” sa buy bust operation sa Torsillo St., Barangay 28 dakong ala-1:31 ng madaling araw.

Sinabi ni Caloocan police chief P/Col. Ruben Lacuesta na nakumpiska sa mga suspek ang humigi’t kumualang 17.03 grams ng hinihinalang shabu na nagkakahalaga ng P115,804.00 at buy bust money.

Pinuri naman ni NPD Director P/BGen. Rizalito Gapas ang DDEU at Caloocan police sa kanilang pagtugon sa inilatag na agenda ng PNP Chief na “Aggressive & Honest Law Enforcement Operations” na nagresulta sa pagkakaaresto sa mga suspek. (Richard Mesa)

NAKAPAGTALA  na ng isang patay at umakyat na sa 52 ang sugatan sa nangyaring pagguho ng ikalawang palapag ng St. Peter the Apostle Church sa San Jose del Monte, Bulacan sa kasagsagan ng misa para sa Ash Wednesday ngayong araw.

Ayon kay Mayor Arthur Robes, kinilala ng mga otoridad ang nasawing biktima na si Luneta Morales, 80 taong gulang, na hindi na nakaligtas pa sa naturang insidente matapos na magtamo ng malaking pinsala nang dahil sa pagbagsak ng naturang simbahan.

Habang sinabi naman ni City Disaster Risk Reduction Management Office head Gina Ayson, dagsa ang mga tao sa naturang simbahan at marami rin ang nakapila para sa magpapahid ng abo nang mangyari an naturang insidente.

Sabi ni Parish priest Romulo Perez, dati nang infested ng anay ang ikalawang palapag ng naturang simbahan na gawa sa kahoy.

Matatandaang batay sa ulat ng San Jose del Monte Public Information Office, lagpas alas-7:00 ng umaga nangyaring ang nasabing pagguho na agad namang nirespondehan ng mga kinauukulan.

Dahil dito ay agad na ipinag-utos ang pansamantalang pagpapasara sa simbahan para magbigay daan naman sa gagawing assessment ng city engineering and building officials sa gusali. (Gene Adsuara)