TININTAHAN ni Pangulong Ferdinand R. Marcos Jr. upang maging ganap na batas ang Republic Act No. 12019, mas kilala bilang Loss and Damage Fund Board Act.

Ang bagong batas , nilagdaan ng Pangulo, araw ng Miyerkules, nagkakaloob ng ‘juridical personality at legal capacity’ sa Loss and Damage Fund Board, isang global finance mechanism para tulungan ang vulnerable states na dumaranas ng epekto ng climate change.

Isang kopya ng bagong batas ang isinapubliko ng Presidential Communications Office (PCO), araw ng Huwebes.

Sa pagkakapasa ng RA 12019, ang Board, bilang governing body ng Fund, ay dapat na mayroong ‘juridical personality na may full legal capacity” para ‘to contract, acquire and dispose immovable and movable property, as well as institute legal proceedings.’

Mayroon din itong legal na kakayahan na “negotiate, conclude, and enter into a hosting arrangement” sa World Bank bilang interim trustee at host ng Fund’s secretariat, at gumawa ng aktibidad kung kinakailangan para sa i- discharge ang papel at mga ginagawa nito.

Kamakailan, napili ang Pilipinas na mag-host ng Board ng Loss and Damage Fund.

Itinatag sa pamamagitan ng desisyon ng Parties to the United Nations Framework Convention on Climate Change at ng Paris Agreement, layon ng Loss and Damage Fund na tulungan ang ‘developing countries’ sa pagtugon sa ‘economic at non-economic loss and damage’ na may kinalaman sa climate change, kabilang na ang ‘extreme weather at slow-onset events.’

Ang Board, bilang isang decision-making body, ay responsable para sa pagtatakda ng ‘strategic direction, operations, at work program’ ng pondo.

Nauna rito, sinabi ni Pangulong Marcos na ang pagho-host ng susunod na board meeting ay makapagbibigay sa Pilipinas ng “strong voice to access the needed financial assistance for climate-related initiatives and impacts.” (Daris Jose)

NAGSAMA-sama ang lider ng iba’t ibang partidong pampulitika sa ilalim ng Alyansa Para sa Bagong Pilipinas upang suportahan ang Philippine National Police (PNP) asa ginagawa nitong paghahanap sa wanted na si Pastor Apollo Quiboloy at kanyang mga kapwa akusado.

Ang alyansa, na binubuo ng Partido Federal ng Pilipinas (PFP) na pinamumunuan ni Pangulong Ferdinand “Bongbong” R. Marcos Jr., Lakas-Christian Muslim Democrats (CMD), Nationalist People’s Coalition (NPC), Nacionalista Party (NP), at National Unity Party (NUP) ay lumagda sa isang joint statement upang ipahayag ang kanilang suporta sa PNP na magawa nito ang kaniolang legal na tungkulin.

Ang pahayag ay nilagdaan nina Special Assistant to the President, Secretary Antonio Ernesto Lagdameo Jr., Executive vice president ng PFP; Speaker Ferdinand Martin G. Romualdez, pangulo ng Lakas-CMD; dating Interior and Local Government Secretary Ronaldo Puno, chairman ng NUP; dating Senate President Vicente “Tito” Sotto III, pangulo ng NPC; at Misamis Oriental 2nd District Rep. Yevgeny Vincente B. Emano, national director ng NP.

Iginiit ng mga lider ang kahalagahan ng pambansang pagkakaisa, at pagpapanatili ng kaayusan, at pagrespeto sa karapatan ng bawat indibidwal.

Inilabas ng Alyansa ang pahayag sa gitna ng umiinit na tensyon sa Kingdom of Jesus Christ (KOJC) compound sa Davao City na pinasok ng mga pulis upang maisilbi ang warrant of arrest kay Quiboloy.

Si Quiboloy at kanyang mga kapwa akusado ay nahaharap sa kasong sexual abuse, child abuse, at qualified human trafficking.

Ang pahayag ng mga lider ng iba’t ibang partidong pampulitika ay isa umanong panawagan para sa lahat na suportahan ang PNP at magtiwala sa legal na proseso upang maiharap si Quiboloy sa hustisya at pag-giit sa pangako ng koalisyon ng administrasyon na pangibabawin ang batas at mapanatili ang pambansang seguridad.

Kamakailan ay nagpulong ang mga lider ng iba’t ibang partidong pampulitika upang bumuo ng isang estratehiya para sa paparating na midterm elections. (Daris Jose)

LAGLAG sa selda ang 67-anyos na lolo na wanted sa kaso ng panggagahasa matapos madakma ng pulisya sa isinagawang manhunt operation sa Caloocan City, kamakalawa ng gabi.

Sa kanyang report may Northern Police District (NPD) Director P/BGen. Rizalito Gapas, sinabi ni Caloocan police chief P/Col. Paul Jady Doles na nakatanggap sila ng impormasyon hinggil sa kinaroroonan ng akusadong si alyas Porperyo.

Inatasan ni Col. Doles ang Warrant of Subpoena Section (WSS) na bumuo ng team para sa isasagawang pagtugis sa akusado.

Kasama ang mga tauhan ng Amparo Police Sub-Station (SS15), agad nagsagawa ang WSS ng joint manhunt operation na nagresulta sa pagkakaaresto sa akusado dakong alas-11:00 ng gabi sa Catmon St., Amparo Subdivision, Barangay 179.

Ayon kay Col. Doles, binitbit ng kanyang tauhan ang akusado sa bisa ng warrant of arrest na inisyu ni Presiding Judge Rodolfo P. Azucena ng Regional Trial Court (RTC) Branch 125, Caloocan City noong January 10, 2024, para sa kasong Rape (RPC Art. 266-A).

Pansamantalang nakapiit ang akusado sa custodial facility unit ng Caloocan police habang hinihintay ang pagpapalabas ng commitment order mula sa hukuman para sa paglilipat sa kanya sa City Jail. (Richard Mesa)

SA botong 200 pabor at isang tutol, inaprubahan ng Kamara ang panukala na iregulate ang motorcycles-for-hire sa bansa.

Ayon kay Speaker Ferdinand Martin Romualdez, naiintindihan ng Kamara ang pangangailangan na maging ligtas ang pagbiyahe ng mga pasahero at produkto.

Kabilang sa may-akda ng panukala sina Reps. Rachael Marguerite Del Mar, LRay Villafurte, Rodge Gutierrez, Zia Alonto Adiong, Manuel Jose Dalipe, Jurdin Jesus Romualdo, Brian Yamsuan, Rufus Rodriguez, Joel Chua, Salvador Pleyto, Romeo Acop, Midy Cua, Antonio “Tonypet” Albano, at iba pa.

Sa ilalim ng HB 10424, dapat ay rehistrado ang motorcycles-for-hire sa Land Transportation Office (LTO) upang masiguro ang roadworthiness nito.

Ang Land Transportation Franchising and Regulatory Board (LTFRB) ang inaatasan ng panukala na mag-regulate ng operasyon ng motorcycles-for-hire kung saan walang digital platform na magagamit para sa book ng biyahe sa mga ito.

Ang bilang ng mga motorcycles-for-hire sa isang ruta ay tutukuyin sa pamamagitan ng local public transport route plan na inirekomenda ng lokal na pamahalaan.

Upang makakuha ng prangkisa o Certificate of Public Convenience, ang isang aplikante ay dapat Pilipino, mayroong pinansyal na kakayanan, LTO Certificate of Vehicle Registration, Insurance coverage at Tax Identification Number o Certificate of Registration bilang isang Common Carrier.

Nakasaad din sa panukala ang pangangailangan na magparehistro ang mga Motorcycle Taxi Platform Providers (MTPPs) at Online E-commerce Platform Providers (OEPPs) sa Securities and Exchange Commission at sa itatakdang requirement upang ma-accredit.

Ang bilis ng isang motorcycles-for-hire ay ililimita sa 60 kilometro bawat oras.

Ang LTFRB din ang inatasan na magtakda ng pamasahe, surcharges, at iba pang transportation fee na maaaring singilin ng operator, OEPP, o MTPP. (Vina de guzman)

KASUNOD nang pagtanggal sa 75 pulis na itinalaga sa kanyang security detail, nanawagan si Vice President Sara Duterte sa kanyang mga supporters at kaalyado sa Senado na tiyakin ang kaligtasan ng kanyang pamilya.

Ang panawagan ni Duterte ay matapos na hikayatin ni Senator Ronald “Bato” dela Rosa ang Philippine National Police (PNP) at Armed Forces of the Philippines (AFP) personnel “who are good at unarmed combat and volunteering” na magbigay ng karagdagang security para kay VP Sara.

Gayunman, sinabi ni VP Sara na walang dapat na ikabahala ang mga ito sa kanya, at sa halip ay bigyan ng proteksyon ang kanyang ina, asawa at apat na anak.

“Huwag kayong mag-alala sa akin. At hindi ninyo kailangan mag-ambag ng pera para sa security ko. Ang pagtatrabaho sa pamahalaan ay pag-alay ng buhay para sa bayan. Alam nating lahat na bahagi ito ng serbisyo,” ayon kay VP Sara.

“Isa lang ang hiling ko sa inyo—ang kaligtasan ng aking pamilya. Huwag ninyong payagan ang anumang karahasan sa aking ina, asawa at apat na anak, personal man o sa internet. At kung sakali man, huwag ninyong palampasin ang sinumang gagawa ng kapahamakan laban sa kanila,” dagdag na wika nito.

Nauna rito, binatikos ni VP Sara si Philippine National Police (PNP) chief Police General Rommel Francisco Marbil, kasunod ng kautusan ng huli na alisin ang 75 pulis na nakatalaga sa kaniya na magbigay ng proteksiyon.

Sa open letter ni Duterte kay Marbil, sinabi ng pangalawang pangulo na inalis ang ilang tauhan ng PNP Police Security and Protection Group (PSPG) na nakatalaga sa kaniya nang magbitiw siya bilang kalihim ng Department of Education (DepEd), at paglabas ng video ng kahawig umano ni Pangulong Ferdinand Marcos Jr. na tila may sininghot na pulbos.

“Ang relief ng mga PNP personnel ay dumating pagkatapos ko mag-resign sa DepEd, pagkatapos ko inihambing ang SONA sa isang catastrophic event, at pagkatapos lumabas ang cocaine video,” ayon kay Duterte.

“Let us spare our people from all the lies. Let us call it what it is — a clear case of political harassment,” dagdag niya.

Ayon pa kay Duterte, pinagkakatiwalaan niya ang mga inalis na pulis dahil ilan sa kanila ay nagbigay din ng seguridad sa kaniyang ama na si dating Pangulong Rodrigo Duterte mula noong 2016, habang ang iba naman ay security detail na niya mula pa noong 2007.

“It was obviously a targeted list and a targeted maneuver — nothing else,” sabi pa ng pangalawang pangulo.

Nitong nakaraang linggo, sinabi ni Duterte na 75 tauhan ng PSPG na nakatalaga sa kaniya na security detail ay inalis sa utos ni Marbil noong July 22.

Samantala, iginiit ni VP Sara na ang pagtanggal sa security personnel ay naglagay sa kanyang pamilya sa panganib.

“Ano ba ang ibig sabihin ng ‘threat’ sa iyo? Ang banta ba ay maaari lamang magmula sa mga external elements? Hindi na ba ‘threat’ kung ang harassment ay nanggagaling mismo sa mga tauhan ng gobyerno?” aniya pa rin. (Daris Jose)

BUMABA ng 16% ang confidential and intelligence funds (CIFs) sa panukalang 2025 national budget kumpara sa alokasyon nito sa 2024 General Appropriations Act (GAA).

Sinabi ni Department of Budget and Management (DBM) Secretary Amenah “Mina” F. Pangandaman na inaprubahan ng DBM ang kabuuang P10.29 billion (B) budget para sa CIFs, kung saan ang P4.37B ay inilaan para sa Confidential Expenses at P5.92B para naman sa Intelligence Expenses.

Sa 2024 GAA, ang CIF ay binigyan ng P12.38B allocation.

“Bumaba po ng 16% ang allocation para sa confidential and intelligence funds sa 2025 NEP kumpara sa alokasyon nito sa 2024 GAA,” ayon sa Kalihim.

Sinabi pa ni Pangandaman na nakatanggap ang DBM ng kabuuang CIF budget proposal na P11.39 billion mula sa iba’t ibang ahensiya, P5.22B ay para sa CF at P6.17B para naman sa IF.

Binigyang diin ni Sec. Pangandaman na ang mga ahensiya ay kinakailangan na sundin ang guidelines sa paggamit ng CIFs. (Daris Jose)

INATASAN ni Pangulong Ferdinand R. Marcos Jr. sa Department of Agriculture (DA) na kagyat na magbigay ng tulong sa pag-rehabilitate ng agriculture sector ng Bulacan, Pampanga, at Bataan matapos ang naging pananalasa ng Super Typhoon Carina-pinatinding southwest monsoon na humagupit sa Luzon.

Sa isang briefing sa Malolos, pinulong ng Pangulo ang mga local chief executives ng tatlong lalawigan para i-assess ang situwasyon at i-check ang mga pangangailangan habang ang relief operations ay nagpapatuloy sa rehiyon.

“In terms of the relief and rescue, I think we are alright. Now, we are talking about rehabilitation, the biggest – I think the three governors agree na ‘yong agri muna ang aayusin natin. ‘Yong infra, we will look at that also ,” ayon sa Pangulo.

Iniulat ng Bulacan na P103 million ang nawala sa agri-fisheries sector, habang ang Pampanga naman ay P378 million at ang Bataan naman ay P92.92 million.

Ang pinagsamang epekto ng Carina at “habagat” na nagresulta ng pagbaha sa 220 barangay sa Pampanga, nakaaapekto ng mahigit sa 127,000 pamilya.

Sinabi ni Bulacan, Governor Daniel Fernando na 100% o 24 lungsod at munisipalidad, ng lalawigan ang apektado ng pagbaha, ang Meycauayan at Malolos ang tinamaan ng malakas na hambalos ni Carina at Habagat.

Sinasabing 11 mula sa 12 munisipalidad at lungsod sa Bataan ay tinamaan din ng pagbaha, naapektuhan ang 208,371 pamilya.

“Na-assess na natin ‘yong majority ng nasira na kailangan bigyan kaagad ng tulong. We’ll have to get determination from the DA as to what areas will go first na puwede nang padalhan ng tulong,”ayon kay Pangulong Marcos.

Ang tulong na ito ay maaaring dumating sa “form of equipment o provision of seedlings, fingerlings, at brood sow.”

“We’ll move on now to the recovery at rehabilitation ng agriculture sector, infrastructure ganoon din pero hindi natin magagawa na immediate ‘yan,” ayon sa Punong Ehekutibo.

Binigyang diin pa rin ni Pangulong Marcos ang pangangailangan na magtayo ng mas maraming water-impounding systems sa Central Luzon para pagaanin ang pagbaha sa panahon ng taga-ulan.

Tinukoy nito ang iba’t ibang aerial inspections ng mga apektadong lalawigan, ibinahagi ng Pangulo ang kanyang naobserbahan na ang wala kahit saan mapuntahan ang tubig-baha.

“Mataas ‘yong tubig ng dagat. Mataas ‘yong tubig ng ilog. May baha pa doon sa mga farmlands,” aniya pa rin.

“Ang laki ng bumaba na tubig, sabay sabay, bigla. Hindi na nakayanan ng ating mga slope protection, ng ating flood control, ng ating mga dike, so we have to find another way to do it. Kaya palagay ko ‘yong impounding talaga,” ang sinabi ng Pangulo.

Sa pag-uulat ng lawak ng pinsala dulot ng bagyo at “habagat,” sinabi naman ni Fernando na ang Bulacan ay handang makipagtulungan sa national government para sa isang permanent solution sa pagbaha sa rehiyon.

Nauna nang ipinagbigay-alam naman ni Fernando kay Pangulong Marcos ang tungkol sa programa ng provincial government para mapagaan ang pagbaha, kabilang ang River Dredging and Restoration Program nito.

Sinabi naman ni Department of Social Welfare and Development (DSWD) Secretary Rex Gatchalian na mahigit sa 250,000 relief packs ang ide-deliver o maghihintay ng pick-up para sa typhoon victims sa Bulacan, Pampanga, at Bataan.

Sinabi pa rin niya na ang DSWD, ay nagpo-proseso na ng 247,000 karagdagang requests sa mga nasabing lalawigan.

Tiniyak naman ni Gatchalian na makikipag-ugnayan ang DSWD sa lahat ng apektadong LGUs para sa probisyon ng cash assistance sa mga apektadong pamilya.

“Once we get all of those (requests), we’ll evaluate them and figure out how to go, how to move forward, whether we use AICS (Assistance to Individuals in Crisis Situation), or the emergency cash transfer (ECT) that we use,” ayon sa Kalihim.

Sa kabilang dako, sinabi naman ni Labor Secretary Bienvenido Laguesma, na ang kanyang departmento ay naglaan ng P176 million para sa TUPAD or Tulong Panghanapbuhay sa Ating Disadvantaged/Displaced workers program sa Central Luzon.

Sa naturang halaga, P62 million ang inilaan para sa Bulacan, Bataan, at Pampanga.

Ang TUPAD ay isang community-based package of assistance para tulungan ang emergency employment para sa mga displaced workers.

Ilan sa mga benepisaryo ng TUPAD ay idineploy para tulungan ang DSWD na mag- repack ng food items at tulungan ang Department of Public Works and Highways sa clearing operations nito.
Samantala, sinabi naman ni Department of Health (DOH) Secretary Teodoro Herbosa na tutulong ang ahensiya na tiyakin ang mental at physical health ng mga bakwit na tinamaan ng kalamidad.
Winika nito na ang mga health workers ay idineploy sa lahat ng mga evacuation centers sa iba’t ibang rehiyon.

“The DOH would also deploy “psychological first aid” teams for fisherfolk and farmers whose sources of income were destroyed by the typhoon,” ani Herbosa. (Daris Jose)

MAHIGPIT na binabantayan ng Department of Trade and Industry (DTI) ang mga presyo ng basic necessities na naka “price freeze” bunsod ng deklarasyon ng state of calamity sa Metro Manila at Batangas.

“In view of the Metro Manila Council (MMC) and the Department of the Interior and Local Government’s (DILG) declaration of state of calamity in the National Capital Region due to the devastating effects of Super Typhoon Carina and the southwest monsoon, and pursuant to Section 6 of the Price Act of the Philippines (RA 7581) as amended, please be informed that prices of basic necessities in the region are automatically frozen. “ nakasaad sa DTI advisory.

Miyerkules, Hulyo 24, 2024 sa kasagsagan ng ma­tinding pagbuhos ng ulan at mga pagbaha na dala ng Habagat nang ideklara ang state of calamity sa 17 lungsod at munisipalidad sa National Capital Region matapos makapagkasunduan ng Metro Manila Council (MMC) na nasundan ng pagdeklara ng DTI ng Price Freeze.

Nagbabala rin ang DTI sa mga negosyo, kabilang ang mga hotel at transient homes, laban sa “price gouging” o hindi makatwirang pagtataas ng presyo.

Hinihikayat ang publiko na iulat ang anumang insidente ng overpricing at mga katulad na paglabag sa DTI Consumer Care Hotline 1-384 o sa email address consumercare@dti.gov.ph. (Daris Jose)

PUMALO na sa 183,464 pamilya o kabuuang 882,861 katao ang apektado ng pinagsamang southwest monsoon o habagat, bagyong Carina at dating tropical depression Butchoy.

Ayon sa report nitong Miyerkules ni National Di­saster Risk Reduction and Management Council (NDRRMC) Executive Director Ariel Nepomuceno, ang mga apektadong pamilya ay mula sa 686 Barangays sa Ilocos Region, Cagayan Valley, Central Luzon, Calabarzon, Mimaropa, Bicol region, Western and Central Visayas, Zamboanga Penin­sula, Northern Mindanao, Soccsksargen, Caraga, Bangsamoro Autonomous Region in Muslim Minda­nao (BARMM) at Cordillera region.

Sa tala ng NDRRMC, nasa 8 pa lamang ang bilang ng nasawi, pito rito ay kumpirmado na kinabibilangan ng apat mula sa Zamboanga Peninsulat at tig-isa naman sa Davao Region, Northern Mindanao at BARMM.

Patuloy na beneberipika ang isang nasawi sa BARMM habang dalawa ang nasugatan at isa ang nawawala sa Northern ­Mindanao.

Nasa 245 naman ang mga nasirang kabahayan mula sa MIMAROPA, Central Visayas, Zamboanga Peninsula,Northern Min­danao, Davao Region, Soccsksargen, CARAGA, BARMM at Cordillera.

Sa mga apektadong pamilya nasa 8,230 pamilya o katumbas na 35,388 katao ang kinakanlong sa 90 evacuation centers habang 115,668 pamilya o 576,936 indibidwal ang nasa labas ng mga evacuation sites. (Daris Jose)