SINABI ni Vice President at Education Secretary Sara Duterte na hindi niya kailanman tinatalakay ang pulitika sa kanyang ama na si dating Pangulong Rodrigo Roa Duterte at kay Pangulong Ferdinand Marcos Jr. dahil kapwa aniya ginagalang ng mga ito ang kanyang kapasyahan bilang babae.

Sinabi pa rin ni VP Sara na hindi siya kailanman pinakialaman ng kanyang ama at ni Pangulong Marcos sa kanyang mga desisyon bilang isang pulitiko.

“Politics is a matter that I have not discussed with former President Rodrigo Duterte, nor have I discussed my positions on national issues with President Ferdinand Marcos Jr.,” aniya pa rin.

“It is clear that both men are blessed with the heart to respect the will of a woman,” dagdag na wika nito.

Sa kabila nito, sinabi ni VP Sara na kapwa ang kanyang ama at Pangulong Marcos ay mayroong “similarly expressed concerns over my well-being.”

“I assured them that I would take care of myself as I carry out my duties and responsibilities as Vice President and the Secretary of the Department of Education,” giit nito.

“Both leaders are also gifted with the wisdom to know that I am not a problem and I do not need to be solved, rather, this is the time to focus on the work that needs to be done for the country,” dagdag na pahayag ni VP Sara.

Ang pahayag na ito ni VP Sara ay matapos magtaka ang ilang mambabatas sa kanyang presensiya sa prayer rally na idinaos ni Kingdom of Jesus Christ (KOJC) founder at lider na si Apollo Quiboloy, na nahaharap ngayon sa pang-aabuso at iba pang reklamo na nakahain sa komite ng Senado at Mababang Kapulungan ng Kongreso.

Ang nasabing prayer rally ay pagpapahayag ng suporta kay VP Sara at sa mga kapatid nitong sina Davao City 1st District Rep. Paolo Duterte at Davao City Mayor Sebastian Duterte at mayroon ding mga panawagan para kay Pangulong Marcos na bumaba na sa puwesto. May mga pambabatikos naman laban kay Unang Ginang Liza Araneta-Marcos.

Subalit, ipinagbikit-balikat lang ni VP Sara ang bagay na ito at binigyang-diin ang pangangailangan na lutasin ang mga pambansang usapin.

“Halimbawa nito ay ang kalidad ng edukasyon, ang patuloy na pagtaas ng presyo ng mga bilihin kasama na ng pagkain, at ang isyu ng terorismo, kriminalidad, kawalan ng katiyakan ng ating seguridad at kapayapaan,” aniya pa rin. (Daris Jose)

BUMABA sa kalahati ang insidente ng paglabag sa karapatang-pantao sa Pilipinas noong nakaraang taon, kumpara sa taong 2022.

Hindi naman nagbigay pa ng detalye si Pangulong Ferdinand Marcos Jr., sa ukol sa bagay na ito sa kanyang naging talumpati sa isinagawang oath-taking ceremony ng star-rank officials ng Philippine National Police sa Palasyo ng Malakanyang subalit iginiit ng Punong Ehekutibo na ang “significant drop” sa human rights violations ay patunay na nakikita ng administrasyon ang “rule of law” bilang “indispensable” sa pagtataguyod sa kawalan ng katarungan.

“It proves that rules that strengthen the fabric of our democracy–rules that our heroes had died for, rules that enshrined in our Constitution, are not inconveniences in policing but are in fact integral and indispensable in serving up justice,” ayon sa Pangulo.

Sinabi pa ng Punong Ehekutibo sa kanyang talumpati na naibaba ng gobyerno ng Pilipinas ang bilang ng index crimes mula 107,899 noong 2017 sa 38,436 noong 2023.

“In the past year, we reached 98 percent crime clearance efficiency. And we have sustained this continuing crusade in the first two months of 2024. Compared to January to February of last year, there were fewer cases of theft, of robbery, carnapping, rape, and physical injury,” ang pahayag ni Pangulong Marcos.

“And we have done it without resorting to legal shortcuts or short-circuiting the process or acts that subvert the rule of law,” dagdag na wika nito.

Sa kabilang dako, nakasaad sa 2024 World Report ng Human Rights Watch na ang “human rights situation in the Philippines remains dire amid extrajudicial killings, attacks against political activists and journalists, and abuses committed during the armed conflict with the 54-year-old communist insurgency.”

Sinabi pa ng HRW na habang ang pagpatay sa ilalim ng bloody drug war ng gobyerno ay bumaba mula nang maupo si Pangulong Marcos sa puwesto, nagpapatuloy naman itong bumababa sa ngayon.

“As of November 15, 471 people have been killed in drug-related violence under Marcos, perpetrated both by law enforcers and unidentified assailants. Most of these cases, as with the previous ones, remain uninvestigated,” ayon sa HRW.

Samantala, nanawagan naman si Pangulong Marcos sa mga PNP generals na patuloy lamang na manatiling tapat sa kanilang tungkulin sa pagsisilbi sa mga mamamayan.

Tiniyak din niya sa mga ito na palalakasin ang kakayahan ng PNP at ang kapakanan ng mga tauhan ng PNP.

Ang hirit pa ng Pangulo sa mga ito ay “leverage on technology” sa paglaban sa cybercrimes, “where the emerging and evolving digital landscape faces threats that can undo its potential contribution to national growth.”

“All breaches in our digital correspondences and transactions are inimical to the people’s welfare and national interest. We cannot allow electronic pickpocketing and all forms of robberies which are the digital equivalent of bag snatching,” ayon sa Chief Executive.

“Cybercriminals also prey on the innocence of our young, by stealing their dignity, and the vulnerabilities of our seniors, who are defrauded of their life savings. On a larger scale, they rob business firms, raiding their vaults, without breaking them down.” dagdag na pahayag ng Pangulo.

Tinuran pa ng Pangulo na pinalalakas ng gobyerno ang anti-cybercrime efforts nito mula sa detection at pagtugon sa mga case build-up at resolution.

Ipagpapatuloy naman ng pamahalaan ang pagsasanay sa mga PNP personnel sa paglaban sa cybercrime at palakasin ang cybersecurity capabilities ng mga ito.

(Daris Jose)

NAKAHANDA ang mga ospital ng Department of Health sa mga banta dulot ng El Niño phenomenon.

Kaugnay nito, tiniyak ng ahensiya na hindi maaantala ang heallth services para sa publiko.

Ayon kay Health Sec. Ted Herbosa mayroong nakalatag na contingency plan ang DOH sakaling makaranas ng kakapusan ng tubig at kuryente ang mga ospital sa bansa.

Liban dito, gumagawa na rin ng mga angkop na hakbang ang Presidential Task Force on El Niño Response para matugunan ang posibleng kakapusan ng tubig at kuryente.

Nag-endorso na rin ang Health Emergency Management Bureau – Response Division ng DOH ng listahan ng health facilities na may mga isyu sa tubig at kuryente para maprayoridad sakaling magkaroon ng kakapusan.

Dagdag pa ng kalihim na kasalukuyan ng nakikipagtulungan ang DOH sa lahat ng health facilities sa buong bansa sa pag-assess ng kanilang kahandaan sa El Niño at kung paano mapapabuti pa ang kanilang estratehiya at plano kasabay ng pag-peak ng naturang weather phenomenon.

Una ng iniulat ng state weather bureau na nasa 15 probinsiya ang maaaring makaranas ng ng dry conditions habang 22 probinsiya naman ang makakaranas ng dry spell at 30 naman ang maaaring makaranas ng tagtuyot dahil sa epekto ng El Niño na inaasahang magtatagal pahanggang Mayo ng kasalukuyang taon. (Daris Jose)

NIREGALUHAN ni Pangulong Ferdinand Marcos Jr. ang kanyang anak na si Ilocos Norte Representative Ferdinand Alexander ”Sandro” Marcos, ng isang sex book na may pamagat na ”Sex for Lazy People: 50 Effortless Positions So You Can Do It Without Overdoing It.”

Ang nakababatang Marcos ay nagdiwang ng kanyang ika- 30 taong kaarawan nito lamang Marso 7.

”I have my own present for you. Because you are practically a senior citi-son, I found you this guide, ‘Sex for Lazy People.’ It is in the mail. Read it well. It will help you. Happy birthday, Sandro,” ayon kay Pangulong Marcos sa kanyang kamakailan lamang na vlog.

Pinayuhan din ng Pangulo ang kanyang anak at iba pa na 30 taong gulang na ”learn to slow down when you must.”

”Listen to your body. Don’t burn the candle at both ends too much,” ayon payo ng Chief Executive.

Pinayuhan din niya ang batang Marcos na huwag ikompromiso ang ilang prinsipyo gaya ng Panginoon, kanyang pamilya at bansa.

Para naman kay Unang Ginang Louise ”Liza” Araneta-Marcos, ang birthday gift nito sa kanyang anak ay isa ring libro na may pamagat na “Be More Taylor: Fearless Advice on Following Your Dreams and Finding Your Voice.”

Pinayuhan din niya ang kanyang anak na palaging bigyan ng importansiya ang kahalagahan ng pamilya at palaging humingi ng paumanhin sa lahat ng oras. (Daris Jose)

INTERESADO si Pangulong Ferdinand R. Marcos Jr. na isulong ang ‘fisheries cooperation’ sa pagitan ng Pilipinas at Marshall Islands.

Nabanggit ni Pangulong Marcos ang ideyang ito nang bisitahin siya ni Marshall Islands President Hilda Heine sa Palasyo ng Malakanyang.

“We welcome President Hilda Heine, President of the Republic of the Marshall Islands (RMI), as she undertakes a visit to the Philippines,” ayon kay Pangulong Marcos sa Facebook post.

“Expanding on our 35-year bond with the RMI, we look forward to advancing a fisheries cooperation agreement and bolstering Pacific cooperation.”aniya pa rin.

Sa nasabing miting, nangako sina Pangulong Marcos at Heine sa isa’t isa na palalakasin ang kolaborasyon ng dalawang bansa pagdating sa iba’t ibang larangan gaya ng paggawa, edukasyon at skills training, at agricultural production.

Sinabi naman ni Presidential Communications Office (PCO) Secretary Cheloy Garafil na ipinaalam ni Heine kay Pangulong Marcos ang plano ng Marshall Islands na bumuo ng labor arrangements sa public at private sectors ng Pilipinas.

Tinukoy ang milyong dolyar na halaga ng infrastructure projects at recruitment ng mga filipinong manggagawa sa Majuro-based construction firms.

Ipinaalam din ni Heine kay Pangulong Marcos na nangangailangan din ang Marshall Islands ng medical professionals na dalubhasa sa larangan ng radiology, orthopedic surgery, general surgery at iba pang medical services na ‘hindi available’ sa Pacific island nation.

“Heine, who is in the country to attend the International Women’s Day event organized by the Asian Development Bank (ADB), said her country is also looking for support from the Philippine government on seaweed farming, as her country diversify people’s livelihood amid the threats posed by climate change that triggers sea level rise,” ayon kay Garafil.

Sa kabilang dako, sinabi naman ni Heine na nais niya na ang mga komunidad sa Marshall Islands ay mag-alaga ng seaweed bilang alternatibong source of income sa kabila ng karamihan sa mga ito ay gumagawa ng kopra.

Para sa Pangulo, maganda ang ideya ni Heine dahil ang demand o pangangailangan para sa ‘seaweed products’ ay nananatiling mataas.

Samantala, binisita ni Heine ang Pilipinas matapos na manumpa siya bilang Pangulo ng Marshall Islands nito lamang Enero.

Tinatayang may 1,500 Filipino ang nagtatrabaho sa Marshall Islands sa larangan ng “clerical support, craft and trade, machine operators, at professionals, bukod sa iba pa. (Daris Jose)

PINASALAMATAN ni Pangulong Ferdinand “Bongbong” Marcos Jr. ang sambayanang Filipino para sa pag-alaala at panalangin ng mga ito sa kanyang Ina na si dating First Lady Imelda Marcos matapos dalhin sa ospital dahil sa hinihinalang pneumonia.

“She is in good spirits, has no difficulty in breathing and is resting well,” ang pahayag ng Pangulo.

Sa katunayan aniya ay nakausap niya ang doktor ng kanyang ina. Sinabi sa kanya na bahagyang may pneumonia ang kanyang ina at ito’y nilalagnat.

      Gayunman, binigyan agad aniya ang kanyang ina ng antibiotics at kumpiyansa aniya ang mga doktor na mapapawi nito ang lagnat ng kanyang Ina na si dating Unang Ginang Imelda.

      Nauna rito, sinabi ni Senator Imee Marcos, kapatid ni Pangulong Bongbong Marcos na dinala nila sa hospital ang kanilang ina na si dating Unang Ginang Imelda.

      “Inospital na namin [for] close monitoring… Suspected pneumonia as she has been having fever [and] cough on [and] off. Given her age, we [have to] take [maximum] precautions,” pahayag ni Senator Marcos na tinutukoy ang 94-anyos na matriarch.

      Mayo noong nakaraang taon nang sumailalim ang dating First Lady sa angioplasty procedure. (Daris Jose)

MAKALILIKHA ng trabaho para sa mga Filipino ang floating solar project ng Australian firm sa Pilipinas.

Sinabi ni Pangulong Ferdinand Marcos Jr., na nakapulong nya ang mga opisyal ng Macquarie Group ukol sa bagay na ito.

“With Macquarie Group’s 1.3 GW floating solar project in Laguna Lake, we’re creating sustainable jobs and cleaner industries,” ayon kay Pangulong Marcos.

Aniya pa, ang inayos na business setting sa bansa ay magreresulta ng mas mabuti at mahusay na renewable energy system.

“Our green lanes and improved business environment pave the way for more initiatives like this to thrive and contribute to our nation’s renewable energy goals,” ayon kay Pangulong Marcos.

Sa kabilang dako, sinabi naman ni Macquamarie group managing director at CEO Shemara Wikramanayake na ‘excited’ na siya na talakayin ang investment bank sa Pilipinas.

“The whole digitization process, we’re excited about. Also, the energy transition we’re excited about … we certainly invest in digitization and we invest in energy transition and in mining and building bigger advisory business,” anito.

Winika ni Wikramanayake na interesado sila na mamuhunan sa Pilipinas dahil sa demographic profile nito para sa pagkakaroon ng “a young and growing population.”

“What we’re keen to do is to partner with Southeast Asia particularly with places like the Philippines, which are proving to be very good to create that environment for the pension savers money here. To bring capital to health, investing in infrastructure, etcetera,” lahad nito.

Samantala, pinuri naman ni Pangulong Marcos ang nasabing kompanya sa interest nito na mamuhunan sa Pilipinas, binigyang diin na malaking tulong ang mga ito para sa pag-unlad ng Pilipinas lalo na sa aspeto ng digitalization process hindi lamang para sa mga investors, kundi maging sa mga lokal.

“We somehow have fallen behind in that regard, and we’re trying to catch-up. Digitization is a very important part of ease of doing business not just for investors, but for locals in their dealings with the government,” ang pahayag ng Pangulo. (Daris Jose)

SINABI ni Pangulong Ferdinand Marcos Jr. na ang pagpapalawak sa Victoria International Container Terminal ay nagpapakita lamang na ang kompanya ng Filipino ay maaaring maging matagumpay kahit pa sa ibang bansa.

”We are delighted to see that since VICT started operations in 2017, it has grown to become a major player in Melbourne, giving healthy competition to its peers,” ayon kay Pangulong Marcos sa isinagawang paglulunsad ng ekspansyon ng VICT.

”This expansion we are witnessing today is a clear sign that Filipino companies can thrive in some of the most advanced economies in the world, and in the case of VICT, they are in it for the long-haul. We look forward to VICT’s astounding success and continued growth,” dagdag na wika nito.

Tinuran pa ng Punong Ehekutibo, maliban sa pagbibigay ng trabaho at panatilihin ang mga kasanayan at paggawa, ”VICT has also been supportive of the Filipino seafarers that constitute a large proportion of the seafarers that pass through its facilities, as well as the 95,000-strong Filipino community in Victoria.”

”As VICT has supported numerous Filipino community events, including the harmonized celebrations of the 125th Anniversary of the declaration of Philippine Independence last June 2023, I would like to extend my thanks to Bruno and VICT for helping the vibrant Filipino community become more visible, more involved here in Australia,” aniya pa rin.

”VICT is a Philippine success story, and I hope it will only be the beginning,” ayon sa Punong Ehekutibo. (Daris Jose)

SUGATAN ang 50-anyos na lalaki ang matapos tarakan sa leeg ng hindi kilalang suspek nang tumanggi ang biktima sa alok ng isang babae na makipagtalik sa kanya sa Malabon City.

Nasa stable na kondisyon habang ginagamot sa Tondo Medical Center (TMC) sanhi ng tinamong saksak sa leeg ang biktimang si alyas “Wilson”, ng M. Blas Brgy. Hulong Duhat.

Sa pinagsamang imbestigasyon nina PSSg Michael Oben at PSSg Bengie Nalogoc, galing sa pakikipag-inuman ang biktima at habang naglalakad sa kahabaan ng M. Naval St., Brgy. Flores pauwi nang lapitan ng isang hindi kilalang babae at inalok umano ng sex dakong ala-1:50 ng madaling araw subalit, tumanggi si ‘Wilson’.

Makalipas ang ilang sandali, bigla na lamang dumating ang isang hindi kilalang lalaki at walang sabi-sabing tinarakan sa leeg ang biktima bago mabilis na tumakas sa hindi matukoy na direksyon sakay ng isang bisikleta,

Isinugod naman ng concerned citizen ang biktima sa Ospital ng Malabon at kalaunan ay inilipat sa TMC hospital habang patuloy naman ang imbestigasyon ng pulisya para sa posibleng pagkakilanlan at pagkakaaresto sa suspek. (Richard Mesa)