Maglaro man o hindi sina injured players Tots Carlos at Alyssa Valdez ay handa ang Creamline na sagupain ang nagdedepensang Petro Gazz sa knockout quarterfinals ng 2024 Premier Volleyball League (PVL) Reinforced Conference.

Haharapin ng Cool Smashers ang Gazz Angels ngayong alas-6 ng gabi matapos ang banatan ng PLDT High Speed Hitters at Chery Tiggo Crossovers sa alas-4 ng hapon sa FilOil EcoOil Centre sa San Juan City.

Bukod kina Carlos at Valdez, hindi rin naglalaro sa Creamline si Jema Galanza na kasama ng Alas Pilipinas sa training.

“Ready naman kami kung hindi sila makabalik, or makabalik sila. Ready naman iyong team, especially iyong mga bench players nagco-contribute naman talaga nang husto,” ani coach Sherwin Me­neses.

Wagi ang Petro Gazz, 25-23, 25-19, 20-25, 23-25, 15-12, sa una nilang bakbakan noong Agosto 13.

Ang magwawagi sa Cool Smashers at Gazz Angels ang haharap sa Cignal HD Spikers, sinibak ang Capital1 Solar Spikers, 25-19, 36-34, 16-25, 22-25, 15-12, sa semifinals.

Aasahan ng Creamline sina American import Erica Staunton, Michele Gumabao, Bernadeth Pons, Bea De Leon, Kyle Negrito at Pangs Panaga.

Sasandigan naman ng Petro Gazz sina import Wilma Salas, Fil-Am Brooke Van Sickle, Aiza Maizo-Pontillas, Jonah Sabete, Myla Pablo at Remy Palma.

Sa unang laro, mag-

Tinalo ng Crossovers ang High Speed Hitters, 19-25, 25-20, 20-25, 25-21, 10-15, sa una nilang pagtutuos tampok ang 39 points ni American import Khat Bell.

MAGSISILBING isa sa mga torchbearer si Hong Kong-born martial arts actor Jackie Chan sa nalalapit na opening ceremony ng Paralympics sa Paris, France.

Ang 70 anyos na martial artist ay naatasang magbitbit sa Paralympic torch sa Paris at ipaparada ito ilang oras bago ang nakatakdang opening ceremony.

Unang sinindihan ang Paralympic flame noong araw ng Sabado sa United Kingdom, ang kinikilalang birthplace ng Paralympic Games.

Mula sa UK, ibiniyahe ito papuntang France sa pamamagitan ng Channel Tunnel sa pamamagitan ni wheelchair fencing medalist Emmanuelle Assmann.

Batay sa schedule, darating sa Paris ang naturang tanglaw pagsapit ng Miyerkules(oras sa France) para sa nakatakdang pagsisimula ng Paralympics sa araw ding iyon.

Gaganapin ang opening ceremony ng Paralympics sa Stade de France, kasama ang magarbong athletes parade sa ilang bahagi ng central Paris.

Nakatakda ang Paralympics mula Aug 28 hanggang Sept. 8, 2024 kung saan mahigit 4,400 atleta ang magpapaligsahan sa 22 sports.

Sa edisyong ito ng Paralympics, mayroong 549 medal na paglalabanan ng mga atleta.

BUHOS ang suporta ni sports patron Manny V. Pangilinan (MVP) upang maging matagumpay ang pagdaraos ng prestihiyosong FIVB Volleyball Men World Championship sa Setyembre 12 hanggang 28 sa susunod na taon.

Inihayag ni Pangilinan ang buong suporta nito sa isang meeting na ginanap sa PLDT office sa Makati City kasama sina Philippine National Volleyball Fe­deration (PNVF) president Ramon “Tats” Suzara, MVP Sports Foundation president Al. Panlilio at PLDT Business Transformation Group Head Ricky Vargas.

“Mr. MVP has once again brought the mea­ning of sports patron to a superlative level. With Mr. MVP’s commitment, the Local Organizing Committee [LOC) will be shifting to a higher gear preparations for the world championship which is a little over a year away,” ani Suzara.

Mas lalong tumataas ang kumpiyansa ng Alas Pilipinas na maganda ang inilalaro sa international tournaments.

Kabilang na rito ang da­lawang sunod na bronze-medal finish sa Southeast Asia Men’s V.League na ginanap sa Manila at Indo­nesia.

“Those bronze medals are already milestones for Philippine men’s volleyball in Southeast Asia. The program is working and we are confident that Alas Pilipinas will make an impact in the world championship,” dagdag ni Suzara.

Sa FIVB MWCH 2025, may 32 matitikas na koponan mula sa iba’t ibang panig ng mundo ang magbabakbakan sa Smart Araneta Coliseum sa Quezon City at Mall of Asia Arena sa Pasay City.

Idaraos ang draw sa Setyembre 14 na susundan ng friendly matches sa pagitan ng dalawang Japanese club teams at Alas Pilipinas Men at Women squads sa Setyembre 7 at 8 na gaganapin sa PhilSports Arena sa Pasig City.

“We are all excited about this historic hosting because Filipino fans will get the opportunity to witness elite volleyball action from 32 teams,” ani Suzara.

Kasama si Pangilinan sa FIVB MWCH LOC Board na co-chaired nina Presidential son William Vincent “Vinny” Araneta Marcos, Senator Alan Peter Cayetano at Department of Tourism Secretary Christina Garcia Frasco.

Nasa LOC Board din sina Senator Pia Cayetano, Philippine Olympic Committee president Abraham “Bambol” Tolentino at Phi­lippine Sports Commission chairman Richard Bachmann.

IPINALIWANAG ng International Tennis Integrity Agency (ITIA) kung bakit hindi nila pinatawan ng suspension si world number Jannik Sinner matapos na magpositibo ito sa pinagbabawal na substance.

Ayon sa ITIA na hindi nila nakita na nagpabaya ang French tennis star kahit na nagpositibo ito sa Clostebol isang anabolic steroid.

Unang lumabas ang resulta ay noong Marso 10 matapos ang Indian Wells tournament.

Matapos naman ang walong araw ay nagkulekta muli sila ng samples at lumabas na positibo pero sa mababang level lamang ito ngayon.

Nakuha umano nito ang pagpositibo sa pamamagitan ng contamination sa gamot ng kaniyang physiotherapist.

Naggagamot umano ang physio ni Sinner sa pamamagitan gn over the counter spray sa kaniyang balat para sa maliit na sugat.

Nilinaw din nila na matapos ang paglabas ng test ay pinatawan nila ito ng automatic provisional suspension subalit umapela si Sinner at kanilang napagtanto na nahawa o na-contaminate lamang ito mula sa kaniyang fitness trainer kaya ipinagpatuloy niya ang paglalaro.

Pagtitiyak ni Sinner na susunod na ito ng mahigpit sa anumang ipinag-uutos ng batas sa tennis community.

Si Sinner ay nagwagi ng limang titulo ngayong season kung saan noong Enero ay nagkampeon ito sa Australian Open at nitong Hunyo ay umangat ang ranking niya sa number 1.

GUMAGAWA rin ng pangalan si Behrouz Elite Swimming Team (BEST) tanker Mikhael Jasper ‘Mikee’ Mojdeh matapos kubrahin ang Most Outstanding Swimmer (MOS) award sa 2024 Asian Open Schools Invitational Age Group Swimming Championships na ginanap sa Bangkok, Thailand.

Humakot ang Immaculate Heart of Mary College-Parañaque standout na si Mojdeh ng kabuuang 385 puntos mula sa pitong ginto, isang pilak at isang tansong medalya para makuha ang MOS trophy sa boys’ 9-year division.

“It is nice to be back in Bangkok again. I was here last February, for the Long Course champs and I really enjoyed it. The swimmers are fast and I like swimming with them because it makes me improve my time,” ani Mojdeh.

Magarbong sinimulan ni Mojdeh ang kampanya nito matapos pagharian ang 200m Individual Medley sa bilis na tatlong minuto at 4.74 segundo.

Sinundan ito ni Mojdeh ng dalawang gintong medalya sa 100m freestyle tangan ang 1:14.70 at 50m butterfly bitbit ang 38.74 segundo.

Muling rumatsada sa huling araw ng kumpetisyon si Mojdeh nang sunud-sunod nitong kubrahin ang ginto sa 50m backstroke (38.99), 50m breaststroke (44.71), 100m butterfly (1:27.23) at 100m backstroke (1:23.25).

Maliban sa ginto, nakapilak din si Mojdeh sa 50m freestyle (34.60) habang may tanso rin ito sa 200m freestyle (2:43.94).

Maliban kay Mojdeh, nagdagdag ng dalawang tansong medalya para sa BEST squad si Kaidyn Waskiewicz sa girls’ 10-11 200m backstroke (3:05.20) at 100m backstroke (1:25.61).

PATULOY ang ginagawang pag-aayos ng kampo ni dating Pinoy boxing champion Manny Pacquiao para sa muling pagsabak nito sa boxing ring.

Sinabi ni MP Promotions head Sean Gibbons, na kanilang inaayos mabuti ang laban kay WBC welterweight champion Mario Barrios.

Dagdag pa nito na may mga ilang dokumento pa silang inaayos na maaring matuloy na hanggang sa buwan ng Disyembre.

Ito ang unang laban ni Pacquiao sa boksing na maaring ganapin sa Las Vegas.

Huling laban ni Pacquiao ay noong Hulyo 28 kay Japanese Rizin Featherweight Champion Chihiro Suzuki kung saan isa lamang itong exhibition fight na nagtapos ang laban sa draw.

INIHAYAG ng Olympic Council of Asia (OCA) ang kanselasyon ng 6th Asian Indoor and Martial Arts Games (AIMAG) na idaraos sana sa Nobyembre sa Thailand.

Dismayado si Philippine Olympic Committee (POC) president Abraham “Bambol” Tolentino lalo pa’t naghahanda ang Pinoy athletes sa pagsabak nito sa AIMAG.

Ngunit kailangan nang mag-move in at isentro ang atensiyon sa ibang torneong lalahukan ng Team Philippines.

“It’s frustrating, but we’ll have to move on,” ani Tolentino.

Magpapadala sana ang Pilipinas ng 421 atleta na sasabak sa 37 sports. Su­balit hindi na ito matutuloy dahil sa kakulangan sa sponsors ng ng organi­zing committee ng Thailand.

“We were hoping to improve on the two gold medals Meggie [Ochoa] and Annie [Ramirez] won in jiu-jitsu as well as the 14 silver and 14 bronze medals clinched in the 2017 edition in Ashgabat [Turkmenistan],” ani Tolentino.

Dahil sa kanselasyon, ang susunod na edisyon ng AIMAG ay idaraos na sa Riyadh, Saudi Arabia base sa inilabas na sulat ng OCA.

Sesentro na ang atensiyon ng Team Philippines sa paghahanda nito sa 2025 Southeast Asian Games na idaraos din sa Bangkok, Thailand.

Nais ng POC na masundan ang impresibong kampanya ng Team Philippines sa Paris Olympics.

NAGTAPOS sa pangalawang puwesto si Joanie Delgaco sa kabuuang anim na rower sa Heat D classification race sa Nautical St- Flat Water.

Nakakuha si Delgaco ng kabuuang oras na 7:43:83 minuto.

Dahil sa nasabing performance nito ay nagtapos ito ng pang-20 na puwesto sa overall ranking sa women’s single sculls category.

Magugunitang nabigo si Delgaco sa women’s single sculls rowing quarterfinals ng Paris Olympics.

Siya ang kauna-unahang Pinay rower na lumahok sa Olympics.

SALUDO si volleyball star Alyssa Valdez kay rower Joanie Delgaco na lumalaban sa 2024 Paris Olympics rowing competitions.

Nagpasalamat si Valdez sa sakripisyo ni Delgaco upang mabigyan ng karangalan ang bansa sa Olympics.

Alam ni Valdez ang paghihirap ng isang atleta sa training dahil naging bahagi rin ito ng national team sa mga nakalipas na taon.

Kaya naman mataas ang respeto ng Creamline veteran player sa lahat ng atletang lumalaban para sa Pilipinas.

“Kahit anong mangyari buo ang tiwala namin sa iyo. Anuman ang mangyari sa journey mo ngayong Olympics, saludong-saludo kami sa iyo,” ani Valdez.

Bago maging rower, naglaro muna si Delgaco ng volleyball noong nasa high school pa lamang ito.

At isa si Valdez sa mga hinahangaan nitong player sa mundo ng volleyball.

Umaasa si Valdez na makakapanood si Delgaco sa mga laro ni Valdez.

“I can’t wait to see you here in the Philippines at makapanood din ng mga volleyball games. Mas marami kang nai-inspire na mga atleta hindi lang ako,” ani Valdez.

Isa si Delgaco sa 22 atletang Pinoy na bahagi ng Team Philippines sa Paris Olympics.

Si Delgaco ang kauna-unahang Pinay rower na nagkwalipika sa Olympic Games.

Sa kabuuan, may apat na Pinoy pa lamang na nakapag-Olympics.

Nauna na sina Cris Nievarez noong 2020 Tokyo Olympics, Benjamin Tolentino noong 2000 Sydney Olympics at Edgardo Maerina noong 1988 Seoul Olympics.