TIBA-TIBA ang Talk ‘N Text sa offseason nang makalawit si John Paul ‘Poy’ Erram mula sister-team North Luzon Expressway.

May dalawang ulit pang pinarebisa ng Philippine Basketball Association (PBA) trade committee ang mga dokumento bago naaprubahan ang three-team trade kasangkot ang Blackwater.

Pumuwersa lalo ang KaTropa, nagkaroon ng lehitimong big man. Mas mapapakinabangan na ang laro ni Jeth Troy Rosario na mas komportable sa stretch four.

“Kahit saan mo si Poy ilagay, malaking bagay iyan, eh,” komento kahapon ni coach Ferdinand ‘Bong’ Ravena, Jr. “Good for us, makaka-help siya with our rotation especially kulang din kami sa bigs.”

Solido pa rin ang core ng koponan kina Jayson Castro, Rosario, Roger Ray Pogoy, veteran Kelly Williams, Anthony Jay Washington.

Paunang full season niya si Bobby Ray Parks, Jr. na nalambat mula sa Elite sa Governors Cup, at si Simon Enciso sa Alaska Milk swap. Nadale rin si Kib Montalbo mula La Salle sa Draft nitong Disyembre.

“We’re trying to build up our team. Hopefully with the demographic of seasoned ang young players, we’ will be able to do that,” tugon ni team governor Victorico ’Ricky’ Vargas.

Palaging kontender ang TNT kahit nang wala pa si Erram. Pasok sa playoffs ng nakaraang Philippine Cup pero nasipa sa San Miguel Beer sa tatlong laro. Sa Commissioner’s, top seed ang KaTropa at hinakbangan ang Aces sa quarters at Barangay Ginebra San Miguel sa semifinals, pero nasilat muli sa SMB sa finals 4-2. Sa Governors Cup, No. 3 sila, kinahig ang Magnolia sa quarterfinals pero kinuryente ng Meralco sa semis.

“Kami naman, magaling sa umpisa. Pagdating sa huli, palpak,” natatawang hirit ni Vargas. “Hindi ko alam bakit nangyayari iyon. Balang araw, malalaman ko rin.”

Tumindi sa papel ang TNT sa pagbabalik ni Erram lalao’t walang June Mar Fajardo ang defending champion San Miguel Beer, Gregory William Slaughter ang Gin KIngs at tengga sa first month ng season si Raymond Almazan ng Meralco.

Puwedeng maging malakas na hanggang dulo ang TNT sa parating na 45th PBA PH Cup na sisiklab bukas (Linggo, Marso 8) sa Araneta Coliseum, pero Marso 11 pa ang binyag sa team sa Big Dome rin kontra Phoenix Pulse.

WALANG problema para sa Philippine Sports Commission ang pagiging abala sa kaliwa’t kanang mga trabaho, matapos itong ipatawag ng Senate at Congress para sa serye ng hearings sa mga proposed bills sa sports.

Inimbitahan ni Senate Committee on Sports Chairman Sen. Christopher Lawrence Go para sa Philippine Boxing and Combat Sports Commission consultative hearings sa panukala nina Senador Emmanuel Pacquiao at Ramon Revilla, Jr.

Ito ay ang Senate Bills 193 at 805 na layuninng maitayo ang magkahiwalay na ahensiya ng gobyerno para sa dalawang professional combat sports.

Sina PSC Chairman William Ramirez, PSC Commissioner Charles Maxey, at Games and Amusement Board Chairman Abraham Mitra ang mga nasa resource group kasama ang mga kinatawan ng Department of Budget and Management, Social Security System, PhilHealth, Pag-Ibig Fund, Department of Health, Governance Commission for GOCCs, Elorde Promotions at muaythai.

Inesplika ni Ramirez ang iba’t ibang paraan para maresolba ang mga reklamo at kritisismo na inilatag sa Senado tulad sa travel tax exemptions at medical provisions.

“This is good we are here and discussing this because we can see how we call all work together,” bulalas niya, dinagdag na may susunod pang consultative hearings para sa implementasyon ng batas.

Ipagpapatuloy naman ang pagdinig hinggil sa panukalang batas ukol sa sports at bibigyang pag-aaral ang pagsasagawa sa nasabing batas.

Pumunta naman sa Kongreso si PSC Executive Assistant at National Training Director Marc Edward Velasco para sa House Bill 4594 ni Leyte 4th District Rep. Lucy Gomez na may akda ng batas sa komprehensibong national grassroots sports program o isabatas na Philippine National Games.

Ibig ni Gomez palalimin ang mga probisyon sa kasalukuyang batas na bumuo sa PNG na Executive Order #163, 1994 at gawin itong mas epektibong bagong pamamaraan para sa pagdiskubre ng mga bagong talento sa sports.

“Change is not always easy, but as public servants let us put in extra effort to study well and weigh effects and consequences of everything,” panapos na pahayag ng sports agency chief. “Be an agent of change for as long as you also make every effort to ensure that those changes are for the better.”

Inagapan din ni Ramirez ang oprotunidad na makausap si Senate President Vicente Sotto III at Minority Leader Senador Franklin Drilon para mapag-usapan ang iba pang programa sa sports. (REC)

NATUPAD na rin sa wakas ni George Oconer ng Standard Insurance-Navy ang may isang dekadang pinapangarap a pagbibisikleta.

Ito ay nang pamayagpagan niya ang katatapos na 10th LBC Ronda Pilipinas 2020 Anniversary Race sa Vigan City.
Sumunod lang sa agos ang 28 taong-gulang na pedalpusher sa Stage 10 criterium na nagsimula at natapos sa Ilocos Sur Provincial Capitol nitong Miyerkoles upang masiguro na walang aksidenteng magaganap sa pormal na pagkakampeon.

Pa-finish line ng cyclist mula sa San Mateo, Rizal, agad siyang sinalubong ng kanyang mga tagahanga para humingi ng autograph at selfie. Kabilang doon ang ama niyang two-time Olympian na si Norberto.

“Salamat sa Diyos, sa mga teammate ko at sa SI-N, dahil sa kanila natupad ang matagal ko ng pangarap na mag-champion dito sa Ronda,” maluha-luha wika ni Oconer na nasa 10 taon na niyang pagkampanya rito at nagrasyahan ng P1M cash sa tagumpay.

May aggregate time siyang 32 oras, 42 minuto at 12 segundo habang nasa second hanggang sixth sa overall individual classification sina tyeammates 2018 champion Ronald Oranza, Ronald Lomotos, John Mark Camingao, Junrey Navarra at El Joshua Carino, ayon sa pagkakahilera.

Nagwagi si dating two-time champion Jan Paul Morales ng Navy sa last stage 40 minutes at plus three laps sa karera. Sumegundo si Oranza habang tumersero si Navarra.

Pumoste si Morales ng 51 minuto at 20 segundo sapat para sungkitin ang pangatlong stage win sa event.
Kampeon din ang Standard Insurance-Navy sa team ng bikathon na ito. (REC)

KINANSELA na rin ang malaking marathon sa Italy dahil sa patuloy na paglobo ng bilang ng kumpirmadong kaso ng coronavirus sa nasabing bansa.

Sa pinakahuling datos, umabot na sa 148 ang patay dahil sa coronavirus sa Italy at mahigit 3,200 naman ang nadapuan ng sakit.

Sa panayam kay Jeff Lagos mula sa Rome, inihayag nitong kanselado ang Rome Marathon na nakatakda sana sa Marso 29.

Ito ay kasunod na rin ng inilabas ng pamahalaan na cabinet decree na nagsususpinde sa malalaking pagtitipon at events sa bansa kabilang na rin ang mga sporting events at kompetisyon hanggang Abril 3.

Dahil dito, ang registration fee na binayaran ng mga runners ay ililipat na lang sa susunod na edisyon ng Rome Marathon sa 2021 kung saan dalawang medalya ang tatanggapin ng mga lalahok.

Sa ngayon, umabot na sana sa mahigit 10,000 runners ang nag-sign up na makilahok sa Rome Marathon.
Samantala, hindi pa matitiyak aniya kung maextend ang pagbubukas ng lahat ng mga paaralan na isinara dahil sa COVID-19.

Batay sa utos ng Italian government, hanggang Marso 15 ang closure ng mga paaralan at unibersidad sa bansa.
Nag-abiso na rin ang Philippine Embassy sa mga Pilipino na maging mapagmatyag at panatilihin ang proper hygiene.