NAGPAABOT ng pakikiramay si Presidential Communications Operations Office (PCOO) Secretary Martin Andanar sa pamilya ni  dating  Deputy Speaker at Cebu City First District Rep. Raul del Mar na pumanaw, Lunes ng gabi.

Si Del Mar, na nagsilbi bilang kongresista ng north district ng Cebu City sa loob ng 9 na termino simula 1987, ay binawian ng buhay sa  ospital sa Maynila sa edad na  79.

Kinumpirma naman ni House of Representatives Secretary-General Jocelia Bighani-Sipin ang pagkamatay ni  del Mar.

“We pray for the eternal repose of his soul, and for his family and loved ones to find strength in this time of grief,” ang pahayag ni Sec. Andanar.

Sinabi ni Sec. Andanar na ang commitment ni del Mar sa kanyang trabaho ay palaging maaalala ng kanyang mga constituents na kanyang napagsilbihan sa panahon ng kanyang panunungkulan partikular na iyong mga “under privileged.”

Pinuri rin niya si del Mar para sa pagtulong nito sa  “growth and development” ng kanyang distrito  aspeto ng   infrastructure, social services, at poverty alleviation.

Hindi rin nakalimutan ni Sec. Andanar  na purihin si del Mar para sa kanyang legislative work pagdating sa media concerns.

Si Del Mar ay principal author ng  Republic Act No. 11122 of 2018 “which declares September 21 of each year as a working holiday in the cities and province of Cebu in celebration of the Cebu Press Freedom Day.”

“Being the son of a journalist and a manager of a local newspaper, his dedication to promote and improve a free yet responsible journalism and media landscape is truly worth noting, which led to people hailing him as ‘Kampeon sa Medya,’” aniya pa rin.

Kaugnay nito, nagpaabot din  ng pakikiramay ang liderato ng Kamara sa pagpanaw kahapon ni Cebu Rep. Raul Del Mar.

Sa mensaheng ipinadala ni House Speaker Lord Allan Velasco, ipinaaabot nila sa pamilya at sa mga kasamahan ang kanilang pakikidalamhati at panalangin para sa ng yumaong kongresista.

Ayon kay Velasco, naipakita ni Del Mar ang passion at commitment nito sa pagseserbisyo publiko sa loob ng siyam na termino bilang kongresista mula pa noong 1987.

Sa loob aniya ng 27 taon ay perfect attendance din ang mambabatas at regular itong dumadalo sa mga sesyon at pagdinig.

Sinabi naman ni Majority Leader Martin Romualdez na hindi malilimutan si Del Mar dahil sa edad nitong 79 taong gulang ay hindi ito napagod na pagsilbihan ang kanyang mga kababayan kahit pa sa gitna ng COVID-19 pandemic. (Daris Jose)

INAKUSAHAN ni Pangulong  Rodrigo  Roa Duterte ang University of the Philippines (UP) ng pagre-recruit ng mga kabataan para isama sa grupong komunista.

Ang pahayag na ito ng Pangulo ay reaksyon sa panawagan na  academic strike ng mga estudyante ng  Ateneo de Manila University (ADMU).

“‘Yung mga eskwelahan, UP, fine. Maghinto kayo ng aral, I will stop the funding. Wala nang ginawa itong ano kundi mag-recruit ng mga komunista diyan,” ang pahayag ng Pangulo sa kanyang public address, Martes ng gabi.

Gayunman, ang  mga  Ateneans at hindi ang mga  UP students ang nanguna na manawagan ng academic strike bilang pagprotesta sa  “criminally neglectful” ng pamahalaan pagdating sa typhoon at pandemic response.

Sa kalatas ng grupo ng mga estudyante sa ADMU ay nakasaad dito na  nangangako silang  iwi-withhold ang pagsusumite ng kahit na anumang school requirements simula kahapon Miyerkules, Nobyembre 18.

“You are taking the cudgels of the poor ahead of your time. That is not your worry, that is the worry of government,” ayon sa Pangulo.

“I suggest to you, stop schooling until mabakunahan lahat ng Pilipino. You resume your duty and you wait for another typhoon and see if the help that we extend is enough to your satisfaction,” dagdag na pahayag ng Chief Executive.

Pinabulaanan naman ng UP Los Baños, ang  “propaganda” video na nagdadawit sa kanilang mga estudyante sa communist organizations. (Daris Jose)